Íbirigu würiña nibureintiña, adüga huméi sun hiyaraati lun aban humá kristiána to buitu

1. Ka lunbei wadügüni lun kristiánugu wamá ha buítiña?

MA WÉIRIGÜDA lumutu wanigi warihin laweiridun aban irahü ani ábanhali wügüri? Genegeti aba lan haweinamudun irahüñü sin háfaagun lun haweinamudun. Gama lumoun, anhein busén wabéi aban wamá gürigia ha afalaruti Hesusu lunti wáfaagun (1 Ko. 13:11; Ebü. 6:1).b Lun aban wamá kristiánugu ha buítiña, mégeitiwa lun gamadagua wamá luma Heowá. Megei wamuti giñe lani sífiri sandu lun líderaguniwa abuiduragüdei wagaburi luma lun wafurendeirun aransera lun gayaraabei lan wanuriagun woungua luma lun waranserun lun wetenirun lun somu buligasion ámuñegü (Ari. 1:5).

2. Ka larufudahabei Agumesehani 1:27 woun, ani kaba wariha lidan aturiahani le?

² Heowá adügübaliña gürigia; ligía adügübalin wügüri tuma würi (aliiha huméi Agumesehani 1:27). Kei wasubudiruni, ámuñegueinarügüti dandu lúgubu wügüri kei túgubu würi, ámuñegueinarügütiña hawariuagua lidan amu katei. Kei hénpulu, ruti Heowá ámuñegueinarügü dasi houn wügüriña luma houn würiña, ani lun hagunfuliruni mégeitiña ámuñegueinarügü iarani luma igaburi (Agu. 2:18). Lidan aturiahani le, wayanuhaba luagu le lunbei hadügüni íbirigu würiña nibureintiña lun aban hamá kristiána ha buítiña. Ani lidan le leweñegua warihibei ka lan lunbei hadügüni íbirigu wügüriña nibureintiña.

ÁFAAGUABA LUN GAGABURI BAN IGABURI LE HÍNSIÑEBEI LUN HEOWÁ

3, 4. Halíaba gayara lan hadarirun íbirigu würiña nibureingiña hénpulu buiti lun háyeihani? (Arihabóun giñe iyawaü).

³ Ayanuhatu Bíbülia hawagu saragu würiña ha meha eseriwidubaña lun Heowá ani hínsiñe ligía houn (aliihabei arütíkulu le burí lídanbei jw.org le gíribei “¿Qué aprendemos de las mujeres de la Biblia?”). Kei lariñaguni bérusu le ídangiñebei lasagarúa aturiahani le, “moun lumuti giñe gátadi hamá”, würiña “lunti deregüda hamá lidan sun katei”. Lanwoun lira, chóuruti añahein lan íbirigu würiña ha buítiña ani derebuguti hafiñen lidan damuriguaü le ñein bubéi ani gayaraati bafurendeirun saragu hámagiñe.

⁴ Anhein aban lubéi íbiri würi nibureingiru buguya, saminabá hawagu fiu íbirigu würiña ha gayaraati báyeihani hagaburi ani lahuuduba bun, áfaagua ban lun báyeihaniña. Lun lira, arihabéi lubuidun hagaburi ani lárigiñe saminabá ida luba lan gayara lan báyeihani. Lidan burí párafu le lunbei warihini wayanuhaba luagu ǘrüwa igaburi le lunbei gagaburi hamani kristiánugu würiña ha buítiña.

5. Ka uagu lunti lubéi ǘnabugu hama würiña kristiána ha buítiña?

⁵ Ǘnabuguni. Würi to ǘnabugutu buiti tumadagua luma Heowá ani buiti giñe tanaagun tungua hama amu (Sant. 4:6). Kei hénpulu, kei le ǘnabugu tubéi ani hínsiñeti Bungiu túguchi le siélubei tun, anuadahatu lun tídehan lidan aransehani le ladügübei Bungiu habügürü ha lúnbaña halidihani damuriguaü hámati ha lúnbaña halidihaniña iduheñu (1 Ko. 11:3).c

6. Ida luba háyeihani íbirigu würiña nibureingiña ǘnabuguni le tarufudubei Rebeka?

⁶ Wayanuhan tuagu Rebeka. Aban meha würi chuti tau ani ganigitu ani subudi tumuti meha ídaba lan ani ida luba lan tadügüni katei (Agu. 24:58; 27:​5-17). Gama lumoun, aba meha giñe würi inebehabutu ani gaganbaditu (Agu. 24:​17, 18, 65). Ánhabu ǘnabugu ani inebehabu buguya lun lugumadin Bungiu kei Rebeka, ábanbadibu gürigia buitu houn biduheñu luma lun damuriguaü.   

7. Ida luba háyeihanu íbirigu würiña ha nibureingiña Esütérü?

⁷ Manaaguni ungua. Ariñagatu Bíbülia “hámañein ǘnabugubutiña lichú aau” (Ari. 11:2). Aban meha lubúein Bungiu úaraguatu Esütérü to meha arufudubalin igaburi le. Kei hénpulu, dan meha le híridubarun urúeime, manaaguntu meha tungua. Lanwoun lira, aganba tumuti meha ani sigitei adundehani le líchugubei Marüdokéu le tiduhe tun (Esü. 2:​10, 20, 22). Gayaraati báyeihani igaburi le tarufudei luáguti ǘnabuguni luma manaagun tan tungua lau bamuriahan adundehani luma lun badügün gasu lau le ariñawagúbei bun (Titu 2:​3-5).

8. Ida luba hafalaruni íbirigu würiña adundehani le lídanbei 1 Timotéu 2:​9, 10 lau hanúadiruni ligaburi hasansiragun luma haranseragun houngua?

⁸ Ariha wamá ábaya igaburi le ñein lubéi tarufudei Esütérü igaburi le. “Magadiñetu” meha, gama lumoun, máfaaguntu lun tapantaha lau lira (Esü. 2:​7, 15). Ida luba báyeihani tigaburi? Aban lídangiñe igaburi le afuranguagüda lumuti 1 Timotéu 2:​9, 10 (aliihabei). Lidan bérusu burí le, ariñagati apostolu Pábulu houn íbirigu würiña lunti lan hadaüragun keisi lubudubu. Dimurei güriegu le layusurubei Pábulu lunti lan hadaüragun würiña kristiána keisi lubudubu lidan aban lubuidun igaburi luma lun gabaroun hamani le hasandirubei amu. Ma wagundan hau íbirigu würiña ha arufudubalin derebugu lan hafiñen lau ligaburi hasansiragun!

9. Ka wafurendeirubei túmagiñe Awigaili?

⁹ Gunfurandaü. Ligiaméme igaburi le luma tayusuruni gürigia tichügü, mini lan le, tasubudiruni le buídubei lumoun le wuribabei ábati tanúadirun tadügüni le buídubei. Ariha waméi le tadügübei Awigaili. Wuribati meha le lanúadirubei tani weiriei, ábati tíchugun fe luagu le lunbei lasuseredun houn sun ha awinwandubaña túbiñe. Adüga tumuti Awigaili katei lau lóufudagun, seremei lichú aau le tarufudubei séfutu saragu ibagari (1 Sam. 25:​14-23, 32-35). Íderagua lumutiwa giñe gunfurandaü lun wasubudiruni kaba lan dan wayanuhan luma kaba lan dan wámanichun lúmati lun berese wamá hau amu, gama lumoun, sin wadügün lun wuriba lan hasandiragun houngua (1 Tesa. 4:11).

FURENDEIBÁ SOMU IARANI LE LUNBEI LAHUUDUN BUN

10, 11. Kaba buiti basagara lau bafurendeirun aliiha luma abürüha? (Arihabóun giñe iyawaü).

¹⁰ Buiti lun hafurendeirun íbirigu würiña somu iarani le gayaraabei lahuudun houn ámuñegü. Fiu lídangiñe katei le bafurendeirun lidan biñüraü lahuuduba bun lidan sun bibagari. Ariha wamá fiu lídangiñe.

¹¹ Furendeibá aliiha luma abürüha buidu. Anihein burí ítaga rasa marihin hamuti súdini lan tafurendeirun aban würi aliiha luma abürüha. Gama lumoun, buiti lira houn sun kristiánugu (1 Tim. 4:13).d Ligíati, mígiraba lun heredehani ni aban bafurendeirun aliiha luma abürüha. Kaba buiti basagara? Luagu aban oubaü, ménrengubei bun badarirun luma lun bakipurun aban wadagimanu lun banuriagun bungua. Luagu le aban oubaü, gayaraati aban ban máisturu buitu tidan Lererun Bungiu. Ani le buídutimabei lídangiñe sun katei, lederebudagüdübei bumadagua luma Heowá baliihanu Bíbülia ani ráramagua buguya asaminara luagu le baliihabei (Hos. 1:8; 1 Tim. 4:15).

12. Ka larufudahabei Ariñawagúni 31:26 bun?

¹² Furendeibá ayanuha buidu luma aganbaña gürigia. Ligía aban iarani súdiniti houn sun kristiánugu. Ruti disipulu Santiagu aban adundehani buiti libügürü katei le, lariñaga: Lunti lan aranseñu lan aban gürigia “lun laganbun, gama lumoun lunti hámaru lan lun ladimurehan” (Sant. 1:19). Bíchugun arigei dan le layanuhóun bun ligía aban igaburi le buiti lun barufuduni luagu berese ban hau gürigia (1 Fe. 3:8). Anhein machourun bubalin luagu abuhán lan gunfurandei le ariñawagúbei bun o le hasandirubei ha ayanuhabaña buma, adügabéi álügüdahani houn lau inebesei. Lárigiñe, raramaguabá asaminara lubaragiñe bóunabuni (Ari. 15:28). Álügüdaguaba bungua: “Le san lubéi nariñaguni inarüni san? Líchuguba san gurasu? Lau san inebesei nariñagei? Arufudatina san gudemehabu?”. Saminabá hawagu íbirigu würiña ha derebuguti hafiñen ha subudiwabaña luagu gagaburi hamani igaburi le ani furendeibá hámagiñe (aliihabei Ariñawagúni 31:26). Tenibá lun le hariñagubei luma ida liña lan hariñaguni. Áfaaguaba lun báyeihani igaburi le, ani éibume gagaburi bani barihubei bungua buídubei lan banügagun bungua hama amu.

13. Ida luba bafurendeiruni fisiu le tánina muna? (Arihabóun giñe iyawaü).

¹³ Furendeibéi fisiu tánina muna. Lidan saragu fulasu, würiña etenirubaña lun liibe-agei beresegu le múnadabei. Másiñati gayara lan tarufudahani búguchu o aban íbiri to wéiriaru bun ida liña lan ladügüniwa. Ariñagatu aban íbiri gíritu Cindy: “Aban lídangiñe idewesei le gebegitimabei le tíchugubei núguchu nun tarufudaha nun, dan le tawadigimaridun aban gürigia saragu, buiti tasandiragun tungua. Lau nafurendeirun ábougua, arumadaha múnada, áhüchagua luma nidin agañeiha adügati lira lun ménrenguntima lan nibagari ani íderagua lumutina lúntima naganwoundagüdüni neseriwidun lun Heowá. Arufudahatu núguchu nun lun geresibiradi nan gürigia múnada, seremei igaburi le gíbetiña íbirigu nasubudiragun dandu eyeriñu kei hiñaruñu ha buítiña, ha úmagiñebei nafurendeira saragu” (Ari. 31:​15, 21, 22). Würiña ha gawadigimaridadibaña ani ha geresibiradibaña gürigia hábiñe subudi hamuti ida luba lan hetenirun houn gürigia ani aban abiniruni hagía houn haduheñu luma lun damuriguaü (Ari. 31:​13, 17, 27; Adü. 16:15).

14. Ka bafurendeirubei lídangiñe le tariñagubei Crystal, ani kaba un betenira?

¹⁴ Furendeibá lun banuriagun bungua. Sun kristiánugu ha buítiña ani derebuguti hafiñen lunti hafurendeirun anuriagua houngua luma lun hagundaarun lau le hámabei (Fili. 4:11). Ariñagatu aban íbiri gíritu Crystal: “Dan meha le nibureingidina ani naturiahaña meha, anuhein meha fiu külase to meha gayaraaboun nanúadirun ani aba hariñagun nagübürigu nun lun lan nanuadiha fiu tídangiñe to ñein lubéi gayara lan nafurendeirun aban fisiu le gayaraabei lahuudun nun. Kei hénpulu, aba lariñagun núguchi nun lun nafurendeirun contabilidad, ani huuti lira nun”. Amu luéi bafurendeirun lun bibihin aban wadagimanu, lunti giñe bafurendeirun ida luba lan bahandilihani seinsu le bagañeirubei (Ari. 31:​16, 18). Ánhabu mádaragun bungua lidoun dúeiti le memegeirun bumuti ani gunda buguya lau mibe lan búmati, gayaraabei betenirun lun baganwoundagüdüni beseriwidun lun Heowá (1 Tim. 6:8).

ARANSEBÁ LUBÁ ÁMUÑEGÜ

15, 16. Ka uagu weiri lubéi hebegi íbirigu würiña mamarieidungiña? (Márükosu 10:​29, 30).

¹⁵ Ánhabu gagaburi igaburi le hínsiñebei lun Heowá ani furendei buguyame fisiu le gayaraabei lahuudun lidan bibagari, aransetimabadibu lubá ámuñegü. Ariha wamá fiu katei le gayaraabei badügüni.

¹⁶ Gayaraati berederun fiu dan mamarieidunga. Ítara kei lariñagun Hesusu añahein anúadirutiña lun herederun mamarieidunga íbini hechu hama gürigia ha ñein lubéi hawinwanda adügüdara hawagu lun gámari hamá (Mat. 19:​10-12). Añahein amu aba herederun hábugua ladüga ámuñegueinarügüti katei le gádanbaliña. Anhein mamarieidungidibu lubéi, chóurubei gebegi ban lun Heowá luma lun Hesusu. Lidan sun ubóu, íbirigu würiña ha hábuguarügübaña gebegitiña saragu lidan damuriguaü. Ínsiñeni inarüniti le harufudubei adügati lun harihinúa keisi ítunu luma úguchuru lidan inarüni (aliihabei Márükosu 10:​29, 30; 1 Tim. 5:2).

17. Kaba íderaguaña íbirigu würiña nibureintiña ibihei le habusenrubei hadügün lidan heseriwidun lun Heowá?

¹⁷ Gayaraati beseriwidun lun Heowá lidan dan dayarüti. Liibe-agei apurichihani lidan sun ubóu íbirigu würiña adügübalin (Sal. 68:11). Gayaraati san badügün aransehani lúmagiñe guentó lun beseriwidun lidan dan dayarüti? Másiñati gayaraati lan beseriwidun kei prekursora, bídehan lidan ábunaguni o beseriwidun Betelirugu. Kaba íderaguabu lun bibihini le babusenrubei badügün lidan beseriwidun? Furieibá lun Heowá, ayanuhabá hama íbirigu ha eseriwidubaña lidan dan dayarüti ani álügüdahaba ka lan mégeiwabei. Lárigiñe, ábürühabei le lubéi badügüni lun gayaraabei lan bibihini le babusenrubei badügün lidan beseriwidun. Ánhabu eseriwida lidan dan dayarüti, bibihuba saragu chansi buiti le lunbei lagundaaragüdünibu lidan beseriwidun lun Heowá.

18. Ka uagu súdini lubéi lun buidu lan tanúadirun aban íbiri kaba lan uma tamarieida? (Arihabóun giñe iyawaü).

¹⁸ Dan le banúadiruni anhein bamarieiduba lubéi. Igaburi luma iarani le akutiha wamaalibei darí guentó gayaraabei líderagunibu lun aban ban würi buitu danme le bamarieidun. Inarüni, anhein busén bubéi bamarieidun, lunti banúadiruni buidu kaba lan uma bamarieida. Ligía aban lídangiñe anúadiruni súdinitimati le lunbei banúadiruni lidan bibagari. Haritaguabei wügüri lan le unbei úmaba lan bamarieida ligíaba lan bichügüdina (Rom. 7:2; Efe. 5:​23, 33). Ligíati, álügüdaguaba bungua: “Aba san kristiánu derebuguti tafiñen ligía? Arihúati san luagu le lan súdinibei lun lumadagua lan luma Bungiu? Buíduburiti san le lanúadirubei? Ánhati san lun lichara? Inebetiña san hiñaruñu lun? Gayaraabei san lóunigirunina lidan numadagua luma Bungiu, líchuguni le nemegeirubei nun luma lun letenirun lun le nasandirubei? Gúnfuliti san lau lidasin? Kei hénpulu, ka lidasinbei lidan damuriguaü, ani ida liña ladügüni?” (Luk. 16:10; 1 Tim. 5:8). Kei le aubei warihei, anhein busén bubéi badarirun aban wügüri buiti, lunti báfaagun lun aban ban würi buitu.

19. Ka uagu gayara lubéi wariñagun luagu aban lan lubuidun chansi “ídemuei” tan aban würi?

¹⁹ Ariñagatu Bíbülia aban lan würi to buitu aban tan “ídemuei” sunsuinagubei lun tani weiriei (Agu. 2:18). Ǘnabugüda lumutu san katei le aban würi? Úa mítaranti, le linarün katei, aban uéiriguni lira tun aban würi. Anihein dan ariñagatu Bíbülia luagu Heowá ‘ídemuei’ lan (Afu. 18:4; Ebü. 13:6). Aban ídemuei buitu aban würi dan le tídehan luma le lanúadirubei tani weiriei lun buidu lan lidin houn tílana haban. Lanwoun lira, kei hínsiñe lubéi Heowá tun, áfaaguatu lun tídehan lun buidu lan lidin lun tani weiriei (Ari. 31:​11, 12; 1 Tim. 3:11). Anhein basaminaruña lubéi bamarieidun, gayaraati baranserun lúmagiñe guentó ederebudagüdei ínsiñeni le basandirubei luagu Heowá luma lun báfaagun lun aban ban “ídemuei” buitu dandu húbiñe kei lidan damuriguaü.

20. Ka buiti gayaraabei tadügün aban úguchuru hawagu tílana tuban?

²⁰ Gayaraati gasanigubadibu lan. Ánhabu amarieida, gayaraabei lachülürüba lan dan lun úguchuru ban (Sal. 127:3). Ligíati, buídubei lun basaminarun kaba lan bemegeira lun aban ban úguchuru buitu. Chóuruti igaburi lan luma iarani le warihibei lidan aturiahani le líderagubadibu saragu. Lau bínsiñehabu, bareini luma buguraasun lídehaba lira lun gunda hamá tílana buban ani haweinamuduba bisaanigu chóuruñu ani lau ínsiñeni (Ari. 24:3).

21. Ka hasandirubei hawagu wábirigu würiña, ani ka uagu? (Ariha humóun iyawaü to luáguboun tidoun garüdia).

²¹ Íbirigu würiña nibureingiña hínsiñewatiña, hínsiñetün woun luagu sun le hadügübei luagu Heowá luma hawagu lumutuniña (Ebü. 6:10). Áfaaguaadün saragu lun gagaburi humani igaburi le hínsiñebei lun Heowá, furendeitün iarani le lunbei labuiduragüdüni hibagari luma habagari ha geyegubaña hau ani aranseñu hiña buidu lubá ámuñegü. Sun huguya, espechalitimati hebegi tun lóundarun Heowá!