Áfaagua wamá lun derebugu lan wafiñen kei Kristu

1, 2. Ka habusenrubei sun lubúeingu Heowá? Ru humá aban hénpulu.

DAN le woudin agañeiha furuda mágidurugu, ka wáluahabei furumiñe? Chóuruti aba lan wálügüdahan luagu tebegi, gama lumoun, súdinitimati woun lun iserigiru lan luma lun buíduharu lan lun teigín. Subudi wamuti furuda lan to funaaru buídutimaboun.

² Dan le wafurendeirun luagu Heowá ani aba wabadiseirun, busentiwa giñe lun lachülürün dan lun derebugu wamá. Ani mama wayanuhaña ya luagu aweiyaduni. Wayanuhaña luagu warufudun lubuidun igaburi luma lun buídutima lan wamadagua luma Heowá. Ariñagati apostolu Pábulu houn kristiánugu ha Éfesubaña gayara lan derebugu lan hafiñen kei Kristu. Ani lun hadügüni, mosu meha lidan hamá aban ani sigí hagía afurendeira luagu Hesusu (Éfesuna 4:13).

3. Ka idan genegegua lan damuriguaü le meha Éfesubei luma saragu damuriguaü uguñe weyu?

³ Dan le meha labürühanbei Pábulu houn lílana damuriguaü le Éfesubei, añahein meha saragu kristiánugu ñein ha derebuguhali hafiñen ani ha lǘhaña lidan inarüni. Gama lumoun, añahein meha giñe kristiánugu ha mégeigiña héredagüdüni hamadagua luma Bungiu. Ligiaméme asuseredubei lidan saragu damuriguaü uguñe weyu. Gíbetiña íbirigu ñein ha seriwihaña lun Heowá luagu saragu irumu. Gama lumoun, añahein amu ha méregili hafiñen. Kéiburi saragu milu íbirigu ha abadiseirubaña sagü irumu. Súngubei hagía mégeitiña háfaagun lun kristiánugu hamá ha derebuguti hafiñen. Agia huguya? Derebuguhali san hafiñen? (Kolosana 2:6, 7.)

IDA LIÑA WARUFUDUNI KRISTIÁNUGU WAMÁ HA DEREBUGUHAÑA

4, 5. a) Aban san habu sun kristiánugu ha derebuguhañabaña? b) Ka idan genegegua hamá kristiánugu ha derebuguhañabaña? (Ariha humóun iyawaü to lídanboun lagumeseha arütíkulu.)

⁴ Mama aban tabu sun furuda dan le funaaru. Gayarati amu lan tesetirun tuáriuagua ani anuhein wéinamutu anuha ñǘbüritu, gama lumoun, gayarati basubudiruni anhein funaaru lubéi o wurigiru lan. Ligiaméme asuseredubei hadan kristiánugu ha derebuguhali hafiñen. Mama aban habu súngubei. Gayarati ámuñegueinarügü lan harumudiri, hechun o ámuñegueinarügü lan katei le hínsiñebei houn, gama lumoun anihein saragu igaburi hawagu súngubei hagía le arufudubalin derebuguhali lan hafiñen. Katei burí san fiú lídangiñe igaburi ligía?

⁵ Sigí hamuti kristiánugu ha derebuguhañabaña lani Hesusu hénpulu (1 Féduru 2:21). Ariñagati Hesusu lunti lan línsiñedun Heowá woun tau sun wanigi, wawani luma wasaminan. Ani ariñagati giñe mosu lan hínsiñedun sun gürigia woun kei wínsiñegua woungua (Matéu 22:37-39). Áfaaguatiña kristiánugu ha derebugubaña afiñen lun gaganbadi hamá lun gumadi burí le. Arufuda hamuti lau ligaburi hawinwandun súdinitima lan houn lumadagu hamá Heowá luma lun harufudun ínsiñeni hawagu amu.

6, 7. a) Amu luéi ínsiñeni, ka burí igaburi aniheinbei hawagu sun kristiánugu ha derebuguhali hafiñen? b) Ka álügüdahani lunbei wadügüni wóuniwagua?

⁶ Sun kristiánugu ha derebuguhali hafiñen arufudatiña ínsiñeni, gama lumoun, ka san amu igaburi aniheinbei hawagu súngubei? (Galasiana 5:22, 23.) Buiti hagaburi, darangilatiña ani gaguraasuntiña. Ragüguatiña houngua dan le gaturobulin hamá ani dan le lasuseredun somu katei le híruti houn meferidirun hamuti hemenigin. Dan le haturiahanu Bíbülia, áluahatiña adundehani le lunti líderaguniña asubudirei le buídubei lumoun le wuribabei, ani aba hayusuruni le hafurendeirubei lun desidírü hamá buidu. Ǘnabugutiña ani gunfuranda hamuti buídutima lan hafalaruni adundehani luma lúrudu le líchugubei Heowá.a Apurichihatiña giñe lau ubebeni ani adüga hamuti sun hayaraati lun ñein lan úarani lidan damuriguaü.

⁷ Meberesenga átirihali lan irumu wau eseriwida lun Heowá, sun wagía lunti wálügüdagun woungua: “Ka asansiruni lunbei nadügüni lun nóuserun kei meha Hesusu?”. Ariha wamá ǘrüwa katei le lunbei líderaguniwa lun derebugu lan wafiñen kei Kristu.

ATURIAHA WAMÓUN BÍBÜLIA BUIDU

8. Ida liña wasubudiruni subudi lanu meha Hesusu Lererun Bungiu buidu ani gunfurandaloun?

⁸ Subudi lumutu meha Hesukrístu Lererun Bungiu buidu ani gunfuranda lumutu giñe buidu. Kéiburi dan le meha 12 lubéi irumu lau, aba lerederun ténpulurugu ayanuha hama máisturugu luagu le tarufudahabei Lererun Bungiu. Sun meha ha aganbubalin layanuhan aba taweiridun hanigi (Lúkasi 2:46, 47). Ani fiú irumu lárigiñe, yusu lumutu Lererun Bungiu buidu darí lun ibidiñeeli lan meha houn láganiñu ida luba lan hóunabuni (Matéu 22:41-46).

9. a) Anhein busén wabéi lun derebugu lan wafiñen, ka lunbei wadügüni? b) Ka lunbei wadügüni dan le waturiahanu Bíbülia?

⁹ Anhein busén wabéi derebugu lan wafiñen, mosu wáyeihani Hesusu. Moun lumuti gufuruma wamá láurügü wasubudiruni inarüni le seinsiyutimabei tidan Bíbülia. Mosu waturiahanu Bíbülia hulili, lugundun subudi wamuti “hounti [lan] ha wéinamuhañabaña lidan hafiñen [éigini le dǘgüdati]” (Ebüréu 5:14). Mosu wasubudiruni le tarufudahabei Bíbülia buidu (Éfesuna 4:13). Ani lun wibihini katei le mosu waturiahanu Bíbülia buidu. Mini lan le mosu lan waliihanu Bíbülia sagü weyu ani aturiaha wamounme wábuguarügü luma hama waduheñu aban weyu luagu dimaasu. Dan le waturiahanu Bíbülia, mosu wáfaagun lun wafurendeiruni ligaburi lisaminan Heowá luma le lasandirubei, ani ábame wayusuruni subudi ligía lun desidírü wamá. Anhein wadüga ítara, léredatimaba wamadagua luma Heowá.

10. Ida liña harufuduni kristiánugu ha derebugubaña afiñen luagu hínsiñe lan lilurudun luma ladundehan Bungiu houn?

¹⁰ Subudi hamuti kristiánugu ha derebugubaña afiñen ka lan tariñagubei Bíbülia, ani hínsiñeti giñe lilurudun luma ladundehan Bungiu houn. Ida liña harufuduni? Lau háfaagun lun hadügüni lugundan Bungiu íbini mosu lan hasansiruni ligaburi hawinwandun, ligaburi hasaminarun luma ligaburi hadügüni katei. Áyeiha hamuti Hesusu ani sansi hamuti binadu housan lun harufudun igaburi buiti kéiburi irichaü luma úaraguni (aliiha huméi Éfesuna 4:22-24). Haritagua waméi yusu lani Bungiu lani sífiri sandu lun ladundehaniña wügüriña ha abürüdübarun Bíbülia. Ligíati, dan le laturiahanu aban kristiánu Bíbülia, íderagua lumuti sífiri sandu lun laganwoundun lisubudin luma línsiñehabu. Íderagua lumuti giñe lun buídutima lan lumadagua luma Heowá.

ÍDEHA WAMÁ LUN ÑEIN LAN ÚARANI LIDAN DAMURIGUAÜ

11. Ida haña meha san gürigia ha geyegubaña lau Hesusu dan le ya lubéi ubouagu?

¹¹ Aban meha wügüri mafigounti Hesusu dan le ya lubéi ubouagu, ánheinti gürigia ha geyegubaña lau gafigountiña meha. Dandu lagübürigu, lamulenu hama sun gürigia ha geyegubaña lau gafigountiña meha. Íbini lani disipulugu anihein meha dan iñu lan hanaagun houngua. Kéiburi lidan guñoun le lóunwenbei Hesusu, aba hasigenehan hámagua luagu ka lan hádangiñe súdinitimabei (Lúkasi 22:24). Íbini ítara, afiñeti meha Hesusu luagu lachülürüba lan dan lun derebugubei lan hafiñen ani hadügüba lan aban damuriguaü le ñein lubéi úarani. Ligía lamuriahanbei luma Heowá guñounméme ligía lun líderaguniña lani disipulugu lun lidan hamá aban kei ligía luma Lúguchi. Aba lariñagun lun: “Lun ábanmeme hamá wama kei au buma” (Huan 17:21, 22).

12, 13. a) Ka lunbei wadügüni sun wagía? b) Ida liña lafurendeirun aban íbiri ídeha lun ñein lan úarani lidan damuriguaü?

¹² Áfaaguatiña kristiánugu ha derebugubaña afiñen lun ñein lan úarani lidan damuriguaü (aliiha huméi Éfesuna 4:1-6, 15, 16). Súngubei wagía lunti wawadigimaridun hama wíbirigu lidan úarani luma darangilaü. Ani lun wibihini mosu ǘnabugu wamá. Kéiburi hamuga anhein acharara somu íbiri woun o lariñagun somu katei le gáriti woun, ida luba san wóunabun? Aba san mererunhadiwa lan lun? Odi áfaaguatiwa lun waransehani katei? Anhein kristiánugu wabéi ha derebuguti hafiñen, wóuchuba waransehani turóbuli lubaragiñe waweiridaguagüdüni.

¹³ Samina humá luagun lani aban íbiri gíriti Uwe hénpulu. Hanarimetiha lasafaragun dan le hachararun íbirigu. Luagu aban weyu, aba desidírü lan laturiahani libagari Dawidi tidan Bíbülia luma tidan líburu Perspicacia. Ka uagu lanúadirei libagari Dawidi? Ladüga gaturobulinti lan meha giñe Dawidi hama amu lubúeingu Bungiu. Kéiburi dan le lálugunbei urúei Saulu láfaruni. Lidan amu ókaasion álugatiña giñe fiú ísüraelina híchaagun dübü luagu. Ani luagu aban weyu, íbini lani weiriou adügatu bula lau (1 Samueli 19:9-11; 30:1-6; 2 Samueli 6:14-22). Íbini ítara, hínsiñememeti Heowá lun Dawidi ani afiñeti giñe luagu. Gudemehabuti meha giñe houn gürigia. Seremei laturiahani Uwe abahüdaguni le, aba líchugun fe mosu lan láyeihani lani Dawidi hénpulu luma lun lasansiruni ligaburi larihini hachara amu. Furendeiti giñe mosu lan feruduna lániña ha achararutiña lun ani ídeha ligíame lun ñein lan úarani lidan damuriguaü. Ma lunti yebe wasigiruni sun wagía lani íbiri le hénpulu?

GAMADAGUA WAMÁ HAMA HA ÚARAGUABAÑA LUN HEOWÁ

14. Ka meha lanúadahabaña Hesusu lumadagume?

¹⁴ Hínsiñetiña meha sun gürigia lun Hesusu. Adügati meha lun buidu lan hasandiragun amu houngua luma, dandu wügüriña, würiña ítara kei irahüñü hama gürigia derebuguhaña. Íbini ítara, mamadaguati meha lungua hama furumiñeguarügü gürigia. Luagu aban weyu, ariñagati houn lani disipulugu: “Numadagu huguya, anhein hadüga le nubeibei” (Huan 15:14). Gamadaguati meha Hesusu hámarügü gürigia ha úaraguabaña lun luma hama ha hínsiñehabubaña lun Heowá ani seriwi hagía lun. Súdiniti giñe lun gamadagua wamá hámarügü gürigia ha hínsiñehabubaña lun Heowá. Ka uagu?

15. Ka uagu buidu lubéi hadügün nibureintiña umadaguaü hama kristiánugu ha derebuguhali hafiñen?

¹⁵ Buítimati táfunadun furuda dan le ladagarun Weyu tuagu. Ani ítara liña ínsiñeni le harufudubei íbirigu lidan damuriguaü kei Weyu ligía. Ka uagu? Ladüga íderagua lumutiwa lun derebugu lan wafiñen. Anhein nibureingidibu lubéi, subudibaali san kaba lan badüga lau bibagari? Anhein busén bubéi desidírü ban buidu, gamadaguabá hama íbirigu ha barühaña saragu irumu eseriwida lun Heowá ani ha ídehatiña lun ñein lan úarani lidan damuriguaü. Sügühaña íbirigu ha lídangiñe saragu turóbuli lidan habagari ani gayarati híderagunibu anúadahei luwuyeri ibagari le buídutimabei. Ánhabu ásügüra dan hama, híderagubadibu lun desidírü ban buidu luma lun aban ban kristiánu le derebuguti lafiñen (aliihabéi Ebüréu 5:14).

16. Ida liña meha híchugun fiú kristiánugu ha derebuguhaña lidan hafiñen ídemuei tun aban nibureintu?

¹⁶ Haritagua tumuti aban íbiri gíritu Helga dan le lan meha lidan tubéi lagumuhóun irumu leskuelarugu, ayanuhatiña lan meha sun tánigu paaná luagu ka lan hasaminarubei hadügün. Gíbetiña ariñagutiña busén hamá houdin aturiaha tidan luban furendei íñuti. Gama lumoun, aba desidírü tan Helga tamuriahan adundehani hama fiú íbirigu ha derebuguhali hafiñen lidan damuriguaü. Saragu hádangiñe wéinamuhaña meha tuéi. Ariñagatu Helga íderagua hamanu saragu ani ínchaha hamanu lun teseriwidun lidan dan dayarüti. Ani seremei adundehani le híchugubei tun seriwitu kei prekursora luagu seingü irumu. Sügühali saragu dan lúmagiñe dan ligía, ani masakürihantu Helga luagu tayusurun saragu dan lídangiñe tibagari lun teseriwidun lun Heowá dan le nibureingiru.

17, 18. Anhein busén wabéi lun húutima wamá lun Heowá, ka lunbei wadügüni?

¹⁷ Anhein wáyeiha lani Hesusu hénpulu, lederebuguduba wafiñen. Buídutimabei giñe wamadagua luma Heowá ani busentimabadiwa weseriwidun lun. Húutimabadiwa giñe lun Heowá. Ariñagati meha Hesusu houn lani disipulugu: “Durunguagüda huméi hilanpun hadan gürigia, lun danme lan harihini buiti le hadügübei, ábame giñe hadimurehan buiti luagu Wáguchi Bungiu le siélubei” (Matéu 5:16).

¹⁸ Kei aubei warihei, sun kristiánugu ha derebugubaña afiñen gayarati hídehan saragu lidan damuriguaü. Ani subudiwatiña giñe luagu yusu hamani hasaminan buidu. Ida liña san líderaguniwa wasaminan lun desidírü wamá buidu? Ida liña warufuduni inebe lan hasaminan amu woun? Warihibei lidan le aban arütíkulu.