“Buidulá hóuserun hadan ha ibidiñehabúbaña lun Bungiu”

1. Ka uagu súdini lubéi lun buidu lan wóuserun danme le lídanñadiwa lan adamurini distritu o lidan adamurini houn lílana ámuñegueinarügü ageiraü?

¹ Aríagua hamutiwa gürigia sagü irumu dan le lídanñadiwa lan adamurini distritu, ligíati súdini lubéi wóuserun buidu, buidu láamuga ladimurehóun luagu Bungiu le unbei wáhuduragua (Fad. 20:26). Lunti furangu lan larihíniwa lidan wóuserun luma ligaburi waríawagun luagu lánigu wamá Kristu ha inarünitiña. Ida luba “[w]óuserun [buidu] hadan ha ibidiñehabúbaña lun Bungiu” danme lídanñadiwa lan adamurini distritu o lidan adamurini houn lílana ámuñegueinarügü ageiraü lun gayara lan wíchugun uéiriguni lun Wáguchi le siélubei? (1 Fe. 2:12.)

2. Kaba burí sügǘ lidan lidaani adamurini distritu íchiga chansi woun lun warufuduni igaburi le lunbei harufuduni kristiánugu?

² Arufuda waméi igaburi le lunbei harufuduni kristiánugu. Arihúati máyeihan wamani igaburi le kamanibei hadan ubouaguna dandu lidan ínsiñeni le wádanbei kei lidan ligaburi wóuseruniña gürigia ha mámabaña wíbirigu lidan afiñeni (Kol. 3:10; 4:5; 2 Tim. 3:1-5). Súdiniti areida wamá houn gürigia ha nadagimeinbaña tidan haban chülüdügütiña o tidan éigagülei, gaguraasun wagíame habá íbini dan le lasuseredun katei le magurabúnti. Wóuseruña giñe keisi lubudubu ánhawa ígira seinsu habá gürigia ha etenirubaña woun, anhein ligía lubéi échunibei.

3. Ka aritawaguagüdübei houn agübürigu, ani ka uagu?

³ Lunti hetenirun agübürigu houn hasaanigu lidan fulasu le ñein lubéi ladügǘwa adamurini, tidan burí éigagülei luma tidan haban chülüdügütiña (Ari. 29:15). Ariñagatu aban würi to arihiboun tau aban haban chülüdügütiña to ñein tubéi aban éigagülei houn aban feru maríeitiña: “Gúndaatiwa hau, huguya Gefentiña [luagu Heowá]. Inebehabutiña hisaanigu ani buíduti hóuserun. Buiti hayanuhan gürigia ha nadagimeinbaña ya huagu, ani hínsiñeti hamuga woun hiabin sagü samudi luma dimaasu”.

4. Ka katei lunbei wóunigiruni lidan ligaburi wasansiragun sunme awanha lan lidan uburugu le ñeinba lubéi ladügǘwa adamurini?

⁴ Gadünamatá wadaüragun. Lunti gadünama tan wadaüragun sánsigua wagíame keisi lubudubu lubá adamurini, moun lumuti wáyeihani ligaburi asansiraguni hanarimeguti le kamanibei hadan gürigia ubouaguna (1 Tim. 2:9). Moun lumuti giñe wasansiragun kamá hamuga wéibuga adüga ehersísiu o áhurera bali, mamurigunga o maranseragunga woungua ni íbini dan le wóudiña lan íchigei wiri lun wibihin aban rumu tidan haban chülüdügütiña o wederegeruñoun lan, o mámañadiwa lan lidan adamurini. Ítara, mabusigaríbadiwa wadaürünu tárüheta to asubudiragüdübalin lídanñadiwa lan adamurini ni wapurichihan danme le wadarirun chansi. Ladügüba lubuidun waríawagun luma ligaburi wóuserun líteme lidan adamurini distritu o lun adamurini houn lílana ámuñegueinarügü ageiraü mámarügü lun hánharun gürigia haruma tanigi lun haganbuni uganu tídangiñeti Bíbülia le anügübei asalbaruni, lubaragiñe lira ladügüba lun lagundaarun Heowá (Sof. 3:17).

Le lunbei gabaroun wamani lubá adamurini distritu irumu 2014

◼ Lóurate programa. Ladaünba 8:00 binaafin ladaarúa bena. Lagumeseruba programa lau músika ladáün 9:20 binaafin ǘrüwagubei weyu. Lúmounme oura ligía, lúnhalime lidan wamá wala lun gayara lan lagumeserun programa keisi lubudubu. Lagumuchuba programa lau uremu luma furíei ladáün 4:50 rábounweyu wándaradi luma samudi, ánheinti dimaasu lagumuchuba ladáün 3:50 rábounweyu.

◼ Adamurini houn lílana ámuñegueinarügü ageiraü. Ñeinbei adamurini houn lílana ámuñegueinarügü ageiraü lidan fiú uburugu. Akutiha hamaali íbirigu ha arihibaña tau sukursáli átiriñein lau haláü lidan fulasu le ñeinba lubéi ladügǘwa adamurini, lueirin fulasu le ñeinba lubéi tamuñeira karü luma átiribaña lan gürigia gabara tidan burí haban chülüdügütiña, ariñahaniti le lébunabei desidírua lan átiribaña lan íbirigu amisurahóua lídangiñe amu burí ageiraü luma kaba burí lan damuriguaü gayara lamisurahóun. Ánhaña hamuga achülüra íbirigu lidoun aban adamurini houn lílana ámuñegueinarügü ageiraü le ídounbei mamisurahóun hamá, gayarati gíbeyabaña lan gürigia achülürütiña ani háfuga úabei ubaraü houn súngubei. Anhein siñabei lubéi hidin lidoun adamurini le yuubei hun, lau fulesei, midin humá lidoun aban adamurini houn lílana ámuñegueinarügü ageiraü.

◼ Amuñeiruni tun karü. Danme le wagía lan ariha lau tamuñeirun karü, maguburahóunbei luagu, ani tamuñeiruba según to achülürütu furumiñe. Keiti liibe-agei lubéi dan lóuguati fulasu lun tamuñeirun karü, amisuraha wamutün lun haweiyasuhan saragu gürigia tidan ábanmeme karü, anhein gayara. Kárürügüboun to lautu awisahani o pülaka le arufudubalin hakarün lan gürigia ha danimatiña gayara tamuñeirun lidan fulasu le adireirúbei tubá hakarün danimatiña.

◼ Haláü. Danme le ladaarúniwa bena, méibaagua wamá lun woudin árügüda haláü lidan fulasu le hínsiñetimabei woun, kamá hamuga wásügüraguña. Lunti hamuga línchahaniwa aranseñu wamá lun wadügün sákürifisiu hawagu amu lun wáluahani le buídubei houn gürigia wáledigu. Ítara lubá harihini gürigia kristiánugu lan inarünitiña wagía ani línchahabaña lun híchugun uéiriguni lun Bungiu (Huan 13:34, 35; 1 Ko. 13:4, 5; 1 Fe. 2:12). Habarügübei gürigia ha awinwandubaña huma tidan tuguyaméme muna, ha aweiyasuhabaña huma tidan hikarün o ha aturiahabarun Bíbülia huma gayara lan hareidun haláü. Míbeti haláü houn wéiyaaña luma houn sánditiña, ligía mama lubéi súnwandan gayara lan hañuurun sun haduheñu hama. Lau fulesei, ígira huméi haláü burí ligía habá wéiyaaña, habá sánditiña luma habá ha etenirubaña houn.

◼ Éigini. Buítimati hanügüni heigin húmagua sügǘ lau háfuridun agañeiha lidan lóurate emeraaguni amidirugu. Gayarati hanügün aban lagei yelu le ñǘraüti le gabarati lábugiñe haláü. Siñabei hanügün lagei yelu le wéiriti lidoun adamurini ni burí budéin o ágeidinaü le bídüriu.

◼ Budagia. Lidan adamurini, gayarati warufuduni weteingiradi luagu fedu lúmagiñeti Bungiu le lau wíchugun budagia lau gundaü lun lawanserun wadagimanu lánina apurichihani lidan sun ubóu. Sun ha íchugutiña budagia tau chekü lunti hadügünu lau tiri “La Torre del Vigía, A.R.”. Gayarabei giñe híchugun budagia tau tarjeta de crédito tuma débito.

◼ Árani. Anhein hátahaña lubéi árani le líchugun surusia hun, lau fulesei, barǘ huméi le hemegeirubei húmagua, ladüga úabei lidan adamurini. Anhein anihein lubéi libimen hitaü huagu ani mosu hayusurun agusa, mabulieida huméi háguruni keisi lubudubu, lugundun denchati ifei burí le. Mágura huméi lidoun lagei ifei ni lidan adamurini ni tidan haban chülüdügütiña.

◼ Lun masuseredun lan danaguaü. Wéiriti lisudinin wóunigiragun woungua luéi lasuseredun somu danaguaü ladüga waguyedagun o wabuguchun. Buleseitiña gürigia sagü irumu tadüga sabadu to hayusuruboun, tótima íñutu. Buítimati sensiyu tan hisabadun ua ligíame gürewei tan, gayara láamuga héibugun darangilu luéigiñe üma irirati, esütépu, o katei líbeina lira.

◼ Gürigia ha hénrenguti haganbun. Lidan adamurini lásügürawagüdüba programa tidan radiu (FM). Lun gayara lan lahuudun hun mégeibadün aban tiraüraü radiu to lautu batería luma audífonu.

◼ Ugunei to adahóuboun hau irahüñü luma haláü gabaruchawaguaditi. Moun lumuti tanügǘn ugunei to adahóuboun hau irahüñü ni haláü gabaruchawaguaditi lidoun adamurini. Gayarati hanügün haláü houn irahüñü anhein lídangiñeti lubéi le gayarabei lachakürǘn luagu aban haláü.

◼ Ibiñein. Liibe-agei adamurini adügǘwati lidan fulasu le daruguati; garabalirügüñein le ebelaagüdüwabei lau somu máhina ñein. Ligíati, lun warufuduni wínsiñehabu, buiti lun mayusurun wamá saragu ibiñein le héreti líhemen, le gayarabei ladügün dañu houn gürigia ha gayarabei lachatirun hawaragun o lañuguchun hágirugu o amu luwuyeri turobuli (1 Ko. 10:24).

◼ Ubanaü Sírvase visitar (S-43-S). Gayarati habürüdüni lani furumiñeguarügü gürigia le arufuduti busén lan lasigirun afurendeira hádangiñe ha únbaña hapurichiha dátosu lidan ubanaü le gíribei Sírvase visitar. Gayarabei hederegeruni ubanaü ligía lidan Departamentu le arihibei tau Agumeiraguagüdüni o lun seküretáriu le lídanbei damuriguaü le ñein hubéi danme le hagiribudun lídangiñe adamurini.

◼ Éigagülei: Barüti lubuidun wóuserun tidan burí éigagülei uéiriguni lun Heowá. Danme le hidin ñein, sánsigua humá buidu keisi aban mínisi kristiánu. Anhein aban lubéi échuni ligirún seinsu lun gürigia le etenirubei hun, adüga huméi.

◼ Haban chülüdügütiña:

Madüga humá daradu tuagu saragu rumu anhein mayusu hubóun lubéi, mebelaagüdün huguyame hóugiñe gürigia ha iridúbaña lidoun rumu.
Madüraagua huméi daradu, ánheingubeirügü asusereda aban lueirin turobuli sódiniti, ani awisaha humá lau lóufudagun tidoun haban chülüdügütiña gayara láamuga hayusurunu amu gürigia rumu (Mat. 5:37). Anhein hadüga, bürǘ huméi númeru le ichugúbei hun luáguti mayusurun humaaru lan rumu. Anhein hadüraagua daradu lárigiñe bián-wein-widü oura heferidirubei seinsu le fayei humaalibei.
Gabaroun huméi anhaün lan afayeiha tau tarjeta de crédito o débito dan le hebelurun tidoun haban chülüdügütiña, liibe-agei dan aguburahóuati sun tebegi rumu rédeiwa ligía lídangiñe hiseinsun lun lafayeirúniwa furumiñeguarügü damichi le gayarati lasuseredun sunme ñein humá. Siñabei hayusuruni seinsu ligía darí danme ladourun daradu fiú weyu lárigiñe háfuridun.
Barǘ humóun kareta to ídanboun tanaahóua ílagu danme le hayusuraaru lan ani giribugüda humóun tárigoun lau lóufudagun lun gayara lan hayusurunu amu.
Anhein ligía lubéi échunibei, ru humá somu seinsu houn nadagimeintiña ha íderagubalün tau hílagu tidan haban chülüdügütiña ani ígira humá giñe seinsu tubá arumadahatu rumu.
Tídanrügüla rumu to ñein lubéi gayara lan hábougun hábougua.
Manüga humá lídangiñe éigini, gafe, o yelu le eseriwidúabei houn gürigia ha achülürübaña arumuga tidan haban chülüdügütiña lidoun adamurini.
Mararamagualá harufuduni igaburi burí le líchugubei sífiri lidan hóuserun hama gürigia ha nadagimeinbaña tidan haban chülüdügütiña. Mabulieida huméi heteniruña lan houn saragu gürigia, óusera humá buidu, gagurabaguadi humá ani areida huguyame.
Súdiniti lun hetenirun agübürigu houn hasaanigu danme le tidan hamá haban chülüdügütiña, dandu lidan amudeiragülei, ágawagülei o pisina, fulasu le ñein lubéi heresibirúa gürigia luma le ñein lubéi ladügǘwa ehersísiu o katei líbeina lira.
Ebegi le bürüwañubei tidan Lista de hoteles recomendados ligíaba hafayeira luagu weyu, fayei humeime giñe liseinsuna gumadi. Anhaün haguburaha lóugiñe, mafayeira huméi ani awisaha humá lau lóufudagun lidoun Departamentu le Arihibei lau Láluahoun Halíaba lan Harumuga Íbirigu ha ñǘbuinbaña lidoun adamurini.
Anhein asusereda somu turobuli tidan hirumun sunme anihagua lan adamurini, awisaha humá lidoun Departamentu le Arihibei lau Láluahoun Halíaba lan Harumuga Íbirigu ha ñǘbuinbaña lidoun adamurini.

◼ Eseriwiduni lau gundaü. Sun ha busentiña hídehan lidan adamurini lunti houdin ariñagei lidan Departamentu lánina Eseriwiduni lau Gundaü. Nibureintiña ha magunfulirúngiña 16 irumu gayarati hawadigimaridun lábugiñe haríaahan hagübürigu o gürigia le óunigirubaliña o amu gürigia wéiriaali le unti híchiga lagübürigu kárugu.