Nibureinti, bubaruaguounbá lidan bafiñen lárigiñe babadiseirun

1. Ka katei buiti ibiha hamaalibei saragu nibureintiña darí guentó?

SAGÜ irumu habadiseirun saragu milu nibureintiña kristiánugu. Buguya san aban hádangiñe? Anhein ítara liña lubéi, gúndaatiña íbirigu ha lílana damuriguaü le ñein bubéi bau, gúndaati giñe Heowá lau le badügübei (Ari. 27:11). Saminabá luagu sun le badügübei darí guentó. Kei hénpulu, háfuga aturiaha baaru Bíbülia luagu saragu irumu. Ani adügati le lun bachoururuni Lererun lan Bungiu Bíbülia. Ani le súdinitimabei, guentó subudi baali lan le abürügüdübarun líburu sagüráutu to. Ani sandi hádibu ínsiñeni tuagu. Kei weiri lan ínsiñeni le basandirubei luagu Heowá, ligía banúadirubei bederegeruni bibagari lun luma lun babadiseirun. Ma lubuidun katei le banúadirubei!

2. Kaba wariha lidan aturiahani le?

² Chóuruti lubaragiñe lan babadiseirun gagibuguatibu meha luma sügǘ le óuchagubalin bafiñen. Gama lumoun lau lásügürün dan bagagibudaguba luma amu burí óuchawaguni. Lóuchuba Satanási lun ledebilidun ínsiñeni le basandirubei luagu Heowá ani láfaaguba lun ladisedagüdǘnibu luéi (Efe. 4:14). Mígiraba lun lasuseredun. Kaba íderaguabu lun úaraguaba lun Heowá luma lun bagunfulirun lau le füramasei bubéi lun? Mosu basigirun awansera, mini lan le “bubaruaguounbá lidan beseriwidun lun Heowá” (Ebü. 6:1). Lidan aturiahani le warihiba ida luba lan gayara lan bibihini.

KA GAYARAABEI BADÜGÜNI LUN ABANBÁ KRISTIÁNU LE DEREBUGUTI LAFIÑEN

3. Ka lunbei hadügüni sun kristiánugu lárigiñe habadiseirun?

³ Dan le labadiseirun aban gürigia, lunti lasigiruni adundehani le líchugubei apostolu Pábulu houn kristiánugu ha éfesubaña. Ínchaha lumutiwa lun “gürigia wamá wéinamuhaña lidan wéibugun luma Kristu” (Efe. 4:13). Ítara liña kamá hamuga lariñaguña houn “hubaruaguóun humá”. Góubaguagüda lumuti apostolu Pábulu wawanserun lidan wamadagua luma Heowá luma laweiridun aban irahü. Gúndaatiña agübürigu lau hasaani figigili, gama lumoun siñati lerederun kei irahü figigili lidan sun libagari. Lau lásügürün dan “mosu lígiruni katei le hani irahüñü” (1 Ko. 13:11). Ligiaméme asuseredubei houn kristiánugu: Lárigiñe wabadiseirun mosu wasigirun awansera lidan wamadagua luma Heowá. Ariha wamá fiu adundehani le lunbei líderagunibu lun bibihini.

4. Kaba igaburi íderaguabu awansera lidan bumadagua luma Heowá, ani ka uagu? (Filipuna 1:9).

⁴ Ganwoungüdabéi ínsiñeni le basandirubei luagu Heowá. Furanguti weiri lan línsiñe Heowá bun. Gama lumoun gayaraati aganwoundeina lan ínsiñeni le. Ida? Ariñaga lumuti apostolu Pábulu ida luba lan ladügǘn, ani darí wamuti le lariñagubei lidan Filipuna 1:9 (aliihabei). Amuriahati apostolu Pábulu luma Heowá hawagu íbirigu Filipuna lúntima lan “laweiridun hínsiñehabu”. Mini lan le gayara lan laganwoundun ínsiñeni le wasandirubei luagu Bungiu. Gama lumoun, gayaraati wadügüni lau wibihin “subudi luma gunfurandaü lidan sun katei”. Mini lan, éibutima lan wasubudiruni Heowá, hínsiñetimabei woun ani hínsiñebei giñe ligaburi woun luma ligaburi ladügüni sun katei. Busentiwa wagundaaragüdüni tídangiñe sun wanigi ani mabusenrúntiwa lun wuriba lan lasandiragun lungua lau le wadügübei. Áfaaguatiwa lun wasubudiruni ka lan lagurabubei wámagiñe ani álugatiwa lun wadügüni.

5, 6. Ida luba waganwoundagüdüni ínsiñeni le wasandirubei luagu Heowá? Afuranguagüda huméi.

⁵ Áyeiha lumuti Hesusu ligaburi Heowá buidu buidu, ligíati éibutima wasubudiruni Hesusu hínsiñetimabei Heowá woun (Ebü. 1:3). Aban igaburi buídutimati lun wasubudiruni Hesusu lau waturiahani gádürü Ewanhéliu le tídanbei Bíbülia. Héchutibu san aliihoun Bíbülia sagü weyu? Anhein madügünbagili lubéi, gayaraati bagumeserun lúmagiñe guentó. Danme baliihani le ladügübei luma le lariñagubei Hesusu, tenibá lun ligaburi ladügüni. Manufudetiña meha gürigia lun hayarafadun lun Hesusu luma lun hayanuhan luma; íbini irahüñü óuyuaha lumutiña meha (Mar. 10:13-16). Adügati meha lun buidu lan hasandiragun lani disipulugu houngua luma; ligía manufude habéi hariñaguni le hasaminarubei lun (Mat. 16:22). Ítara liña meha ligaburi Hesusu ladüga ítara liña lan ligaburi Lúguchi le siélubei. Gayaraati wayarafadun lun Heowá. Ligía gayara lubéi wafurieidun lun, gayaraati giñe wariñaguni sun le tídanbei wanigi lun. Ani adüga wamuti lau ichouruni ladüga masaminarunbei wuriba wawagu. Hínsiñetiwa lun ani bereseti wau (1 Fe. 5:7).

⁶ Sanditi meha Hesusu gudemehabu hawagu gürigia. Ariñagati Apostolu Matéu woun: “Dan larihiniña gürigia, aba hagudemedagun lun, ladüga nidiheri hamá, maguraasun hagía, kamá mudún ha móuniritiña” (Mat. 9:36). Ani ida liña larihiniña Heowá gürigia? Dan le layanuhabei Hesusu luagu Lúguchi, ariñagati: “Mabusenrunti Húguchi le siélubei lun leferidirun ni aban hádangiñe ǘnabugutiña ha” (Mat. 18:14). Ma wagundan wasubudiruni weiri lan wínsiñe lun Heowá! Dan le wasubudiruni Hesusu buidu, ladügüba lira lun laganwoundun ínsiñeni le wasandirubei luagu Heowá.

7. Kaba buiti lanüga bun lun gamadaguabá hama kristiánugu ha derebuguhali hafiñen?

⁷ Anihein amu katei le gayaraabei badügüni lun laganwoundun ínsiñeni le basandirubei luagu Heowá luma lun derebugu lan bumadagua luma. Ka lunbei badügüni? Lun gamadaguabá hama íbirigu ha derebuguhali hafiñen lidan damuriguaü. Gúndaañanu íbirigu ha súnwandan. Masakürihantiña lau hanúadirun heseriwidun lun Heowá. Amuriahabá hama lun habahüdahan somu sügǘ bun le winwan hamaalibei lidan heseriwidun lun Heowá. Ani danme le lunti lan banúadirun somu katei súdiniti lidan bibagari, ayanuhabá hama lun híchugun adundehani bun. Ítara kei tariñaguni Bíbülia: “Háhaburuguñein saragu eweridihatiña agañeiruni” (Ari. 11:14).

8. Ka gayaraabei badügüni anhein machourun bubalin le tarufudahabei Bíbülia?

⁸ Aturiahabá luagu katei le machourun bubéi. Ítara kei barihini lidan aturiahani biama, lóuchuba Satanási lun mawanserunbá lidan bumadagua luma Heowá. Aban sádara to layusuruboun lun basaminarun mama lan inarüni sun le bafurendeirubei tídangiñe Bíbülia. Kei hénpulu, gayaraati ladügün somu gürigia lun basaminarun saliguarügü wamá ítaraguarügü mama lan Heowá adügübaliwa. Gayaraati masaminarunbá meha saragu luagu katei le. Gama lumoun, guentó lau niburein hádibu lan, másiñati harufudahañein lan bumaisturugu leskuelarugu bun. Háfuga buiti laganbún le hariñagubei ani másiñati genege lan houn gürigia lafiñerún luagu. Gabarounbei másiña lan maturiahan hamagili lan buidu buidu sun katei le achoururagüdübalin anihein lan aban Bungiu le adügübalin sun katei. Haritagua huméi le lariñagubei Ariñawagúni 18:17, TNM: “Ha furumiñetiña arufudatiña hakesin genegeti garicha hamá darí hayabin amu lun hálügüdaguniña”. Ka adundehani wadarirubei lidan burí dimurei le? Luagu moun lumuti lan bafiñerun luagu sun le ariñawagúbei bun leskuelarugu. Le lunbei badügüni baturiahani buidu buidu le tariñagubei Lererun Bungiu. Aluahabá ariñahani tidan wani agumeiraguagüdüni. Ayanuhabá hama íbirigu ha meha afiñebaña luagu saliguarügü lan sun katei ani álügüdabaña ka lan adügübei lun hafiñerun luagu Bungiu le Adügübalin sun katei ani hínsiñe wagía lun.b Líderagubadibu bayanuhan hama íbirigu ha lun wasaminarun buidu anihein lan aban Bungiu le adügübalin sun katei.

9. Ka wafurendeirubei túmagiñe Melissa?

⁹ Aban íbiri gíritu Melissa íderagua lumutu saragu takutihan luagu sun katei le ladügübei Bungiu.c Ariñagatu: “Dan le hayanuhan máisturugu leskuelarugu luagu saliguarügü lan sun katei adüga hamuti lun hafiñerun gürigia inarüni lan. Furumiñe hanufudetina meha nagagibudagun luma katei le machourun nubéi. Mabusenruntina meha nakutiha luagu burí katei le, ladüga hanufudetina luagu inarüni lan luagu saliguarügü lan sun katei. Ábati nasaminarun mabusenrun lan Heowá neseriwidun lun ítaraguarügü, ligía nakutihabei libügürü katei le. Ábati naliihanu líburu ¿Existe un Creador que se interese por nosotros? tuma burí garüdia ¿Es la vida obra de un Creador?, El origen de la vida. Cinco cuestiones dignas de análisis. Ligía meha nemegeirubei naturiahanu sun ariñahani le. Asakürihatina madügügiñenani”.

10, 11. Kaba íderaguabu awandei óuchawaguni? (1 Tesalónikana 4:3, 4).

¹⁰ Manharabá lun luriban ayumahani. Dan le nibureingili gürigia, ábatima laganwoundun ayumahani le lasandirubei lun lagamaridun, ani háfuga hadügüdarun amu buagu lun badügün magíaguni. Ligía labusenrunbei Mafia lun badügüni. Kaba íderaguabu lun meiguadabá lidoun óuchawaguni le? (Aliihabei 1 Tesalónikana 4:3, 4). Danme bafurieidun lun Heowá, ariñagabéi lun ida liña lan basandiragun bungua ani amuriahabá erei luma (Mat. 6:13). Haritaguabá aranseñu liña lan Heowá lun líderagunibu, mama lun laguseragüdünibu (Sal. 103:13, 14). Gayaraati giñe líderagunibu le tariñagubei Bíbülia. Melissa, to uáguboun layanuhóua lidan párafu le lubaragiñebei le, mosu meha táfaagun lun tígiruni liwiye saminaü. Ariñagatu: “Seremei naliihanu Bíbülia sagü weyu ligía mábürühan lubéi narüna. Haritaguagüda tumutina Bíbülia lun lan Heowá yu lan nibagari ani busentina lun yarafa lan nun súnwandan” (Sal. 119:9).

¹¹ Mama mosu lun babuguarügübá agagibudagua luma turobuli le. Abahüdaguabéi le asuseredubei bun lun búguchi o tun lan búguchu. Inarüni hénrengubei lan bun bayanuhani biturobulin houn amu, gama lumoun súdiniti lun badügüni. Ariñagatu Melissa: “Amuriahatina luma Heowá lun líderagunina lun ganigi nan ani lárigiñe aba nayanuhan luma núguchi luagu le asuseredubei nun. Lárigiñe nayanuhan luma núguchi sanditina aban óunwenbu awalidaguni. Subudi numuti weiri lan lugundan Heowá nau”.

12. Kaba íderaguabu lun banúadirun buidu?

¹² Ígiraba lun ladundehanibu le tariñagubei Bíbülia. Eibu aweirideinabá, hígirubadibu bagübürigu lun banúadiruni le lunbei badügüni. Gama lumoun, mabulieidabei anihagua saragu katei le ibidiñegili bun luáguti ibagari. Ka gayaraabei badügüni lun madügün ban aban katei wuribati le gayaraabei lagadeiruni bumadagua luma Heowá? (Ari. 22:3). Haritaguatu aban íbiri gíritu Kari ka lan tadügübei lun buidu lan le tanúadirubei. Gunfuranda tumuti memegeirun lan aban kristiánu le derebuguhali lafiñen lúrudu tídangiñe Bíbülia lun kada turobuli le úmabei lagagibudagua. Ariñagatu Kari: “Mosu meha gunfuranda nani ka lan lasaminarubei Heowá luagu ítaga katei, mámarügü lun nasigiruni ítaga lúrudu”. Danme baliihanu Bíbülia, álügüdaguaba bungua: “Ka larufudubei abahüdaguni le nun luagu ligaburi lasaminarun Heowá? Anihein somu adundehani ya le lunbei líderagunina lun nadügüni katei buidu? Ánhana gaganbadi lun adundehani le, Ida luba lidin nun?” (Sal. 19:7; Isa 48:17, 18). Ánhabu aliihoun Bíbülia ani ráramagua buguyame asaminara luagu adundehani le tídanbei, ménrenguntimabei bun bagundaaragüdüni Heowá lau katei buiti le banúadirubei. Eibu gunfurandatimabani ligaburi lisaminan Heowá, barihubei memegeirunbá lúrudu lun kada turobuli le úmabei bagagibudagua. Larufudubei katei le bawanseruña lan lidan bumadagua luma Bungiu.

13. Ida luba híderagunibu umadagu buítiña? (Ariñawagúni 13:20).

¹³ Áluaha ban umadagu ha hínsiñeti Heowá houn. Kei warihini lidan párafu 7, gayaraati híderagunibu bumadagu lun bawanserun lidan bumadagua luma Heowá (aliihabei Ariñawagúni 13:20). Tenibá lun tikesin aban íbiri gíritu Sara. Teferidiruñein meha ugundani le tasandirubei lidan teseriwidun lun Heowá, gama lumoun aba lasuseredun aban katei le íderagubarun. Ariñagatu Sara: “daritina umadagu buítiña dántima le nemegeiruniña. Óundaraguatina tuma aban numada sagü dimaasu lun waturiahanu Garüdia Awisahatu, ani ínchaha tumutina ábanya numada lun níchugun óunabagülei lidan damuriguaü. Seremei houn numadagu, aba narihin lisudinin naturiahan nábuguarügü luma nafurieidun. Murusun murusun aba lederebugudun numadagua luma Heowá, ani ábaya nagundaarun”.

14. Ida liña libihin Julien umadagu buítiña?

¹⁴ Ka lunbei badügüni lun badarirun umadagu buítiña? Ariñagati aban íbiri gíriti Julien le wéiyaalibei lidan afiñeni guentó: “Dan meha niburein nubéi, daritina meha umadagu buítiña lidan apurichihani. Apurichihatiña meha lau ubebeni ani íderagua hamutina lun gúndaatima nan lidan apurichihani. Aba nagumeserun asaminara neseriwidun lidan dan dayarüti. Aba giñe níchugun fe neferidiruñein lan meha chansi lun gamadagua nan umadagu buítiña ladüga niseinsigun lan meha náluahabaña númadagume. Dan lárigiñe, daritina giñe umadagu buítiña dan le neseriwidun Betelirugu. Íderagua hamutina lun nafurendeirun anúadira isebáhari buiti, ani adügati le lun buídutima lan numadagua luma Heowá”.

15. Ka eweridihani líchugubei Pábulu lun Timotéu? (2 Timotéu 2:20-22).

¹⁵ Ka lunbei badügüni ánhabu ariha mabuidun lan somu íbiri le lílana damuriguaü lun bumada lan? Subudi lumuti meha apostolu Pábulu añahein lan meha gürigia lidan adamurini kristiánu lánina furumiñeti sígulu ha masaminaruntiña ani móuseruntiña kei kristiánugu. Ligía lariñagubei lun Timotéu lun ladisedun hawéi (aliihabei 2 Timotéu 2:20-22). Áfaaguaadiwa saragu lun gamadagua wamá luma Wáguchi Bungiu le siélubei, ligía moun lubéi gamadagua wamá hama gürigia ha gayaraabei hagadeiruni wamadagua luma Heowá (Sal. 26:4).

LÍDERAGUBADIBU LAGANWOUNDUN BESERIWIDUN LUN HEOWÁ LUN BAWANSERUN LIDAN BUMADAGUA LUMA

16. Ka badügübei lun gayaraabei lan bibihini le babusenrubei lidan beseriwidun lun Heowá?

¹⁶ Houchabá baganwoundagüdüni beseriwidun lun Heowá. Anuadahabá kaba lan badüga lidan beseriwidun lun Heowá lugundun lederebudagüdübei bafiñen ani líderagubadibu lun ábanba kristiánu buiti (Efe. 3:16). Kei hénpulu gayaraabei babuiduragüdüni baturiahan bábuguarügü luma baliihanu Bíbülia (Sal. 1:2, 3). Gayaraabei giñe bafurieidun lun Heowá gabügürügua tídangiñe sun banigi. Háfuga mosu giñe lan bóunigiruni isebáhari le banúadirubei luma lun bafurendeirun ayusurei bidaani buidu (Efe. 5:15, 16). Gúndaati giñe Heowá saragu, dan le larihini báfaaguña lan buidu buidu lun gayaraabei lan bawanserun lidan bumadagua luma.

17. Ka uagu buídubei lubéi lidin bun ánhabu íderagua amu?

¹⁷ Dan le bíderaguniña amu, ábanhadibu kristiánu le derebuguti lafiñen. Ariñagati Hesusu: “Gúndaatimati le íchugubei sügǘ luéi le eresibirubei” (Adü. 20:35, Lererun Bungiu to lánina iseri daradu). Ánhabu ayusurei bidaani, bere lun bíderagun amu, buídubei lidin bun. Ka gayaraabei badügün lun bíderaguniña amu? Kei hénpulu, gayaraabei bíderaguniña íbirigu ha sándibaña o ha derebuguhaña ha lílana damuriguaü lun bidin adügei hani mandóu, o lau bíderaguniña afurendeira ida liña lan tayusurun tablet, gágamuru, luma katei líbeina lira. Anhein aban bubéi nibureinti badiseihali, gayaraabei basaminarun beseriwidun kei ídehati lidan damuriguaü, ítarati gayaraabei beseriwidun houn bíbirigu (Fili. 2:4). Gayaraabei giñe barufuduni bínsiñehabu houn gürigia ha ibidiñegili Heowá houn lau banügüni uganu buiti lánina Larúeihan Bungiu houn (Mat. 9:36, 37). Anhein gachansin bubéi, gayaraabei giñe bídehan lidan dasi le lánina dan dayarüti.

18. Ida liña líderagunibu beseriwidun lidan dan dayarüti lun bawanserun lidan bumadagua luma Bungiu?

¹⁸ Líchuguba eseriwiduni lidan dan dayarüti saragu chansi bun lun bawanserun lidan beseriwidun lun Bungiu. Ánhabu eseriwida kei prekursoru, gayaraabei bidin tidan Leskuela houn Apurichihatiña Larúeihan Bungiu o beseriwidun Betelirugu o bídehan lidan ábunaguni. Arihabéi le tariñagubei aban prekursora nibureintu gíritu Kaitlyn: “Lau napurichiha hama íbirigu ha sügühaña saragu dan lidan heseriwidun lun Heowá adügati lun gayaraabei lan nabuiduragüdüni numadagua luma Heowá lárigiñebei nabadiseirun. Ínchaha lumutina hani hénpulu lúntima laganwoundun naturiahanu Bíbülia luma lun aban nan máistara buitu”.

19. Kaba abiniruni beresibira ánhabu asigira awansera lidan bumadagua luma Bungiu?

¹⁹ Ánhabu asigira awansera lidan bumadagua luma Bungiu, labinirubadibu Heowá saragu. Mayusurun bubéi bere adüga katei le meseriwínti lun ni kata (1 Huan 2:17). Masakürihanbadibu luagu ni kata. Gúndaarügübadibu ani buídubei lidin bun lidan bibagari (Ari. 16:3). Línchahabaña lubuidun bani hénpulu nibureintiña hama íbirigu ha derebuguhaña lun hadügüni ligiaméme (1 Tim. 4:12). Ani létima súdinitimabei basandiruba lan darangilaü ugundani lau basubudiruni gunda lan Heowá bau luma luagu lumadabá (Ari. 23:15, 16).