Álügüdahani le hadügübei aliihatiña
Ariñagati le abürühabalin Ariñawagúni 30:18, 19 úa lan gunfuranda lani “lémeri wügüri tuagu würi”. Ka labusenrubei lariñagun lau dimurei le?
Añahein saragu gürigia álügüdaguatiña houngua ka lan mini lubéi dimurei le, íbini gürigia ha subudihabúbaña tun Bíbülia. Anihán le lariñagubei bérusu le: “Anihein gádürü katei wéiritu nanigi lau ani úati gunfuranda nani. Témeri ágila sielu, témeri hewe luagu dübü, témeri waporu baranaha luma lémeri wügüri tuagu würi” (Ari. 30:18, 19).
Saminatiwa yebe luagu lan katei wuribati layanuhóua dan le lariñawagún “lémeri wügüri tuagu würi”. Ka uagu? Ladüga layanuhaña lan bérusu le lubaragiñebei le luagu anihein lan katei wuribati “makimuledaditi” (Ari 30:15, 16). Ani layanuhaña bérusu 20 tuagu “würi to gagabarahadiboun”, to ariñaguboun luagu madügün tan ni kata wuribati. Ligía yebeti wasaminarunbei anihein lan katei le ídanbei genegegua tan ágila, hewe, waporu luma wügüri hawariuagua: gayara lan hadügün somu katei míchugunga hagía amu fe luagu le hadügübei. Adügati le lun wasaminarun layanuhaña lan dimurei “lémeri wügüri tuagu würi” luagu aban wügüri sumaditi le eyeedubarun aban würi nibureintu lun larounrun tuma míchugunga tuguya fe luagu le labusenrubei ladügün tau.
Gama lumoun, gayaraati wafiñerun layanuhaña lan bérusu le luagu katei buiti. Layanuharügüña abürühati Ariñawagúni luagu katei le adügübei lun taweiridun lanigi.
Arufudati abürüdǘni ebüréu luagu layanuhaña lan Ariñawagúni 30:18 luagu aban katei buiti. Afuranguagüdatu aban dimurei-agei tuáguti Bíbülia luagu dimurei le ásügürawagüdübei kei “úati gunfuranda nani” layanuhaña lan “luagu aban katei wéiriti lubuidun ani hénrenguti gunfurandawa lan” (Theological Lexicon of the Old Testament, de Ernst Jenni y Claus Westermann).
Ariñagati giñe máisturu Crawford Howell Toy, le arufudahabei tidan luban liñun-agei furendei Harvard (Meriga), luagu mama lan layanuhaña bérusu le luagu katei wuribati. Layanuhaña lan le abürühabalin bérusu le luagu katei hanarimeti lubuidun darí lun hénrengu lan lun gunfuranda lani.
Ligíati gayara lubéi wariñagun lau ichouruni layanuhaña lan Ariñawagúni 30:18, 19 luagu katei hanarimeti lubuidun darí lun siñá lan gunfuranda wamani. Ítara kei abürühati Ariñawagúni, wéiritu giñe wanigi dan le warihini ligaburi táhamahan ágila, ligaburi taduruuhan hewe ligibuagu dübü íbini magudi tan, ligaburi tadügüni waporu témeri baranaha, luma ida liña lan tínsiñedun aban würi nibureintu lun aban wügüri nibureinti darí lun hamarieidun ani aba hawinwandun úara lau ugundani.