Nefu-hati

Rúhali Bungiu ubafu lun Hesusu lun lagumuchun lau sun turobuli le ubouagubei. Anihein burí turobuli le siñá wamuti aransera. Ánheinti Hesusu, arufudati lau burí milaguru le meha ladügübei luagu gabafu lan lun laransehani, kéiburi lagidaruni wuribani le ubouagubei, figóu le galagante wabéi lau sun le lanügübei lúmagua, sandi luma óunweni laganagua (Mat. 9:1-6; Rom. 5:12, 18, 19). Arufudati burí milaguru le ladügübei gayara lan lareidaguagüdüni “sun luwuyeri sandi” luma láguyuguagüdün hilaaña (Mat. 4:23; Huan 11:43, 44). Gabafuti giñe lun lararamuni lanarime burí durumandei luma lun lagumuchun hau sífirigu wuribatiña (Mar. 4:37-39; Luk. 8:2). Ma ruti darangilaü woun wasubudiruni rúhali lan Heowá ubafu lun Liráü? Gayaraati wachoururuni lagunfuliruba lan abiniruni burí le wagurabubei lun lanügüni Larúeihan Bungiu. Arufudaali milaguru burí le meha ladügübei Hesusu ubouagu, gayara lan ladügüni asansiruni burí le dayarügü lidan sun Ubóu keisi Lurúeite Larúeihan Bungiu. w23.04 páh. 3, 4 pár. 5-7

Anhein weiri lubéi damuriguaü le ñein hubéi, háfuga ñeinbei lan dan mibihin humá híchugun óunabagülei ladüga gibe hamá íbirigu ha busentiña híchugun óunabagülei. Anhein ítara liña lubéi, háfuga saminaadün lan buídutimabei lan lun miñurun humani húhabu, lau sun lira, mábürühala harüna. Ualá gufuruma humá láurügü haranserun aban óunabagülei. Ítara, anhein siñá híchugun óunabagülei lidan burí furumiñeti párafu, gayaraabei hóunabun lidan furumiñeguarügü amu. Danme le haranserun lubá taturiahóun Garüdia Awisahatu, samina humá ida liña lan lúaradun kada párafu luma tema le lichügüdinabei aturiahani ligía. Ítarati, aranseñu huba lun hóunabun. Ábanya katei le gayaraabei hadügüni, haranserun lidan burí párafu le ayanuhabei luagu inarüni létima hulilibei tidan Bíbülia. Kei le hénrengu lubéi lafuranguagüdüniwa párafu burí le, míbetiña burí íbirigu iñuruti háhabu lun hóunabun lidan. Ánheinti hénrengumemegili lubéi hun lun híchuguni hóunabagüle lidan adamuridaguni? Lubaragiñe lagumeserun adamuridaguni, ariñaga huméi lun íbiri le alidihabalin aturiahani ka lan álügüdahani habusenrubei hóunabun. w23.04 páh. 21, 22 pár. 9, 10

Súnwandan meha lafalaruni Hosé ladundehan Heowá ani adügati le lun aban lan wügüri buiti. Ǘrüwañein wéiyaasu líchugun Bungiu adundehani lun, lun lóunigiruniña liduheñu. Ani adüga lumuti lau lóufudagun íbini hénrengu lan (Mat. 1:20; 2:13-15, 19-21). Seremei gaganbadi lan Hosé lun Heowá gayara lubéi meha lóunigirunu María. Chóuruti adüga lan katei le lun hínsiñetima lan tun María luma lun inebetima lan tun. Huguya wügüriña maríeitiña, gayaraati háyeihani Hosé lau háluahan adundehani tídangiñeti Bíbülia le lunbei líderagunün óunigiraña hiduheñu. Dan le hafalaruni adundehani le, íbini mosu lan hadügün asansiruni lidan hibagari, arufudatün hínsiñe tan hani weiriou hun. Ani ladügüba katei le lúntima derebugu lan hibagari keisi maríeitiña. Ariñagatu aban íbiri to awinwanduboun Banuatu, to barüharuboun lóugiñe 20 irumu maríeiñu: “Dan le narihini nani weiriei áluahei ladundehan Heowá luma afalarei, ábatima inebe lan nun. Chóuruti nasandiragun nungua ani afiñetina luagu le lanúadirubei ladügün”. w23.05 páh. 21 pár. 5

Huríu ha meha agiribudubaña Babilóniagiñe, mosu meha lánigubaña lan Bungiu (2 Lur. 7:6). Mini lan san le hadügüñein lan meha sun katei buidu? Uá. Mosu meha hadügün asansiruni lidan habagari lun gayara lan hagundaaragüdüni Heowá. Genegeti aba lan meha háyeihani saragu hádangiñe huríu ha águrahoubaña Babilónia ligaburi hasaminan luma hechun babilóniana. Irumu burí lárigiñe, aba taweiridun lanigi gumadimati Neemíasi lau larihin mariñagadi hamá harahüñü huríu lun hererun ebüréu (2 Lur. 6:6, 7; Neem. 13:23, 24). Ida luba méhati hafurendeirun asandira ínsiñeni luagu Heowá luma áhuduragua lun anhein ua lubéi gunfuranda hamani iñeñein létima ídanbei tabürüdǘwa Lererun Bungiu? (Ésüd. 10:3, 44). Ligía mosu lubéi meha hadügün huríu ha óunwenbu burí asansiruni, ani ménrenguntimabei meha houn lun hadügüni lau hawinwandun Ísüraeli ladüga ladügǘña meha aransehani lunya láhudurawagun lun Heowá (Neem. 8:8, 9). w23.05 páh. 15 pár. 6, 7

Híruti, íbini lan ichaahóua lan woun lun wadügün aban katei, gayara lan wadunragun luma turobuli le gayaraabei leberesehaniwa. Kéiburi dan le ladügün “katei le magurabúnti” lun madaani wamá lun wadügüni le wabusenrubei wibihin lidan weseriwidun lun Bungiu (Apur. 9:11, TNM). Gayaraati giñe ladügün turobuli lun lábürühan warüna luma lun lagidaruni were (Ari. 24:10). Ani kei chará wabéi, anihein dan wádaruni wagudi ani adügati katei le lun hénrengu lan woun wáfaagun lun wibihini le wabusenrubei wadügün (Rom. 7:23). O másiñati labuchadun wawagu (Mat. 26:43). Ka gayaraabei líderagunün lun hubaruaguounméme humá dan le lasuseredun lira o dan le mabuidun lan huéyuri? Haritagua huméi dan le lan mibihin humani le habusenrubei hadügün, úati lan mini lan lira luagu moun lumuti lan hasigirun áfaagua. Según tariñaguni Bíbülia, wásügürüba lídangiñe saragu turobuli. Lau sun lira, ariñagatu giñe woun gayara lan wasigirun wabaruaguóun luma wibihini le wabusenrubei lidan weseriwidun lun Heowá. Ítara liña, dan le wasigirun wabaruaguóun, íbini laganagua turobuli, warufuduñein lun Heowá busén wamá wagundaaragüdüni. Saminatün san luagun óunwenbu ugundani le lasandirubei Heowá dan larihini wáfaaguña lan lun wadügüni le wabusenrubei wadügün lidan weseriwidun lun? w23.05 páh. 30 pár. 14, 15

Ánhabu eseriwida kei prekursoru, bafurendeiruba ídeha hamá ámuñegueinarügü hawuyeri gürigia luma ayusurei seinsu buidu (Fili. 4:11-13). Ka uagu magumeserun bubéi eseriwida kei prekursoru ídehati? Laranserubadibu le lun beseriwidun kei prekursoru luma lun beresibirun amu burí dasi lánina dan dayarüti, kéiburi lidan ábunaguni o Betelirugu. Sun íbirigu wügüriña, lunti háfaagun lun hadügüni le mégeiwabei lun heseriwidun keisi wéiyaaña lidan afiñeni. Ariñagatu Bíbülia luagu íbiri le busenbei leseriwidun houn íbirigu lidan dasi le: “Buiti labusenrubei ladügün” (1 Tim. 3:1). Lubaragiñeti lira, mosu beseriwidun kei ídehati lidan damuriguaü. Íderagua hamutiña ídehatiña lidan damuriguaü wéiyaaña lidan afiñeni lidan ámuñegueinarügü igaburi. Dandu ídehatiña lidan damuriguaü kei wéiyaaña lidan afiñeni, seriwitiña lau ǘnabuguni houn hábirigu ani apurichihatiña lau ubebeni. w23.12 páh. 28 pár. 14, 16

Gumeseti urúei Hosíasi áluahei Heowá dan meha le nibureingili. Busenti meha lasubudiruni Lubungiute buidu buidu luma ladügüni lugundan. Hénrenguti meha lun Hosíasi larúeihan lidan dan ligía, ladüga meha hudugua hamá hiibe-agei gürigia houn búngiugu mama inarünitiña. Ligía meha megei lubéi Hosíasi ganigi lan lun lageindagun luéigiñe áhuduraguni inarüniti. Ani buiti ladügüni! Manügüngili meha ni 20 irumu dan le lagumeserunbei agidaraguei sun katei le gánibei luma áhuduraguni houn búngiugu mama inarünitiña lídangiñe ageiraü (2 Kro. 34:1, 2). Íbini nibureingidibu lan, gayaraati ítara ban kei Hosíasi. Ida? Lau báluahani Heowá luma afurendeireina ban luagu lubuidun ligaburi. Línchahabadibu katei le lun bederegeragun bungua lun Heowá. Ani kaba buiti lanüga katei le bun? Ariñagati Luke, le abadiseirúbei dan meha le 14 lubéi irumu lau: “Lúmagiñe guentó lun lubaruaguóun, neseriwidun lun Heowá ligíaba furumiñe lidan nibagari ani náfaaguba lun nagundaaragüdüni” (Mar. 12:30). Bibihuba saragu abiniruni anhein badüga ligiaméme. w23.09 páh. 11 pár. 12, 13

Dan meha le labürüdünbarun apostolu Pábulu ligaradan houn tesalónikana, manügüngiña meha ni aban irumu keisi damuriguaü. Másiñati míbegili lan meha hasubudin wéiyaaña lidan afiñeni ha ñéinbaña ani chará hamá. Íbini ítara, mosu meha larufudúniwa inebesei houn. Eibu ayarafadeina lan óunwenbu asufuriruni, háfuga mosu lanme wáluahani hídehan wéiyaaña lidan afiñeni ha lídanbaña damuriguaü le ñein wabéi sügǘ lau lidan amu dan, ladüga gayaraati mibihinhadiwa lanme adundehani túmagiñe lóundarun Heowá ni tídangiñe sukursáli. Ligía lunti lubéi hínsiñe hamá wéiyaaña lidan afiñeni woun, arufuda wagíame inebesei houn. Meberesenga le asusereduti, kipu wamá lichú aau ani metenira wamá lun hachara. Lubaragiñe lira, gabaroun waméi layusuruñein lan Heowá Kristu lun ladundehaniña wügüriña úaraguatiña ha. Ítara kei lóunigiruni bunidi lichügü súdara, lóunigirubei giñe emenigini lánina asalbaruni wasaminan. Rútiwa fe meseriwín lan sun le lídanbei ubóu le lun ni kata (Fili. 3:8). Ruti giñe emenigini le darangilaü tun wanigi, ru ligía iderebugu woun. w23.06 páh. 11, 12 pár. 11, 12

Sun ha aganbubalin le tariñagubei würi “ibidiougua tau”, lunti hanúadiruni kaba lan hadüga: hánharun lun agunbirahani le tadügübei o hamaharun lun. Gébunati lun méiguadun wamá lidoun magíaguni. Según líburu to gíriboun Ariñawagúni, ariñagatu würi “ibidiougua tau”: “Bímetimati duna íweruhouarügüti” (Ari. 9:17). Ka mini lubéi “duna le íweruhouarügüti”? Ariñagatu Bíbülia ítara liña lan agamariduni hadan maríeitiña kei duna diliti (Ari. 5:15-18, TNM). Gayaraati larounrun wügüri tuma aban würi, marieirügaaña ligía ligibugiñe lúrudu. Mítaranti “duna le íweruhouarügüti”. Mini lan duna le, magíaguni, ani dürügua lumuti lilurudun Bungiu. Liibe-agei dan, gürigia ha adügübaña magíaguni, adüga hamuti aramudaguarügü, kei ladüga aban híweruti dan le líweruhan. Gürigia ha asaminarubaña haramuduñein lan iwiyei le hadaagubei, habulieidaguña. Ariha lumuti Heowá sun katei, úatiña ni aban lun heyeeduni. Ani lau sun gayara lan hasandiruni katei le kei “duna bímeti”, úati ni kata gífitimati luéi leferidiruni gürigia lumadagua luma Heowá (1 Ko. 6:9, 10). w23.06 páh.  22, 23 pár. 7-9

Anhein sandí hubéi mámaali lan tídangiñe sun hanigi hafurieida o masandi humaali lan ugundani le meha hasandirubei lidan apurichihani, masaminara humá féridi humaali lan lani Heowá sífiri sandu. Kei gafigoun wamá, ñeinbei dan wasandiragun woungua ítara. Anhaün ariha hagumeseruña lan eferidirei ubebeni le meha huágubei, ráramagua humá asaminara luagun le meha asuseredubei lun apostolu Pábulu. Íbini meha áfaagua lan lun láyeihani Hesusu, subudi lumuti meha ñeinbei lan dan hénrengu lan lun lun ladügüni le buídubei. Lidan amu dimurei, aranseñu liña meha Pábulu lun lagunfulirun lau lani ministeriu meberesenga ida liña lan lasandiragun lungua. Ítarameme, kei chará wabéi, moun lumuti wafiñerun luagu le wasandirubei dan le wanúadiruni kaba lan wadüga. Lubaragiñe lira, lunti aranseñu wamá lun wadügüni le buídubei íbini dan le henren lan woun. Anhaün asigira adügei le buídubei, lau lásügürün dan, gayaraabei lasansirun le hasandirubei (1 Ko. 9:16). w24.03 páh. 11, 12 pár. 12, 13

Gayaraati warufuduni wínsiñehabu houn wábirigu lau weresibiruniña lau sun wagundan luma lau wánharun houn keisi wamadagu (2 Ko. 6:11-13). Saragu wádangiñe, awanhein lidan damuriguaü le ñein habéi íbirigu ha ámuñegueinarügüti hagaburi ladüga ligaburi hagüriarún. Kaba íderaguawa lun hínsiñetima hamá woun? Wetenirun lun lubuidun hagaburi. Ligíati, ida luba warufuduni hínsiñe hamá wábirigu woun? Lau wáfaagun lun warihiniña kei larihiniña Heowá. Lídanme saragu asufuriruni, mósume warufudun ínsiñeni hawagu wábirigu. Ida luba lóunigiruniwa Heowá danme le lagumeserun saragu asufuriruni? Samina wamá luagun adundehani le meha líchugubei Heowá houn lumutuniña lun líderaguniña ásügüra lau ibagari lídangiñe lábürühoun luagun binadu Babilónia: “Heiba, nánigu, belú humá húbiñoun hadouragueime bena haugua. Aramudagua humá luagu murusun dan, darí lásügürün ligañi Wabureme” (Isa. 26:20). Másiñati giñe mosu lanme wadügüni ligiaméme danme le wásügürün lídangiñe saragu asufuriruni. w23.07 páh. 6, 7 pár. 14-16

Subudiwa humá kei aban gürigia le gunfuranda lumutiña amu. Álügüdagua humá hungua: “Sanditiña ha híbiri gürigia aranseñu niña lan lun nadügün asansiruni ani madügüdarun nan lun ladügǘn katei kei nabusenruni? Aganba numutiña san amu, ígira nuguya lun hadügüni le himei habéi anhein mariban lubéi?”. Dan le gunfuranda wamaniña amu ani aranseñu wagía lun wadügüni asansiruni le emegeirúbei, warufuduñein luagu wáyeihañein lan Heowá luma Hesusu. Dan le lasansirun gádantiwa, lunti aranseñu wamá lun wadügüni asansiruni le mégeiwabei lugundun gayaraati lanügün katei le turobuli le magurabun wamuti. Gayaraati ladagarun sandi wéiriti wawagu, wagagibudagun luma maseinsuni o lasansiragun katei lidan polítika (Apur. 9:11, TNM). Íbini wadasin tidan lóundarun Heowá, gayaraati lasansirun ani gayaraati hénrengu lan asansiruni ligía woun. Gayaraati wéchudun luagu iseri asansiruni lidan wabagari anhein wasigira gádürü adundehani le: 1) wánharun lun asansiruni, 2) wetenirun lun le lunbei liabin, 3) wetenirun lun katei buiti le lídanbei wabagari lúmati 4) wadügün katei buiti hawagu amu. w23.07 páh. 22 pár. 7, 8

Dan meha le nibureingili Danieli, aba hanügüni babilóniana hageiroun, dise luéi Herusalén le lageira. Lau sun meha nibureingili lan Danieli, wéiritu meha hanigi amu lau. Ténitiña babilóniana lun le harihibei ligibugiñe hagu: aban nibureinti magadiñeti le úabei mégeiti luagu ani hádangiñeti iduheñu ha íñubei habara lidan lageira (1 Sam. 16:7). Ligíati larufudahóunbei lun lun hádangiñe lan gürigia ha íñubei habara Babilónia (Dan. 1:3, 4, 6). Hínsiñeti meha Danieli lun Heowá ladüga aban lan nibureinti le busenbei leseriwidun lun. Subudi wamuti ítara liña lan, ladüga dan meha le wein lubéi irumu lau Danieli, írida lumuti Heowá úara hama wügüriña úaraguatiña kéiburi Noé luma Hobu, ha meha eseriwidubaña lun luagu saragu dan lau úaraguni (Agu. 5:32; 6:9, 10; Hob. 42:16, 17; Ese. 14:14). Súnwandan meha hínsiñe lan Danieli lun Heowá, wügüri le awinwandubei aban ibagari buiti ani migifeti (Dan. 10:11, 19). w23.08 páh. 2 pár. 1, 2

Dan le busén humá hagañeihan aban muna, busenbadün harihinu muna tuguya buidu buidu lun harihini ídatima tiña lan. Ligiaméme giñe lunbei wadügüni dan le waliihanu luma dan le waturiahanu Bíbülia. Anhoun waliiha lau lóufudagun, míbebei katei wafurendeirun, káteirügübei “létima ménrengubei tídangiñe” wafurendeira (Ebü. 5:12). Ítara kei mosu lan wasubudirun aban muna buidu buidu lubaragiñe wagañeihanu, mosu giñe waturiahanu Bíbülia buidu lun warihini ida liña lan sun lácharagun ariñahani le tídanbei luma ida liña lan gani lan lúmagua. Úati buídurügü lan láurügü hafiñerun, mosu giñe hasubudiruni ka lan uagu hafiñera luagu ítaga katei. Lun gunfuranda wamanu Lererun Bungiu buidu buidu, lunti waturiahani sun tácharagun luma inarüni huliliti le tídanbei. Ínchaha lumutiña meha apostolu Pábulu sun kristiánugu lun haturiahanu Lererun Bungiu lau ubebeni, gayara láamuga gunfuranda hamani títulen, timigifen, tilulin luma liñun inarüni le tídanbei, “lun ínsiñeniba lan lílagüle luma liderebugu” hafiñen (Éfe. 3:14-19). Lunti giñe wadügüni ligiaméme. w23.10 páh. 18 pár. 1-3

Ayanuhatu Bíbülia hawagu saragu gürigia ha meha arufudubaña gaguraasuni. Ka uagu maturiahan hubalin abahüdaguni burí ligía? Kéiburi abahüdaguni luáguti Dawidi. Lau sun meha nibureingili lan dan le lanuadirúnbei lun ligíaba lan urúei Ísüraeli, mosu meha lagurabahan luagu saragu irumu lubá larúeihan. Seriwiti meha Simeón tuma Ana lau úaraguni lun Heowá sun añaha lan agurabahei Mesíasi le füramasewaalibei (Luk. 2:25, 36-38). Danme le haturiahani sügǘ burí le, álügüdagua humá hungua: “Ka íderagubaliña gürigia ha lun gaguraasun hamá? Ka buiti hibihubei lau harufuduni lubuidun igaburi le? Ida luba náyeihaniña?”. Gayaraabei giñe hafurendeirun saragu hámagiñe ha meha arufudubaña maguraasun hamá (1 Sam. 13:8-14). Gayaraabei hálügüdagun hungua: “Ka meha san uagu maguraasun habéi? Ka katei wuribati lanügübei maguraasuni houn?”. w23.08 páh. 25 pár. 15

Aban meha wügüri úaraguati apostolu Féduru. Mígirunti meha lun ñein lan somu katei adügüti lun lábürühan larüna sunsuinagubei. Kei hénpulu, arufuda lumuti meha úaragua lan dan le lariñagunbei Hesusu fiu dimurei houn lani disipulugu, le meha úabei gunfuranda hamani (Huan 6:68). Saragu hádangiñe, lubaragiñe hamuga meha hamuriahan luma Hesusu lun lafuranguagüdüni houn ka lan labusenrubei lariñagun o hagurabahan lan lun lafuranguagüdüni, ábarüga masigirun hamá afalarei Hesusu. Ánheinti Féduru, madügün lumuti lira. Aba lariñagun hagibugiñe súngubei Hesusurügüñein lan ariñaga dimurei “lánina ibagari magumuchaditi”. Lau sun meha subudi laali lan Hesusu lígirubei lan Féduru hama amu apostolugu lábugua, ariñagati lau ichouruni luagu lárügüdaguba lan Féduru lungua ani úaraguabei lan (Luk. 22:31, 32). Gunfuranda lumuti meha Hesusu “aranseñu liña lan sífiri, anhein úgubu, débiliti” (Mar. 14:38). Ligíati, íbini yeegua lan Féduru lau Hesusu, míchugun lumuti meha Hesusu apostolu le keisi féridihali. Lárigiñebei meha láguyugun Hesusu, aba larufudagun lungua lun Féduru, genegeti dan le lan lábuguarügüñein lubéi (Mar. 16:7; Luk. 24:34; 1 Ko. 15:5). Chóuruti íderagua lani katei le apostolu le lun liñuragun lídangiñe lanarime íruni le luágubei lárigiñe le ladügübei. w23.09 páh. 22 pár. 9, 10

Feruduna lumutiña Bungiu gürigia ha afiñebaña luagu, daruguati lau hafigoun sunsuinagubei ani aba mabahüdün laali figóu ligía (Sal. 32:1, 2). Ariha lumutiña Heowá gürigia ha kei richaguatiña ladüga hafiñen ani madurunhaña ligibugiñe. Íbini meha barǘ lani Bungiu Abüraámü, Dawidi hama amu lubúeingu kei gürigia richaguatiña, gafigounmemégiña meha ani charatiña. Gama lumoun, kei meha afiñe habéi, aba lanügüniña kei gürigia maduruntiña, dántima le lagoubaguagüdüniña hama gürigia ha máhuduragunbaña lun (Efe. 2:12). Tidan gárada houn Rómana, furanguti lígiruni apostolu Pábulu, lun lan gamadagua wamá luma Heowá, mosu lan afiñe wamá luagu. Ítara liña meha lariñawagún luagu Abüraámü luma luagu Dawidi ani gayaraati giñe lariñawagún ligiaméme wawagu. w23.12 páh. 3 pár. 6, 7

Uguñe weyu, anihein aban lubuidun chansi wama súngubei wagía keisi kristiánugu inarünitiña: wadagaragüdün lun Heowá. Ida? Lau wayusuruni wadaani, were luma wámati lun wídehan lidan laburuchagun uganu luáguti Larúeihan. Ánhawa íchigei le buídutimabei wámagiñegua lun Heowá, warufudubei weiri lan weteingiruni chansi le wámabei lun wáhuduragun lun. Íridati meha apostolu Pábulu ámuñegueinarügü katei le moun lumuti wabulieidagun luéi lidan wáhuduragun lun Heowá (Ebü. 10:22-25). Kéiburi wafurieidun lun, wayanuhan houn amu luagu wemenigin, wadamuridagun hama wíbirigu luma wíchugun gurasu wámagua, guentotima lau ariha wamaali lan “luagu yarafaali lan luéyuri Wabureme” Heowá. Lidan lagumuhóun kapítulu le tídanbei líburu to gíriboun Arufudúni, ariñagati lani Heowá ánheli: “Lunlá Bungiu báhuduragua”. Bianñein wéiyaasu lariñaguni dimurei le lun larufuduni weiri lan lisudinin katei le (Aruf. 19:10; 22:9). Maweiyasun wamá abulieidei ariñahani huliliti le furendei wamaalibei luáguti aransehani le ladügübei Heowá lun láhudurawagun lun ni luéi lueirin lebegi chansi le wámabei lun wáhuduragun lun Wabungiute le wéirigutimabei. w23.10 páh. 29 pár. 17, 18

Sun wagía, busentiwa lun gaganbadi wamá lun gumadi luáguti lunti lan hínsiñegua wamá wámagua. Mabulieida huméi dimurei le meha lariñagubei Hesusu: “Ñeinbei saragu wuribani darime lun heferidiruni saragu [ . . . ] ínsiñehabuni hádangua” (Mat. 24:12). Lau burí dimurei le, mama meha lariñaguña Hesusu mínsiñeguabaña lan saragu hádangiñe lani disipulugu hámagua. Íbini ítara, lunti wóunigiragun woungua luéi láfadarun hagaburi lílana ubóu le wawagu lánina mínsiñehabu hamá. Lau gabaroun wamani katei le, ariha waméi lóunabagüle álügüdahani le: anihein san somu katei le gayaraabei líderaguniwa arihei anhein weiri lubéi ínsiñeni le wasandirubei hawagu wábirigu? Anha, lau wetenirun lun ida liña lan wóunabun dan le anihein lan somu turobuli lidan wabagari (2 Ko. 8:8). Íridati meha apostolu Féduru aban lídangiñe sügǘ ligía lau lariñagun: “Lóugiñe sun katei, ñeinlá saragu ínsiñeni hidan houn híbirigu; lugundun daruguati ínsiñeni lau saragu figóu” (1 Fe. 4:8). Ligíati, arihúati ídatima liña lan wínsiñehabu lidan ligaburi wóunabun dan le hachararun wábirigu woun o dan le hadügün somu katei le gáribei woun. w23.11 páh. 10, 11 pár. 12, 13

Anhein hawagurügüñein lubéi fiu lílana damuriguaü wasandira ínsiñeni, mama warufuduña gaganbadi lun le lariñagubei Hesusu luagu ínsiñeni. Inarüni gayara lan hésebetima wamá harugabu ítaga íbirigu, ítara kei meha lasuseredun lun Hesusu hama fiu hádangiñe lani apostolugu (Huan 13:23; 20:2). Íbini ítara, haritaguagüda lumutiwa apostolu Féduru lunti lan wasandirun ínsiñeni le tímatimaati hawagu sun wábirigu, libe le wasandirubei hawagu waduheñu (1 Fe. 2:17). Ariñagati: “Lunti lubeiti hínsiñegua humá hungua lau sun taruman hanigi, luma lau sun here” (1 Fe. 1:22). Layanuhaña bérusu le luagu ínsiñeni le ñǘbuinbei lídangiñe wanigi, darí lun wasandiruni íbini hawagu gürigia ha adügübaña lun hénrengu lan woun. Kéiburi hamuga dan le adügaali lan aban íbiri somu katei le mínsiñeti woun o ariñagaali lan somu dimurei le gáriti woun. Lidan kesi lira, háfuga busenbadiwa lan hamuga wáguyuguagüdüni wuribani ligía lun. Ánhawa hamugati óusera ítara, magundanbei hamuga Heowá. Ítara liña meha lafuranguagüdüni Hesusu lun Féduru (Huan 18:10, 11). Ligía labürühanbei Féduru: “Máguyugüda humá wuribani luagu wuribani, ni anabúni luagu anabúni; lubaragiñe lira, águyugüda humá abiniruni” (1 Fe. 3:9). Anhein weiri lubéi ínsiñeni le hasandirubei hawagu amu, buídubei hóuseruniña ani gudemebaña giñe hun. w23.09 páh. 29 pár. 10, 11

Wéirigüda lumutu lufuresen laweiridun aban irahü wanigi lugundun lidan magaradahan wamá, wügürihali! Genegeti susere lan lira sin ni murusun áfaaguni. Ánheinti lawanserun gürigia darí lun aban lan kristiánu le derebuguti lafiñen, mégeiti áfaaguni (1 Ko. 13:11; Ebü. 6:1). Lun kristiánugu wamá ha buítiña, mégeitiwa gamadagua wamá luma Heowá. Megei wamuti giñe lani sífiri sandu le íderagubaliwa abuiduragüdei wagaburi luma aransera lubá wanuriagun woungua luma lun wetenirun lun amu burí buligasion ámuñegü (Ari. 1:5). Heowá adügübaliña gürigia; ligía adügübalin wügüri tuma würi (Agu. 1:27). Kei wasubudiruni, ámuñegueinarügüti dandu lúgubu wügüri kei túgubu würi, ámuñegueinarügütiña hawariuagua lidan amu burí katei. Ámuñegueinarügüti dasi le líchugubei Heowá houn wügüriña luéi le líchugubei houn würiña ani lun hagunfuliruni, mégeitiña ámuñegueinarügü iarani luma igaburi (Agu. 2:18). w23.12 páh. 18 pár. 1, 2

Busenti meha san Hesusu lun hayusuruni amu gürigia liri Lúguchi? Anha. Lau sun meha añahein lan tábutigu relihión ha afiñebaña lidan dan ligía luagu wéiriya lan sagüráu lan liri Bungiu darí lun moun lumuti lan liridún, mígirunti meha Hesusu lun lararamuni saminaü le —le múaranbei luma le tarufudahabei Bíbülia— luéi líchugun uéiriguni lun liri Lúguchi. Samina wamá luagun le asuseredubei dan meha le lasagarunbei Hesusu sífirigu wuribatiña lídangiñe aban wügüri lidan fulasu le gíribei Gerasa. Aba hanufudedagun gürigia saragu darí lun hayumuragun lun Hesusu lun lidin hageiragiñe (Mar. 5:16, 17). Busenti meha Hesusu lun hasubudiruni sun gürigia liri Heowá. Ligíati, lubaragiñebei lidin ñéingiñe, aba lariñagun lun wügüri ligía lun labahüdaguni le ladügübei Heowá luagu houn sun gürigia, mama le ladügübei Hesusu luagu (Mar. 5:19). Busenti Hesusu, le Warúeite, lun wadügüni ligiaméme, lun warufudahani liri Heowá houn sun gürigia (Mat. 24:14; 28:20). Dan le wadügüni katei le, gúndaagüda wamuti. w24.02 páh. 10 pár. 10

Ma lubuidun tídanñadiwa lan lóundarun Heowá lidan lagumuhóun dan le! Íbini aribadeinatima liña lan katei, rúhali Heowá íbirigu woun lun híderaguniwa (Sal. 133:1). Íderagua lumutiwa adundehani le líchugubei Heowá woun lun gunda wamá hama waduheñu (Efe. 5:33–6:1). Ru lumuti giñe lichú aau le wemegeirubei woun lun wageindagun luma luriban saminaü luma lun gunda wamá. Íbini ítara, lun mábürühan lan warüna lidan weseriwidun lun Heowá, ñeinbei dan mosu lan wadügün saragu áfaaguni. Ka uagu? Ladüga gayaraati ladügün katei le hadügübei luma le hariñagubei amu gürigia lun wuriba lan wasandiragun woungua. Gayaraati giñe lábürühan warüna dan le wadügün somu charati, dántima le wadügüni ligiaméme charati saragu wéiyaasu. Mosu wáfaagun lidan weseriwidun lun Heowá íbini wásügürün lídangiñe ǘrüwa katei le: 1) dan le lachararun aban íbiri woun, 2) dan le lachararun tani würi weiriei tun o tachararun lani wügüri weiriou lun luma 3) dan le wuriba lan wasandiragun woungua ladüga charati le wadügübei. w24.03 páh. 14 pár. 1, 2

Ñeinbei dan haganbun sügǘ hawaguti íbirigu ha aganwoundagüdübalin heseriwidun lun Heowá. Másiñati ñüdün hamá tidan Leskuela houn Apurichihatiña Larúeihan Bungiu o aba lan háguyun lidoun fulasu le ñein lubéi lemegeirúa hídehan apurichihatiña. Gayaraati san hadügüni ligiaméme? Anhein ítara liña lubéi, hubaruaguóun humá! Súnwandan hálugun lubúeingu Heowá lun haganwoundagüdüni heseriwidun lun (Adü. 16:9). Ánheinti siñá lubéi hadügüni guentó? Masaminara humá gebegitima lan le hadügübei ha aganwoundagüdübalin heseriwidun luéi le hiyaraabei adüga. Awanduni súdinitimabei lidan weseriwidun lun Heowá (Mat. 10:22). Mabulieida huméi gunda lan Heowá lau híchuguni le buídutimabei húmagiñegua lun según le gádanbalün luma le hiyaraabei adüga. Ítara luba gayara lan hafalaruni Hesusu súnwandan lárigiñe habadiseirun (Sal. 26:1). w24.03 páh. 10 pár. 11

Füramaseti Wáguchi Bungiu le siélubei woun feruduna lubadiwa lan ánhawa asaküriha luagu wafigoun (Sal. 86:5). Ánhawa lubeiti asaküriha tídangiñe sun wanigi luagu figóu le wadügübei, mébunabei lun wasandirun machouruni luagu lagunfulirubei lan Heowá le füramase lubéi: chóuruti feruduna láadiwa lan. Kaba íderaguawa lun masaminarun wamá memeni lan sun le wadügübei lun Heowá? Waritaguni mafosu lániwa lun wadügün ni kata, gunfurandarügü lumutiwa ani maweiyasunbei amuriaha wama lun wadügün lóugiñe le wayaraabei adüga. Wéiriti lugundan lau le wadügübei, buídurügaali ligía, meberesenga anhein ñüraü lubéi o weiri lan. Samina wamá giñe hawagun gürigia ha meha awinwandubaña lidan tidaani Bíbülia, ha meha eseriwidubaña lun Heowá tídangiñe sun hanigi. Kei meha apostolu Pábulu, nadagimeinti meha luagu saragu irumu mabuchadunga luagu aweiyasuha saragu milu kilometuru lun lagumeserun saragu damuriguaü. Chülüti meha dan lun lasansirun le gádanbalin ani siñaali meha lapurichihan kei luagu aban dan. Aba san magundanhali lan Heowá lau? Uá, mítaranti. Sigiti Pábulu adügei sun liyaraati ani sigiti Heowá abinirei (Adü. 28:30, 31). Ítarameme, mama súnwandan gayaraabei lan wíchuguni ligiaméme lun Heowá, létima súdinitimabei, lébuna wadügüni. w24.03 páh. 27 pár. 7, 9

Lau meha furíei le ladügübei Hesusu lun Heowá, ruti meha aban buiti hénpulu houn lani disipulugu. Sun meha dan le laubei Hesusu agunfulira lau lani ministeriu ubouagu, gabügürüguati meha lafurieidun. Mosu meha lasagarun dan lun lafurieidun ladüga wéiriti meha beresegu lan ani añahein meha saragu gürigia geyegu lau (Mar. 6:31, 45, 46). Saragiaheiti meha lun gadaani lan lun lafurieidun lun Lúguchi. Luagu aban dan, furíeiti sun áriebu lubaragiñe ladügün aban katei súdiniti (Luk. 6:12, 13). Guñoun le lubaragiñebei lounwen Hesusu, furíeiti lun Heowá gabügürügua ladüga meha subudi lani lasusereda lan katei le hénrengutimabei lun lidan lani ministeriu ubouagu (Mat. 26:39, 42, 44). Arufudati lani Hesusu hénpulu woun meberesenga lan liibe waberesegun, mosu lan wasagarun dan lun wafurieidun lun Heowá. Lun lira, másiñati mosu lan saragia wamá o warumugun leti lun wafurieidun lun Heowá, ítara, warufudubei lun weiri lan lebegi lubuidun idewesei le woun. w23.05 páh. 3 pár. 4, 5

Según iñeñein le ídangiñebei tabürüdǘwa Bíbülia, layanuhaña bérusu le luagu weiri lan ínsiñeni le lasandirubei Heowá hawagu kristiánugu anuadirúaaña darí lun lagoubadaguagüdüniwa luma aban duna le éibaaguati. Subudi hamuti kristiánugu anuadirúaaña hínsiñe hamá lun Bungiu (Hud. 1). Ariñaga lumuti apostolu Huan le lasandirubei dan le labürüdünbalin dimurei burí le: “Ariha humá lueirin wínsiñe lun Bungiu Úguchili, darí lun gayara lan laguarúniwa woun ‘lirahüñü Bungiu’” (1 Huan 3:1). Hawagurügüñein san kristiánugu anuadirúaaña lasandira Heowá ínsiñeni? Uá, hínsiñetiña sun lubúeingu lun. Kátima achoururagüdübalin woun hínsiñe wamá lun Heowá? Lebegi esefuruni le lafayeirubei wawagu arufudubalin woun weiri lan wínsiñe lun (Huan 3:16; Rom. 5:8). w24.01 páh. 28 pár. 9, 10

Arufuda lumuti bérusu le íñugiñebei ka lan meha ladügübei Dawidi lun manufudedun lan: aba meha lararamagun asaminara luagun le lunbei ladügüni Heowá luagu ámuñegü. Subudi lumuti meha Dawidi lesefurubei lan Heowá lidan dan le buídutimabei. Ladüga füramasehaali meha lun ligíaba lan leweñegua urúei le agumadihabei Ísüraeli lidoun dan ligía (1 Sam. 16:1, 13). Ani subudi lumuti meha giñe Dawidi, anhein lan füramase laali lubéi Heowá katei le lun, lagunfulirubei lan. Ka füramase láalibei Bungiu woun? Lau sun ua lan füramase lan Heowá woun wawinwanduba lan aban ibagari maturobulinga guentó, füramasehaali, meberesenga lan turobuli le úmati wagagibudagua lidan ubóu le, lagumuchuba lan lau lídanme iseri ubóu (Isa. 25:7-9). Chóuruti gabafu lan Heowá lun láguyuguagüdüniña hilaaña, lun lareidaguagüdüniña sánditiña luma lagumuchun hau sun láganiñu (1 Huan 4:4). w24.01 páh. 6 pár. 12, 13

Samina wamá luagun lébuna wederegeruni wabagari lun Bungiu ani badisei wagía. Ladüga busén wamá woudin luéigiñe lóubadina Heowá. Haritagua huméi ka lan meha íderagubadün achoururei anihán lan inarünibei. Aba meha hasubudiruni Heowá ani aba harihini keisi Húguchi le siélubei, aba linebedun hun ani hínsiñe ligía hun. Ábatima laganwoundun hafiñen luagu ani ínchaha lumutün katei le lun hasakürihan lídangiñe hifigoun. Aba hígiruni hadügüni katei le mínsiñebei lun Heowá ani aba hagumeserun adügei le hínsiñebei lun. Sanditün meha aban óunwenbu awalidaguni lau harihini luagu feruduna laadün lan (Sal. 32:2). Ábati hagumeserun abasiiha adamuridagua ani aba giñe hayanuhan houn amu luagu lubuidun burí katei le hafurendeirubei. Guentó, kei ábanhadün lan kristiánu le deregeguaali lungua lun Bungiu ani badisei huguya, héibuguña luéigiñe lémeri ibagari ani aranseedün lun mígirun humani (Mat. 7:13, 14). Ítarameme wamá deregüdagu lidan wafiñen ani aranseñu súnwandan lun hínsiñe lan Heowá woun luma lun gaganbadi wamá lun lilurudun. w23.07 páh. 17 pár. 14; páh. 19 pár. 19

Líderagubadiwa wararamagun asaminara luagun füramasei le wadügübei lun Heowá dan le wederegeragunbei woungua lun, lun wibihin erei lun mábürühan wamá lidoun óuchawaguni. Kei hénpulu, madarihanbadiwa gürigia maríeitiña. Kei deregeguaadiwa lan woungua lun Heowá, madügünhadiwa katei líbeina le. Keiti mígirun wabéi lun láhüchün luriban ayumahani tidan wanigi, mámaali mosu wageindagun lárigiñe lun wasagaruni luriban ayumahani ligía ñéingiñe. Wadiseduba luéi hémeri “ha salufuribaña” (Ari. 4:14, 15). Ítara kei lanúadirun Hesusu lagundaaraguagüdüni Lúguchi, bunagua wamaali giñe lidan wasaminan máhabadiwa lan lun furumiñeguarügü katei le subudi wamuti magundan lan Heowá lau, Bungiu le unbei wederegeragua woungua (Mat. 4:10; Huan 8:29). Le linarün katei, líderagubadiwa turobuli luma óuchawaguni lun warufudun aranseñuwaña lan lun wafalaruni Hesusu súnwandan. Ani subudi wamuti líderagubadiwa lan Heowá. w24.03 páh. 9, 10 pár. 8-10