Ruti Heowá gurasu houn ha asufurirubaña luma gálumaü tun hanigi. Kaba íderaguawa lun gudemehabu wamá luma lun wíchugun gurasu houn amu ítara kei ladügüni Heowá? Líderagubadiwa wáyeihan amu burí igaburi le gánibei luma lichugúniwa gurasu. Kéiburi ka igaburi? Ani kaba íderaguawa lun hínsiñeguameme wamá wámagua, sigí wagíame íchiga gurasu wámagua sagü weyu? (1 Tesa. 4:18). Mosu wafurendeirun íchaagua woungua lidoun halugaarun amu, wasandirun ínsiñeni hawagu libe le wasandirubei hawagu waduheñu luma warufudun areini (Kol 3:12; 1 Fe 3:8). Dan le gudemehabu lan gürigia ani anihein amu burí igaburi le luagu, ménrengunbei lun lun líchugun gurasu houn ha ásügürübaña lídangiñe lénrengunga. Afuranguagüda lumuti Hesusu katei le lau dimurei le: “Katei le buinbei tidan anigi, ligía lariñagubei iyumaü. Gürigia le buídubei, katei buiti lariñagubei ladüga tídanñein lan lanigi ubuiduni” (Mat. 12:34, 35). Furanguti wíchugun lan gurasu houn wábirigu ábanbei lídangiñe igaburi le buídutimabei lun warufudun ínsiñeni. w23.11 páh. 10 pár. 10, 11

Lun gunfuranda wamani profesía burí le tídanbei Bíbülia, mosu wamuriahan ídemuei. Samina humá habisidahaña lan aban uburugu le ibidiñeti hun ani ñǘdünti aban humada huma, le subudibalin uburugu ligía buidu buidu. Subudi lumuti halíañadün lan luma haliñounba lan lanügaün ámuñegueinarügü üma le ñeinbei. Ma lubuidun ñüdün lan humada huma! Ítarameme, subudi lumuti giñe Heowá ka lan dan ídanbei wawinwanda luma ka lan mégeigilibei lun lasuseredun. Ligíati, lun gunfuranda wamani profesía le tídanbei Bíbülia, mosu wamuriahan luma Heowá lau ǘnabuguni lun líderaguniwa (Dan. 2:28; 2 Fe. 1:19, 20). Kei furumiñeguarügü úguchili, busenti Heowá lun buidu lan lidin houn lisaanigu ámuñegü (Her. 29:11). Ani mítaranti Heowá kei agübürigu ha ubouagubaña, lugundun subudi lumuti buidu buidu kaba lan asusereda ámuñegü ani adügati lun labürüdǘn profesía burí le tidan Lererun ladüga busén lan lun wasubudiruni le lunbei lasuseredun saragu dan lubaragiñe (Isa. 46:10). w23.08 páh. 8 pár. 3, 4

Rúhali Bungiu ubafu lun Hesusu lun lagumuchun lau sun turobuli le ubouagubei. Anihein burí turobuli le siñá wamuti aransera. Ánheinti Hesusu, arufudati lau burí milaguru le meha ladügübei luagu gabafu lan lun laransehani, kéiburi lagidaruni wuribani le ubouagubei, figóu le galagante wabéi lau sun le lanügübei lúmagua, sandi luma óunweni laganagua (Mat. 9:1-6; Rom. 5:12, 18, 19). Arufudati burí milaguru le ladügübei gayara lan lareidaguagüdüni “sun luwuyeri sandi” luma láguyuguagüdün hilaaña (Mat. 4:23; Huan 11:43, 44). Gabafuti giñe lun lararamuni lanarime burí durumandei luma lun lagumuchun hau sífirigu wuribatiña (Mar. 4:37-39; Luk. 8:2). Ma ruti darangilaü woun wasubudiruni rúhali lan Heowá ubafu lun Liráü? Gayaraati wachoururuni lagunfuliruba lan abiniruni burí le wagurabubei lun lanügüni Larúeihan Bungiu. Arufudaali milaguru burí le meha ladügübei Hesusu ubouagu, gayara lan ladügüni asansiruni burí le dayarügü lidan sun Ubóu keisi Lurúeite Larúeihan Bungiu. w23.04 páh. 3, 4 pár. 5-7