Sánsiwaali san le tariñagubei Bíbülia?

Uá. Dan le wagoubaguagüdünu kopia binaduharu to tánina Lererun Bungiu tuma kopia to uguñeboun weyu, arihúati ligiamémegili lan ariñahani le tídanbei, íbini barüharu lan lóugiñe saragu milu irumu lúmagiñe tadügǘn lau burí ubuñei le gagadeiraditi.

Mini lan san le úa lan ni aban charati tidan kopia to adügǘboun?

Dariwaaru saragu milu kopia tánina Lererun Bungiu to meha abürüdǘboun lidan binadu dan. Fiu tídangiñe kopia tuguya, dariwati fiu asansiruni tidan, arufudati le adügǘwa lan fiu charati lidan tabürüdǘn. Liibe-agei lídangiñe asansiruni le, maweirinti ladüga masansirun lumuti le mini lubéi le abürüdǘbei. Lau sun lira, dariwati fiu asansiruni wéiriraüti. Genegeti lüha lan ladügǘn asansiruni burí ligía lun gayara lan lasansirún uganu le tídanbei. Ariha wamá bián hénpulu:

1. Anuhein burí Bíbülia to ásügürawagüdüboun lidan binadu dan, to ídanboun wadarirei dimurei burí le lidan 1 Huan 5:7: “Añájein ǘrüwa geféentiña luágu cátei le siélu. Búngiu Úguchili, Búngiu Irájü, lúma Búngiu Sífiri Sándu, áni ában méme jagía” (Lerérun Búngiu to lánina Iséri Darádu). Lau sun lira, anuhein burí binadu kopia to uáguboun gayara lan lafiñerúniwa, to chóurugüda lumuti woun úa lan meha dimurei burí le tidan. Aba labürüdǘn ñein lárigiñe.a Ligía úa lubéi dimurei burí le tidan Bíbülia to uáguboun gayara lan lafiñerúniwa uguñe weyu.

2. Fuati liri Bungiu saragu milu wéiyaasu tidan binadu kopia to tánina Bíbülia, lau sun lira, gidá hamuti saragu ásügüragüdütiña iri le lun híchugun “Aburemei” o “Bungiu” ñein.

Ida liñati wasubudiruni madaribadiwa lan amu burí charati?

Tau saragu kopia tánina Bíbülia to anuheinboun uguñe weyu, ménrenguntimahali ladarirún charati lidan abürüdǘni.b Dan le wagoubaguagüdünu dugumedu to, ka wafurendeirubei? Gayaraati san wafiñerun luagu uganu le tídanbei Bíbülia uguñe weyu?

• Ánheinti Abürüdǘni Ebüréu (le unbei laguarúa Binadu Abürüdǘni), ariñagati sásaamu le gíribei William Henry Green: “Gayaraati lariñawagúniwa lau ichouruni úa lan amu abürüdǘni le ásügürawagüdübei lau ichouruni kei le”.

• Abürühati sásaamu Frederick Bruce tuagu Iseri Daradu: “Gíbetimati Abürüdǘni lánina Iseri Daradu le aniheinbei uguñe weyu [...] luéi le aniheinbei hama abürühatiña ha lánina binadu dan, ani afiñewati luagu le habürühabei”.

• Ariñagati Sir Frederic Kenyon, aban sásaamu subudihabúti tuagu Bíbülia, “gayara lan lárügüdünu aban gürigia Bíbülia lúhaburugu chóuruñu Lererun tan Bungiu, sügügüdawatu machararunga lúmagiñe binadu dan darí guentó”.

Ka amu resun wámabei lun wachoururuni sügügüdawa tan Bíbülia masansirunga ariñahani le tídanbei?

• Dandu huríu ha adügübaña kopia tídangiñe Lererun Bungiu kei amu kristiánugu, abürüha hamuti charati wéinamuti le hadügübei lubúeingu Bungiu (1 Lúrudu 20:12; 2 Samueli 11:2-4; Galasiana 2:11-14).c Abürüha hamuti giñe abahüdaguni le arufudubalin mabuidun lan le hadügübei huríu lau maganbadi le meha harufudubei luma fiu arufudahani charati le harufudahabei gürigia (Oseasi 4:2; Malakíasi 2:​8, 9; Matéu 23:​8, 9; 1 Huan 5:21). Lau habürüdüni gürigia ha abahüdaguni burí le kei aubei bürüwañu lan tidan furumiñetu dugumedu, arufudatiña haruma lan housan ani inebe tan Lererun Bungiu to sánduboun houn.

• Ma lunti wagurabun adüga lan Bungiu, le íchugubarun Bíbülia woun, lun masansirun lan ni kata lídangiñe uganu le tídanbei? (Isaíasi 40:8; 1 Féduru 1:​24, 25).d Lugundun mámarügüñein houn gürigia ha lánina binadu dan labusenra lun tahuudun, busenti giñe lun tahuudun lidan wadaani (1 Korintuna 10:11). Le linarün katei, “sun le ariñawagúbei tidan Lererun Bungiu lúmagiñe binarü, lun larufudahóun woun labürühóua; bürüwati meha dimurei burí ligía lun wanügün gurasu luma dǘgüdaguaü lídangiñe, gayara láamuga wemenigidúntima luagu Bungiu” (Rómana 15:4).

• Tídangiñe meha kopia lánina Abürüdǘni Ebüréu laliiha dandu Hesusu kei lani apostolugu ani marufuduntiña nidiheri hamá luagu anihein lan charati lidan abürüdǘni ligía (Lúkasi 4:16-21; Adügaü 17:1-3).