Le lunbei gabaroun wamani lubá adamurini ǘrüwati weyu
Lóurate programa. Ladaünba 8:00 binaafin ladaarúa bena. Lagumeseruba programa lau músika ladáün 9:20 binaafin ǘrüwagubei weyu. Lúmounme oura ligía, lúnhalime lidan wamá wala lun gayara lan lagumeserun programa keisi lubudubu. Lagumuchuba programa kéiburi ladáün 5:00 rábounweyu wándaradi luma samudi, ánheinti dimaasu lagumuchuba kéiburi ladáün 4:00.
Alawaha waméi Heowá lau uremu. Eremuhatiña meha lumutuniña Heowá lun, lidan binadu dan, lun halawahani. Súdinimemegili músika lidan áhuduraguni inarüniti uguñe weyu (Sal. 28:7). Lau músika lagumesera kada fánreinti lánina adamurini le ǘrüwati weyu. Mámarügü lun waganbahan músika yágüragua lahuuda; adügǘwati lun walawahani Heowá luma lun wafurendeirun luagu. Ligíati, danme lawisahan alidihati sesióun lagumesera lan programa lau músika, lubaragiñe werederun ayanuha, áluaha waméi wala lun wañuurun aganbahei. Anhein wadüga ítara, warufudubei weiri lan lebegi áfaaguni le hadügübei íbirigu ha tanúadirubaña óundaruni Watchtower lun háfaruni burí músika le. Áfayahatiña íbirigu ha bián wéiyaasu lidan irumu uburugun Patterson (Newayoru) lun gürawárü hamani lubuidun burí músika le hínsiñebei woun waganbahan. Lárigiñe waganbahani músika le aubei lagumesera programa, walawahabei Heowá lau weremuhan lun.
Amuñeiruni tun karü. Danme le wagía lan ariha lau tamuñeirun karü, maguburahóunbei luagu, ani tamuñeiruba según to achülürütu furumiñe. Keiti liibe-agei lubéi dan lóuguati fulasu lun tamuñeirun karü, amisuraha wamutün lun haweiyasuhan saragu gürigia tidan ábanmeme karü, anhein gayara. Kárürügüboun to lautu awisahani o pülaka le arufudubalin hakarün lan gürigia ha danimatiña gayara tamuñeirun lidan fulasu le adireirúbei tubá hakarün danimatiña.
Haláü. Danme le ladaarúniwa bena, méibaagua humá lun hárügüdün haláü lidan fulasu le hínsiñetimabei hun kamá hamuga hásügüraguña. Samina humá hawagun ha híbiri, íbini mosu lanme hígiruni ubaraü le hínsiñetimabei hun houn amu lun hañuurun lidan aban le maweirinbei línsiñe hun. Arufuda wamuti kristiánugu lan inarünitiña wagía dan le aranseñu wamá lun wadügün sákürifisiu hawagu amu, adügatiti lira lun híchugun sun ha arihiti lubuidun wóuserun uéiriguni lun Bungiu (Huan 13:34, 35; 1 Ko. 13:5; 1 Fe. 2:12). Habarügübei gürigia ha awinwandubaña huma tidan tuguyaméme muna, ha aweiyasuhabaña huma tidan tuguyaméme karü o ha aturiahabarun Bíbülia huma gayara lan hareidun haláü. Madagaragüda humá ni kata luagu burí haláü, anhein mama lubéi hareiduñein habá amu. Anhein hadüga ítara, ménrengunbei lasubudirúniwa ka lan burí haláü málabei. Ñeinbei haláü adireirúti habá wéiyaaña mutu luma habá sánditiña. Kei mibe lubéi, ligía mama lubéi súnwandan gayara lan hañuurun sun haduheñu hama. Lau fulesei, ígira huméi haláü burí ligía habá wéiyaaña, habá sánditiña luma habá ha etenirubaña houn.
Gadünamatá wadaüragun. Lunti gadünama tan daüguaü to lunboun wayusurunu lidan adamurini, moun lumuti wáyeihani ligaburi asansiraguni hanarimeguti le kamanibei hadan ubouaguna (1 Tim. 2:9). Moun lumuti giñe wasansiragun kamá hamuga wéibuga adüga ehersísiu o áhurera bali, mamurigunga o maranseragunga woungua buidu ni íbini dan le wóudiña lan abürüdagüdei wiri tidan haban chülüdügütiña lun wibihin rumu o ederegerei, ni dan le mámañadiwa lan lidan adamurini. Anhein wadüga ítara, mabusigaríbadiwa wadahirunu tárüheta to asubudiragüdübalin lídanñadiwa lan adamurini tuagu wadaüragun, mabusigaríbadiwa giñe wapurichihan danme le wadarirun chansi. Ladügüba lubuidun ligaburi wóuserun luma waríawagun líteme lidan adamurini le ǘrüwati weyu, mámarügü lun habusenrun gürigia haruma tanigi haganbuni uganu tídangiñeti Bíbülia le gayaraabei lasalbaruniña, ladügüba giñe lun tagundaarun lani Heowá (Sof. 3:17).
Layusurún gágamuru konputadora o katei líbeina lira. Anhein samina hubéi hanügün gágamuru, konputadora o katei líbeina lira húmagua lidoun adamurini, lau fulesei, seti huméi lun meberesehan lani haganbun ha híbiri. Anhein hayusuruba lubéi aban konputadora dábuledu, aban kámara lun hadiraahan o lun gürawárü humá bidéu o amu katei kei lira, samina humá hawagun ha híbiri, meberesehan huméi harihin, gayara láamuga harihini sun le asuseredubei luagu plataforma. Arufuda humá giñe inebehabu houn amu lau móunahan humá, anhein mama lubéi mosu, lirahüñü burí abürüdǘni houn amu luéigiñe gágamuru o Internet sunme aniha lan programa.
Éigini. Barǘ huméi heigin húmagua lidoun adamurini luéi háfuridun agañeihei lidan lóurate emeraaguni amidirugu. Gayaraati hanügün aban lagei yelu le gabarati lábugiñe haláü lidoun adamurini. Moun lumuti hanügün lagei yelu le wéinamuti ni budéin o ágeidinaü le bídüriu.
Budagia. Lidan adamurini, gayaraati warufuduni weteingiradi luagu fedu lúmagiñeti Bungiu le lau wíchugun budagia lau gundaü lun lawanserun wadagimanu lánina apurichihani lidan sun ubóu. Sun ha íchugutiña budagia tau chekü lunti hadügünu lau tiri “Watch Tower Bible and Tract Society of Pennsylvania”. Ñeinbei adamurini le ídanti gayaraabei lan híchugun íbirigu budagia tau tárüheta lánina dúeiti o tau tárüheta lánina seinsu areidúañuti.
Árani. Anhein hátahaña lubéi árani le líchugun surusia hun, lau fulesei, barǘ huméi le hemegeirubei húmagua, ladüga úabei lidan adamurini. Anhein anihein lubéi libimen hitaü huagu ani mosu hayusurun agusa, mabulieida huméi háguruni keisi lubudubu, lugundun denchati ifei burí le. Mágura huméi lidoun lagei ifei ni lidan adamurini ni tidan haban chülüdügütiña.
Lun masuseredun lan danaguaü. Wéiriti lisudinin wóunigiragun woungua luéi lasuseredun somu danaguaü ladüga waguyedagun o wabuguchun. Sagü irumu, añahein gürigia abuleseirútiña tadüga sabadu to hayusuruboun, tótima íñutu. Buítimati magürewei tan hisabadun manarime ligíame tuenden, gayara láamuga héibugun darangilu luéigiñe üma irirati, esütépu o katei líbeina lira.
Gürigia ha hénrenguti haganbun. Ñeinbei adamurini le ídanti lásügürawagüdüba programa tidan radiu (FM). Lun gayara lan lahuudun hun mégeibadün aban tiraüraü radiu to lautu batería luma audífonu.
Ugunei to adahóuaboun hau irahüñü luma haláü gabaruchawaguaditi. Moun lumuti tanügǘn ugunei to adahóuaboun hau irahüñü ni haláü gabaruchawaguaditi lidoun adamurini. Gayaraati hanügün haláü houn irahüñü anhein lídangiñeti lubéi le gayaraabei lachakürǘn luagu aban haláü.
Ibiñein. Adügǘwati liibe-agei adamurini lidan burí fulasu le daruguati; garabalirügüñein le ebelaagüdüwabei lau somu máhina ñein. Ligíati, lun warufuduni wínsiñehabu, buiti lun mayusurun wamá saragu ibiñein le héreti líhemen, le gayaraabei ladügün dañu houn gürigia ha gayaraabei lachatirun hawaragun o katei líbeina lira (1 Ko. 10:24).
Éigagülei. Barüti lubuidun wóuserun tidan burí éigagülei uéiriguni lun Heowá. Danme le hidin ñein, sánsigua humá buidu keisi aban mínisi kristiánu. Anhein aban lubéi échuni ligirún seinsu lubá gürigia le etenirubei hun, adüga huméi.
Haban chülüdügütiña:
Madüga humá daradu tuagu saragu rumu anhein mayusu hubóun lubéi, mebelaagüdün huguyame hóugiñe gürigia ha iridúbaña lidoun rumu.
Madüraagua huméi daradu, ánheingubeirügü asusereda aban lueirin turobuli sódiniti, ani awisaha humá lau lóufudagun tidoun haban chülüdügütiña gayara láamuga hayusurunu amu gürigia rumu (Mat. 5:37). Anhein hadüga, bürǘ huméi númeru le ichugúbei hun luáguti mayusurun humaaru lan rumu. Anhein hadüraagua daradu lárigiñe bián-wein-widü oura heferidirubei seinsu le fayei humaalibei.
Gabaroun huméi anhaün lan afayeiha tau tárüheta lánina dúeiti o tau tárüheta lánina seinsu areidúañuti dan le hebelurun tidoun haban chülüdügütiña, liibe-agei dan, aguburahóuati sun tebegi rumu rédeiwa ligía lídangiñe hiseinsun lun lafayeirúniwa furumiñeguarügü damichi le gayaraati lasuseredun sunme ñein humá. Siñabei hayusuruni seinsu ligía darí danme ladourun daradu fiu weyu lárigiñe háfuridun.
Danrügülá hemegeiraaru lan kareta to ídanboun lanaahóua ílagu hárügüdoun ani giribugüda humóun tárigoun lau lóufudagun danme súnhali hayusurunu gayara lan hayusurunu amu.
Anhein ligía lubéi échunibei, ru humá somu seinsu houn nadagimeintiña ha íderagubalün tau hílagu tidan haban chülüdügütiña, ígira humá giñe seinsu tubá arumadahatu rumu.
Tídanrügüla rumu to ñein lubéi gayara lan hábougun hábougua.
Márügüda humá lídangiñe éigini, gafe o yelu le igirúbei habá sun ha achülürübaña arumuga tidan haban chülüdügütiña lun hanügüni lidoun adamurini.
Mararamagualá harufuduni igaburi burí le líchugubei sífiri lidan hóuserun hama gürigia ha nadagimeinbaña tidan haban chülüdügütiña. Mabulieida huméi heteniruña lan houn saragu gürigia, óusera humá buidu, gagurabaguadi humá ani areida huguyame.
Súdiniti lun hetenirun agübürigu houn hasaanigu danme le tidan hamá haban chülüdügütiña, dandu lidan amudeiragülei, ágawagülei o pisina, fulasu le ñein lubéi heresibirúa gürigia, le ñein lubéi ladügǘwa ehersísiu o katei líbeina lira.
Ebegi le bürüwañubei tidan Lísüta tánina haban chülüdügütiña ligíaba hafayeira luagu weyu, fayei humeime giñe liseinsuna gumadi. Anhaün haguburaha lóugiñe, mafayeira huméi ani awisaha humá, lau lóufudagun, lidoun Departamentu le Arihibei lau Láluahoun Halíaba lan Harumuga Íbirigu ha Achülürübaña lidoun Adamurini.
Anhein asusereda somu turobuli tidan hirumun sunme anihagua lan adamurini, awisaha humá lidoun Departamentu le Arihibei lau Láluahoun Halíaba lan Harumuga Íbirigu ha Achülürübaña lidoun Adamurini.
Eseriwiduni lau gundaü. Sun ha busentiña hídehan lidan adamurini lunti houdin ariñagei lidan Departamentu lánina Eseriwiduni lau Gundaü. Nibureintiña ha magunfulirúngiña 16 irumu gayaraati hawadigimaridun lábugiñe haríaahan hagübürigu o gürigia le óunigirubaliña o amu gürigia wéiriaali le unti híchiga lagübürigu kárugu.