Sügügüdawati adamurini wéiriti tídangiñe bigibigitu luma tídangiñe radiu

Espechaliti adamurini wéiriti le lánina irumu 2020. Furumiñe wéiyaasu gürawárua lan programa le houn sun gürigia ani gayaraati larihíniwa lídangiñe Internet. Gama lumoun, íbirigu ha awinwandubaña Malaui luma Mosanbíke ariha hamuti adamurini le mayusurunga Internet. Ida liña san lasuseredun katei le?

Sétanu le arihibei lau híderawagun íbirigu luma sétanu le arihibei lau hawadigimari gefentiña luagu Heowá lidan sun ubóu le lábugiñebei laríaahan Musu Úaraguati, rútiña üma, lun laganbún adamurini wéiriti tídangiñe radiu lidan ageiraü Malaui luma Mosanbíke. Ka uagu ladügǘwa aransehani le? Ladüga seru lan Internet Malaui. Ligía mibe habéi íbirigu ha awinwandubaña lidan ageiraü ligía lun gani hamá Internet. Afuranguagüda lumuti William Chumbi, lílana Sétanu le Arihibei tau Sukursáli Malaui: “Radiu tuma bigibigitu ligíarügüñein gayara lan hayusurun íbirigu lun harihini adamurini wéiriti”. Ariñagati giñe, Luka Sibeko, lílana Sétanu le Arihibei tau Sukursáli to Malaui: “Lun hamuga ua tan bigibigitu tuma radiu, fiúrügüñanu hamuga íbirigu gayara lan harihini programa le”. Ligiaméme asuseredubei Mosanbíke. Fiúrügüñanu íbirigu gayara lan hagañeihan aban lubuidun gágamuru, siñati hafayeihan Internet ladüga sérutu.

Ida liña habihini

Ladüga sandi COVID-19, gumesetiña íbirigu aganbei adamuridaguni tídangiñe radiu luma tídangiñe bigibigitu.a Amuriahatiña íbirigu houn tabureme radiu lun híchugun lanwoun oura lun hásügüragüdüni adamurini wéiriti.

Gama lumoun, gagibuguatiña íbirigu ha Malauibaña luma aban turobuli hénrenguti. Ábanrügüñein oura tígirun emisora lun hayusurunu íbirigu, ladüga saminatiña anhein migife lubéi programa gayaraati labuchadun hawagu ha aganbubalin. Aba wafuranguagüdün houn, wadagimanu le wadügübei lun lan wíderaguniña gürigia. Íbini siñá lan wáfuridun, áfaaguatiwa lun haganbuni gürigia uganu buiti le tídanbei Bíbülia. Adügati katei le lun hasansiruni gürigia hagaburi ani lun gunda lan habagari kei iduheñu. Dan le haganbuni katei le, aba hánharun lun híchugun lanwoun oura houn íbirigu tidan radiu.

Lidan ageiraü Malaui, ru hamuti adamurini wéiriti tídangiñe radiu luma tídangiñe bigibigitu. Chülütu burí emisora to lidan sun burí ageiraü ligía. Lidan ageiraü Mosanbíke, sügügüdawati adamurini wéiriti tidan 85 emisora tánina radiu tuma tánina bigibigitu. Chülüti programa le houn míñunu gürigia lidoun ageiraü ligía.

Lun lásügürawagüdün adamurini wéiriti le tídangiñe aban emisora to tani bigibigitu gástawati 28,227 dólarüb ani gástawati kei burí 20,000 dólarü tun emisora lánina radiu lun lásügürawagüdün adamurini le lidan ageiraü ligía. Ámuñegueinarügüti ebegi afayeirúti tuagu aban emisora según limigifen fulasu le ñein lubéi tachülüra emisora, fáyeiwati lúmagiñe 15 dólarü darí 2,777 dólarü.

Góunigi hamuti íbirigu budagia saragu. Kei hénpulu. lidan ageiraü Malaui ibihatiña íbirigu lun harariragüdüni ebegi le afayeirúbei 30 %. Ítara liña habihin lun lararirun 1,711 dólarü. Rarigüda tumuti fiu emisora ebegi Mosanbíke ladüga gafayeihadi hamá íbirigu ani buidu ligía hagaburi.

Rútiña íbirigu óunwenbu seremei

Wéiriti eteingiruni le hasandirubei íbirigu ladüga gayara lan haganbuni luma harihini adamurini lidan igaburi le. ariñagati aban íbiri gíriti Patrick, aban wéiyaali lidan afiñeni Malaui: “Rútiwa seremei lun Musu Úaraguati ladüga ladügüni aransehani le wabá lidan lidaani sandi COVID-19”. Ariñagati ábaya íbiri, le gíribei Isaac Malauina: “Úati gágamuru ni burí konputadora wama. Ligía weteingirubalin tídangiñe sun wanigi ladüga gayara lan waganbuni adamurini wéiriti tídangiñe radiu. Aban óunwenbu idewesei túmagiñeti lóundarun Heowá. Seremei lun lira, sagatiña niduheñu buiti lídangiñe programa le. Chóuruti hínsiñe hamá lubúeingu Heowá lun”.

Ñǘdünti aban apurichihati le mabadiseirúngili le awinwandubei Mosanbíke furumiñe wéiyaasu lidan adamurini wéiriti lidan irumu 2020. Ariñagati: “Narihini adamurini wéiriti tídangiñe bigibigitu haritaguagüda lumutina aban lan Bungiu Suntigabafu Heowá. Madügünti sandi lun michu lani Heowá le wemegeirubei woun lidan wamadagua luma ani ru lumuti woun lun warihini ya wábiñe. Ariha numuti furangu hínsiñegua hamá lánigu Heowá hámagua ani chóurugüda lumutina le anuhán lan to relihión inarünitu”.

Ariñagati aban íbiri gíriti Wyson aban wéiyaali lidan afiñeni: “Busentina níchugun seremei lun Musu Úaraguati ladüga letenirun woun lidan lidaani sandi le. Míbeti wámati ani wawinwanduña lidan aban fulasu gudemeti. Seremei warihini o waganbuni adamurini wéiriti le, sagatiwa saragu buiti lídangiñe”.

Adügati Sétanu le Arihibei lau Híderawagun Íbirigu luma Sétanu le Arihibei lau Arufudahani aransehani lun laganbahóun luma lun larihín adamurini wéiriti lánina irumu 2021 lídanrügü fiu fulasu. Halía libihíniwa seinsu lun lánhingichun wadagimanu le? Seremei lun budagia le ichugúbei lidan ámuñegueinarügü igaburi lidan donate.jw.org. Rútiwa seremei houn ladüga gíchigadi humá.