Ka san Arümahedónbei?

Óunabagülei le tíchugubei Bíbülia

Aban lagumuhóun wuribu lani Bungiu hama gumadimatiña ubouaguna Arümahedónbei. Láganiñu Bungiu gumadimatiña ha, hau sun ha afalarubaliña, ladüga maha hamá lun Larúeihan (Sálumu 2:2). Lagumuchuba Arümahedón lau harúeihan gürigia (Danieli 2:​44).

Ábanrügüñein wéiyaasu láfuachun dimurei Arümahedón tidan Bíbülia, tídanrügüñein liliburun Arufudúni 16:16. Ariñagatu líburu to, lidan aban profesía, aba lan hóundarawagun “sun urúeigu ha ubouagubaña lubá wuribu le lánina óunwenbu luéyuri Bungiu le Suntigabafu”. Lasusereduba wuribu le lidan aban “fulasu le gíribei Arümahedón lidan hererun ebüréu” (Arufudúni 16:​14).

Kaba ageindagua lidan wuribu Arümahedón? Hesukrístu úara hama lani ánheligu ha siélubaña ani hagumuchuba hau láganiñu Bungiu (Arufudúni 19:​11-16, 19-21). Habadinagua ha lúnbaña heferidiruni wuribu, ñéinbaña sun ha agarabaagubaña luagun Larúeihan Bungiu, habu sun ha óuserubalin Bungiu lau minebenehabuni (Esekiéli 39:7).

Lídanba san aban fulasu ya ubouagu lageindawagúa Arümahedón? Uá. Lídanba sun ubóu lageindawagúa Arümahedón, mámarügübei lidan aban fulasu ubouagu (Heremíasi 25:​32-34; Esekiéli 39:​17-20).

Dimurei Arümahedón (Har Meghiddóhn lidan ebüréu), mini lan “Wübü le lani Megidu”. Aban meha uburugu Megidubei, aban fulasu le meha ñein lubéi haganawa binadu ísüraelina. Arufudati abahüdaguni luáguti dan le sügühalibei ageindawagúa lan saragu wuribu wéinamuti yarafa lun fulasu ligía. Adimurehatu Bíbülia luagu fiu lídangiñe (Alidihatiña 5:​19, 20; 2 Urúeigu 9:​27; 23:29). Siñati ábanbei lan fulasu le lídanbei binadu Megidu Arümahedón lugundun úati ni aban wübü gíriti ítara ñein. Ani makabebaña hamuga giñe sun ha lúnbaña hageindagun luma Bungiu lidan fulasu wayati le gíribei Hesüreeli, le ñein lubéi uburugu Megidu. Le linarün katei, ábanbei sügǘ Arümahedón, le ñeinba lubéi lóundaragua sun arúeihani gabafuti le ubouagubei lun hageindagun luma Larúeihan Bungiu.

Kaba asusereda lidan wuribu Arümahedón? Ibidiñeti woun ida luba lan layusuruni Bungiu lubafu, le wachoururubei layusurubei lan lememe meha layusurubei lidan binadu dan: huya dereguati, hárabaganali, fuludu, láhuyun watu gemeti luma súfuru, labirihaniga luma sandi (Hobu 38:​22, 23; Esekiéli 38:​19, 22; Abakúku 3:​10, 11; Sakaríasi 14:12). Kei ñeinbei lan bulíeiguaü hadan láganiñu Bungiu, gíbebaña áfaragutiña hámagua, lau sun híchuguba lan fe Bungiu lan ageindagubei hama (Esekiéli 38:​21, 23; Sakaríasi 14:13).

Lagumuchuba san Arümahedón lau Ubóu? Magünrinchawagunbei Ubóu le ídanbei wawinwanda lidan Arümahedón. Adügǘwati Ubóu lun hawinwandun gürigia lidan lun súnwandan (Sálumu 37:29; 96:10; Apurichihati 1:4). Ligíati, magumuchagunbei Arümahedón lau sun katei. Le linarün katei, ladügüba Arümahedón lun gayara lan herederun “saragu gürigia” ha úaraguabaña lun Bungiu wínwanñu (Arufudúni 7:​9, 14; Sálumu 37:34).

Marufudahantu funagia Bíbülia lídanbei lan Arümahedón lagumuchagüle ubóu? Inarüni anihein lan bérusu tídangiñeti Bíbülia le ídanbei layusurúa dimurei ubóu lun layanuhóun luagu fulasu le ñein lubéi wawinwanda. Gama lumoun, yusu tumuti giñe Bíbülia dimurei le dan le tayanuhan hawagu gürigia ha madügünbalin le lubeibei Bungiu (1 Huan 2:​15-17). Lidan kesi le, lanügübei Arümahedón “lagumuchagüle ubóu” (Matéu 24:3).

Ídaame san lageindawagúa wuribu le gíribei Arümahedón? Dan le layanuhanbei Hesusu luagu aban “óunwenbu asufuriruni” le lunbei lagumuchun lidan Arümahedón, ariñagati: “Ánheinti luagu weyu luma oura le lunbei nagiribudun ubouagun, ibidiñeti ni ka un, ni houn ánheligu ha siélubaña, ni nun, au le Liráü Bungiu; Búngiurügüñein Úguchili asubudirei” (Matéu 24:​21, 36). Labu sun lira, arufudahatu Bíbülia lageindawaguba lan Arümahedón lidan aban dan le subudiwabei kei lagiribudun Kristu keisi urúei marihúaditi, le agumeserubei lidan irumu 1914 (Matéu 24:​37-39).