Ida luba wabuiduragüdüni wafurieidun

1, 2. a) Ka katei adügübei lun wariñaguni ligiaméme dimurei dan le wafurieidun lun Heowá? b) Ida liña wasubudiruni teni lan Heowá lun sun le wariñagubei lun dan le wafurieidun lun?

ANIHEIN san dan sandigua humá hungua ligiaméme lan dimurei hariñagubei lidan hafurieidun? Susereñahaali katei le woun súngubei. Másiñati adüga lan liibe weberesegun lun chati lan furíei le wadügübei. Háfuga sandiguatiwa woungua madüna wamani wabahüdahani lun Heowá le wasandirubei.

² Chóurugüda tumuti Bíbülia woun létima lan súdinibei lun Heowá tídangiñe lan wanigi láfurida dimurei le wariñagubei lun dan le wafurieidun lun lúmati lun ǘnabugu wamá. Ligíati máhüchüra humá áluaha dimurei hanarimeburiti lubuidun lun hafurieidun. Lugundun ariñagatu Bíbülia luagu Heowá: “Aganba bumuti hafurieidun ha ǘnabugubaña” (Sal. 10:17). Téniti lun sun dimurei le wariñagubei lidan furíei ladüga berese lan wau (Sal. 139:​1-3).

3. Kaba burí álügüdahani wóunaba lidan aturiahani le?

³ Lidan aturiahani le wóunabubei álügüdahani burí le: ka uagu moun lumuti lubéi wanufudedun wabahüdahani lun Heowá le wasandirubei luma le wasaminarubei?, ida luba wafurieidun lun Heowá lúntima wayarafadun lun?, ida liña líderaguniwa furíei le wadarirubei tidan Bíbülia lúntima wabuiduragüdüni wafurieidun?, ani ka gayaraabei wadügüni anhein weiri lubéi wadiheri darí lun siñá lan wariñaguni le wasandirubei lun Heowá?

MANUFUDEDA HUMÁ LUN HAFURIEIDUN LUN HEOWÁ

4. Kaba íderaguawa lun wadaarunu wanigi lun Heowá? (Sálumu 119:145).

⁴ Ménrenguntimabei woun wabahüdahani lun Heowá le wasandirubei luma le wasaminarubei anhein wariha kei aban umadaü buiti le busenbei buiti woun. Samina wamá luagu le abürühabalin Sálumu 119, le ásügürübei lídangiñe saragu lamiselu luma turobuli. Kei hénpulu, añahein fiu gürigia ayanuhatiña lanarime iyeeni luagu (Sal. 119:​23, 69, 78). Mosu meha giñe lagagibudagun luma lichara guánarügü (Sal. 119:5). Lau sun lira, buiti meha lumadagua luma Bungiu, ligíati manufude lubéi ladaarunu lanigi lun (aliiha huméi Sálumu 119:145).

5. Ka uagu moun lumuti lubéi wígirun leredehaniwa luriban saminaü luéi wafurieidun lun Heowá? Ru humá aban hénpulu.

⁵ Busenti Heowá hafurieidun íbini ha adügaaña figóu wéiriti lun (Isa. 55:​6, 7). Ligíati, mígira wamá lun leredehaniwa luriban saminaü luéi wafurieidun lun Heowá. Lúntima gunfuranda wamani buidu, samina wamá luagu aban abugahati awión le achararubei o le adireirúbei luéi üma le lunbei lanügüni. Subudi lumuti gayara lan lamuriahan ídemuei hama ha echekühabalin tuéiyasun awión. Ladügüba san busiganu lun mamuriaha lan ídemuei hama? Uá! Ítarameme, moun lumuti ladügün busiganu lun mayanuhan wamá luma Heowá dan le wachararun o dan le wadireirun luéi üma le lunbei wárügüdüni (Sal. 119:​25, 176).

IDA LUBA WAFURIEIDUN LUN HEOWÁ LÚNTIMA WAYARAFADUN LUN?

6, 7. Kaba íderaguawa lun wadaarunu wanigi lun Heowá dan le wafurieidun lun? Ru humá aban hénpulu (ariha huméi giñe abürüdǘni).

⁶ Dan le furangu lan wayanuhan luma Heowá luagu le wasaminarubei luma luagu le wasandirubei, adügati katei le lúntima wayarafadun lun. Ariha waméi ka lan gayaraabei líderaguniwa lidan wafurieidun lun Heowá lúntima wayarafadun lun.

⁷ Ráramagua wamá asaminara luagu burí lubuidun ligaburi Heowá.a Éibutima wararamagun asaminara luagu burí igaburi le, ménrenguntimabei woun wariñaguni lun le wasandirubei luma le wasaminarubei (Sal. 145:​8, 9, 18). Ligía asuseredubei tun Kristine, aban íbiri to meha furundebei túguchi. Ariñagatu: “Hénrenguti meha nun nayanuhan luma Heowá dan le narihini kei aban úguchili. Sanditina meha ladügüba lan nichara lun ladisedun nuéi”. Ka igaburi lídangiñe le luágubei Bungiu íderagubarun? Ariñagatu: “Adügati línsiñehabu Heowá le magumuchadibei lun chouru lan nasandiragun nungua. Subudi numuti lerederuba lan nurugabu súnwandan ani ánhana lan acharara, líderagubadina iñuragua lídangiñe le gádanbalina ani hínsiñememebadina lun. Íderagua lumutina nararamagun asaminara luagu línsiñehabu lun gayara lan nabahüdahani lun katei le adügübei lun nagundaarun luma katei le adügübei lun nadiheridun saragu”.

8, 9. Ka buiti wibihubei dan le wararamagun asaminara luagu le lunbei wariñaguni lun Heowá lubaragiñe wafurieidun lun? Ru humá aban hénpulu.

⁸ Samina waméi le lunbei wariñaguni lun Heowá lubaragiñe wafurieidun lun. Lubaragiñe wafurieidun, gayaraati wadügün álügüdahani kei burí le: “Ka turobuli úmabei nagagibudagua? Anihein funa san somu gürigia le úagili feruduna nani? Anihein san somu turobuli le úmabei nagagibudagua uguñe weyu le ñein lubéi nemegeirei lídehan Heowá?” (2 Uru. 19:​15-19). Gayaraati giñe wáyeihani Hesusu lau wamuriahan lidan furíei luagu Larúeihan Bungiu, luagu lugundan luma luagu liri Heowá (Mat. 6:​9, 10).

⁹ Hénrenguti meha tun aban íbiri gíritu Aliska tafurieidun lun Heowá dan le tíchugubei fe anihein lan kánserü lichügüwagun tani weiriei ani mawinwandunbei lan saragu dan. Ariñagatu: “Wéiriti meha nidiheri darí lun siñá lan nasaminarun buidu ani ibidiñeti nun kaba lan nariñaga lun Heowá lidan furíei”. Ka íderagubarun? Ariñagatu: “Lubaragiñe nagumeserun afurieida, díreitina murusun dan lun nasaminaruni buidu kaba lan nariñaga lun Heowá lidan furíei. Íderagua láadina katei le lun mámarügü lan nuougua nafurieida ni luagu niturobulin, íderagua láadina giñe lun darangilu nan dan le nafurieidun lun Heowá”.

10. Ka uagu buidu lubéi lun wanügüni wadaani lun wafurieidun lun Heowá? (Ariha humóun giñe iyawaü).

¹⁰ Barǘ waméi wadaani lun wafurieidun. Inarüni yarafagüda lániwa furíei chátiti lun Heowá, lau sun lira, ánhawa adüga furíei le migifeti gayaraabei wabahüdahani lun Heowá sun le wasandirubei.b Ariñagati Elijah, le tani Aliska weiriei: “Hóuchatina nafurieidun saragu wéiyaasu luagu weyu lun Heowá, ani arihatina, dan lan le migife lan furíei le nadügübei, adügati lun yarafatima lan nasandiragun nungua lun Heowá. Kei le meteni lan lun átiriñein lan dan nayusurun lun nafurieidun lun, gayaraati nálüdün ayanuha luma”. Houcha huméi hadügüni le: Áluaha humá somu fulasu le ñein lubéi gayara lan hanügüni hidaani lun hayanuhan luma Heowá, aban fulasu le ñein lubéi úabei lan eberesehatün, le ñein lubéi gayaraabei lan hafurieidun lau umalali héreti, ani áfaagua huguyame lun héchudun adügei.

RÁRAMAGUA WAMÁ ASAMINARA LUAGU FURÍEI LE HADÜGÜBEI LUBÚEINGU HEOWÁ HA LÁNINA BINADU DAN

11. Ida liña líderaguniwa wararamagun asaminara luagu furíei le hadügübei fiu lubúeingu Heowá ha lánina binadu dan? (Ariha huméi giñe rekuáduru “Sandiguañahaadün san hungua kei hagía?”).

¹¹ Másiñati líderagubadiwa lan wararamagun asaminara luagu le hariñagubei fiu lubúeingu Heowá ha lánina binadu dan lidan hafurieidun luma lidan heremuhan. Teni wamá lun ligaburi hariñaguni le hasaminarubei luma le hasandirubei lun gayara lan wadügüni ligiaméme. Másiñati wadariruba lan dimurei le gayaraabei wayusuruni lun walawahani Heowá. Chóuruti wadariruba lan furíei le genegeguabei luma le wásügürübei.

12. Ka álügüdahani gayaraabei wadügüni wóuniwagua dan le waliihan aban furíei tídangiñe Bíbülia?

¹² Danme le waliihan aban furíei tídangiñe Bíbülia, álügüdagua wamá woungua: “Ka ariñagubalin dimurei burí le? Ka gádanbalin? Násügürüña san lídangiñe somu sügǘ libe lira? Ka gayaraabei nafurendeirun lídangiñe?”. Másiñati, mosu lan wakutihan libügürü lun wadariruni lóunabagüle álügüdahani burí le, anhein wadüga ítara, wasagaruba saragu buiti lídangiñe. Ariha wamá fiu hénpulu.

13. Ka wafurendeirubei lídangiñe furíei le tadügübei Ana? (1 Samueli 1:​10, 11; ariha huméi giñe dibuhu).

¹³ (Aliiha huméi 1 Samueli 1:​10, 11). Dan meha le tadügüni Ana furíei le, biánñein meha titurobulin: maraüheitu ani tíchuguña meha tubuyamun lidere dan tun (1 Sam. 1:​4-7). Anhein wásügürüña lubéi lídangiñe somu turobuli le genegeti máranina lan, ka gayaraabei wafurendeirun lídangiñe tafurieidun Ana? Ragǘ tumuti Ana tidaani lun tariñaguni lun Heowá sun le adiheridagüdübarun, ani lárigiñe tadaarunu tanigi lun Heowá buiti tasandiragun tungua (1 Sam. 1:​12, 18). Adüga waméi ligiaméme ani ‘ígira waméi wadiheri lun Aburemei’, mini lan le, wafuranguagüdüni lun Heowá ka lan adiheridagüdübaliwa ani ida liña lan ladügün idiheri le lun wasandiragun woungua (Sal. 55:22).

14. a) Ka amu katei wafurendeirubei lídangiñe tani Ana hénpulu? b) Ida luba wabuiduragüdüni wafurieidun dan le wararamagun asaminara luagu le tariñagubei Bíbülia? (Ariha huméi giñe abürüdǘni).

¹⁴ Fiu irumu lárigiñe tagüriahani Ana Samueli, le tisaani, aba tanügüni lun Elí fádiri le íñutimabei (1 Sam. 1:​24-28). Aba tíchugun Ana eteingiruni lun Heowá tídangiñe sun tanigi lidan aban furíei le tadügübei, ladüga tarihini ida liña lan lóunigiruniña Heowá lubúeingu ha úaraguabaña (1 Sam. 2:​1, 8, 9).c Másiñati magumuchagungili lan buga titurobulin, lau sun lira aba tetenirun lun abiniruni le tibihubei lúmagiñe Heowá. Ka wafurendeirubei? Furendeitiwa ménrenguntima lan wagagibudagun luma lénrengunga ánhawa etenira lun ídemuei le líchugubei Heowá woun.

15. Ka wafurendeirubei lídangiñe furíei le ladügübei Heremíasi? (Heremíasi 12:1).

¹⁵ (Aliiha huméi Heremíasi 12:1). Dan le larihibei Heremíasi luagu buidu lan lidin houn gürigia ha wuribabaña, adügati le lun lábürühan larüna, ábürühati giñe larüna ladüga hadügün ísüraelina bula lau (Her. 20:​7, 8). Ménrengunti gunfuranda wamani ida liña lan lasandiragun lungua lugundun adügǘwati giñe bula wau, ani genegeti giñe buidu lan lidin houn gürigia ha wuribabaña uguñe weyu. Lau sun ariñaga lani Heremíasi luriban lasandiragun lungua lun Heowá, michu lumuti duru luagu. Lubaragiñe lira, dan le larihini ida liña lan lererehan Heowá houn lumutuniña ha ebedaagubaña lun, ábatima lafiñerun Heremíasi luagu óusera lan Heowá lau irichaü súnwandan (Her. 32:19). Wagía gayaraati giñe wadügüni ligiaméme, wabahüdahani lun Heowá katei le adügübei lun wuriba lan wasandiragun woungua, lau afiñeni luagu laranserubei lan waturobulin lidan dan le buídutimabei lun.

16. Ka wafurendeirubei lídangiñe furíei le ladügübei aban lewita le dísebei luéi lageira? (Sálumu 42:​1-4; ariha huméi giñe dibuhu tuma iyawaü).

¹⁶ (Aliiha huméi Sálumu 42:​1-4). Ariñaga lumuti aban lewita ida liña lan lasandiragun lungua lidan uremu le, dan le dise lubéi luéi lageira ani siñati lóundarun hama ísüraelina líledigu. Másiñati gayara lan wasandiragun woungua ítara kei ligía dan le siñá lan wáfuridun wábiñegiñe o dan le wadaürǘña lan ladüga wafiñen. Dan le lasuseredun aban katei ítarati woun, dariguatiwa woungua lau liibe saminaü, lau sun lira le buídutimabei lun wariñaguni lun Heowá lidan furíei ida liña lan wasandiragun woungua. Líderagubadiwa katei le lúntima gunfuranda wamani buidu ida liña lan wasandiragun woungua luma lun warihini katei lidan amu igaburi. Kei hénpulu, aba líchugun lewita le fe gachansibei lan lun lalawahani Bungiu lidan amu burí igaburi (Sal. 42:5). Ráramaguati giñe asaminara luagu anihein lan Heowá óunigirei (Sal. 42:8). Líderagubadiwa wadaarunu wanigi lun Heowá lun wasubudiruni ka lan uagu wasandiragun woungua lidan ítaga igaburi, ladügüba katei le lun darangilu wamá luma lun wibihini erei le wemegeirubei lun wawandun.

17. a) Ka wafurendeirubei lídangiñe furíei le ladügübei Honasi? (Honasi 2:​1, 2). b) Ida liña líderaguniwa fiu dimurei le lídanbei Sálumu dan le wásügürün lídangiñe lénrengunga? (Ariha huméi abürüdǘni).

¹⁷ (Aliiha huméi Honasi 2:​1, 2). Adügati profeta Honasi aban furíei lun Heowá dan le aniha lubéi turageirugu aban udu. Íbini maganbadi lan lun Heowá, chouru lumuti luagu laganbubei lan Heowá lafurieidun. Yúsuti saragu Sálumu lidan layumuragun, arufudati le luagu subudi lani sálumu burí le buidu buidu.d Lau laritaguni luma lararamagun asaminara luagu burí sálumu lira, adügati lun lachoururuni líderagubei lan Heowá. Ítarameme, ánhawa áfaagua lun wafurendeirun bérusu tídangiñeti Bíbülia, gayaraabei waritagun luagu bérusu burí ligía ani ru ligíame dǘgüdaguaü woun dan le wafurieidun lun Heowá dan le wásügürüña lan lídangiñe lénrengunga.

FURIEIMÉME HUMÁ LUN HEOWÁ LÚNTIMA HAYARAFADUN LUN

18, 19. Ida liña líderaguniwa dimurei le lariñagubei Rómana 8:​26, 27 anhein máfuridun lubéi dimurei le wabusenrubei wariñagun lun Heowá lidan furíei luagu le wasandirubei? Ru humá aban hénpulu.

¹⁸ (Aliiha huméi Rómana 8:​26, 27). Anihein dan weiri lan idiheri le wasandirubei darí lun máfuridun lan dimurei le wabusenrubei wariñagun lun Heowá lidan furíei luagu le wasandirubei. Gama lumoun, dan le lasuseredun aban katei ítarati, aba layusuruni Bungiu lani ‘sífiri sandu’ lun líderaguniwa. Ka mini lubéi katei le? Mini lan le yusu lani Heowá lani sífiri sandu, lun labürüdǘn saragu furíei tidan Bíbülia. Ligíati, dan le siñá lan wariñaguni furangu le wasaminarubei, gayaraati lánharun Heowá lun furíei le wadügübei íbini ragǘ wamá fiu dimurei lídangiñe furíei le bürüwañubei tidan Bíbülia kamá hamuga wererun guánarügü, ani lárigiñe aba lóunabuni furíei ligía.

¹⁹ Íderagua lumutu gabaroun tani aban íbiri rúsiana gíritu Elena katei le, to adaürǘboun ladüga tafurieidun luma taliihanu Bíbülia. Wéiriti meha tidiheri darí lun hénrengu lan tun tafurieidun. Ariñagatu: “Haritaguatina, dan lan le lásügüragun katei nau ani ibidiñeti nun kaba lan namuriaha luma Heowá lidan furíei, gayaraati lánharun Heowá lun furíei le hadügübei amu lubúeingu le áfuachubei tidan Bíbülia kamá hamuga nuguya afurieidubei lun”. Ani ariñagayatu: “Ruti katei le gurasu nun lídantima dan le hénrengubei”.

20. Kaba íderaguawa lun waranseruni dimurei le lunbei wariñaguni lidan wafurieidun dan le nidiheri wamá?

²⁰ Dan le gibe lan katei lun wachügü, gayaraati hénrengubei lan woun wetenirun lun le wariñagubei lidan wafurieidun. Ka gayaraabei líderaguniwa lun waranserunu wanigi lubá wafurieidun? Líderagubadiwa waliihani sálumu lau umalali héreti o wabürühani le wasandirubei ítara kei meha ladügüni urúei Dawidi (Sal. 18, 34, 142; ichügüdinaü). Keiti ámuñegueinarügü wabéi wawariuagua, kada aban wádangiñe gayaraati láluahani le buídutimabei lun lun laranserun lubá lafurieidun (Sal. 141:2). Ka buídutimabei hun?

21. Ka uagu gayara lubéi wadaarunu wanigi lun Heowá?

²¹ Ruti gurasu woun wasubudiruni gunfuranda lani Heowá le wasandirubei íbini lubaragiñe wariñaguni lun (Sal. 139:4). Lau sun lira, hínsiñeti lun laganbuniwa luma lun larihini afiñe wamá luagu. Ligíati, manufudeda wamá wafurieidun lun Wáguchi Bungiu le siélubei. Yusu wamá dimurei lídangiñe furíei le wadarirubei tidan Bíbülia. Dará wamóun wanigi lun lun wabahüdahani katei le adügübei lun wadiheridun luma katei le adügübei lun wagundaarun. Aban umadaü buiti Heowá ani súnwandan wouba woubabei lan.