Aban líburu lun aturiahani to úatu amu tibe

Lidan eneru, irumu 2021, awisahati Musu Úaraguati luagu tadügǘba lan aban iseri líburu lun taturiahóun Bíbülia gíritu Winwan humá lau ugundani.a Ka hasandirubei dan haganbunbalin ñunsu le? Ariñaga lumuti Matthew, le awinwandubei Kanadá, ida liña lan lasandiragun lungua: “Wéiriti meha nugundan! Danti le naganbunbalin burí yanu ani arihanéi bidéu burí le afuranguagüdübalin ka lan uagu tadügǘwa líburu to luma ida liña lan larihíniwa anhein gunfuranda habalin gürigia le bürüwañubei tidan, ábantima nagundaarun. Memeniha buga nanigi narihinu luma nagumeserun ayusuroun!”.

Lau sun yusu tan líburu to aban iseri igaburi lun lichugún aturiahani tídangiñeti Bíbülia, mámarügüñein lidan katei le amu tan tuéi to burí ayusurúboun tubaragiñe. Anhein gámañaha humaaru lubéi líburu to imprimíruaaruboun húhaburugu, másiñati ariha humaali lan anihein lan aban katei tuagu le úati tuagu to tíbiri. Busentün hasubudiruni katei lan? Lun lira, furendei humá luagu ida liña lan tadügǘn líburu Winwan humá lau ugundani.

Aban iseri líburu lau aban iseri igaburi

Tigaranan gárada. Lun tadügǘn líburu Winwan humá lau ugundani, mégeiwati meha aban ubanaü le garanatimati. Ka uagu? Ladüga anuhein tóugiñe 600 iyawaü to ámuñegueinarügüti tikolorun tidan líburu to, kéiburi diisi wéiyaasu tóugiñe to tídanboun líburu Kátima san. Lanwoun lira, anihein giñe fánreinti tidan le ídanbei mabürüdǘn lan ni kata, ua tuguya iyawaü ñein. Bián katei le úara, barüti turobuli. Dan le ibibiñe tan gárada, ménrengunti tarihíniwa iyawaü to lídanboun le aban louba ubanaü íbini murusunraü. Lun masuseredun lan katei le, hóuchaguatiña íbirigu ha lídanbaña Sétanu le Arihibei lau Imprimírua tan Agumeiraguagüdüni ha Wallkillbaña (Newayóru) gádürü ámuñegueinarügü tuwuyeri gárada to ayusurúboun Betelirugu. Ábati hanúadirunu lílana Sétanu le Arihibei lau Labürühóun Ariñahani gárada tótima duruboun. Lau sun inarüni lan luagu sérutima tan gárada to kéiburi 16 wéiyaasu tuéi tóñaha wayusuruboun, adügati katei le lun hayusurunu aturiahatiña líburu Winwan humá lau ugundani marihinga hamóun iyawaü to lídanboun le aban louba ubanaü.

Ligaburi lafurarún tidáü líburu. Ámuti lasandirún tidáü líburu Winwan humá lau ugundani luéi tidáü amu burí líburu ladüga lau lan amu luwuyeri ubuñei lafurarúa. Miriti tidáü to tíbiri líburu, ánheinti tidáü líburu to, mámirinti lun buídutima lan larihín dibuhu le luágubei. Lanwoun lira, ídehati ligaburi ladügǘn idáü le lun magadeirun tan furese. Gayaraati sérutima lan luwuyeri idáü le seingü wéiyaasu luéi le miribei. Ligía tawadigimaridunbei saragu sukursáli lidan aban lun hadarirun aban ebegi le ǘnabutimati.

Ánheinti sérutima lubéi ubuñei le, kati uagu layusurúa? Afuranguagüda lumuti aban íbiri le lílana Sétanu le Arihibei lau Imprimírua tan Agumeiraguagüdüni: “Kei tayusurúba lubéi líburu to saragu, busentiwa lun magadeirun tan furese”. Ariñagati Eduardo, le awadigimaridubei tidan áfisi to ñein lubéi imprimírua tan agumeiraguagüdüni tidan sukursáli to Bürasíliboun: “Gúndaagüda lumutiwa tayusurun lóundarun Heowá ubuñei buiti lun gayara lan wayusurun aban líburu buitu kei to sun anuha lan ayusurei budagia buidu”.

Turobuli le úmabei wagagibudagua lun imprimírua tan agumeiraguagüdüni lidan lidaani sandi COVID-19

Gumesetiwa imprimíroun líburu Winwan humá lau ugundani lidan ǘrüwa-hati, irumu 2021, lidan lidaani sandi COVID-19, ligíati aba lubéi wagagibudagun luma amu burí lénrengunga. Kei meha siñá lubéi lafuridúniwa ni lebelurúniwa tidoun Beteli, siñati meha hachülürün íbirigu ídeha Betelirugu ni hiridún iseri eseriwidutiña ñein. Ligía meha lougua habéi íbirigu ha imprimírübaña ani mosu meha giñe tadourun fiu imprenta ladüga lúrudu le híchugubei gumadimatiña.

Ida liñati hagagibudagun luma burí lénrengunga le? Danbei le gayara lubéi imprimírua tan agumeiraguagüdüni, aba lamuriahóun hama íbirigu ha eseriwidubaña lidan burí amu departamentu Betelirugu lun hídehan luagu fiu dan lidan imprimírua tan agumeiraguagüdüni. Ariñagati Joel, le etenirubei lun imprimírua tan agumeiraguagüdüni: “Adügati areini le harufudubei íbirigu ha luma aranseñu hamá lun hafurendeirun katei iseri lun gayara lan wadügüni sun wadagimanu le ichugúbei woun”.

Íbini gagibugua wamá luma burí lénrengunga imprimírühadiwa saragu míñunu líburu Winwan humá lau ugundani ani lun lira, yúsuhadiwa saragu ubuñei, kéiburi singi lun imprimírua tan agumeiraguagüdüni, tafurarúniwa, bandi gárada, tinta luma pegamentu. Lúmounbei wanügün seingü hati imprimírü agumeiraguagüdüni, gástaadiwa meha lóugiñe 2.3 míñunu dólarü merigana lun lagañeihóun ubuñei burí le. Lun magastarun wamá saragu, áfaaguatiwa lun imprimírü wamanu líburu tórügü hemegeiruboun lílana damuriguaü.

“Ma tubuidun líburu to”

Ida liña hasandiragun máisturugu hama aturiahatiña houngua tau líburu to? Ariñagati aban íbiri gíriti Paul, le awinwandubei Australia: “Hínsiñetu líburu to nun saragu darí lun hínsiñe lan nun níchugun aturiahani tau. Chawá tumuti harihin gürigia ani adügatu lun wayanuhan biángubei. Le hínsiñebei nun óundara tani líburu to ariñahani furanguti, álügüdahani huliliti le achülürübei tidoun hanigi gürigia, bidéu, iyawaü, rekuáduru burí, lúmati fánreinti le ñein lubéi lichugúa dasi houn aturiahatiña lun hawanserun. Ma tubuidun líburu to; ínchaha tumutina lun garufudahadi nan”.

Ariñagati aban aturiahati merigana: “Hínsiñetu iseri líburu to nun. Íderagua lumutina dibuhu burí le tídanbei lun gunfuranda nani puntu le súdinibei. Chülüti bidéu le ñeinbei tidoun nanigi ani ínchaha lumutina lun nawinwanduni le nafurendeirubei”. Abasiihati aturiahati le lidoun sun adamuridaguni ani aturiahati bián wéiyaasu lidan dimaasu.

Mégeigidiwa imprimírü wamá saragu míñunu tídangiñe líburu to lidan saragu iñeñein. Adügaali Musu Úaraguati aransehani lun imprimírua tan líburu to lidan 710 iñeñein, 340 tóugiñe líburu Kátima san.

Halíagiñe libihúa seinsu lun ladügǘn sun wadagimanu le? Lídangiñe budagia le ichugúbei lun lamainirún apurichihani lidan sun ubóu. Saragu lídangiñe budagia le, rúati lídangiñe donate.jw.org. Rútiwa seremei hun luagu gíchigadi humá. Ídehati lira lun wadügün líburu to luntu taturiahóun Bíbülia houn gürigia ha busenbaña hasubudiruni Heowá luma hawinwandun lun súnwandan (Sálumu 22:26).