Íderagua wamaña lau lóufudagun ha “lúntiñabaña ibagari le magumuchaditi”

1. Ida liña hóunabun gürigia dan le wapurichihan houn? (Adügaü 13:​47, 48; 16:​14, 15).

LIDAN furumiñeti sígulu, gíbetiña meha gürigia ánharutiña lun inarüni dan le lapurichihóunbei uganu buiti houn (aliiha huméi Adügaü 13:​47, 48; 16:​14, 15). Uguñe weyu, añahein giñe gürigia ánharutiña lun uganu buiti lúmagiñe haganbuni luagu furumiñeti wéiyaasu. Añahein amu mabusenrúntiña haganbuni uganu buiti furumiñe ani lau lásügürün dan aba busén hamá hasubudirun luagu Bungiu. Kati lunbei wadügüni dan le wadarirun gürigia lidan apurichihani “ha lúntiñabaña ibagari le magumuchaditi”?

2. Ka uagu gayara lubéi wariñagun ítara liña lan apurichihani kei lounigirúniwa aban ichari?

² Gayaraati wariñagun ítara liña lan apurichihani kei lounigirúniwa aban ichari. Dan le anihein lan aban ábunaguti ábunaguei linadürigu, háfuga larihin amu nadü gínhali ani gayaraahali lalubahóun, ábati lidin alubahei lau lóufudagun. Ítarameme, dan le wíderaguniña gürigia lun gunfuranda hamani lebegi arufudahani le tídanbei Bíbülia háfuga wadariruniña gürigia ha aranseeña lun hánharun lun uganu buiti, ábati wadügüni sun wayaraati lun wíderaguniña lau lóufudagun (Huan 4:​35, 36). Ánhawa etenira lun le geyegubei wau, gayaraabei wasubudiruniña bián hawuyeri gürigia ha, ani wasubudirubei ida luba lan wíderaguniña kada aban hádangiñe. Lidan aturiahani le, warihibei ka lan gayaraabei wadügüni dan le warihin aranseeña lan gürigia lun hánharun lun uganu buiti dan le wayanuhan hama luagu furumiñeti wéiyaasu. Wayanuhaba giñe luagu ka lan gayaraabei wadügüni lun wíderaguniña awansera.

DAN LE BUSÉN HAMÁ GÜRIGIA HAGANBUNI UGANU BUITI

3. Ka gayaraabei wadügüni ánhawa adarira aban gürigia lidan apurichihani le busenbei laganbuni uganu buiti? (1 Korintuna 9:26).

³ Dan le wadariruniña gürigia lidan apurichihani ha busentiña haganbuni uganu buiti, busentiwa wíderaguniña lau lóufudagun lun hagumeserun éibuga lidan lémeri ibagari. Mama mosu wagurabahan: lidan furumiñeti wayanuhan hama gayaraati wálügüdüniña anhein busén habéi haturiahanu Bíbülia ani agunbiraha wamañame lidoun adamuridaguni (aliiha huméi 1 Korintuna 9:26).

4. Ka sügǘ arufudubei añahein lan gürigia ánhatiña haturiahanu Bíbülia lúmagiñe furumiñeti wéiyaasu wayanuhan hama?

⁴ Álügüda wamaña anhein busén habéi haturiahanu Bíbülia. Añahein gürigia ánharutiña lun haturiahanu Bíbülia lúmagiñe furumiñeti wayanuhan hama. Ariha waméi le asuseredubei Kanadá. Aban weyu luagu-gádürü, aba tayarafadun aban würi nibureintu lun tarufudaagüle agumeiraguagüdüni ani aba tárügüdünu garüdia Winwan humá lau ugundani. Aba tariñagun íbiri tuguya tun yusua tan garüdia to lun lichugún aturiahani tídangiñeti Bíbülia mafayeihanga. Aba tariñagun würi tuguya tun íbiri, hínsiñeti lan hamuga tun taturiahanu Bíbülia, ítara liñati aba tígiruni linumerun tigagamurun tun íbiri. Weyuméme ligía aba tabürühan würi tuguya tun íbiri aba tálügüdünu luagu aturiahani. Aba tariñagun íbiri tuguya tun gayara lan haturiahan samudi o dimaasu. Ábati tóunabun nibureintu tuguya: “Kati uagu maturiahan wabéi haruga? Ladüga gadaanibadina”. Larugan, aba hagumeseruni aturiahani, ani dimaasuméme ligía ñǘdüntu nibureintu tuguya adamuridagua ani aba tasigirun awansera lau lóufudagun.

5. Ka lunbei gabaroun wamani dan le wálügüdüniña gürigia anhein busén habéi haturiahanu Bíbülia? (Ariha humóun giñe iyawaü).

⁵ Furanguti mítaran hamá sun gürigia kei nibureintu to. Lunti gabaroun wamani aniheinbei lan dan mosu lan wayanuhan luagu somu katei le hínsiñeti houn gürigia lun gayaraabei lan busén hamá haganbuniwa. Íbini ítara, ánhawa akipura aban igaburi le buiti ani arufuda wagía berese wamá hau gürigia, háfuga wagumeserun aban aturiahani lau lóufudagun. Ka gayaraabei wariñaguni lun wadügüni? Ligía álügüdahani le adügǘbei houn saragu íbirigu luma houn prekursorugu ha ménrengunbei houn hagumeserun aturiahani tídangiñeti Bíbülia. Ariha waméi ka lan hóunabubei.

6. Ka gayaraabei wadügüni lun busén hamá gürigia wagiribudun ayanuha hama tuagu Bíbülia?

⁶ Afuranguagüdütiña íbirigu ha anihein lan fulasu le ñein lubéi buídutima lan mayusurun wamá dimurei kei burí “külase” o “aturiahani”. Buídutimati lidin houn dan le hayusurun dimurei kei “ayanuha” o “hasubudirunu Bíbülia buidu”. Lun busén hamá gürigia wagiribudun ayanuha hama, ariñagatiña íbirigu gayara lan wariñagun houn óunaba tan Bíbülia álügüdahani burí le adüga wamaalibei wóuniwagua lidan sun wabagari o mámarügüñein lan tuagu relihión tayanuha Bíbülia, rutu giñe adundehani le huuti. Ani gayaraati giñe wariñagun houn: “Lídanrügü 10 o 15 minutu gayaraati hafurendeirun katei le gayaraabei líderagunün saragu”. Mama mosu wariñagun houn busén wamá wachülürün sagü dimaasu, ítara wadügüba lun madiheridun hamá ni lun hasaminarun wadügüdaruña lan hawagu lun haturiahan.

7. Ida liña híchugun fiu gürigia fe darí hamaali lan inarüni? (1 Korintuna 14:​23-25).

⁷ Agunbiraha wamaña lidoun aban adamuridaguni. Genegeti lidan lan meha lidaani apostolu Pábulu, añahein lan meha gürigia ha íchugutiña fe luagu darí hamaali lan inarüni láurügü houdin lidoun adamuridaguni luagu furumiñeti wéiyaasu (aliiha huméi 1 Korintuna 14:​23-25). Ligiaméme asuseredubei uguñe weyu. Gíbetiña gürigia awanserutiña lau lóufudagun dan le hagumeserun abasiiha lidoun wadamuridagun. Ídabati wagunbirahaña lidoun adamuridaguni? Gayaraati wagunbirahaniña lidoun adamuridaguni le adügǘbei samudi o dimaasu lúmagiñe furumiñeti wéiyaasu wayanuhan hama. Gayaraabei wayusuruni liri yanu le lunbei lichugúniwa samudi o dimaasu ligía, o somu puntu súdiniti tídangiñe Garüdia Awisahatu to lunboun waturiahanu dimaasu ligía. Mama mosu wagurabahan lun wachülürün lidoun arufudahani 10 le tídanbei líburu Winwan humá lau ugundani lun wagunbirahaniña gürigia.

8. Ánhawa agunbiraha gürigia lidoun adamuridaguni, ka gayaraabei wafuranguagüdüni houn? (Isaíasi 54:13).

⁸ Dan le wagunbirahaniña gürigia lidoun wadamuridagun, afuranguagüda waméi houn mítaran lan wadamuridagun kei le adügǘbei tidan amu burí relihión. Lárigiñebei tidin aban aturiahatu luagu furumiñeti wéiyaasu lidoun adamuridaguni le lánina taturiahóun Garüdia Awisahatu, aba tálügüdünu aturiahatu íbiri to íchuguboun aturiahani tun: “Subudi lumuti san le adügübalin álügüdahani hiri sun gürigia ha ñéinbaña?”. Aba tafuranguagüdüni íbiri tuguya tun ítara liña lan damuriguaü kei iduheñu ani áfaagua wamá lun wasubudiruni hiri sun íbirigu. Aba tariñagun aturiahatu tuguya anhein lan tidan tiligilisin ibidiñegua hamá hámagua lau hiri. Háfuga gíbetiña giñe gürigia ibidiñeti lisuuni wadamuridagun houn, ligía buidu lubéi wafuranguagüdüni houn (aliiha huméi Isaíasi 54:13). Damuriguatiwa lun wáhuduragun lun Heowá, lun wafurendeirun luagu luma lun wíchugun dǘgüdaguaü wámagua (Ebü. 2:12; 10:​24, 25). Ligía subudiwa lubéi wadamuridagun luagu lubuidun aransehani le lídanbei luma luagu íderagua lániwa lun wafurendeirun ani madügün wamuti échuni le burí adügǘbei tidan amu burí relihión (1 Ko. 14:40). Kei le wóudiña lubéi tidan Luban Wadamuridagun lun wafurendeirun, áfaaguatiwa lun buidu lan leiti le ñeinbei. Lidan wadamuridagun, masigenehantiwa wámagua ani magúarahan wagía. Lanwoun lira, mádaraguntiwa woungua lidoun polítika ani mayanuhan wagía luagu. Lun hasubudiruni gürigia ka lan gayaraabei hagurabuni lidan wadamuridagun, gayaraati warufuduni bidéu houn le gíribei Ka adügǘbei lidan wadamuridagun?

9, 10. Ánhawa agunbiraha aban gürigia lidoun adamuridaguni, ka gayaraabei wariñaguni houn lun manufudedun hamá lun houdin? (Ariha humóun giñe iyawaü).

⁹ Gíbetiña gürigia hanufudetiña hadamuridagun wama ladüga saminatiña lariñawagúba lan houn mosu lan hadügagun houngua gefentiñame luagu Heowá. Ligíati, chóurugüda huméi houn gürigia resibi wamutiña lan ha mámabaña gefentiña luagu Heowá buidu ani ánhaña lan busén, gayaraati houdin aganbaha ani úabei ni aban ariñaguti houn mosu lan híchugun óunabagülei, mafosurúnbaña giñe lun hadügagun houngua gefentiñame luagu Heowá. Madügǘnti amu adamuridaguni le hounti irahüñü, ligíati gayara lubéi hañuurun agübürigu habu hasaanigu úara lun hafurendeirun. Ítarati, subudi hamuti agübürigu halíañanu lan hasaanigu ani ka lan arufudahóubei houn (2 Lur. 31:12). Mamuriahantiwa seinsu ñein lugundun adüga wamuti le lariñagubei Hesusu: “Mafayeihantün lun hibihini ubafu le, maguburaha humá giñe luagu” (Mat. 10:8). Gayaraati giñe hariñagun houn mama lan mosu hadaürün daüguaü sérutu, lugundun meteniti Bungiu lun ligaburi harihín gürigia, tun anigi letenira (1 Sam. 16:7).

¹⁰ Ánhaña ñüdün gürigia adamuridagua, adüga waméi sun wayaraati lun buidu lan hasandiragun houngua. Gayaraati wanügüniña lun hasubudiruniña wéiyaaña lidan afiñeni hama amu íbirigu. Anhein buidu lubéi hasandiragun houngua ménrenguntimabei hagiribudun. Anhein mabibülian habéi, arufuda waméi bérusu burí houn tidan wabibülian ani ariñaga wameime houn ida liña lan léibugun aturiahani le akutihóubei.

ÁNHAWA AGUMESERA ABAN ATURIAHANI

11. Ida liña warufuduni inebe lan hadaani gürigia woun?

¹¹ Ánhawa agumesera aban aturiahani tídangiñeti Bíbülia, ka burí katei lunbei gabaroun wamani? Súdiniti lun inebe lan hadaani gürigia woun. Ánhawa ariñaga houn gürigia wachülürüba lan ítaga oura gúnfuli waméi wererun, íbini ua lan súdini lan katei le houn gürigia lidan fulasu ligía. Buiti giñe lun málüdün wamá dan le wíchuguni furumiñeti aturiahani. Ariñagatiña fiu íbirigu ha ménrengunbei houn híchugun aturiahani tídangiñeti Bíbülia, lunti lan málüdün wamá íbini busén hamá gürigia hasigirun aturiaha. Ani mayanuhan wamá saragu, ígira wamá lun aturiahatiña lan ayanuha (Ari. 10:19).

12. Ka wabusenrubei wibihin lúmagiñe wagumeserun aban aturiahani?

¹² Dan le wíchugun aturiahani tídangiñeti Bíbülia houn gürigia, le wabusenrubei lúmagiñe wagumeseruni aturiahani lun hasubudiruni gürigia Heowá luma Hesusu ani hínsiñe hagíame houn. Lun wibihini katei le, lunti warufudahani le tariñagubei Bíbülia, mama le wasaminarubei o le wasubudirubei (Adü. 10:​25, 26). Ruti meha apostolu Pábulu aban lubuidun hénpulu woun. Dan le larufudahanbei houn gürigia, ayanuhati meha luagu Hesusu, wügüri le lóunahabei Heowá lun líderaguniwa lun wasubudiruni ani hínsiñe ligíame woun (1 Ko. 2:​1, 2). Ígira lumuti Pábulu furangu súdini lan lun hiderawagún iseri disipulugu lun gagaburi hamani igaburi buíduburiti kei golu o pülata (1 Ko. 3:​11-15). Laganagua igaburi ligía anihein afiñeni, lichú aau, lualin ichügü luma linebenwa Heowá (Sal. 19:​9, 10; Ari. 3:​13-15; 1 Fe. 1:7). Falá waméi lani hénpulu ani íderagua wamaña aturiahatiña lun here lan hafiñen luma lun hadügün aban umadaguaü buiti luma Háguchi hínsiñehabuti le siélubei (2 Ko. 1:24).

13. Ida luba warufuduni gaguraasun wamá ani gunfuranda wamani gádantiña aturiahatiña? (2 Korintuna 10:​4, 5; ariha humóun giñe iyawaü).

¹³ Áyeiha waméi ligaburi larufudahan Hesusu lau gaguraasun wamá ani arufuda wameime gunfuranda wamani le gádanbaliña gürigia. Madüga wamá álügüdahani houn le adügüti lun hasandiragun houngua wuriba. Ánhawa ariha hénrengu lan houn gunfuranda hamá somu puntu, sigí wamá wabaruaguóun ani ábame wagiribudun ayanuha luagu katei ligía amu dan. Ani ánhawa ariha hénrengu lan houn hánharun lun somu arufudahani, mafosura wamaña, ru wamá dan lun lachülürün inarüni tidoun hanigi (Huan 16:12; Kol. 2:​6, 7). Góubaguagüda tumuti Bíbülia arufudahani mama inarüniti luma aban wübü le lunbei lagünrinchawagun (aliiha huméi 2 Korintuna 10:​4, 5). Lun wíderaguniña gürigia ígira aban échuni le lǘhañabaña afiñera luagu, furumiñe mosu wíderaguniña lun harihini Heowá keisi haramudaguagüle (Sal. 91:9).

ÁNHAÑA ÑÜDÜN GÜRIGIA LIDOUN ABAN ADAMURIDAGUNI

14. Ida luba wóuseruniña gürigia ha ñǘdünbaña lidan wadamuridagun?

¹⁴ Busenti Heowá lun wóuseruniña sun gürigia ha ñǘdünbaña lidoun wadamuridagun lau ínsiñeni, meberesenga hechun, halíana hamá, anhein risi habéi o anhein gudeme habéi (Sant. 2:​1-4, 9). Ariha waméi ida luba lan wadügüni.

15, 16. Ka gayaraabei wadügüni lun buidu lan hasandiragun gürigia houngua dan le hachülürün luagu furumiñeti wéiyaasu lidoun wadamuridagun?

¹⁵ Añahein gürigia ñǘdüntiña lidan adamuridaguni lúnrügü harihini ka lan asuseredubei ñein o ladüga hínchahaniña amu gürigia lun houdin. Ligíati, ánhawa ariha iseri gürigia achülüra lidoun adamuridaguni, yarafa wamá houn ani ru wamá lubuidun achülürüni houn. Arufuda wamá gamadóuni ani mafuuda wamá saragu lun masandiragun hamá houngua wuriba. Gayaraati wagunbirahaniña lun hañuurun wama luma lun haliihan wama o gayaraati giñe wibihin aban Bíbülia o aban agumeiraguagüdüni houn. Samina wamá luagu amu katei le gayaraabei wadügüni lun hasandiragun houngua buidu. Kei hénpulu, anihein aban wügüri ñǘdünti tidan Luban Adamuridaguni ani haritagua lágili sandí lan meha murusun busiganu ladüga saminati mabuidun lan lasansiragun weyu ligía. Lun lasandiragun lungua buidu, aba lariñagun íbiri le eresibirubalin lun, lun madiheridun lan ladüga íbini buidu lan wasansiragun wagía gefentiña luagu Heowá, ítara waña kei furumiñeguarügü gürigia. Chülüti dan lun labadiseirun wügüri ligía ani mabulieidun lumuti ligaburi leresibiruni íbiri ligía. Ligíati, íbini busén wamá warufuduni berese wamá hau gürigia ha achülürübaña lidoun wadamuridagun, lunti wóunigiruni ligaburi wayanuhan hama lugundun mabusenrúntiwa webelurun lidoun habagari (1 Fe. 4:15).

¹⁶ Ka amu katei gayaraabei wadügüni lun hasandirun gürigia buidu lan weresibiruniña? Kei hénpulu, lunti inebehabu wamá dan le wayanuhan hawagu gürigia ha mámabaña gefentiña luagu Heowá, kei burí dan le wayanuhan luagu hafiñen, dan le wíchugun óunabagülei o dan le gani wamá fánreinti lidan adamuridaguni. Mariñaga wamá ni kata le gayaraati ladügün lun hasandiragun houngua wuriba o lun mabusenrun hamá hagiribudun (Titu 2:8; 3:2). Kei hénpulu, mama lunti wayanuhan wuriba luagu hafiñen amu. Lunti giñe góunigi hamá íbirigu ha íchugubaña yanu lun mayanuhan hamá wuriba luagu hafiñen amu (2 Ko. 6:3). Ani dan híridun aban dimurei le hayusurubei gefentiña luagu Heowá le ibidiñebei lila houn gürigia ha abasiihabaña adamuridagua, lunti hafuranguagüdüni. Ítara, harufudubei berese hamá hau gürigia.

17. Ka lunbei wadügüni ánhawa adarira gürigia ha “lúntiñabaña ibagari le magumuchaditi”?

¹⁷ Eibu lásügürün dan, súdinitimati apurichihani ani darimemegidiwa gürigia ha “lúntiñabaña ibagari le magumuchaditi” (Adü. 13:48). Ligíati, ánhawa apurichiha lun aban gürigia le ánhati lun uganu buiti, masaminara waméi bián wéiyaasu lun wálügüdüni anhein busén lubéi laturiahanu Bíbülia luma lun wagunbirahani lidoun wadamuridagun. Ítara, wíderagubei gürigia lun lagumeserun éibuga lídangiñe “üma le anügübei [ . . . ] lidoun ibagari le magumuchaditi” (Mat. 7:14).