Mabulieida waméi wafurieidun hawagu amu

1. Ida liña wasubudiruni súdini lan lun Heowá furíei le wadügübei?

ABAN lubuidun idewesei lúmagiñeti Heowá furíei. Samina wamá luagu le: Rúhali Heowá saragu dasi houn ánheligu ani rúhali giñe óunwenbu burí dasi lun Hesusu le Liráü (Sal. 91:11; Mat. 28:18). Lau sun lira, ariñagatu Bíbülia luagu Heowá: “Ladüga aganba bumuti afurieiduni” (Sal. 65:2). Ka mini lubéi le? Mini lan Heowá guánarügü lan aganbubalin furíei. Lugundun busenti ligía lan aganbei wafurieidun.

2. Ka buiti hénpulu lígirubei apostolu Pábulu woun lun wáyeihani?

² Gayaraati wariñaguni lun Heowá lidan furíei sun katei le adiheridagüdübaliwa, lau sun lira, lunti giñe wafurieidun hawagu amu. Ligía ladügübei apostolu Pábulu. Kei hénpulu, ariñagati houn kristiánugu ha lílana damuriguaü le Éfesubei: “Másuti neteingiruni Bungiu huagu dan le naritagun huagun lidan nafurieidun lun” (Efe. 1:16). Lau sun lira, furíeiti giñe hawagu burí amu. Abürühati lun Timotéu: “Dan le nayumuragun lun Bungiu buagu sagü nafurieidun áriebu wéyuagu, teinki numuti Bungiu” (2 Tim. 1:3). Gíbeti meha katei lichügüwagun Pábulu le uágubei gayara lan lafurieidun luougua, lau sun lira, díreiti dan lun lafurieidun hawagu amu gürigia (2 Ko. 11:23; 12:​7, 8).

3. Ka uagu anihein lan burí dan wabulieidagun wafurieidun hawagu amu?

³ Anihein dan gayaraati wabulieiduni wafurieidun hawagu amu. Ka uagu? Ariñagatu aban íbiri gíritu Sabrinaa: “Gíbeti weberesegun uguñe weyu. Adügati katei le lúnrügü wafurieidun luagu waturobulin luma luagu le wemegeirubei”. Ánhawa íchiga fe ligía lan asuseredubei woun, líderagubadiwa aturiahani le saragu. Luéigiñe aban oubaü, wakutihaba ka lan uagu súdini lubéi wafurieidun hawagu amu. Luéigiñe le aban oubaü, warihuba fiu adundehani luagu ida luba lan wadügüni.

KA UAGU SÚDINI LUBÉI WAFURIEIDUN HAWAGU AMU?

4, 5. Ida liña gabafu lan furíei le wadügübei hawagu amu? (Santiagu 5:16).

⁴ Wéiriti lubafu afurieidúni le ladügübei gürigia hawagu amu (aliiha huméi Santiagu 5:16). Le san linarün gayara lan wíderaguniña amu lau wafurieidun hawagu? Anha, gayaraati. Kei meha subudi lan lun Hesusu leyeedaguba lan Féduru luagu subudi lani, aba lariñagun lun: “Ayumuraguaadina buagu lun Bungiu lun meferidirun bani bafiñen” (Luk. 22:32). Afiñeti meha giñe apostolu Pábulu luagu gabafu lan furíei. Ligíati, dan le ladaürǘña lubéi Roma lúbiñe, abürühati lun Filemón: “Aransehabá giñe ubaraü nubá, lugundun agurabatina luagu” lóunabubei lan “Bungiu hafurieidun lun náfuridun furisunrugúgiñe” (Fil. 22). Ani ligía asuseredubei: murusun dan lárigiñe, aba hígiragüdüni aba lagumeserun apurichiha.

⁵ Úati mini lan le lau lan wafurieidun gayara lan wafosuruni Heowá lun ladügüni le wamuriahabei luma. Lau sun lira, gunfuranda lumuti ka lan katei adügübei lun wadiheridun ani anihein dan, aba líchuguni le wamuriahabei woun. Línchahabadiwa wasubudiruni katei le lúntima wafurieidun lun dan le anihein lan somu katei le adügübei lun wadiheridun, lau afiñeni luagu ladügübei lan le buídutimabei (Sal. 37:5; ariha huméi giñe 2 Korintuna 1:11).

6. Ida liña líderaguniwa wafurieidun hawagu amu lúntima hínsiñe hamá woun? (1 Féduru 3:8).

⁶ Líderagubadiwa wafurieidun hawagu amu lun “gudemehabu” wamá (aliiha huméi 1 Féduru 3:8). Gürigia le gudemehabubei téniti lun le hásügürübei amu ani busenti ladügün somu katei lun líderaguniña (Mar. 1:​40, 41). Ariñagati aban wéiyaali lidan afiñeni gíriti Michael: “Dan le nafurieidun luagu le hemegeirubei amu ábatima gunfuranda nani le gádanbaliña, adügatiti katei le lúntima hínsiñe hamá nun. Íbini ibidiñe lan houn, yarafatimati nasandiragun nungua houn”. Ariñagati giñe Richard, ábanya wéiyaali lidan afiñeni, ámuya buiti le wasagarubei dan le wadügüni katei le: “Dan le wafurieidun hawagu amu, ábatima busén wamá wíderaguniña”. Ariñagati giñe: “Lau wíderaguniña gürigia ha uágubaña wafurieida, ítara liña kamá hamuga wídehaña lun lounabún wafurieidun”.

7. Ida liña líderaguniwa wafurieidun hawagu amu lun warihini waturobulin kei lubeibei? (Filipuna 2:​3, 4; ariha humóun giñe iyawaü).

⁷ Íderagua lumutiwa wafurieidun hawagu amu lun warihini waturobulin kei lubeibei (aliiha huméi Filipuna 2:​3, 4). Kei lábugiñeñein lan lubafu Mafia ubóu le ídanbei wawinwanda, gagibuguatiwa súngubei wagía luma burí turobuli (1 Huan 5:19; Aruf. 12:12). Dan le hechu wamá afurieida hawagu amu, haritaguagüda lumutiwa dimurei le lídanbei 1 Féduru 5:​9, le ariñagubei: “Subudiñu huméi luagu ligiaméme lan giñe hasufurirubei hiduheñu luéigiñe Kristu lidan sun fulasu”. Ariñagatu aban prekursora gíritu Katherine: “Haritaguagüda lumutina nafurieidun hawagu amu luagu mámarügüñadina lan nuguya gaturobulin. Adügati katei le lun metenirun nan saragu nuouguarügü”.

KÁTAÑA EMEGEIRUBAÑA LUN WAFURIEIDUN HAWAGU?

8. Kátaña emegeirubaña lun wafurieidun hawagu?

⁸ Gayaraati wafurieidun hawagu ha sándibaña, hawagu nibureintiña ha adügüdarúbei hawagu o ha adügǘbei bula hau leskuelarugu o hawagu íbirigu ha aweiyadeinabaña. Gagibuguatiña giñe saragu íbirigu luma eibaahóuni, anihein dan hámagiñe urúeigu o gumadimatiña, añahein hádangiñe gagibuguatiña giñe luma híchugun haduheñu lidere dan houn (Mat. 10:​18, 36; Adü. 12:5). Añahein hádangiñe wábirigu ígira hamaaru haban ladüga turobuli le lánina polítika le lídanbei hageira. Añahein amu, súfuritiña ladüga chagaguaü le lánina liñawan dan. Másiñati ibidiñe hamá íbirigu ha woun. Lau sun lira, dan le wafurieidun hawagu, warufuduñein gaganbadi wamá lun gumadi le líchugubei Hesusu lun hínsiñegua wamá wámagua (Huan 13:34).

9. Ka uagu lunti lubéi wafurieidun hawagu wábirigu ha anügübalin ubaraü tidan lóundarun Heowá luma tuagu hani weiriou?

⁹ Gayaraati giñe wafurieidun hawagu íbirigu ha anügübalin ubaraü tidan lóundarun Heowá, kei burí lílana Musu Úaraguati, íbirigu ha íderagubaliña, lílana Sétanu le Arihibei tau Sukursáli, ha burí arihibaña lau burí departamentu le tídanbei sukursáli, óunigirutiña sirkuitu, wéiyaaña lidan afiñeni, hama ídehatiña lidan damuriguaü. Saragu hádangiñe gíbeti katei hachügüwagun sun añaha lan agunfulira lau hadasin tidan lóundarun Heowá (2 Ko. 12:15). Ariñagati Mark, le eseriwidubei kei óunigiruti sirkuitu: “Aban lídangiñe katei le hénrengutimabei nun, dise nan hawéi nagübürigu, derebuguhaña ani sándihaña. Subudi numuti teni tan nitu lau sun tani weiriei houn lau saragu ínsiñeni, íbini ítara, gáriti nun siñá lan ñein nan hama lun níderaguniña”. Lau sun ibidiñe lan sun katei le hásügürübei íbirigu ha woun, buídubei wadüga lun wafurieidun hawagu (1 Tesa. 5:​12, 13). Gayaraati giñe wafurieidun tuagu hani íbirigu ha weiriou, ha íderagubaliña lun gayaraabei lan hasigirun lidan hadasin.

10, 11. Gúndaati funa san Heowá dan le wafurieidun hawagu sun wábirigu lidan aban?

¹⁰ Kei le aubei warihei, anihein dan wafurieidun hawagu sun íbirigu lidan aban. Kei hénpulu, másiñati wariñagun lun Heowá lun líderaguniña íbirigu ha adaürǘbaña o lun líchugun gurasu houn ha féridihañabaña somu haduhe lidan óunweni, sin wíriduni liri somu íbiri. Ariñagati aban wéiyaali lidan afiñeni gíriti Donald: “Kei gibe habéi íbirigu ha ásügürübaña lídangiñe lénrengunga, anihein dan wafurieidun hawagu súngubei lidan aban”.

¹¹ Gúndaati funa san Heowá lau furíei kei burí le? Anha, gúndaati! Le linarün katei, buiti lun wafurieidun ítara lugundun ibidiñeti woun le hemegeirubei kada aban hádangiñe lubúeingu Bungiu. Ligía buidu lubéi lun wafurieidun hawagu súngubei (Huan 17:20; Efe. 6:18). Arufudati furíei burí le weiri lan ínsiñeni le wasandirubei hawagu sun wábirigu (1 Fe. 2:17).

KA LUNBEI WADÜGÜNI DAN LE WAFURIEIDUN LUAGU SOMU ÍBIRI?

12. Ida liña líderaguniwa wetenirun lun le gádanbaliña íbirigu lun wafurieidun luagu le hemegeirubei?

¹² Teni wamá lun le gádanbaliña. Íbini buidu lan lun wafurieidun hawagu sun wábirigu, buídubei giñe lun wafurieidun luagu ítaga íbiri. Anihein san somu íbiri lidan damuriguaü le lǘhalibei ageindagua luma aban sandi? Anihein san somu nibureinti le ábürühaali larüna ladüga hadügüdarúña lan lupaanágu leskuelarugu luagu? Añahein san aban hádangiñe agübürigu hagüriahañanu hasaanigu hábuguarügü “arufudaheina houn kei labusenruni Wabureme” Heowá? (Efe. 6:4). Ánhawa etenira lun le gádanbaliña wábirigu, ménrenguntimabei woun wíchaagun woungua lidoun halugaarun, ani línchahabadiwa katei le lun wafurieidun hawagu (Rom. 12:15).b

13. Gayaraati san wafurieidun hawagu íbirigu ha ibidiñebaña woun?

¹³ Írida wamaña lau hiri. Anihán katei le lunbei wadügüni íbini ibidiñe hamá woun. Kei hénpulu, samina wamá hawagu íbirigu ha adaürǘbaña Crimea, Eritrea, Rusia luma Singapur. Gayaraati wadariruni hiri íbirigu ha lidan jw.org.c Ariñagati aban óunigiruti sirkuitu gíriti Brian: “Dan le nabürüdüni liri o tiri aban íbiri ha burí adaürǘbaña ani lárigiñe aba níriduni hiri, ménrenguntimati nun naritaguni luma lun níriduni hiri lidan nafurieidun”.

14, 15. Kaba íderaguawa lun wadügün furíei luágutima le gádanbaliña wábirigu?

¹⁴ Furíei wamá hawagu wábirigu según le gádanbaliña. Ru lumuti Michael, le úagubei wayanuha lidan párafu 6, adundehani le woun: “Dan le naliihan lidan jw.org hawagu wábirigu ha furisunrugubaña, áfaaguatina nasaminarun ida luba lan hamuga nasandiragun nungua lidan halugaarun. Nadiheriduña hamuga tuagu nani weiriou ani busenbadina hamuga nasubudiruni anhein tounigirúña lubéi buidu. Íderagua lumutina le lun nafurieidun luagu le gádanbaliña íbirigu ha maríeibaña ani hadaürǘña” (Ebü. 13:3).

¹⁵ Ságüme wasaminarun luagu le hásügürübei wábirigu furisunrugu, ábame liabin wachügüwagun le lunbei wamuriahani hawagu lidan furíei. Kéiburi, gayaraati wamuriaha luma Heowá lun buidu lan hóuseruniña súdaragu ha furisunrugubaña wábirigu o wamuriahan giñe luma lun gayaraabei lan hígirun gumadimatiña lun háhuduragun wábirigu lun Bungiu (1 Tim. 2:​1, 2). Gayaraati giñe wafurieidun hawagu lílana damuriguaü le yarafabei houn íbirigu ha adaürǘbaña, lun háyeihani lubuidun hénpulu le harufudubei íbirigu úaraguatiña ha, luma lun giñe línchahaniña gürigia ha mámabaña Gefentiña lun haganbuni uganu le wapurichihabei (1 Fe. 2:12). Gayaraati giñe wafalaruni adundehani burí le dan le wafurieidun hawagu íbirigu ha ásügürübaña lídangiñe ámuñegueinarügü lénrengunga. Gayaraati warufuduni weiri lan ínsiñeni le wasandirubei hawagu wábirigu lau wetenirun lun le gádanbaliña, lau wíriduni hiri, luma lau wafurieidun lun Heowá luagu le gádanbaliña (1 Tesa. 3:12).

ǗNABUGU WAMÁ DAN LE WAFURIEIDUN

16. Ka lunbei gabaroun wamani dan le wafurieidun? (Matéu 6:8).

¹⁶ Kei le aubei warihei, wéiriti lubafu furíei le wadügübei hawagu amu lugundun gayaraati lasansiruni le gádanbaliña. Lau sun lira, mosu ǘnabugu wamá. Dan le wafurieidun, mama wabahüdaguña aban katei lun Heowá le ibidiñebei lun. Moun lumuti giñe wíchugun adundehani lun luáguti ida luba lan lahandilihani le gádanbaliña lubúeingu, lugundun subudi lumuti ka lan hemegeirubei, íbini lubaragiñe híchugun fe o wíchugun fe (aliiha huméi Matéu 6:8). Ligíati, ka uagu lunti lubéi wafurieidun hawagu amu? Amu luéi le ariha wamaalibei lidan aturiahani le, furíeitiwa giñe hawagu amu lun warufudun luagu berese wamá hau ani hínsiñe hagía woun. Ani sanditi Heowá aban lanarime ugundani lau larihini wáyeihañein lan ínsiñeni le larufudubei.

17, 18. Afuranguagüda huméi lau aban hénpulu ida liña lan wasubudiruni teni lan Heowá lun furíei le wadügübei.

¹⁷ Íbini genege lan masansirun lubéi lan furíei le wadügübei le gádanbaliña amu, arufuda lumuti furíei ligía hínsiñe hamá wábirigu woun ani gebegiti katei le lun Heowá. Samina wamá luagu aban úguchili le gasaanibei bián irahüñü, aban wügüri tuma aban würi. Sándiñein amuleñein, ábati tariñagun litu lun túguchi: “Papa, íderagua huméi namulen lugundun sándiñein”. Leteniruña úguchili lun lisaani buidu buidu, lau sun lira, gúndaati dan le larihini hínsiñe lan tamulen lisaani tun, ligía tamuriahanbei luma lun ladügün somu katei luagu.

¹⁸ Ítarameme, busenti Heowá lun warufudun ínsiñeni houn amu luma lun wafurieidun hawagu. Ítara luba warufuduni mámarügüñein lan wawounguarügü wasaminara, warufudubei giñe samina wamá hawagu wábirigu ani mabulieidun lubéi Heowá lira (2 Tesa. 1:3; Ebü. 6:10). Lanwoun lira, kei le aubei warihei, ñeinbei dan lasansiruni furíei le wadügübei le gádanbaliña amu. Mabulieida waméi lubeiti wíriduniña wábirigu lidan wafurieidun!