Ísüraeliba san lagumesera Arümahedón? | Ka tariñagubei Bíbülia?

Mariñaguntu Bíbülia lídanba lan ítaga fulasu lageindawagúa wuribu le gíribei Arümahedón, lubaragiñe lira, ariñagatu aban lan wuribu le lunbei lasuseredun lidan sun ubóu Arümahedón ani ñeinba hageindagua sun urúeigu ubouaguna luma Bungiu.

•  “Sífirigu hagía máfianu [...], aba burí háfuridun óundaraguaña sun urúeigu ha ubouagubaña lubá wuribu le lánina óunwenbu luéyuri Bungiu le Suntigabafu. [...] Ábati hóundaraguniña urúeigu lidan fulasu le gíribei Arümahedón lidan hererun ebüréu” (Arufudúni 16:14, 16).

Dimurei “Arümahedón”, lídangiñeti dimurei ebüréu Har Meghid·dohnʹ, le mini lubéi Wübü “Megidu”. Megidu ligía meha aban lídangiñe binadu uburugu lani Ísüraeli. Ligía hasaminarunbei saragu gürigia Ísüraeliba lan lagumesera wuribu Arümahedón. Lau sun lira, dandu fulasu le ñein lubéi uburugu Megidu kei amu burí fulasu le luéigiñebei oubaü le ñeinhin lubéi lálüda Weyu libiti Asia, ñǘbüriti, ligíati makawebaña hamuga “sun urúeigu ha ubouagubaña” ñein hau sun hasudaranigu.

Yúsuati burí hénpulu lun tabürüdǘniwa líburu Arufudúni (Arufudúni 1:1). Ligía lubeiti, mama aban fulasu le aniheinbei ubouagu Arümahedón, layanuhaña luagu sügǘ le lunbei gadan lániña sun néchanigu ubouagu danme le hóundaragun lun hageindagun luma Larúeihan Bungiu (Arufudúni 19:11-16, 19-21).