Sigí wamá ageindagua luma luriban ayumahani

1. Ka uma wageindagua súngubei wagía?

AYUMAHAÑAHAADÜN san hadügün somu katei le mínsiñebei lun Heowá? Anhein ítara liña lubéi, másiñati samina humá húnrügüñein lan lasusereda katei le, ligía lábürühanbei harüna. Gama lumoun, ariñagatu Bíbülia: “Masufurirungidün ni aban óuchawaguni le hásiñarun gürigia awanda” (1 Ko. 10:13). Mini lan lira mámarügüñein lan hun lasusereda lira; añahein amu íbirigu ha giñe ageindagubaña luma burí luriban ayumahani. Lidan aünha lan ageindagua luma luriban hayumahan, mabulieida huméi anihein lan Heowá hurugabu lun líderagunün agañeirei ageindaguni le.

2. Ka óuchawaguni úmabei hagagibudagua fiu kristiánugu hama aturiahatiña Bíbülia? (Ariha humóun giñe iyawaü).

² Ariñagatu giñe Bíbülia: “Dan le lachawahani luriban layumahan gürigia, ligía lábürühan lidoun ladügǘn le wuribabei” (Sant. 1:14). Lidan amu dimurei, mama sun gürigia lun hóuchawaguniwa lau ligiaméme óuchawaguni. Kei hénpulu, añahein fiu kristiánugu hama burí aturiahatiña Bíbülia másiñati ayumaha hamá hadügün katei wíyeti lánina agamariduni, kéiburi larounrun wügüri tuma würi mamarieidunga, larounrun wügüri luma wügüri líledi o tarounrun würi tuma würi tíledi. Añahein amu ígira hamaali haríagun iyawaü o bidéu lánina magíaguni, lau sun lira, ayumahatiña lunya haríagunu. Añahein hagía ayumahatiña lunya hayusurun düroga o lunya hátagun. Meberesenga ka lan luriban ayumahani úmabei wagagibudagua, chóuruti sandigua wamá woungua kei meha lasandiragun apostolu Pábulu lungua, le ariñagubei: “Dan […] le busén nan nadügüni le buídubei, wuribatirügüñein […] nadüga” (Rom. 7:21).

3. Ka gayaraabei lasaminarun aban gürigia le ageindagubei luma luriban ayumahani?

³ Anhein hageindaguña lubéi luma luriban ayumahani, másiñati sandigua humá hungua mabafu humá lun hagidaruni luriban ayumahani ligía lídangiñe hichügü, ábati hasaminarun magundanbei lan Heowá hau ladügarügü aünha lan ageindagua luma luriban ayumahani ligía. Mítaranti! Lun warihini ka lan uéigiñe wariñagei lira, lidan aturiahani le wóunabuba bián álügüdahani: 1) Ka busenbei lun wasandiragun woungua ítara? 2) Ida luba wagañeiruni luriban wayumahan?

LE LABUSENRUBEI MAFIA LUN WASAMINARUN

4. a) Ka labusenrubei Mafia lun wasaminarun? b) Ka uagu chouru wabalin gabafu wamá lun wageindagun luma luriban ayumahani?

⁴ Busenti Satanási lun wasaminarun mabafu wamá lun wamahadun lun óuchawaguni le úmabei wagagibudagua. Ligía larufudahanbei Hesusu woun lun wamuriahan luma Heowá: “Mígira bawa lun wábürühan lidoun óuchawaguni, dísegüdarügü bawa luéi” Mafia (Mat. 6:13). Ariñagati Satanási maganbadibaña lan gürigia lun Heowá ánhaña lan agagibudagua luma óuchawaguni (Hob. 2:4, 5). Ka uagu lariñagei Mafia lira? Lariñagubei ítara ladüga samina lan ítara waña lan kei ligía. Ladüga ligía furumiñetibei éiguada lidoun le layumahabei, ábati maganbadi lan lun Bungiu. Ani mámarügüñein le lasaminara: saminati yebe giñe luagu léiguaduba lan Liráü Bungiu, wügüri le mafigounbei, lidoun ladügǘniwa le wuribabei! (Mat. 4:8, 9). Linarün funa san Mafia mabafu wamá lun wageindagun luma luriban ayumahani? Liyeeni! Chóuruti gabafu wamá lun wageindagun luma luriban ayumahani, kei lariñaguni apostolu Pábulu: “Úati cátei jénreenguti nun ladǘga lídaañadina ában lúma Crístu le íchugubei ubáfu nun” (Fili. 4:13, Lerérun Búngiu to lánina Iséri Darádu).

5. Ida liña wasubudiruni chouru lani Heowá gayara lan wagañeiruni luriban ayumahani?

⁵ Mítaranti Heowá kei Mafia: chouru lumuti Heowá buidu buidu gayara lan wageindagun luma luriban ayumahani. Ida liña wasubudiruni? Lugundun ariñagati Heowá hásügürüba lan saragu gürigia ha úaraguatiña lídangiñe saragu asufuriruni. Gunfuranda humuti san le mini lubéi le? Meyeehanti Heowá, ligía guánarügü ariñagubei hásügürüba lan saragu gürigia lidoun iseri ubóu. Ariñagatu Bíbülia ‘harú tan hadaüragun’ gürigia ha, mini lan lira, harumañu haña lan ligibugiñe lagu Heowá (Aruf. 7:9, 13, 14). Furanguti subudi lan lun Heowá gabafu wamá lun wageindagun luma luriban ayumahani.

6, 7. Ka ámuya katei labusenrunbei Mafia lun wasaminarun?

⁶ Luagu le aban oubaü, busenti giñe Satanási lun wafiñerun láurügü lan ñein lan luriban ayumahani lidan wasaminan siñabei lan lagundaarun Heowá wau ni lun wibihin ibagari magumuchaditi. Bulíeiguati Satanási! Lugundun ligía memeniginbei, ladüga siadi laali Heowá ani siñabei lawinwandun lun súnwandan (Agu. 3:15; Aruf. 20:10). Kei memenigin lubéi, gimugati woun ani busenti lun wasandiragun woungua kei ligía. Gama lumoun, chóurugüda tumuti Bíbülia woun busén lan Heowá líderaguniwa lun lagundaarun wau luma lun wawinwandun lun súnwandan. Ligía tariñagubei Bíbülia: “Mabusenrunti lun leferidirun ni aban hádangiñe; labusenrun lun hasakürihan sun gürigia” (2 Fe. 3:9). Mítaranti wakesin kei likesin Mafia, lugundun wagía, hemenigitiwa!

⁷ Kei le aubei warihei, ánhawa asaminara mabafu wamá lun wageindagun luma luriban ayumahani o wafiñerun memenigin wamá, wasaminaruña kei labusenruni Satanási. Líderagubadiwa gabaroun wamani katei le lun mígiraguagüdün wamá woungua lun Mafia (1 Fe. 5:8, 9).

LE WASANDIRUBEI LADÜGA GAFIGOUN WAMÁ

8. Ka ámuya katei adügübei lun wasaminarun mabafu wamá lun wageindagun luma luriban ayumahani o wasaminarun magundan lan Heowá wau? (Sálumu 51:5; ariha huméi giñe “Ariñahani súdiniti”).

⁸ Amu luéi Satanási, anihein amu katei le adügübei lun wasaminarun mabafu wamá lun wageindagun luma luriban ayumahani o lun wasaminarun magundan lan Heowá wau. Ka uagu wayanuha? Wayanuhaña luagu figóu le galagante wabéi lúmagiñe Adán tuma Ewa (Hob. 14:4; aliiha huméi Sálumu 51:5).a

9, 10. a) Ida liña meha lasandiragun Adán tuma Ewa houngua dan le hafigouhanbei? (Ariha huméi giñe dibuhu). b) Ida liña wasandiragun woungua ladüga figóu le wádanbei?

⁹ Samina wamá ida liña lan lasandiragun Adán tuma Ewa houngua lárigiñebei hafigouhan. Lárigiñe maganbadi hamá lun Heowá, aba haramudagun ani lárigiñe aba houchun lun hadouragun lau hágubu. Ka uagu hadügei lira? Ariñagatu líburu Perspicacia para comprender las Escrituras: “Adügati figóu le hádanbei lun hasandirun duru, idiheri, machouruni luma busiganu”. Ítara liña le kamá hamuga tídanñanu aban muna to geleinñu tiña hau ani siñati háfuridun. Mini lan le, siñahali lan buga gamadagua lan Adán tuma Ewa luma Bungiu. Íbini háfaagun lun gamadaguaya hamá luma, siñahali, lugundun hasandiramémeba duru, idiheri, machouruni luma busiganu ladüga gafigoun hamá.

¹⁰ Mítaranti wakesin kei likesin Adán tuma Ewa, lugundun hemenigitiwa. Óunaha laali Heowá Liráü esefurawa lun ferudunawa lan wafigoun luma lun gamadagua wamá luma Bungiu (1 Ko. 6:11). Íbini ítara, kei galagante wamani figóu, maweiriduntu wanigi lau giñe wasandirun duru, idiheri, machouruni luma busiganu. Ligíati, ariñagatu Bíbülia gabafumémegili lan figóu hawagu sun gürigia, íbini hawagu ha áfaagubaña lun mafigouhan hamá (Rom. 5:14). Moun lumuti wígirun lun ladügün lira lun wasaminarun mabafubadiwa lan lun wadügüni le buídubei, ni lun wasaminarun magundanbei lan Heowá wau. Kaba íderaguawa lun wagidaruni saminaü mabuidunti le wawariua?

11. Anhein mabafu wabéi lun wageindagun luma luriban ayumahani, ida luba líderaguniwa Rómana 6:12?

¹¹ Anihein dan, ítara liña figóu le wádanbei kamá hamuga aban umalali le ariñagubei: “Siñabei bageindagun luma luriban ayumahani le lídanbei bisaminan, mabafubadibu lun basagaruni lídangiñe bichügü”. Madüga wamá gasu lau umalali le! Haritagua waméi ariñaga tan Bíbülia moun lumuti lan wígirun lun gabafu lan figóu luagu wágubu (aliiha huméi Rómana 6:12). Mini lan lira gabafu wamá lun méiguadun wamá lidoun ladügǘn wuribani le wayumahabei (Gal. 5:16). Subudi lumuti Heowá gabafu wamá lun méiguadun wamá lidoun óuchawaguni. Lun hamuga mabafu wamá lun wadügüni, mamuriahan lumuti hamuga wama (2 Lur. 30:11-14; Rom. 6:6; 1 Tesa. 4:3). Ítara liña, gabafutiwa lun wagañeiruni ageindaguni luma luriban ayumahani.

12. Ka lunbei wadügüni ánhawa asandira magundan lan Heowá wau, ani ka uagu?

¹² Anihein dan waganbuni lumalali figóu le wádanbei ariñaga: “Kei le anihein lubéi luriban ayumahani le buagu, magundanbei Heowá bau”. Madüga wamá gasu lau! Haritagua waméi ariñaga tan Bíbülia gunfuranda lani Heowá buidu buidu lau lan figóu wagüriahóua (Sal. 103:13, 14). Kei “subudi lan sun katei lun” Heowá, subudi lumuti gayara lan ladügün figóu le wádanbei lun liábingua luriban saminaü wachügüwagun (1 Huan 3:19, 20). Íbini wageindaguña lan luma luriban ayumahani, harumamémebadiwa ligibugiñe lagu Heowá ánhawa áfaagua lun mígiraguagüdün wamá woungua lun luriban wayumahan. Ka uagu chouru wabalin lira?

13, 14. Ida liña wasubudiruni gunda lan Heowá wau íbini wageindaguña lan luma luriban ayumahani?

¹³ Ariñagatu Bíbülia mama lan ligiaméme wayumahan aban katei lumoun wadügüni. Mama súnwandan lun gabafu wamá lun mayumahan wamá katei wuribati, anati le wadügübei, gabafutiwa luagu. Kei hénpulu, añahein meha hádangiñe korintuna lubaragiñe hadügagun houngua kristiánugume, héchutiña meha wügüriña hagamaridun wügüriña háledigu. Ariñagati meha apostolu Pábulu: “Añahein hídangiñe, ítara hiña meha”. Mini lan san le aba lan meha lagidarún luriban ayumahani le hawéi? Siñati wasaminarun ítara, lugundun libe-agei dan hénrenguti lagidarún luriban ayumahani hachügüwagugiñe ha gagaburibalin igaburi le. Ánhañati kristiánugu ha meha árügüdagubaña houngua luéi hadügüni katei wuribati le hayumahabei, ‘chibawaali meha hafigoun’ ani gúndaahali meha Heowá hau (1 Ko. 6:9-11). Gayaraati lariñawagúniwa ligiaméme huagu.

¹⁴ Meberesenga luriban ayumahani le úmabei hageindagua, chouru huméi gayara lan hagañeiruni. Lau sun siñá lan hagidaruni luriban ayumahani le lídangiñe hichügü sunsuinagubei, gayaraati hárügüdagun hungua lun mafalarun humani ‘lagübüri haritagun’ (Efe. 2:3). Ligíati, ida luba hagañeiruni luriban hayumahan? Ariha waméi.

KABA ÍDERAGUAWA AGAÑEIREI AGEINDAGUNI LUMA LURIBAN AYUMAHANI?

15. Anhein busén wabéi wagañeiruni luriban ayumahani, ka uagu moun lumuti lubéi weyeedagun woungua?

¹⁵ Furumiñeti katei le gayaraabei hadügüni lun hagañeiruni luriban ayumahani, hasubudiruni ka lan hidebilinbei. Góunigigua humá hungua luéi ‘heyeedagun hungua’ (Sant. 1:22). Kei hénpulu, másiñati añahein lan asaminarutiña ítara: “Añahein gátaatimatiña sügǘ nau, anhein au, murusunrügüñein natun”. O añahein ariñagutiña: “Lun hamuga arufuda tan nani weiriou saragu ínsiñeni nun, maríagutina hamuga iyawaü o bidéu lánina magíaguni”. Gama lumoun, le asaminarubei ítara, marihin lumuti luagu weiri lan liturobulin, adügarügüti lun ménrengun lan lun léiguadun lidoun óuchawaguni. Ligíati, míchiga humá duru hawagu amu nírügü lidan hisaminan. Lugundun gürigia guánarügü gadurunbei luagu le ladügübei (Gal. 6:7).

16. Ka gayaraabei hadügüni lun haranserun lun hadügüni le buídubei?

¹⁶ Amu luéi meyeedagun wamá woungua, lunti aranseñu wamá lun wadügüni le buídubei (1 Ko. 9:26, 27; 1 Tesa. 4:4; 1 Fe. 1:15, 16). Samina humá luagu katei le gayaraabei ladügün lun héiguadun lidoun óuchawaguni. Másiñati ménrengunbei lan woun wéiguadun lidoun óuchawaguni guñoun o dan le buchá lan wawagu. Samina huméi kaba lan hadüga danme le hagagibudagun luma óuchawaguni ani asayaha huméi lidan hisaminan ida luba lan hamahadun lun. Kei le aubei warihei, aban katei le lunbei líderaguniwa ageindagua luma óuchawaguni, waranserun lubaragiñe lasuseredun (Ari. 22:3).

17. Ka wafurendeirubei lúmagiñe Hosé? (Agumesehani 39:7-9; ariha humóun giñe iyawaü luma dibuhu).

¹⁷ Samina wamá ida liña lan meha lóunabun Hosé dan le tálugunbei lani Potifárü weiriou lun larounrun tuma, aba lariñagun tun lau lóufudagun uá lan (aliiha huméi Agumesehani 39:7-9). Arufudati ligaburi lóunabun aranseñu liña lan meha lun ladügüni le buídubei lubaragiñe lagagibudagun luma óuchawaguni le. Subudi laali meha wuriba lan larounrun aban wügüri tuma lani amu wügüri weiriou. Ka gayaraabei wafurendeirun lúmagiñe Hosé? Buídubei wadüga ánhawa aransera lubaragiñe wagagibudagun luma óuchawaguni. Ligíati, danme le wagagibudagun luma óuchawaguni, ménrengubei woun wamahadun lun, lugundun subudi wamaali kaba lan wadüga.

“HÓUCHAGUA HUMÁ HUNGUA”

18. Ka ámuya katei megei wabéi lun gayaraabei lan lagañeirúniwa luriban ayumahani? (2 Korintuna 13:5).

¹⁸ Lun gayara lan hagañeiruni luriban ayumahani, lunti giñe hóuchagun hungua gabügürügua (aliiha huméi 2 Korintuna 13:5). Ladügüba lira lun gayaraabei lan hasansiruni ligaburi hisaminan o le lunbei hadügüni danme le hagagibudagun luma óuchawaguni. Kei hénpulu, lárigiñe hagagibudagun luma aban óuchawaguni, álügüdagua humá hungua: “Lau san lóufudagun namahara lun?”. Anhein mama lubéi lau lóufudagun hamahara lun, mábürühala harüna. Gama lumoun, áfaagua humá lun furesetimabei lan hamahadun lun dánmeya le hagagibudagun luma óuchawaguni. Álügüdagua humá hungua: “Gayaraati san nasagaruni luriban saminaü le lídangiñe nichügü lau lóufudagun? Ladügüña san isebáhari le nanúadirubei lun hénrengutima lan nun nawanduni óuchawaguni? Direi numuti san narihin lau lóufudagun dan burí le táfuridun iyawaü lánina magíaguni? Furanguti san nun súnwandan lan buidu lan gaganbadi nan lun burí lilurudun Heowá, íbini anihein lan dan hénrengu lan nun narufudun ragüguaü unguaü?” (Sal. 101:3).

19. Ka uagu súdini lubéi lun buidu lan wanúadirun lidan katei ñǘbüriti?

¹⁹ Haritagua waméi giñe úati lan “ni kata geyeedaguaditi ani salufuri kei hanigi gürigia” (Her. 17:9). Ariñagati Hesusu: “Tídangiñe anigi láfurida saminaü wuribati” (Mat. 15:19). Kei hénpulu, gayaraati labulieidagun aban gürigia le ígira láalibei laríagun iyawaü o bidéu lánina magíaguni asaminara gayara lan laríagun iyawaü o bidéu le mabuidunti, ladügarügü máfuridun hamá gürigia surusu ñein. O háfuga lariñagun lúnguarügü: “Mama katei wuribati nasaminarun nadügüña lan katei wíyeti, madügünrügü naali ligía”. Larufuduña ligaburi saminaü le laranseruña lan lun ‘líchugun ugundani lun luriban layumahan’ (Rom. 13:14). Ka gayaraabei hadügüni lun méiguadun humá tidoun sádara to? Haritagua huméi dan lan le wuriba lan le hanúadirubei lidan katei le genegeti hun ñǘbüri lan, gayaraati ladügün lun giñe hanúadirun wuriba lidan katei le sériuti.b Maha humá lun saminaü mabuidunti le gayaraabei ladügün lun heyeedagun hungua lun hadügün katei wuribati.

20. Ka wemeniginbei lubá ámuñegü, ani ka ídemuei wámabei uguñe weyu?

²⁰ Kei le aubei warihei, ru lumuti Heowá erei le wemegeirubei woun lun gayaraabei lan wageindagun luma óuchawaguni. Lanwoun lira, seremei lebegi esefuruni hemenigi wabéi lun wawinwandun lun súnwandan lídanme iseri ubóu. Maame wagundan weseriwidun lun Heowá mageindagunga luma luriban wayumahan! Sun awanha lan agurabahei weyu ligía, haritagua waméi ánhawa lan áfaagua lun wagagibudagun luma óuchawaguni, labinirubadiwa lan Heowá ani íderagua láwame agañeira.