Adamurini distritu, aban lubuidun ariñahani luáguti inarüni houn gürigia
1. Ka burí inarüni uágunbei gayara lan hasaminarun ísüraelina lidan hafedun le sagüráubei?
1 Óundaraguatiña meha ísüraelina ǘrüwa wéiyaasu luagu irumu lun hadügüni hafedun burí le sagüráubei. Íbini hóunrügüñein lan meha wügüriña lichugúa lúrudu lun houdin, libe-agei dan barǘ hamutiña sun hafamilian hámagua Herusaléun lidan burí ókaasion le (2 Lur. 16:15, 16). Ñein gachansintiña meha lun hasaminarun luagun burí inarüni le méiniti. Kei hénpulu, gayarati meha hasaminarun luagun Heowá, luagu aban lan Bungiu hínsiñehabuti ani ru lumuti lan hemegeirun sun lubúeingu houn (2 Lur. 15:4, 5) o gayara lan lafiñerúniwa luagu ladundehan Heowá luma lóunigihan (2 Lur. 32:9, 10) luagu anúadira laaña lan Heowá lun lumutuniña hamá, ani ligía lan mosu lubéi harufuduni lau ligaburi hawinwandun richagua hamá kei ligía (2 Lur. 7:6, 11). Uguñe weyu ru lumuti giñe adamurini distritu chansi le woun.
2. Ida liña líderaguniwa programa lánina adamurini lun gunfuranda wamani inarüni?
2 Íderagua lumutiwa programa lun gunfuranda wamani inarüni. Lidan adamurini distritu aganbatiwa saragu yanu, arihatiwa drama, demostrasión luma burí entrewista le íderagubaliwa lun gunfuranda wamani lisuuni inarüni le tídanbei Bíbülia (Huan 17:17). Sun dan le, bereseguñein lóundarun Heowá aranseha aban programa le lunti lasubudiragüdüni Bungiu houn gürigia lídangiñetiña sun ubóu (Mat. 24:45-47). Mádühantu san hanigi lau ugundani dan le hasaminarun luagun sun le lunbei hafurendeiruni?
3. Kaba íderaguawa lun wasagarun buiti lídangiñe programa?
3 Lun wasagarun saragu buiti lídangiñe adamurini, mosu ñein wamá ǘrüwagubei weyu ani ru wagíame arigei lun programa. Mabulieida huméi hayanuhan luma hábuti lun hamuriahan üma lídangiñe huádigimari. Lun gayara lan híchugun arigei lun programa sagü weyu, emeraagua humá buidu áriebu. Añahein gürigia aban híchuguni harihin luagun íbiri le íchugubalin yanu o habürühani puntu burí le súdinitimabei. Mígira humá lun ladarasahani gágamuru o amu katei haganbun ni haganbun amu. Houcha humá lun mayanuhan humá, mabürühan hugíame lídangiñe gágamuru, houcha humá giñe lun meigin humá matun hugíame labadinagua programa.
4. Ida luba híderaguniña agübürigu hasaanigu lun hasagarun buiti lídangiñe adamurini?
4 Lidan irumu lánina emeraaguni le meha hefeduhabei huríu kada sedü irumu, óundaraguatiña meha ísüraelina lun haganbuni laliihoun Lúrudu lidan tufedun dibasein. Sun meha lílana familia, íbini “irahüñü” óundaraguatiña lun haganbun ani furendei hagía (2 Lur. 31:12). Uguñe weyu gúndaatiwa dan le warihin saragu familia ñun úara lidan adamurini hau hasaanigu agagudúañu aganbahei programa. Háfuga buídubei lun sagü lan guñoun haliihani úara le habürühabei lun hakutihani puntu burí le súdinibei hun. “Libidiounigan aau, ligía aban lídangiñe katei le lídanbei hasaminan nibureingiña” ligía moun lumuti lubéi hígiruniña agübürigu hasaanigu lun hadügüni le habusenrun. Súdiniti lun hasubudiruni agübürigu halíañanu lan hasaanigu —íbini ha wéinamuraühaña— dandu lidan lóurate emeraaguni kei dan le lídanñanu lan fulasu le ñein lubéi harumuga (Ari. 22:15; 29:15).
5. Ida liña wewendedagüdüni inarüni lau ligaburi wóuserun?
5 Wéndegüda lumuti lubuidun igaburi inarüni. Dan le buidu lan wóuserun lidan uburugu le ñein lubéi ladügǘwa adamurini, wéndegüda wamuti inarüni (Titu 2:10). Gürigia ha nadagimeinbaña tidan haban chülüdügütiña, hínsiñeti houn hawadigimaridun hama gürigia ha gaguraasuntiña, buiti hóuserun ani gídehaditiña (Kol. 4:6). Lidan irumu le ásügürübei, dan le houdin íbirigu tídangiñe aban sukursali adüga bísinisi tidan aban haban chülüdügütiña, aba tariñagun lábuti alugurahani houn: “Hínsiñeti woun lun hayabin gefentiña luagu Heowá eredera ya lugundun inebehabutiña ani buiti hagaburi. Súnwandan giñe hóuseruniña nadagimeintiña lau inebesei ani tóunigi hamuti sun katei ya”.
6. Ida luba wewendedagüdüni inarüni dan le lídanñadiwa lan uburugu le ñein lubéi ladügǘwa adamurini?
6 Mámarügüñein lun hasubudiruni íbirigu kátawa lan o lun hasubudiruni gürigia anihein lan aban adamurini leseriwida solapa, seriwiti giñe lun aban buiti uganu. Híchuguba gürigia fe luagu sun lan ha gámabalin buiti hasansiragun, buiti haranseragun houngua ani máyeihan hamuti lagübüri hasansiragun gürigia ubouaguna (1 Tim. 2:9, 10). Ligía mosu lubéi wetenirun lun ligaburi waranseragun woungua lidan uburugu le ñein lubéi adamurini, íbini giñe dan le wíchuguni wiri tidan haban chülüdügütiña. Ánhawa achülüra tau galasun chátitu o tau bibidí, mabuidunbei layanuhóun wawagu kei lubúeingu Heowá. Íbini anhein adügǘwa adamurini lidan aban fulasu ñein lumuti táhurerua bali ani hunre liña, mosu wasansiragun buidu. Ánhawa desidírü wasansiragun lubá woudin eiga lárigiñe programa, mabulieida waméi adamurini lan lébunabei awanhein lan ñein ani moun lumuti wadaürün dáüguaü madünamatu.
7. Ida luba wagundaarun hama wíbirigu lidan lidaani adamurini?
7 Lidan meha hafedun ísüraelina chülütiña meha íbirigu lídangiñetiña amu fulasu lidan hageira hama giñe terencha, ani adügatiha le lun ñein lan úarani (Adü. 2:1, 5). Lidan burí adamurini distritu, furanguti larihín úarani le wádanbei keisi íbirigu. Adügati igaburi le lun taweiridun hanigi gürigia (Sal. 133:1). Ani yusu wamuti dan ligía lun wasubudirun amu íbirigu, wayanuhan hama lidan lóurate éigini lubaragiñe wáfuridun agañeiha bóugudi.
8. Ka burí resun wámabei lun wídehan lidan adamurini anhein gayara lubéi wadügüni?
8 Wéiritu hanigi gürigia dan le harihini lubuidun laransehóun adamurini burí le, dántima le hasubudiruni mafayeirúniwa hamá ha adügübalin wadagimanu burí le. Gayarati san ‘hederegeragun hungua’ lun hidin áluaha hídehan lidan adamurini? (Sal. 110:3.) Gíbetiña agübürigu ñǘdüntiña ídeha úara hama hasaanigu lun harufudahan houn ida luba lan híderagun amu. Anhein hénrengu lubéi hun hadügün iseri umadagu ladüga hanufude humá hayanuhan, gayarati líderagunün heseriwidun lidan adamurini. Ariñagatu aban íbiri: “Masubudiruntina amu gürigia lidan adamurini haweidigia niduheñu hama fiú numadagu. Gama lumoun, dan le nídinbei ídeha lidan arumadahani, aba nasubudirun saragu íbirigu dandu hiñaruñu kei eyeriñu. Hínsiñeti nun!”. Dan le waganwoundagüdüniña wamadagu lidan woudin ídeha wéiriti ugundani le wasandirubei (2 Ko. 6:12, 13). Anhein madügünñaha humagili lubéi, álügüda huméi wéiyaali lidan afiñeni ka lan lunbei hadügüni lun gayara lan hídehan.
9. Kaba wadüga lun wamisurahan amu lidoun adamurini?
9 Amisuraha humá amu lun houdin aganbei inarüni. Ǘrüwa dimaasu lubaragiñe adamurini wáfuriduba amisurahaña gürigia lun houdin lidan adamurini kei wadügüni lidan irumu burí le sügühalibei. Hadügübei lílana kada damuriguaü hayaraati lun hafanreinhanu amisuragülei lidan sun fulasu le ñein lubéi hapurichiha (ariha huméi rekuaduru “Ida luba wederegerunu amisuragülei?”). Anhoun ígiragua, mosu hanügünu lidoun adamurini lun hapurichihan houn gürigia ha lúnbaña hadariruniña ǘmadarugu.
10. Abahüdagua humá somu sügǘ le arufudubei buidu lan resultóu le líchugubei tafanreinhóun amisuragülei.
10 Buiti san resultóu le lanügübei tafanreinhoun amisuragülei? Lidan aban adamurini, ibihati aban ídehati haláü houn bián maríeitiña. Aba hariñagun lun ibiharügü hamá aban amisuragülei ábati busén hamá houdin arihei houngua ida liña lan katei. Aweiyasuhatiña lóugiñe 300 kilómeturu tidan karü lun hachülürün ñein. Amu íbiri to ñǘdüntu apurichiha muna tuagu muna aba tederegerunu amisuragülei lun aban gürigia. Kei ariha tani busén lan gürigia ligía lasigirun afurendeira, aba tafuranguagüdüni ariñahani le tídanbei amisuragülei lun. Murusun dan lárigiñe, lidan adamurini, ariha tumuti íbiri to gürigia ligía luma aban lumada barüina hagía aba tídangiñe iseri agumeiraguagüdüni.
11. Ka uagu súdini lubéi woudin lidan adamurini distritu sagü irumu?
11 Sun fedu sagüráuti le meha hadügübei ísüraelina, aban meha idewesei lúmagiñe Heowá lun heseriwidun lun “lau inarüni luma úarani” (Hos. 24:14). Ítarameme ídehati adamurini distritu lun wasigirun abagarida “úaragua luma inarüni” ani ligía aban fánreinti méiniti lidan wáhuduragun lun Bungiu (3 Huan 3). Ayumahatiwa lun labiniruniña Heowá sun ha hínsiñehabubaña lun inarüni ani áfaaguatiña irumu luagu irumu lun lidan hamá adamurini burí le, lun haganbun ani furendei hagía.
[Ariñahani burí lidan létüra wéinamuti lidan páhina 4]
Dan le buidu lan wóuserun lidan uburugu le ñein lubéi ladügǘwa adamurini, wéndegüda wamuti inarüni
[Ariñahani burí lidan létüra wéinamuti lidan páhina 5]
Ǘrüwa dimaasu lubaragiñe adamurini wáfuriduba amisurahaña gürigia lun houdin lidan adamurini
[Rekuáduru le lídanbei páhina 3-6]
Le Lunbei Gabaroun Wamani Lubá Adamurini Distritu Irumu 2012
◼ Lóurate programa. Lagumeseruba programa ladaün 9.20 binaafin ǘrüwagubei weyu. Ladaarúba bena ladaün 8.00. Danme le lawisahoun luagu lagumesera lan músika lánina ebelaagülei, lunti wáluahani wala lun gayara lan lagumeserun programa keisi lubudubu. Lagumuchuba programa wándaradi luma samudi ladaün 4.55 rábounweyu, ani dimaasu lagumuchuba ladaün 3.40.
◼ Amuñeiruni tun karü. Maguburahóunwabei lun tamuñeirun karü danme le wagía lan ariha lau fulasu ligía, tamuñeiruba karü según to achülürütu furumiñe. Lidan fulasu le adireirúbei tun hakarün gürigia danimantiña, karü to lautu plaka le indikarübalin hani lan danimantiña tugíarügüboun amuñeira ñein. Keiti libe-agei lubéi dan lóuguati fulasu lun tamuñeirun karü, amisuraha wamutün lun haweiyasuhan saragu gürigia tidan ábanmeme karü anhein gayara.
◼ Haláü. Hóunrügübei gürigia ha awinwandubaña huma húbiñe gayara lan hareidun haláü o houn ha aturiahabarun Bíbülia huma o ha aweiyasuhatiña huma tidan hikarün (1 Ko. 13:5).
◼ Éigini. Buítimati hanügün héigin sügǘ lau háfuridun agañeiha lidan lóurate amidi. Gayarati hanügün aban lagei yelu le ñǘraüti le gabarati lábugiñe hala. Siñabei hanügün aban lagei yelu le wéiriti lidoun adamurini ni burí budein o ágeidinaü le bídiriu.
◼ Budagia. Gayarati warufuduni weteingiradi luagu fedu lúmagiñeti Bungiu le, lau wíchugun budagia lau gundaü lun lawanserun wadagimanu lánina apurichihani lidan sun ubóu. Sun ha íchugutiña budagia tau chekü lunti hadügünu lau tiri sukursali to arihiboun lau hageira.
◼ Danaguaü luma sandi sódiniti. Anhein abuleseira o asandira somu gürigia sódini lidan adamurini, wisá huméi ídehati le yarafatimabei hun, lagúaruba íbiri ligía lau lóufudagun lidoun departamentu Letenirún houn Sánditiña lun harihini íbirigu ha nadagimeinbaña ñein ídatima liña lan gürigia ligía teni hagíame lun.
◼ Árani. Anhein hátahaña lubéi árani to líchugun surusia hun, lau fulesei barǘ huméi le hemegeirubei húmagua, ladüga úabei lidan adamurini. Anhein anihein lubéi libimen hitaü huagu ani mosu hayusurun agusa, mabulieida huméi háguruni keisi lubudubu, lugundun peliguruti ifei burí le. Mágura huméi lidoun lagei ifei ni lidan adamurini ni tidan haban chülüdügütiña.
◼ Sabadu. Buleseitiña gürigia sagü irumu tadüga sabadu to hayusuruboun. Buítimati sensiyu tan hisabadun ua ligíame gürewei tan, gayara láamuga héibugun darangilu luéigiñe üma irirati, esütépu, o katei líbeina lira.
◼ Gürigia ha hénrenguti haganbun. Lidan adamurini lásügüragüdüwaba programa tidan radiu (FM). Lun gayara lan lahuudun hun, mégeitün aban liraüraü radiu le lauti batería luma audífonu.
◼ Ugunei to ádahouboun hau irahüñü luma haláü gabaruchawagúaditi. Moun lumuti tanügǘn ugunei to ádahouboun hau irahüñü ni haláü gabaruchawagúaditi lidoun adamurini. Gayarati hanügün haláü houn irahüñü anhein gayara lubéi labadülerúniwa lóubuagu hala hagübürigu.
◼ Ibiñein. Libe-agei adamurini adügǘwati lidan fulasu le daruguati; garabalirügüñein le diliti ñein. Ligíati, lun warufuduni wínsiñehabu buiti lun mayusurun wamá saragu ibiñein le héreti líhemen le gayarati ladügün dañu houn gürigia ha gayarabei lachatirun hawaragun o lañuguchun hágirugu o amu luwuyeri turóbuli (1 Ko. 10:24).
◼ Ubanaü Sírvase visitar (S-43-S). Buídubei lun hanügün aban o biama ubanaü to gíriboun Sírvase visitar lun habürüdüni lani furumiñeguarügü gürigia le unti hapurichiha dátosu anhein busén lubéi lasigirun afurendeira. Gayarabei hederegeruni ubanaü ligía lidan Departamentu lánina Agumeiraguagüdüni o danme le hagiribudun lídangiñe adamurini hederegerounme lun sekretariu le lídanbei damuriguaü le ñein hubéi.
◼ Éigagülei. Mosu líchugun ligaburi wóuserun tidan burí éigagülei uéiriguni lun Heowá. Anhein aban lubéi échuni ligirún seinsu lun gürigia le etenirubei hun, adüga huméi.
◼ Haban chülüdügütiña.
1) Madüga humá daradu tuagu saragu rumu anhein mayusu huboun lubéi ani mebelaagüda humá saragu gürigia lidoun rumu lóugiñe númeru le iridúbei.
2) Madüraagua huméi daradu anhein mama lubéi luagu aban katei sériuti, ani awisaha humá tidoun haban chülüdügütiña anhein siñá lubéi hagunfulirun (Mat. 5:37).
3) Mabulieida huméi ánhadün lan afayeiha tau tarjeta de crédito o débito dan le hebelurun tidoun haban chülüdügütiña, libe-agei dan aba tárügüdün seinsu ñéingiñe tuagu rumu to lunboun hayusurunu, luma luagu somu damichi le gayarati lasuseredun danme le ñein humá. Gayarabei hasagaruni seinsu ligía fiú weyu lárigiñe háfuridun.
4) Barǘ humoun kareta to ídanboun tanaahoua ílagu danme le hayusuraaru lan ani ru humoun tárigoun lau lóufudagun gayara láamuga hayusurunu amu.
5) Ru humá somu seinsu houn nadagimeintiña ha íderagubalün tau hílagu tidan haban chülüdügütiña ani ígira humá giñe seinsu tubá arumadahatu rumu sagü weyu.
6) Tídanrügüla rumu to ñein lubéi gayara lan hábougun hábougua.
7) Márügüda humá lóugiñe le yuubei hun lídangiñe éigini lánina binaafin, gafe, o yelu le eseriwidúabei houn gürigia ha achülürübaña arumuga tidan haban chülüdügütiña.
8) Arufuda huméi igaburi le líchugubei sífiri dan le hóuserun hama gürigia ha nadagimeinbaña tidan haban chülüdügütiña. Mabulieida huméi heteniruña lan houn saragu gürigia, óusera humá buidu, gagurabaguadi humá ani areida hugíame.
9) Súdiniti lun hetenirun agübürigu houn hasaanigu danme le tidan hamá haban chülüdügütiña, dántima le lídanñanu lan fulasu le ñein lubéi heresibirúa gürigia, lidan agawagülei o pisina, o ñein lubéi ladügǘwa ehersísiu.
10) Ebegi le bürüwañubei tidan Lista de hoteles recomendados ligíaba hafayeira luagu weyu, fáyei humeime liseinsuna gumadi. Anhaün haguburaha lóugiñe, maha humá hafayeiruni ani lau lóufudagun awisaha humá lidan Departamentu le ñein lubéi láluahoua arumuguni houn íbirigu.
11) Anhein asusereda somu turóbuli tidan hirumun, awisaha humá lidan Departamentu le ñein lubéi láluahoua arumuguni houn íbirigu danme le aünhagua lidan adamurini.
◼ Eseriwiduni lau gundaü. Sun ha busentiña hídehan lunti houdin lidan Departamentu lánina Eseriwiduni lau Gundaü. Ha magunfulirungiña 16 irumu gayarati hawadigimaridun lábugiñe haríaahan hagübürigu o gürigia le óunigirubaliña o amu gürigia le wéiyaali le unti híchiga lagübürigu kárugu.
[Rekuáduru le lídanbei páhina 6]
Ida luba wederegerunu amisuragülei?
Lun gayara lan tederegehóun lidan sun fulasu, mosu murusunrügü lan wayanuhan. Gayarati wariñagun: “Buiti binaafin. Lídanñadiwa aban wadagimanu le adügǘbei lidan sun ubóu lun tafanreinhóun amisuragülei to. Busentina níchugun aban hun. Hadariruba lanwoun ariñahani tidan”. Adüga huméi lau ubebeni. Danme le háfuridun samudi luma dimaasu, gayarabei giñe hayusurunu Garüdia Atalaya tuma ¡Despertad! anhein ñein chansi.