Íbirigu wügüriña nibureintiña, adüga huméi sun hiyaraati lun aban humá kristiánu le buiti

1. Ka lunbei hadügüni wügüriña kristiánugu lun buidu lan lidin houn?

ABA lariñagun urúei Dawidi lun Salomón: “Ganigibá, óuseraba kei aban wügüri” (1 Uru. 2:​1-3). Sun wügüriña ha kristiánugu buídubei hadüga lun hafalaruni adundehani le. Lun buidu lan lidin houn, lunti hafurendeirun gaganbadi lun lilurudun Heowá luma lun híchuguni adundehani le tídangiñebei Bíbülia lidan habagari (Luk. 2:52). Ka uagu súdini lubéi lun aban hamá kristiánugu buítiña íbirigu nibureingiña?

2, 3. Ka uagu súdiniti lubéi lun aban hamá kristiánugu buítiña íbirigu nibureintiña?

² Anihein saragu dasi súdiniti hama kristiánugu wügüriña, dandu hadan haduheñu kei lidan damuriguaü. Anhein aban bubéi íbiri nibureinti amürü, chóuruti saminaadibu lan luagu dasi le lunbei gani bani ámuñegü. Másiñati basaminaruña lan lun beseriwidun kei prekursoru, ídehati lidan damuriguaü ani ámuñegü kei wéiyaali lidan afiñeni. Háfuga busén ban bamarieidun luma lun gasaanigu ban (Efe. 6:4; 1 Tim. 3:1). Lun gayara lan bibihini sun katei le, luma lun buídubei lan lidin bun lunti aban ban kristiánu le buiti ani le derebuguti lafiñen.b

³ Kaba íderaguabu lun aban ban kristiánu buiti ani le derebuguti lafiñen? Ka iarani súdiniti lúntibei bafurendeiruni ani gayaraagua amürüme bungua buidu lidan? Ani ida luba baranserun guentó lun bagunfulirun lau bidasin ámuñegü? Ariha waméi.

KABA ÍDERAGUABU LUN ABAN BAN KRISTIÁNU LE BUITI?

4. Halíaba badarira hénpulu buiti? (Arihabóun giñe iyawaü).

⁴ Anuadirabá burí hénpulu buiti lun báyeihani. Gayaraati barihini luagu buíntiña lan Bíbülia lau hénpulu buiti le hani wügüriña úaraguatiña ha hínsiñeti Bungiu houn ani góunigi hamaaña lumutuniña lidan ámuñegueinarügü igaburi. Chóuruti gayara lan badarirun hénpulu buiti le hani wügüriña derebugu tafiñen haganagua biduheñu o lidan damuriguaü le ñein bubéi lun báyeihani (Ebü. 13:7). Lanwoun lira, anihein giñe hénpulu le buídutimabei, le lani Hesusu (1 Fe. 2:21). Danme burí le baturiahani sun burí hénpulu le, tenibá lun lubuidun burí igaburi le badarirubei luagu kada aban hádangiñe (Ebü. 12:​1, 2). Lárigiñe, ábame basaminarun luagu le lunbei badügüni lun bafalaruni hani hénpulu.

5. Ka lunbei badügüni lun bibihin lichú aau luma gunfurandaü, ani ka uagu súdini lubéi? (Sálumu 119:9).

⁵ Ragüba luagu “lichú aau luma gunfurandaü” (Ari. 3:21). Wügüriña ha gagaburibalin igaburi le díreitiña dan lun hasaminaruni kaba lan hadüga. Ligíati, áfaaguaba lun gagaburibani igaburi le ani meferidirabéi. Ka uagu? Lidan ubóu le añahein saragu nibureintiña ígiraguagüdatiña houngua lun ladundehaniña hasaminan luma le hasandirubei (Ari. 7:7; 29:11). Lanwoun lira, gayaraati giñe tadügün bigibigitu, pikchá, Internet luma burí páhina le ñein lubéi hadügǘwa umadagu lun gani lan lidan ligaburi bisaminan luma badügüni katei. Ligíati, ka lunbei badügüni lun lachuudun bau luma lun gunfuranda ban? Furumiñe, lunti bafurendeiruni adundehani le tídanbei Bíbülia luma lun basaminarun ka lan uagu buidu lubéi bun le lariñagubei Heowá. Ani lárigiñe, yusubéi le furendei baalibei lun badügüni le aubei lagundaara Heowá (aliihabei Sálumu 119:9). Ánhabu afurendeira asaminara lidan igaburi le, líderagubadibu lun aban ban kristiánu le buiti (Ari. 2:​11, 12; Ebü. 5:14). Guentó warihaali ida luba lan líderagunibu lichú aau luma gunfuranda 1) lidan bóuseruniña íbirigu würiña, ani 2) lidan baranseragun bungua.

6. Ida luba larufuduni aban nibureinti le chuti lau ani gunfuranda ligía inebe hamá íbirigu würiña lun?

⁶ Líderagubadibu lichú aau luma gunfurandaü lun inebe hamá würiña bun. Kei hamuga guentó, másiñati busén lan aban nibureinti lasubudirun aban íbiri buidu. Úati ni kata wuribati luagu lira. Gama lumoun, aban nibureinti le furendeihali asaminara, mabürühanbei, mariñagun ligíame ani madügün ligíame ni kata le lunbei ladügün lun tasaminarun hínsiñe tan lun, ánheingubeirügü lasaminaruña lubéi lamarieidun tuma (1 Tim. 5:​1, 2). Ánheinti ladari tubéi, lóunigirubei lubuidun tiri ani meredebaña hábugua ánhaña úa somu gürigia hama (1 Ko. 6:18).

7. Ida luba líderaguni lichú aau luma gunfurandaü aban nibureinti luáguti laranseragun lungua?

⁷ Ábaya igaburi le ñein lubéi larufudei aban nibureinti furendeihali lan asaminara kei lasaminarun Heowá lau ligaburi ladaüragun luma lau ligaburi lásaruni lídiburi luma lamurigun. Liibe-agei dan ha adügübarun daüguaü hama ha agumeiraguagüdübaña luáguti iseri estaili úati inebe lan Heowá houn ani wíyeti hanügüni habagari. Ligíati hadügübei daüguaü murutu ani adügatiña lun henege hamá würiña wügüriña. Aban nibureinti le áfaagubei lun aban lan kristiánu derebuguti lafiñen gabaroun lubéi adundehani le tídanbei Bíbülia luma lubuidun hénpulu le lídanbei damuriguaü lidan lóurate lanúadirun ida luba lan lasansiragun luma laranseragun lungua. Gayaraati lálügüdagun lungua: “Arufuda lumuti san le nanúadirubei yusu nan lichú aau ani inebe lan hasaminan amu nun? Arihúati san luagu ligaburi nadaüragun neseriwiduña lan lun Bungiu?” (1 Ko. 10:​31-33; Titu 2:6). Nibureintiña ha ayusurubaña lichú aau luma gunfurandaü mama gáñeirügü hamuti henebenehabu íbirigu, arufuda hamuti giñe inebe lan Háguchi Bungiu le siélubei houn.

8. Ida luba lafurendeirun aban íbiri nibureinti lun lafiñerúniwa luagu?

⁸ Afiñewa lan buagu. Mini lan le gúnfuliba lau sun dasi le íchugubei bun (Luk. 16:10). Saminabá luagu lubuidun lani Hesusu hénpulu. Marufudunti meha mebereseni ani gúnfuliti meha lau sun dasi le íchugubei lun. Ani adüga lumuti meha sun le lariñagubei Heowá lun lun ladügüni, íbini anihein lan meha lídangiñe hénrenguti. Hínsiñetiña meha gürigia lun, lántima disipulugu ani aranseñu liña meha lun líchuguni libagari hawagu (Huan 13:1). Ítara kei Hesusu áfaaguaba lun bagunfulirun lau furumiñeguarügü dasi le íchuguti bun. Anhein ibidiñe lubéi bun ida luba lan badügüni, ǘnabugu ban, amuriahabá ídemuei luma somu íbiri le derebuguti lafiñen. Ualá gufuruma ban lau badügün murusun (Rom. 12:11). Adügabéi sun le uágubei lariñawagúa bun lun badügüni, adügabéi kamá hamuga badügüñein lun Heowá “mama houn gürigia” (Kol. 3:23). Inarüni bachararuba lan, ligíati ǘnabuguba ani anhabá lun bichara (Ari. 11:2).

FURENDEIBÁ SOMU IARANI LE LUNBEI LAHUUDUN BUN

9. Ka uagu buidu lubéi lun lafurendeirun aban nibureinti somu iarani le lunbei lahuudun lun?

⁹ Lun aban ban kristiánu le buiti mégeitibu bafurendeirun somu iarani le lunbei lahuudun bun. Líderagubadibu iarani burí le bafurendeirubei lun bagunfulirun lau dasi lidan damuriguaü luma lun badarirun wadagimanu ani kipubeime ani líderagunibu giñe lun banuriagun bungua, banuriahaniña biduheñu lúmati lun buidu lan banaagun bungua hama amu. Ariha wamá fiu lídangiñe.

10, 11. Ka uagu buidu lubéi lun aban nibureinti luma lun damuriguaü lafurendeirun aliiha luma abürüha buidu? (Sálumu 1:​1-3; arihabóun giñe iyawaü).

¹⁰ Furendeibá aliiha luma abürüha buidu. Ariñagatu Bíbülia wügüri lan le gúndaabei ani buiti lidin lun aliiha lanu Lererun Bungiu sagü weyu ani ráramagua ligía asaminara luagu le laliihabei (aliihabei Sálumu 1:​1-3). Ítara liña lasubudiruni ka lan lisaminanbei Heowá, ani íderagua lumuti katei le lun lasaminarun lau lichú aau luma lun furangutima lan lun (Ari. 1:​3, 4). Mégeiwatiña wügüriña hiibe ha lidan damuriguaü. Ka uagu?

¹¹ Mégeitiña sun íbirigu dandu wügüriña kei würiña ídemuei hámagiñe wügüriña lun harufudahan luma lun híchugun adundehani buiti houn le tídangiñeti Bíbülia (Titu 1:9). Anhein galiiradi bubéi ani gábürüdadi amürü buidu gayaraabei waranserun yanu luma óunabagülei le buiti ani le gayaraabei lederebudagüdüni hafiñen amu. Luagu le aban oubaü, danme le baturiahan ani aganba buguya yanu lidan adamuridaguni luma lidan adamurini, gayaraabei babürühani puntu le hínsiñetimabei bun lun bederebudagüdüni bafiñen luma lun bíchugun dǘgüdaguaü houn amu íbirigu.

12. Kaba íderaguabu lun gayanuhadi ban buidu hama amu?

¹² Furendeibá ayanuha buidu luma aganbaña gürigia. Súdiniti lun gagaburi hamani sun wügüriña kristiánugu igaburi le. Le lílabei le, lunti lan baganbuniña gürigia ani gunfurandabeime le hasaminarubei luma le hasandirubei (Ari. 20:5). Gayaraati bafurendeiruni le labusenrunbei aban gürigia lariñagun lau ligaburi lumalali, ligibu luma lau ligaburi lánhingichuni lúgubu. Furendeiwati katei le láurügü lasügürǘniwa dan hama gürigia. Anhein súnwandan lubéi bau ayanuha luéigiñe gágamuru o luéigiñe teknolohía ani abürüha amürü burí mensahe hénrengutimabei bun bayanuhan gagibugu hama amu. Ligíati áluahaba chansi lun bayanuhan gagibugua hama amu (2 Huan 12).

13. Ka amu burí katei lunbei lafurendeiruni aban íbiri nibureinti? (1 Timotéu 5:8; arihabóun giñe iyawaü).

¹³ Furendeibá awadigimarida lun banuriagun bungua. Aban kristiánu le buiti lunti gayaraagua lan lungua lun lanuriagun lungua ani anuriahalañame tílana luban (aliihabei 1 Timotéu 5:8). Anihein burí ageiraü, le ñein lubéi gayara lan hafurendeirun nibureintiña somu fisiu lúmagiñe háguchi o hámagiñe amu haduheñu, anhein lidan amu burí ageiraü másiñati mosu lan houdin tidan somu leskuela le ñein lubéi larufudahóua somu fisiu. Lidan furumiñeguarügü kesi buiti lun bafurendeirun somu fisiu lun banuriagun bungua (Adü. 18:​2, 3; 20:34; Efe. 4:28). Benefabá lidan buadigimari ani gumubei katei le badügübei. Ítara luba buídubei lan biri, ani chourubéi gayaraabei lan bibihin aban wadagimanu ani kipubeime. Igaburi luma burí iarani le uágubei wayanuhan líderagubadibu lun bagunfulirun lau amu dasi le lunbei bibihini ámuñegü. Ariha wamá fiu lídangiñe.

ARANSEBÁ LUBÁ ÁMUÑEGÜ

14. Kaba íderaguei aban nibureinti lun laranserun lun leseriwidun lun Heowá lidan dan dayarüti?

¹⁴ Gayaraati beseriwidun lun Heowá lidan dan dayarüti. Saragu íbirigu ha kristiánu haña ha buítiña ani derebugu ligía hafiñen guentó, gumesetiña eseriwida kei prekursorugu dan meha le nibureingiña. Ánhabu eseriwida kei prekursoru, bafurendeiruba ídeha hamá ámuñegueinarügü gürigia ani bafurendeiruba giñe ayusurei seinsu buidu (Fili. 4:​11-13). Ka uagu magumeserun bubéi eseriwida kei prekursoru ídehati? Íderagua laaña eseriwiduni le saragu íbirigu lun heseriwidun kei prekursoru. Ani gayaraati líderagunibu eseriwiduni le lun beseriwidun lidan amu dasi le lani dan dayarüti, kei burí beseriwidun lidan ábunaguni o betelirugu.

15, 16. Ka gayaraabei ladügüni aban íbiri nibureinti le busenbei leseriwidun kei ídehati lidan damuriguaü o kei wéiyaali lidan afiñeni?

¹⁵ Gayaraati aban ban ídehati lidan damuriguaü o wéiyaali lidan afiñeni. Sun íbirigu lunti háfaagun lun hadügüni le mégeiwabei lun aban hamá wéiyaali lidan afiñe. Ariñagatu Bíbülia íbiri lan le busenbei leseriwidun lidan dasi le houn íbirigu “buiti labusenrubei ladügün” (1 Tim. 3:1). Lun aban ban wéiyaali lidan afiñe furumiñe mosu aban ban ídehati lidan damuriguaü. Íderagua hamutiña ídehatiña lidan damuriguaü wéiyaaña lidan afiñeni lidan saragu ámuñegueinarügü igaburi. Dandu ídehatiña lidan damuriguaü kei wéiyaaña lidan afiñeni seriwitiña lau ǘnabuguni houn hábirigu ani apurichihatiña lau ubebeni. Aban nibureinti gayaraati ladügüni le mégeiwabei lun aban lan ídehati lidan damuriguaü danme le lagumuchun laweiridun. Gayaraati líridun aban ídehati lidan damuriguaü lun wéiyaali lan lidan afiñeni le gayaraaguati lungua murusunraü lárigiñe lagunfulirun 20 irumu.

¹⁶ Anihein tidan Bíbülia le lubéi hadügüni ha busenbaña heseriwidun kei ídehatiña lidan damuriguaü o kei wéiyaaña lidan afiñeni ani ínsiñeni luagu Heowá, hawagu haduheñu luma luagu damuriguaü lébunabei (1 Tim. 3:​1-13; Titu 1:​6-9; 1 Fe. 5:​2, 3). Afaaguaba lun gunfurandabani igaburi le iridúbei ñein, aban katei le gayaraabei líderagunibu lun gunfurandabani, bamuriahan luma Heowá lun líderagunibu agunfulirei.c

17. Ida luba laranserun aban nibureinti lun aban lan wügüri maríeiti luma lun aban lan tílana muna le buiti? (Arihabóun giñe iyawaü).

¹⁷ Lachülürüba dan lun bamarieidun luma lun aban ban hachügüdina tílana muna. Ítara kei lariñaguni Hesusu, añahein íbirigu wügüriña ha buítiña ani derebuguti hafiñen anúadiraaña lun ítarameme hamá maniga weiriou (Mat. 19:12). Ánhabuti amarieida, mosu bárügüdüni lidasin wügüri maríeiti luma lun aban ban ichügüdinaü houn tílana buban (1 Ko. 11:3). Agurabati Heowá lun hínsiñe tan lani wügüri weiriou lun luma lun letenirun lun le temegeirubei lidan tumadagua luma Bungiu, lidan le temegeirubei múnada luma lidan tasandiragun tungua (Efe. 5:​28, 29). Igaburi luma iarani le warihibei lidan aturiahani le —kei burí lichú aau, gunfurandaü, inebesei hawagu würiña luma lafiñerúniwa buagu— laranserubadibu lira lun aban ban wügüri maríeiti le buiti luma lun aban ban giñe hachügüdina tílana muna le buiti.

18. Ida luba laranserun aban nibureinti lun aban lan úguchili buiti ámuñegü?

¹⁸ Gayaraati gasaanigubadibu lan. Ánhabu amarieida, gayaraati gasaanigubadibu lan. Gayaraati larufudaha lani Heowá hénpulu bun saragu lun aban ban úguchili buiti (Efe. 6:4). Ariñaga lumuti Heowá lun Hesusu le lisaani hínsiñe lan lun ani gunda lan lau (Mar. 1:11). Ánhabu gasaani buídubei lun gagaburibani bachoururagüdüni houn gunda ban hau luma lun bariñagun houn buidu lan hadüga dan le hadügün somu katei le buiti. Agübürigu ha asigirubalin lani Heowá hénpulu íderagua hamutiña hasaanigu lun aban hamá kristiánugu buítiña ani ha derebuguti hafiñen. Ida luba baranserun lúmagiñe guentó lun aban ban úguchili buiti? Lau bóuseruniña biduheñu hama íbirigu ha lílana damuriguaü lau ínsiñeni, luma lau bafurendeirun ariñaga houn hínsiñe hamá bun ani gebegi hamá bun saragu (Huan 15:9). Líderagubadibu igaburi le mámarügü ánhabu amarieida o gasaanigu ban, líderagubadibu lúmagiñe guentó lúntima gebegi ban lun Heowá, houn biduheñu luma houn lílana damuriguaü.

ARANSEDIBU SAN LUN BADÜGÜNI?

19, 20. Ka lunbei ladügüni aban íbiri le nibureingili lun aban lan kristiánu le buiti ani le derebuguti lafiñen? (Arihabóun iyawaü to luáguboun tidáü garüdia).

¹⁹ Anhein aban lubéi íbiri nibureingili amürü, haritaguabei mámaba lan ítaraguarügü lun aban ban kristiánu le buiti. Lunti banúadirun hénpulu buiti, báluahan lichú aau, gunfurandaü, lafiñerúniwa buagu, bafurendeirun somu fisiu le huuti luma lun baranserun lubá ámuñegü.

²⁰ Lau basaminarun luagu sun katei le lunbei badügüni, háfuga basaminarun gíbeya lan bun. Gama lumoun, mábürühala barüna, gayaraati bibihini! Mabulieidabei busén lan Heowá líderagunibu (Isa. 41:​10, 13). Ñéinbaña íbirigu dandu wügüriña kei würiña ha lílana damuriguaü burugabu lun híchugun aban húhabu bun. Danme le ábanhadibu wügüri kei le labusenruni Heowá, buídubei bibagari ani gúndaabei. Hínsiñetibu woun saragu ani ayumahatiwa lun lasigirun Heowá abinirei sun áfaaguni le badügübei lun aban ban kristiánu le buiti ani le derebuguti lafiñen (Ari. 22:4).