Ariha wamuti san megei wamá wawanserun lidan weseriwidun lun Bungiu?

1, 2. a) Ida liña lagunfulirun Isaíasi 60:22 lidan lagumuhóun dan le? b) Ka temegeirubei lóundarun Heowá uguñe weyu?

“HA MÍBEBAÑAHA, hóustaruba milu; bianraü gürigia ha, ábanbaña óunwenbu néchani” (Isaíasi 60:22). Lagunfuliruña profesía le lidan lagumuhóun dan le. Kéiburi lidan irumu 2015, añaheinhaña meha 8,220,105 gefentiña luagu Heowá apurichiha lidan sun ubóu. Libügürü awanseruni le, ariñagati Heowá: “Au Aburemeibei, nadügüba lun lasuseredun furese, danme lachülürün dan ligía”. Mini lan le gíbetimabei lan wawadigimari eibu dan. Gumeseediwa san adügei sun wayaraati lun wapurichihani ani arufudaha wameime uganu luáguti Larúeihan Bungiu? Saragu íbirigu wügüriña hama würiña heseriwiduña kei prekursoru ha adügübaña 70 oura luagu hati o kei prekursorugu ídehatiña. Añahein amu ñǘdünhaña lidoun amu fulasu lun hídehan lidan apurichihani. Ani añahein amu hawadigimariduña saragu lidan tábunawagun Luban Wadamuridagun.

² Sagü irumu anihein kéiburi 2,000 iseri damuriguaü. Ani mégeiwatiña wéiyaaña lidan afiñeni hama ídehatiña lidan damuriguaü lun hetenirun lun burí damuriguaü ligía. Ligíati, sagü irumu mégeiwatiña saragu milu íbirigu wügüriña lun heseriwidun keisi ídehatiña lidan damuriguaü ani ha ídehabaña lidan damuriguaü lun wéiyaaña hamá lidan afiñeni. Furanguti súngubei lan wagía lunti waganwoundagüdüni weseriwidun lun Heowá, dandu wügüriña kei würiña (1 Korintuna 15:58).

KÁTIMA MÉGEIWABEI LUN LAWANSERUN GÜRIGIA LIDAN LESERIWIDUN LUN BUNGIU?

3, 4. Ka gayarabei wasaminarun wadügüni lidan weseriwidun lun Heowá?

³ (Aliiha huméi 1 Timotéu 3:1). Ariñagati Pábulu houn íbirigu ha áfaagubaña lun hibihin somu buligasion lidan damuriguaü luagu buidu lan hadüga. Adügati le lariñagubei Pábulu lun wasaminarun luagun aban gürigia le áfaaguti línchuni lúhabu lun lárügüdün aban katei le díseti luéi. Kéiburi anhein busén lubéi aban íbiri lun ídehatibei lan lidan damuriguaü, háfuga líchugun fe mosu lan láfaagun lun larufudun somu igaburi le lunti larufuduni aban kristiánu. Danme le libihini ani iridúa ligíame, lasigiruba áfaagua lun aban lan wéiyaali lidan afiñeni.

⁴ Añahein bandi íbirigu hadügüña asansiruni lidan habagari lun haganwoundagüdüni heseriwidun lun Heowá. Kei hénpulu, háfuga busén hamá heseriwidun keisi prekursorugu, hawadigimaridun Betelirugu o lidan tábunawagun Luban Adamuridaguni. Ariha waméi ida liña gayara lan tíderaguniña Bíbülia lun hasigirun awansera.

SIGÍ WAMÁ AWANSERA LIDAN WESERIWIDUN LUN HEOWÁ

5. Ida liña gayara lan hayusuruni nibureintiña lubuidun hátuadi luma here lidan heseriwidun lun Heowá?

⁵ Ha nibureingiñabaña buiti hátuadi ani héregiña, ani ligía gayara lubéi hadügün saragu katei lidan heseriwidun lun Heowá (aliiha huméi Ariñawagúni 20:29). Fiú hádangiñe nibureintiña ha eseriwidubaña Betelirugu nadagimeintiña adaagua o imprimírü líburu. Añahein amu ídehatiña lidan taransehóun o tábunawagun Luban Adamuridaguni. Añahein nadagimeintiña íderaguaña gürigia ha asufurirubaña ladüga somu chagaguaü lánina liñawan dan. Ani añahein saragu prekursorugu furendeitiña ayanuha amu iñeñein o aba háguyun lidoun amu fulasu lun hapurichihan.

6-8. a) Ka íderagubalin aban nibureinti lun lasansiruni ligaburi larihini leseriwidun lun Bungiu, ani ka resultóu libihibei? b) Ka lunbei wadügüni lun warihini aban lan Bungiu “buiti” Heowá?

⁶ Íbini hínsiñe lan Heowá woun ani busentiwa wíchuguni le buídutimabei lun, gayarati wasandiragun woungua kei aban íbiri gíriti Aarón. Busenti meha lagundaarun lau leseriwidun lun Heowá, gama lumoun magundanti meha lasandiragun lungua. Ñǘdünti meha adamuridagua ani apurichiha ligía lúmagiñe liñüraü, gama lumoun mésebeti ñein. Ka ladügübei?

⁷ Áfaaguati meha lun laliihanu Bíbülia sagü weyu, lun laranserun lubá adamuridaguni ani óunaba ligía lidan. Gumeseti giñe afurieida lun Heowá gabügürügua. Íderagua lumuti sun katei le lun lawanserun lidan leseriwidun lun Bungiu. Ábatima lasubudiruni Aarón Heowá ani aba laganwoundun ínsiñeni le lasandirubei luagu. Ani ítara liña lagundaarun. Aba lagumeserun eseriwida keisi prekursoru, ídehati lidan burí fulasu le asufurirubei ladüga somu liñawan dan ani aba lidin apurichiha lidan amu ageiraü. Guentó ábanhali wéiyaali lidan afiñeni ani leseriwiduña Betelirugu. Ida liña lasandiragun lungua? Ariñagati ariha laali lan lau lagu ‘buiti lan Heowá’. Ani ariñagati giñe busén lan laganwoundagüdüni leseriwidun lun Heowá lun leteingiruni luagu sun le ladügübei luagu. Subudi lumuti ru lan katei le saragu abinirúni lun.

⁸ Ariñagati aban abürühati sálumu: “Houcha humá, ariha humeime luagu buidu lan Aburemei”. Ani lárigiñe aba lariñagun: “Ha áluahabalin Aburemei, memegeirúnbaña ni kata” (aliiha huméi Sálumu 34:8-10). Dan le wíchuguni le buídutimabei lun Heowá, gúndaatiwa ladüga subudi wamani gunda lan giñe Heowá. Ani lagunfulirubei lani füramasei luagu lóunigirubadiwa lan.

MABUCHADALÁ WAWAGU

9, 10. Ka uagu buidu lubéi lun gagurabaguadi wamá?

⁹ Háfuga busén wamá wadügün saragu katei luagu Heowá. Ánheinti lǘhadiwa lubéi agurabaha wibihin somu buligasion lidan damuriguaü o agurabaha lun lasansirun gádantiwa? Anhein asusereda le woun, gaguraasun wamá (Mikeasi 7:7). Háfuga lígiruña Heowá lun lasigirun katei kei lubéi. Gama lumoun afiñe wamá luagu líderagubadiwa lan Bungiu súnwandan. Samina wamá luagun Abüraámü. Füramase haali meha Heowá aban isaani lun, gama lumoun sügüti saragu irumu lubá nasirua lan Isaakü. Lidan anihán lan Abüraámü agurabaha lagunfulirun katei le, gaguraasunti ani meferidirun lumuti lafiñen luagu Heowá (Agumesehani 15:3, 4; 21:5; Ebüréu 6:12-15).

¹⁰ Furanguti hénrengu lan lerederun gürigia agurabaha (Ariñawagúni 13:12). Gama lumoun ánhawa íruda ani ábame werederun asaminara saragu luagun gádantiwa, weferidirubei waguraasun. Buítimati wayusuruni dan lun wáfaagun lun warufuduni igaburi le mégeiwabei lun wibihin buligasion lidan damuriguaü. Ariha wamá ǘrüwa katei le gayarabei wadügüni lidan awanha lan agurabaha.

11. a) Ka igaburi buiti lunbei gagaburi wawani? b) Ka uagu mosu lubéi wadügüni?

¹¹ Kipu wamá lubuidun igaburi. Anhoun waliiha Bíbülia ani samina wagíame luagun le waliihabei, lachuuduba wau, wafurendeiruba asaminara buidu luma lun desidírü wamá buidu. Súdiniti lun hakipuruni íbirigu wügüriña igaburi burí le lun hetenirun lun damuriguaü (Ariñawagúni 1:1-4; Titu 1:7-9). Danme le waturiahanu Bíbülia, wasubudirubei ka lan lisaminanbei Heowá luagu saragu katei. Ani sagü weyu gayarabei wayusuruni le wafurendeirubei lun desidírü wamá buidu. Kei hénpulu, wasubudirubei ida luba lan wóuseruniña amu, ida luba lan wayusuruni seinsu buidu luma ida luba lan wanúadahanu wadaüragun luma isebáhari.

12. Ida liña harufuduni lílana damuriguaü gayara lan lafiñerúniwa hawagu?

¹² Áfaagua wamá lun wagunfulirun buidu lau sun wadagimanu le ichugúti woun. Dan le meha haransehañoun lubéi lumutuniña Bungiu ténpulu, mégeiti meha Neemíasi wügüriña lun híderaguni etenira lun bandi wadagimanu. Kátaña san lanúadirubaña? Ha meha gayarabei lafiñerúniwa hawagu. Subudi lumuti hínsiñe lan Bungiu houn ani luagu heteniruba lan buidu lun furumiñeguarügü wadagimanu le ichugúti houn (Neemíasi 7:2; 13:12, 13). Susereti aban katei ítarati uguñe weyu. Anhein úaragua lubéi aban íbiri ani nadagimein ligía buidu, buídubei layanuhóun luagu. Ani háfuga gayarabei leresibirun lanwoun wadagimanu lidan damuriguaü (1 Korintuna 4:2). Súngubei wagía, dandu wügüriña kei würiña, adüga waméi sun wayaraati lun wagunfulirun lau furumiñeguarügü wadagimanu le ichugúti woun (aliiha huméi 1 Timotéu 5:25).

13. Ida liña gayara lan wáyeihani Hosé dan le wouserúniwa wuriba?

¹³ Afiñe wamá luagu Heowá. Ánhawa lóusera aban gürigia lau marichaü, ka gayarabei wadügüni? Gayarati wafuranguagüdüni lun ida liña lan wasandiragun woungua. Gama lumoun, ánhawa asigira ageindagua luagu waricha, gayarabei wadügün lun laweiridagun turóbuli. Samina wamá luagun lani Hosé hénpulu. Óusera hamuti líbirigu wuriba, ani lárigiñe aba lichugún duru luagun luagu aban katei le mama ladüga ani aba ladaürǘn. Gama lumoun, afiñeti luagu Heowá. Aba lasaminarun luagun lani Bungiu füramasei ani kípuguati lungua úaragu (Sálumu 105:19). Lidan lidaani lénrengunga, arufudati meha fiú igaburi le íderagubalin dan le leresibirubei aban wadagimanu súdiniti (Agumesehani 41:37-44; 45:4-8). Anhein óuseraña láadiwa lubéi aban gürigia wuriba, amuriaha wamá lichú aau luma Heowá. Líderagubadiwa lun wakipurun darangilaü ani lun hínsiñehabu wamá danme le wayanuhan luma gürigia ligía (aliiha huméi 1 Féduru 5:10).

AWANSE WAMÁ LIDAN APURICHIHANI

14, 15. a) Ka uagu lunti lubéi wetenirun súnwandan lun ligaburi wapurichihan? b) Ka gayarabei hadügüni lun héchudun lun amu ligaburi apurichihani? (Ariha humóun iyawaü burí to lídanboun lagumeseha arütíkulu luma rekuáduru “Gayaraati san wouchun amu burí ligaburi apurichihani?”).

¹⁴ Ariñagati Pábulu lun Timotéu lun lan labuiduragüdüni ligaburi larufudahanu Lererun Bungiu. Ani ariñagati giñe lun: “Góunigiguaba buáriuagua, luma lau le barufudahabei” (1 Timotéu 4:13, 16). Barühali meha Timotéu saragu irumu apurichiha. Kati uagu mosu lubéi labuiduragüdüni ligaburi lapurichihan? Ladüga sánsitiña gürigia ani sánsiti giñe gádantiña. Anhein meha busén lubéi Timotéu lun hasigirun gürigia aganbei, mosu meha lasigirun abuiduragüdei ligaburi larufudahan. Mosu giñe wadügüni ligiaméme.

¹⁵ Dan le woudin apurichiha, lidan saragu fulasu úatiña gürigia hábiñe. Lidan burí amu fulasu, añahein hábiñe, gama lumoun siñati webelurun lidoun fulasu le ñein lubéi haganawa. Anhein asusereda katei le woun, háfuga gayarabei wouchun amu ligaburi apurichihani lun wayanuhan hama gürigia.

16. Ida luba wibihin lubuidun resultóu lidan apurichihani ǘmadarugu?

¹⁶ Hénrenguti houn besafu íbirigu hapurichihan lidan fulasu le ñein hamuti bandi gürigia, kéiburi ñein lubéi tárügüdüwa íngiini tuma busu, o mágidurugu luma burí lidan párüke. Ida liña hagumeseruni yanu? Añahein hagía aba hayanuhan luagu somu iseri ñunsu. Añahein amu aba hariñagun somu katei buiti houn gürigia hawagu hasaanigu o aba hálügüdüniña luagu hawadigimari. Ánhaña ariha hínsiñe lan hayanun lun gürigia, aba hafuranguagüdüni lun le tariñagubei Bíbülia ani aba hálügüdüni luagu ka lan lisaminanbei. Ítara liña hibihin hayanuhan hama gürigia tuagu Bíbülia.

17, 18. a) Kaba íderaguawa lun chóurutima lan wasandiragun woungua danme le wapurichihan lidan fulasu le ñein habéi bandi gürigia? b) Ka uagu lahuuduba lubéi ayumahani le lasandirubei Dawidi lun lalawahani Heowá woun lidan apurichihani?

¹⁷ Háfuga hénrengu lan woun wagumeserun ayanuha hama gürigia ha ibidiñetiña woun ǘmadarugu. Ligía asuseredubei lun Eddie, aban prekursoru le erederubei Nueva York. Ka íderagubalin lun lafiñerun luougua? Ariñagati dan le lan hadügüni haturiahan keisi iduheñu, dandu ligía kei lani weiriou áluahatiña ariñahani luagu ida luba lan hóunabun dan le hariñagun gürigia somu katei lun hararamuni yanu. Amuriahatiña giñe ídemuei hama amu Gefentiña. Guentó, hínsiñeti lun Eddie lapurichihan ñein hamuti bandi gürigia.

¹⁸ Ánhawa agundaara lidan apurichihani ani sigí wagíame abuiduragüdei ligaburi wapurichiha, harihibei amu wawanseruña lan (aliiha huméi 1 Timotéu 4:15). Háfuga gayarabei giñe wíderagun somu gürigia lun aban lan gefenti luagu Heowá. Ariñagati Dawidi: “Nalawahabei Nabureme súnwandan, leremuhaba niyuma lun súnwandan. Pántatina lau Aburemei; aganba huméi, gunda huguyame huguya wügüriña ǘnabugutiña!” (Sálumu 34:1, 2).

SIGÍ WAMÁ AWANSERA LUN WÍCHUGUN UÉIRIGUNI LUN HEOWÁ

19. Ka uagu gayara lubéi gunda lan aban lubúein Heowá le úaraguati íbini siñá lan ladügüni sun le labusenrun ladüga gádanti?

¹⁹ Ariñagati giñe Dawidi: “Aburemei, alawahalabu sun le badügübei! Seremei hamabu ha gúnfulibaña buma! Hadimureha luagu luéirigun barúeihan! Hadimureha luagu burí katei gabafuti le badügübei! Subudigüdawalá bubafu houn gürigia luma luéirigun barúeihan!” (Sálumu 145:10-12). Ha hínsiñehabubaña lun Heowá ani úaraguatiña lun busentiña hayanuhan luagu houn amu tídangiñe sun hanigi. Gama lumoun anhein wéiyaadiwa lubéi ani sánditiwa háfuga siñabei wapurichiha muna tuagu muna kei aubei wabusenra. Ka gayarabei wadügüni? Haritagua waméi walawahañein lan Heowá sagü wayanuhan luagu hama gürigia ha geyegubaña wau, kéiburi surusiagu hama anosuhatiña. Ani anhein furisunruguñadiwa lubéi? Íbini ítara, háfuga gayarabei wayanuhan hama amu luagu Heowá. Hínsiñeti katei le lun Heowá (Ariñawagúni 27:11). Hínsiñeti giñe lun dan le weseriwidun lun íbini mabusenrun hamá waduheñu hadügüni ligiaméme (1 Féduru 3:1-4). Íbini lidan lidaani lénrengunga gayarati walawahani Heowá, wabuiduragüdüni wamadagua luma ani awanse wagíame lidan weseriwidun lun.

20, 21. Kaba lani wawanserun lidan weseriwidun lun Bungiu efekütu hawagu amu?

²⁰ Chóuruti labinirubadiwa lan Heowá ánhawa asigira adüga umadaguaü luma ani seriwi wagíame lun lau sun wayaraati. Anhein wasansira lóurate wapurichihan o ligaburi wawinwandun, háfuga gachansintimabadiwa lan lun wíderaguniña gürigia asubudirei sun füramasei le ladügübei Bungiu. Ani háfuga gayaratimabei lan wíderaguniña wíbirigu. Danme le harihini wáfaaguña lan lun weseriwidun lidan damuriguaü, chóuruti hínsiñetimabadiwa lan houn.

²¹ Meberesenga átirihali lan irumu wau eseriwida lun Heowá, súngubei wagía gayarati wasigirun áfaagua lun wabuiduragüdüni wamadagua luma ani awanse wagíame lidan wafiñen. Lidan le aban arütíkulu warihibei ida luba lan wíderaguniña amu lun hawanserun.