Haritagua humagili san?
Aliiha humaaru san sun Garüdia Awisahatu to lánina irumu le? Ariha huméi anhein gayara lubéi hóunabuni álügüdahani burí le:
Ka mini lubéi wasansiruni ligaburi wasaminan? (Rom. 12:2).
Mini lan le úa lan buídurügü lan wadügün somu katei buiti. Lunti wakutihani ligaburi wasaminan lun wasubudiruni ida waña lan múnadagiñe wabiti ani adüga wagíame furumiñeguarügü asansiruni le wemegeirubei lidan wabagari lúntima lúaradun luma lilurudun Bungiu (w23.01, páhina 8 luma 9).
Ida luba warihini le asuseredubei ubouagu lau lubudubu?
Beresetiwa lau le asuseredubei ubouagu luma ida liña lan lagunfulirun profesía burí le. Gama lumoun, mabusenrúntiwa wariñaguni le wasaminarubei, le gayaraabei ladügün lun lafanreinragun damuriguaü, lubaragiñe lira, lunti wariñaguni le tafuranguagüdübei lóundarun Heowá (1 Ko. 1:10) (w23.02, páhina 16).
Ka idan amu lan labadiseirun Hesusu hawéi lani disipulugu?
Mítaranti Hesusu kei wagía, lugundun mama meha mosu lederegeragun lungua lun Heowá lugundun lidan aban néchani le deregewaali lungua lun Bungiu lágurahoua. Aban meha wügüri mafigounti, ligíati, mama meha mosu lasakürihan luagu ni kata (w23.03, páhina 5).
Ka gayaraabei wadügüni lun gachansin hamá saragu íbirigu lun híchuguni hóunabagüle lidan adamuridaguni?
Ru wamá óunabagülei chátiti, lun gachansin hama amu íbirigu lun híchuguni hóunabagüle. Lanwoun lira, moun lumuti giñe wayanuha luagu saragu puntu lidan wóunabagüle lun gayaraabei lan wíchugun chansi houn amu lun giñe hóunabun (w23.04, páhina 23).
Katei san “émeri sagüráuti” le iridúbei lidan Isaíasi 35:8?
Lidan hakesin huríu, yúsuati üma le áfuridubei Babilóniagiñe darí Ísüraeli kei aban hénpulu. Anti lidan burí dan le? Saragu san irumu lubaragiñe irumu 1919, gumesewati üma le aransehóua, kei hénpulu, lau imprimírua tan Bíbülia ani sügügüdawa tuguya lidoun amu burí iñeñein. Barǘ lumutuniña “émeri sagüráuti” le lumutuniña Bungiu lidoun darangilaü le hádanbei lau hawinwandun lidan úaraguni, ani ámuñegü heresibirubei abiniruni le lunbei lanügüni Larúeihan Bungiu (w23.05, páhina 15 darí 19).
Ka bián würiña ayusurubaña kei hénpulu ha uágubaña layanuha Ariñawagúni kapítulu 9?
Ayanuhati Ariñawagúni tuagu aban würi “ibidiougua tau” ani ariñagati ha lan afalarubarun añahein lan “lidan habara hilaaña”. Luagu le aban oubaü, ayanuhatu tuagu würi to arufuduboun “lichú aau” ani ariñagati ánhaña lan ánhara gürigia lun tagunbirahan lanügübaña lan lidoun ‘lualin ichügü’ luma ibagari (Ari. 9:1, 6, 13, 18) (w23.06, páhina 22 darí 24).
Ida liña larufudun Heowá gunfurandaü luma ǘnabuguni lidan ligaburi lóuseruni Lotu?
Ariñagati Heowá lun Lotu lun lanuraha Sodomagiñe lun lidin lidoun amu fulasu luagu wübü. Dan le layumuragunbei Lotu lun Heowá lun lígiruni lun lidin Sóarü, ánhati Heowá lun le lamuriahabei Lotu luma (w23.07, páhina 21).
Ka gayaraabei tadügüni aban würi anhein aríagua lubéi tani weiriei iyawaü lánina agamariduni?
Lunti taritagun mama lan tuguya gadurunboun. Buídubei lun tetenirun lun tumadagua luma Bungiu luma lun tararamagun asaminara luagu abahüdaguni tídangiñeti Bíbülia hawagu würiña ha gaturobulinbaña, ani ha unbaña líchiga Heowá dǘgüdaguaü. Gayaraati tíderaguni tani weiriei lun ladisedun luéi katei le anügübalin lidoun luriban échuni le (w23.08, páhina 14 darí 17).
Ida liña líderaguniwa gunfurandaü luma darangilaü dan le layanuha aban gürigia wuriba luagu wafiñen?
Gayaraati warihini álügüdaguni le ladügübei aban gürigia kei aban chansi lun wasubudiruni ka lan lisaminanbei o ka lan adiheridagüdübalin. Líderagubadiwa katei le, lun wóunabun lau darangilaü (w23.09, páhina 17).
Ka wafurendeirubei lídangiñe le tadügübei María lun gayara lan tárügüdün erei?
Dan le tíchugunbei María fe luagu lúguchuboun lan Mesíasi, aba tarabachun hawagu amu. Ruti Gabüriéli tuma Isawéli dǘgüdaguaü tun lau hayusurunu Lererun Bungiu. Gayaraati giñe híchugun wábirigu dǘgüdaguaü woun (w23.10, páhina 15).
Ida liña lóunabuni Heowá wafurieidun?
Füramaseti laganbuni wafurieidun ani gabaroun lumuti le labusenrubei ladügün lidan lóurate lóunabuni (Her. 29:12). Gayaraati lóunabuni Heowá furíei le wadügübei lun lidan ámuñegueinarügü igaburi, gama lumoun, súnwandan líderagubadiwa lan (w23.11, páhina 21 luma 22).
Anhein ayanuha lubéi Rómana 5:2 ya luagu emenigini, ka san uagu liridúa lidan bérusu 4?
Lúmagiñe laganbun aban gürigia luagu uganu buiti másiñati hemenigi lan lawinwandun lidan aban paraísu ya ubouagu. Lau lagagibudagun luma lénrengunga ani awandaléi ani subudi le luagu gunda lan Heowá lau, ábatima lederebugudun lafiñen (w23.12, páhina 12 luma 13).