Ida luba gayara lan wíchugun adundehani le buiti?

1. Kátaña lúnbaña híchugun adundehani houn amu, ani ka uagu?

AÑAHEIN gürigia ménrengunti houn híchugun adundehani houn amu, añahein hagía manigitiña lun híchugun adundehani. Meberesenga anhein ganigi wabéi odi manigi wamá lun wíchugun adundehani houn amu, lachülürüba dan lun wadügüni. Ka uagu? Ladüga ariñaga lan Hesusu hasubudirúaba lan lani disipulugu ladüga hínsiñegua hamá hámagua (Huan 13:35). Arufuda wamuti hínsiñe hamá wíbirigu woun dan le wíchugun adundehani houn dan le hemegeiruni. Ariñagatu Lererun Bungiu ítara liña lan “leweridihan umadaü” kei “ibiñein buiti, lun tagundaarun anigi”, lúmati “lun tabimedun uani” (Ari. 27:9).

2. Ka lunbei hasubudiruni wéiyaaña lidan afiñeni, ani ka uagu? (Ariha huméi giñe rekuáduru “Ida luba lichugún adundehani lidan adamuridaguni le labadinaguabei dimaasu?”).

² Wéiyaaña lidan afiñeni hagíatima lunbei hasubudiruni ida luba lan híchugun adundehani houn amu, ladüga ligía dasi le líchugubei Heowá luma Hesusu houn lun harihin hau lílana damuriguaü (1 Fe. 5:​2, 3). Gúnfulitiña lau dasi le dan le hayusurunu Bíbülia lun híchugun yanu luma adundehani houn lílana damuriguaü luma dan le híchugun adundehani lun kada aban hádangiñe lubúeingu Bungiu, íbini ha adisedubaña lídangiñe damuriguaü. Ida luba gayara lan wíchugun, dandu wagía kei wéiyaaña lidan afiñeni, adundehani buiti dan le mégeiwa lan?

3. a) Ida luba wafurendeirun íchiga adundehani le buiti? (Isaíasi 9:6; ariha huméi giñe rekuáduru “Falá waméi ligaburi ladundehan Hesusu dan le wíchugun adundehani”). b) Kaba wariha lidan aturiahani le?

³ Gayaraati wafurendeirun saragu katei luagu ida luba lan wíchugun adundehani buiti lau wetenirun lun ida liña lan híchugun fiu gürigia ha iridúbaña tidan Bíbülia adundehani. Lau sun lira, Hesusu íchugubalin hénpulu le buídutimabei woun. Kei hénpulu, watu Lererun Bungiu lun Hesusu “Garíawaseti” lugundun buidu burí lan adundehani le líchugubei (aliiha huméi Isaíasi 9:6). Lidan aturiahani le, warihiba ka lan lunbei wadügüni dan le lamuriahóun adundehani wama lúmati dan le mosu lan wíchugun adundehani dan le mamuriahóun lan wama. Warihibei giñe súdini lan wíchugun adundehani lidan dan le buídutimabei luma lau lubuidun igaburi.

DAN LE LAMURIAHAN ABAN GÜRIGIA ADUNDEHANI WAMA

4, 5. Ka lunbei wálügüdagun woungua dan le lamuriahóun adundehani wama? Ru humá aban hénpulu.

⁴ Kaba hamuga furumiñeti katei wadüga dan le lamuriahan aban gürigia adundehani wama? Másiñati aba lan wasandirun ugundani ani busentiwa wariñaguni lun gürigia ligía kaba lan ladüga lau lóufudagun. Lau sun lira, buídubei wálügüdagun woungua furumiñe: “Subuditi san luáguti katei le nun buidu, lun gayara lan níchugun aban adundehani buiti lun?”. Anihein dan, buídutimabei wáluahan kaba lan íchigei adundehani le buídutimabei lun.

⁵ Samina wamá anihein lan aban wamada lau aban sandi. Ábanti weyu, aba lariñagun woun lakutihaña lan luagu aban agaranihani lun sandi le luágubei, ábati lálügüdüniwa ka lan buídutimabei lídangiñe. Másiñati subudi wamani kaba lan hamuga agaranihani wanúadira. Lau sun lira, anhein mama wabéi surusia ani ibidiñeti luáguti láranina sandi ligía woun, buídutimabei hamuga láluahan wamada aban surusia le subudihabúti lun lisandi.

6. Ka uagu buídubei lubéi lun wagurabahan murusun lubaragiñe wíchugun somu adundehani?

⁶ Anihein dan gayaraati wasaminarun subudi lan luáguti le gádanbalin gürigia woun buidu buidu darí lun gayara lan wíchugun aban adundehani lun. Íbini ítara, buídubei lun wagurabahan murusun lubá wíchugun somu adundehani lun. Ka uagu? Lugundun ariñagatu Bíbülia lidan Ariñawagúni 15:28 gürigia lan ha richaguabaña “samina hamuti kaba lan hóunaba”. Íbini subudi wamani kaba lan adundehani wíchiga, buídubei wadireirun dan lun wakutihan libügürü, wafurieidun ani ráramagua wagíame asaminara luagu le lunbei wariñaguni. Ítara, úarabei adundehani le lunbei wíchuguni luma ligaburi larihini Heowá katei. Ariha waméi le asuseredubei lun profeta Natán.

7. Ka larufudahabei lani Natán hénpulu woun?

⁷ Dan meha le lariñagubei urúei Dawidi lun profeta Natán busén lan lábunagun aban ténpulu lun Heowá, lau lóufudagun aba lariñagun profeta lun buidu lan le lasaminarubei ladügün. Gama lumoun, mabusenrunti buga Heowá Dawídiba lan ábunaguoun ténpulu to. Mosu hamuga meha lálügüdüni Natán Heowá lubaragiñe lariñaguni le lasaminarubei (1 Kro. 17:​1-4). Arufudahati sügǘ le woun dan lan le lamuriahan somu gürigia adundehani wama, buídubei lun ‘hámaru wamá lun wadimurehan’ (Sant. 1:19).

8. Ka amu katei lunbei gabaroun wamani dan le wíchugun adundehani?

⁸ Gabaroun waméi ábanya katei le lunbei wóunigiruni dan le wíchugun adundehani houn amu: ánhaña lan adügei le wariñagubei houn, gayaraabei lanügün katei ligía wuribani houn, ani gayaraati ladügün le lun gadurun wamá lidan. Ligía mosu lubéi wasaminaruni buidu buidu lubaragiñe wíchugun somu adundehani lun aban gürigia.

DAN LE LUNTI LAN WÍCHUGUN ADUNDEHANI DAN LE MAMURIAHÓUN LAN WAMA

9. Ka lunbei hachoururuni wéiyaaña lidan afiñeni lubaragiñe hererehan lun aban íbiri? (Gal. 6:1).

⁹ Anihein dan, mosu hóufudahan wéiyaaña lidan afiñeni eweridirei aban íbiri le ábürühamemeli “lidoun figóu”, kei lariñaguni Galasiana 6:1 (aliiha huméi). Dan le wuriba lan le lanúadirubei aban gürigia, gayaraabei lanügüni lira lun léiguadun lidoun aban figóu le wéiriti. Le habusenrubei wéiyaaña lidan afiñeni habihin, híderaguni íbiri ligía lun lasigirun luéigiñe üma le anügübei lidoun ibagari magumuchaditi (Sant. 5:​19, 20). Le lunbei hachoururuni wéiyaaña lidan afiñeni, anhein inarüni lubéi léiguaduña lan íbiri le lidoun figóu, hadügünbalin ítara lugundun gabaroun hamuti giñe anihein lan katei ladügün gürigia úati wuriba lan ligibugiñe lagu Heowá (Rom. 14:​1-4). Ánheinti chouru hamaali lubéi wéiyaaña lidan afiñeni adügaali lan íbiri somu katei wuribati, ida luba hererehan lun lau aban igaburi buiti?

10-12. Ka lunbei hadügüni wéiyaaña lidan afiñeni dan le lunti lan hererehan lun somu íbiri le mamuriahan lumuti ererehóuni ligía hama? Ru humá aban hénpulu (ariha huméi giñe dibuhu tuma iyawaü).

¹⁰ Mama aban katei ménrengunti houn wéiyaaña lidan afiñeni hererehan lun aban gürigia le mamuriahan lumuti ererehóuni ligía hama. Ka uagu? Lugundun ariñagati apostolu Pábulu gayara lan lachararun aban gürigia míchugunga ligía fe. Ligíati, lubaragiñe hererehan wéiyaaña lidan afiñeni lun aban gürigia, mosu hadügün saragu katei lun ménrengun lan lun gürigia ligía lánharun lun ererehóuni.

¹¹ Aningirán aban hénpulu. Lubaragiñe lábunun gürigia aban nadü, furumiñe, mosu lagarabahani múa lun ñulú lan ani lun ménrengun lan táhüchün nadü. Lárigiñe lábununu nadü, mosu láturagunu. Ítarameme, lubaragiñe hererehan wéiyaaña lidan afiñeni lun aban gürigia, mosu haranserun buidu. Ítara, ménrengunbei lun íbiri lánharun lun hererehan wéiyaaña lidan afiñeni anhein subudiwa habéi keisi gürigia hínsiñehabutiña ani buidu ligía hóuseruniña amu. Ligíati, lubaragiñe hañuurun wéiyaaña lidan afiñeni ayanuha luma, gayarati hariñagun lun ladüga lan hínsiñe lan houn ani berese hagía lau, ligía busén habéi hayanuhan luma luagu ítaga katei.

¹² Sun añahan lan wéiyaaña lidan afiñeni ayanuha luma gürigia le achararubei, gayaraati haritaguagüdüni lun sun lan wagía charatiwa ani anihein lan dan megei wamá lun lererehóuniwa woun (Rom. 3:23). Lau saragu ínsiñeni luma inebesei, gayaraabei harufuduni lun tau Bíbülia halía lan lacharara. Ábameti hafuranguagüdüni wéiyaaña lidan afiñeni lun lau aban igaburi le ménrengunti ka lan lunbei ladügüni lun lasansiruni ligaburi. Lagumuhóun, ábame hariñagun lun íbiri le buidu lan ladüga lau asansiruni le ladügübei. Ani lárigiñe, ábame hafurieidun luma (Sant. 5:15).

13. Ka gayaraabei hadügüni wéiyaaña lidan afiñeni lun hachoururuni gunfuranda lani íbiri adundehani le ichugúbei lun?

¹³ Anihein dan, amu lan gunfuranda lani íbiri le unbei lererehóua le hariñagubei wéiyaaña lidan afiñeni lun. Kati lunbei hadügüni wéiyaaña lidan afiñeni lun masuseredun lan lira? Gayaraati hadügün álügüdahani lau inebesei lun íbiri ligía lun hachoururuni anhein gunfuranda lubalin adundehani le ichugúbei lun ani subudilei kaba lan ladüga (Apur. 12:11).

LIDAN DAN LE BUÍDUBEI LUMA LIDAN IGABURI LE BUÍDUBEI

14. Ka uagu moun lumuti lubéi wíchugun adundehani dan le gañi wamá?

¹⁴ Keiti sun lan wagía charatiwa, anihein dan wariñaguba dimurei le adügüti lun hagañidun amu (Kol. 3:13). Ariñagatu Bíbülia anihein burí lan dan wagañidun wámagua (Efe. 4:26). Lúntiti wárügüdagun woungua lun míchugun wamá adundehani dan le gañi wamá. Ka uagu? “Lugundun gürigia le gáñibei, madügün lumuti le aubei lagundaara Bungiu” (Sant. 1:20). Ánhawa íchiga adundehani gáñiñu waña, chóuruti gayarabei lan ladügün katei le lun lawosudun katei. Úati mini lan le mariñagun wabéi lan lun gürigia le achararubei woun ida liña lan wasandiragun woungua. Lunti wagurabaha darangilu wamá lun gayaraabei lan wariñaguni ida liña lan wasandiragun woungua. Ariha waméi ka lan gayaraabei wafurendeirun lúmagiñe Eliú, wügüri le meha ererehabei lun Hobu.

15. Ka wafurendeirubei lídangiñe ligaburi lererehan Eliú lun Hobu? (Ariha huméi giñe dibuhu).

¹⁵ Saraguñein weyu lau Eliú aganbei le lariñagubei Hobu houn nege lumadagu ha íchugubaña duru luagu. Íbini gudeme lan Hobu lun, aba lagañidun luma ladüga lariñagun Hobu dimurei moun lumuti luagu Heowá dan le aniha lan ayanuha luéigiñegua. Íbini ítara, aguraba lumuti Eliú lichansin lun layanuhan lau darangilaü luma lau inebesei (Hob. 32:2; 33:​1-7). Arufudahati le ladügübei Eliú aban katei súdiniti woun: dan le lan lererehan aban gürigia lunti lan ladügüni lidan dan le buídutimabei luma lau lubuidun igaburi. Mini lan le lunti lan ladügüni lau inebesei luma lau ínsiñeni (Apur. 3:​1, 7).

ARANSEÑU WAMÁ LUN WÍCHUGUN LUMA LUN WERESIBIRUN ADUNDEHANI LE BUITI

16. Ka hafurendeirubei lídangiñe le lariñagubei Sálumu 32:8?

¹⁶ Ariñagati bérusu le ídangiñebei lasagarúa aturiahani le aríagu liña lan Heowá woun dan le líchugun adundehani luma dan le lererehan woun (aliiha huméi Sálumu 32:8). Le mini lubéi bérusu le, dan lan le líchugun Heowá adundehani woun, mama ñein leredera katei, sigiti etenira woun lun líderaguniwa afalarei adundehani ligía. Ma lubuidun igaburi le larufudahabei Wabungiute woun! Áyeiha waméi dan le wíchugun adundehani lun aban gürigia. Mígira waméi katei ítaraguarügü, sigí wamá etenira lun lun wíderaguni, gayara láamuga lafalaruni adundehani le ichugúbei lun.

17. Ka gayarabei wariñagun hawagu wéiyaaña lidan afiñeni ha íchugubaña adundehani furanguti le asagarúbei tídangiñe Bíbülia? (Isaíasi 32:​1, 2).

¹⁷ Lidan lagumuhóun dan le, mégeitimatiwa wíchugun luma weresibirun adundehani le buiti (2 Tim. 3:1). Ítara haña wéiyaaña lidan afiñeni ha íchugubaña adundehani furanguti le tídangiñeti Bíbülia “keisi lísensen duna lidan múa mábeiti” (aliiha huméi Isaíasi 32:​1, 2). Seremei wamutiña umadagu ha ganigibaña lun hariñaguni woun létima wemegeirubei waganbun. Ítara liña adundehani burí le híchugubei woun “kei mansana lautu golu lidan pülata” (Ari. 25:11). Sigiméme wamá áfaagua lun warufuduni lichú aau le wemegeirubei dandu lun wíchugun adundehani le buiti kei lun weresibiruni.