Diisi-hati

Anihein san dan hénrengu lan hun gaganbadi humá? Anihein meha giñe dan lasuseredun ligiaméme lun Dawidi. Ligía meha lamuriahanbei luma Bungiu: “Sandigüdayabei ugundani le lánina besefuhan nun; adügabá lun busén nan lun gaganbadi nan bun” (Sal. 51:12, TNM). Íbini meha hínsiñe lan Heowá lun Dawidi, anihein meha dan hénrengu lan lun gaganbadi lan lun, ligiaméme giñe asuseredubei woun. Ka uagu? Furumiñe, ladüga galagante wamani maganbadi. Libiaman, ladüga ínchaha lániwa Satanási súnwandan lun webedaagun lun Bungiu, ítara kei ladügüni (2 Ko. 11:3). Ani lǘrüwan, ladüga ligía lan hagaburibei gürigia ha geyegubaña wau uguñe weyu,“adügei lugundan sífiri le agumadihabei garabalirugu, le nadagimeinbei hádangiñe ha maganbadibaña lun Bungiu” (Efe. 2:2). Ligíati, lun gaganbadi wamá lun Heowá luma houn gürigia ha únbaña líchiga ubafu, mosu wáfaagun lun wagidaruni luriban igaburi wawariua lun mígiraguagüdün wamá woungua lun Satanási ni lun ubóu le lábugiñebei lubafu. w23.10 páh. 6 pár. 1

Ka wafurendeirubei lídangiñe ladügüni Hesusu milaguru lánina lasaliraguagüdün duna diweinme? Furendeitiwa ǘnabuguni. Mapantahanti meha luagu ni aban lídangiñe katei buiti le ladügübei. Lubaragiñe lira, ǘnabuguti meha ani súnwandan meha líchuguni uéiriguni lun Lúguchi luagu katei le ladügübei (Huan 5:19, 30; 8:28). Ánhawa áyeihei Hesusu, ǘnabugubadiwa ani manaagunbadiwa woungua luagu katei le wadügübei, lubaragiñe lira, wíchugubei sun uéiriguni lun Bungiu le unbei weseriwida (Her. 9:23, 24). Ru waméi sun uéiriguni le ladünabei Bungiu lun. Ladüga, lun hamuga míderagun lániwa Heowá, siñabei hamuga wadügün ni kata (1 Ko. 1:26-31). Aban gürigia le ǘnabuguti, memegeirunti lun hasubudiruni sun gürigia adügaali lan buiti hawagu amu. Buídurügüti lun láurügü lasubudiruni Heowá le ladügübei ani gebegi ligía lun (ariha huméi giñe Matéu 6:2-4; Ebü. 13:16). Wéiriti lugundan Heowá dan le larihini busén wamá ǘnabugu wamá kei Hesusu (1 Fe. 5:6). w23.04 páh. 4 pár. 9; páh. 5 pár. 11, 12

Lau ladundehan lani Bungiu sífiri sandu, ínchaha lumutiña meha apostolu Pábulu kristiánugu lun háluahani le buídubei houn amu. Ida luba wafalaruni adundehani le lidan adamuridaguni? Lau waritaguni busén hamá giñe amu íbirigu híchugun óunabagülei. Ru wamá aban hénpulu le gayaraabei líderaguniwa lun gunfuranda wamani katei le. Ma inarüni dan lan le hayanuhan hama humadagu mámarügüñein huguya ayanuha sun dan, ígiratün giñe lun hayanuhan humadagu, adián? Aban katei ítarati asuseredubei lidan adamuridaguni. Busentiwa lun híchuguni hiibe-agei íbirigu hóunabagüle. Ligíati, aban katei buiti le gayaraabei wadügüni lun wíchugun gurasu houn wábirigu lau wíchugun chansi lun hayanuhan luagu hafiñen (1 Ko. 10:24). Ligíati, lunti chati lan wóunabagüle. Ítara, ñeinbei chansi lun gíbetima hamá íbirigu óunabutiña. Lanwoun lira, íbini chátibei lan wóunabagüle, moun lumuti giñe wayanuhan luagu saragu puntu. Anhaün ayanuha luagu sun puntu le lídanbei párafu, siñabei hadarirun ha híbiri kaba lan hariñaga. w23.04 páh. 22, 23 pár. 11-13

Gabaroun waméi lunti lan wasigirun íderaguaña amu, lídantima apurichihani. Lunti aranseñu wamá lun wadügün asansiruni lidan wani ministeriu. Ayanuhatiwa hama gürigia ha ámuñegueinarügüti hafiñen, hagaburi luma fulasu le ñéingiñe lubéi hayabin. Ka uagu lunti lubéi wetenirun lun hénpulu le líchugubei apostolu Pábulu? Ladüga, aranseñu liña meha lun ladügün asansiruni lidan lani ministeriu luma lun gunfuranda lániña amu. Óunaha lumuti meha Hesusu Pábulu “apurichiha houn ha mámabaña huríu” (Rom. 11:13). Ani lun meha lagunfulirun Pábulu lau dasi le, apurichihati meha houn huríu, houn güriegu, houn chu tau, houn ábunagutiña múa, houn gumadimatiña luma houn urúeigu. Lun lachülürün tidoun hanigi ámuñegueinarügü gürigia, ariñagati: “Rúguaadina nungua keisi kada hawuyeri gürigia” (1 Ko. 9:19-22). Dan meha le lapurichihan houn, gabaroun lumuti meha le hafiñerubei luma hechun. Ka wafurendeirubei? Buídutimabei lan lidin woun lidan apurichihani ánhawa asaminara luagun ariñahani le gayaraabei húutima lan lun ítaga gürigia luma lun aranseñu wamá lun wadügüni asansiruni le emegeirúbei. w23.07 páh. 23 pár. 11, 12

Úati débili lan gürigia le gaguraasunbei, lubaragiñe lira, héreti lugundun mégeiti erei lun lárügüdagun lungua laganagua lénrengunga. Gaguraasuni ábanbei lídangiñe igaburi le líchugubei lani Bungiu sífiri (Gal. 5:22, 23). Dimurei güriegu le ásügürawagüdübei kei “gaguraasuni”, anihein dan yusua lan lun layanuhóun luagu aban gabayu áraabuna le amasurúaali. Samina humá luagun asansiruni le? Lúmagiñe aban lan gabayu áraabuna darí lun aban lan gabayu gumadiwaali…, ani lau sun lira, heremémegili. Ka gayaraabei lariñawagún wawagu? Ida luba gaguraasun wamá ani here wagíame? Siñati wadügüni wábugua, mégeitiwa wamuriahan sífiri sandu luma Bungiu. Arihúaali furangu gayara lan wafurendeirun gaguraasuni. Samina wamá hawagun saragu gefentiña luagu Heowá ha arufuda hamaalibei lubuidun igaburi le dan le hálugun amu gürigia hasigenehan hama. Adügaali ligaburi hóunabun íbirigu ha lun hayanuhan amu gürigia buidu hawagu gefentiña luagu Heowá (2 Tim. 2:24, 25). w23.09 páh. 15 pár. 3

Lidan aban lanarime arufudúni, arihati meha apostolu Huan 24 wéiyaaña áhuduragua lun Heowá sielu. Aba halawahani ani subudi hamuti ligíarügüñein lan garicha lun leresibiruni sun “uéiriguni, inebesei, luma ubafu” (Aruf. 4:10, 11). Anihein giñe saragu resun hama ánheligu lun halawahani Heowá luma lun híchugun uéiriguni lun. Lúmañanu sielu ani subudi hamuti buidu buidu. Ariha hamuti ligaburi lidan sun le ladügübei ani alawaha hamuti dan le harihini nadagimein (Hob. 38:4-7). Alawaha wamuti giñe Heowá dan le wayanuhan luma. Adüga wamuti dan le wariñaguni lun ka lan hínsiñebei woun luagu luma ka lan uagu garíaguadi wabéi lun le ladügübei. Danme le waliihanu luma waturiahanu Bíbülia, áfaagua wamá lun wáyeihani ligaburi Heowá le hínsiñetimabei woun (Hob. 37:23; Rom. 11:33). Lárigiñe, abahüdaha waméi lun Heowá ida liña lan wasandiragun woungua dan le wararamagun asaminara luagun lubuidun burí ligaburi. Gayaraati giñe walawahani Heowá dan le líderaguni kada aban wádangiñe o dan le líderaguniña sun wábirigu (1 Sam. 2:1, 2). w23.05 páh. 3, 4 pár. 6, 7

Lúmagiñe irumu 1919, aba meha mabafuharu lan sun relihión mama inarünitu to ubouaguboun, tomeme Babilónia to Wéiriboun, hawagu lumutuniña Bungiu. Lidan irumu ligía lachülaagua “musu úaraguati” ani lidan dan lachülaagua lun gayaraabei lan hagumeserun gürigia ha harumabaña anigi éibuga lidan “émeri sagüráuti” (Mat. 24:45-47; Isa. 35:8). Seremei lun wadagimanu le hadügübei amu lun haransehani üma ligía, gayaraahali meha hafurendeirun ha agumeserubaña éibuga lidan üma le saragu katei luagu Heowá luma luagu le labusenrubei ladügün (Ari. 4:18). Gayaraati meha giñe hadügüni asansiruni le mégeiwabei lun gayaraabei lan hagundaaragüdüni Bungiu. Furanguti magurabun lan lun hadügüni sun asansiruni le mégeiwabei lidan aban. Le ladügübei Bungiu, larumadahañanu lumutuniña lau léibugun dan. Ma inarüni samina wamá luagun ugundani le lunbei wasandiruni danme le lachülürün weyu lun wagundaaragüdüni Heowá machararunga? Lun lakipurúniwa aban üma buidu, mégeiwati lun laransehóuniwa. Lúmagiñe irumu 1919, ladügǘña wadagimanu luagu “émeri sagüráuti” lun gayaraabei lan háfuridun saragu gürigia tídangiñe Babilónia to Wéiriboun. w23.05 páh. 17 pár. 15; páh. 19 pár. 16

Harufudahaña lílana Musu Úaraguati houn íbirigu lun heseriwidun kei ídehatiña lidan ámuñegueinarügü sétanu. Ligíati, heteniruña ídehatiña ha lun saragu dasi. Chóuruti aranseeña lan íbirigu ha lun hóunigiruniña lánigu Hesusu ya ubouagu. Danme le hanügǘn sun kristiánugu anuadirúaaña sielun lidan lagumuchagüle saragu asufuriruni, hasigiruba lubúeingu Heowá áhuduragua lun lau úaraguni ya ubouagu lau Hesusu keisi Hábuti. Lídanme dan ligía, lábürühaba aban sétanu hani néchanigu lau furundei wawagun, watu Bíbülia lun sétanu ligía, Gogu le Magoguna (Ese. 38:18-20). Lau sun lira, málübaña ani mibihin habéi le habusenrubei hibihin: lun hígiruni lumutuniña Heowá háhuduragun lun. Chouru wamuti lesefurubadiwa lan Heowá. Lidan aban arufudúni, arihati meha apostolu Huan “saragu gürigia”, hameme amu mudún, áfurida wínwanñu lídangiñe “óunwenbu asufuriruni”. Ligíati, furanguti hesefuruba lan (Aruf. 7:9, 14). w24.02 páh. 5, 6 pár. 13, 14

Ka gayaraabei wadügüni lun líchuguni Heowá lani sífiri sandu woun? Lunti wamuriahani luma, waturiahanu Lererun, kípugua wagíame woungua tidan lóundarun. Anhein wadüga, wáyeihabei “igaburi le líchugubei sífiri” (Gal. 5:22, 23). Lun líchuguni Heowá lan sífiri sandu woun, mosu haruma lan dandu wagaburi kei wasaminan. Ánhawa ígira lun lebelurun saminaü wíyeti wachügüwagun, ígira wagíame lun ladundehani luriban saminaü ligía ligaburi wóuserun, weferidirubei sífiri sandu le ñǘbuinbei lúmagiñe Heowá (1 Tesa. 4:7, 8). Ka amu katei lunbei gabaroun wamani? Ariñagati meha apostolu Pábulu: “Míchiga humá mebereseni lun dimurei le lariñagubei Bungiu” (1 Tesa. 5:20). Layanuhaña bérusu le luagu burí profesía, kéiburi luáguti yarafamémeeli lan luéyuri Heowá. Masaminara wamá mégeigili lan saragu dan lubá liabin weyu ligía o úaadiwa lanme danme le laduurun wuribu le Arümahedón. Gabaroun wamuti chülümémeeli lan luéyuri Heowá, ligía wáfaagunbei lun buidu lan wagaburi luma wóuserun ani deregeguañu waña woungua lun Bungiu lun wadügüni le lubeibei (2 Fe. 3:11, 12). w23.06 páh. 12, 13 pár. 13, 14

Ka lunbei ladügüni aban kristiánu anhein áfuacha iyawaü lánina agamariduni lidan ligagamurun o tidan lani konputadora? Lunti ladigiruni larihin tuéi furesegueina. Aban katei le gayaraabei líderaguniwa adügei katei le, lau ua lan ni kata gebegitimati woun sügǘ lau wamadagua luma Heowá. Ábanya katei, lau sun anuhein iyawaü o bidéu le manügǘnti kei katei lánina agamariduni, másiñati adüga lan lun wagumeserun asaminara luagun magíaguni. Mabusenrúntiwa warihin iyawaü tíbeina tura. Ka uagu? Ladüga mabusenrun wamá wadügün magíaguni nírügü lidan wasaminan (Mat. 5:28, 29). Ariñagati aban wéiyaali lidan afiñeni tailandiana gíriti Dawidi: “Álügüdaguatina nungua: ‘Hínsiñebei hamuga san lun Heowá lun nasigirun aríagua iyawaü lánina agamariduni íbini menege tanu iyawaü lánina agamariduni?’. Íderagua lumutina nasaminarun ítara lun buidu lan le nanúadirubei”. Anhein adüga inebesei le wasandirubei luagu Heowá lun madügün wamá somu katei le mínsiñeti lun, ménrenguntimabei woun lun wanúadirun buidu. “Linebenwa Bungiu lagumesehabei [o lébunabei] lichú aau”. w23.06 páh. 23 pár. 12, 13

Lidan bérusu le, másiñati layanuhóuña lan luagu damuriguaü lau dimurei “húbiñoun”. Ánhawa eredera yarafa houn wábirigu lídanme lidaani óunwenbu asufuriruni, lóunigirubadiwa Heowá ítara kei füramase lani. Ligíati, úati buídurügü lan láurügü wawanduniña wábirigu, lunti giñe warufudun ínsiñeni inarüniti houn. Chóuruti hénrengubei lan wásügürün lau ibagari lídangiñe óunwenbu asufuriruni ánhawa marufudun ínsiñeni houn wábirigu. Ábanbei dan hénrenguti lanarime luéyuri Heowá houn sun gürigia (Sof. 1:14, 15). Hagagibudaguba giñe lubúeingu Heowá luma amu burí lénrengunga. Ánhawa lubeiti aransera lúmagiñe guentó, gayaraabei darangilu wamá, gayara ligíame wíderagun amu gürigia. Lau awanduni, gayaraabei wagagibudagun luma furumiñeguarügü lénrengunga le ñǘbuinti. Lau gudemehabu, aranseñu waba lun wadügüni sun wayaraati lun wíderaguniña wábirigu lidan le hemegeirubei. Ani lau ínsiñeni le wasandirubei hawagu, wibihiba lun lidan wamá aban. Líchugubei Heowá wafayeiruaha woun laume líchugun ibagari magumuchaditi woun lídanme iseri ubóu, aban ubóu le ñein lubeime úaali lan hárabaganali, liñawan dan o katei líbeina lira. Labulieidúaba sun lénrengunga le úmabei wagagibudagua uguñe weyu (Isa. 65:17). w23.07 páh. 7 pár. 16, 17

Liibe-agei dan, ayanuhatu Bíbülia hawagu lubúeingu Bungiu ha meha úaraguabaña lun kei gürigia gabafutiña. Gama lumoun, íbini meha hátima hérebaña hádangiñe, mama meha súnwandan hasandiragun houngua ítara. Lidan meha likesin urúei Dawidi, anihein meha dan lasandiragun lungua lau ganigi darí lun lariñagun: “Derebugugüda bumutina lidan fulasu chóuruti lau bareini”. Íbini ítara, anihein meha dan débili lan lasandiragun lungua, buin ligía lau anufudei (Sal. 30:7). Ánheinti Sansón, lau sun meha weiri lan erei le líchugubei lani Heowá sífiri sandu lun, mabulieidun lumuti meha ledebiliduba lan “kei furumiñeguarügü wügüri” sin lan lubafu Bungiu (Ali. 14:5, 6; 16:17). Halíagiñe meha san hasagara lubúeingu Bungiu ha erei? Lúmagiñe Heowá. Íbini meha Pábulu, subudi lumuti meha megei lani ubafu le ñǘbuinbei lúmagiñe Heowá (2 Ko.12:9, 10). Anihein meha dan wuriba lan látuadi apostolu le (Gal. 4:13, 14). Lanwoun lira, láfaaguña meha luougua lun ladügüni le buídubei (Rom. 7:18, 19). Ani anihein meha dan nidiheri lan ani hanufude ligía leferidiruni libagari (2 Ko. 1:8, 9). Íbini ítara, ariñagati: “Dántima le débili nan, ábatima néredun”. Ida liña san le? Kei meha ru lani Heowá erei le lemegeirubei lun, aba meha liabin lun aban lan gürigia gabafuti. w23.10 páh. 12 pár. 1, 2

Anhein anihein lubéi burí dan wageindagun luma luriban saminaü luagu ni kata wamá, haritagua waméi Heowá lan achawahabaliwa hadoun lumutuniña (Huan 6:44). Ariha lumuti lubuidun igaburi le wawagubei —íbini másiña lan marihin wamani— ani subudi lumuti ídatima waña lan (2 Kro. 6:30). Ligíati, dan le lariñagun gebegi wamá, gayaraati wafiñerun lun (1 Huan 3:19, 20). Háfuga añahein lan wádangiñe awanhagua asandira duru ladüga meha charati le wadügübei lubaragiñe wasubudiruni inarüni (1 Fe. 4:3). Añahein amu, barühaña saragu dan eseriwida lun Heowá lau úaraguni, lau sun lira, añahagua ageindagua luma luriban échuni. Agia huguya? Tíchuguña san hanigi duru huagu? Anhein ítara liña lubéi, líchuguba gurasu hun hasubudiruni añahein lan meha lubúeingu Heowá ha asandirubalin ligiaméme. Kéiburi apostolu Pábulu le meha ariñagubei luougua fugiabu lan ligía, dántima meha lasaminarun luagu charati le meha ladügübei (Rom. 7:24). Íbini asakürihaali lan meha lídangiñe lifigoun ani badisei ligía, anihagua meha ariñaga luougua ‘ni kata lan ligía hadan apostolugu’ ani ariñagati ligía lan “furumiñeti hádangiñe” ha gafigounbaña (1 Ko. 15:9; 1 Tim. 1:15). w24.03 páh. 27 pár. 5, 6

Gayaraati wafurendeirun aban katei súdiniti lídangiñe likesin urúei Hoasi: lunti lan wáluahan umadagu ha buítiña, umadagu ha hínsiñeti Heowá houn ani ha busenbaña hagundaaragüdünu lanigi. Gayaraati gamadagua wamá hama gürigia ha ámuñegueinarügüti harumudiri. Haritaguabéi díseeli lan meha laweiridun Hoyadá luéi Hoasi. Ráramaguaba asaminara luagun hagaburi bumadagu ani álügüdaguaba bungua: “Íderagua hamutina san lúntima nafiñerun luagu Heowá? Ínchaha hamutina san lun gaganbadi nan lun lilurudun Bungiu? Hínsiñeti san houn hayanuhan luagu Heowá luma luagu le haturiahabei tídangiñe Bíbülia? Inebeti san lilurudun Bungiu houn? Manufudetiña san hariñaguni nun ka lan idan nacharara o lérügüñein nabusenrubei naganbun hariñaga nun?” (Ari. 27:5, 6, 17). Le linarün katei, anhein mínsiñe lubéi Heowá houn bumadagu, memegeirun bumutiña lidan bibagari. Ánheinti hínsiñe lubéi Heowá houn, góunigibaña umadagu hagía. Hanügüba saragu buiti bun! (Ari. 13:20). w23.09 páh. 9, 10 pár. 6, 7

Lau létüra álüfa lagumesera létüra burí le lídanbei güriegu, lagumuchati lau létüra omega. Lau lariñagun Heowá luougua ligía lan “Álüfabei luma Omega”, lafuranguagüdüñein meha dan le lan lagumeserun aban katei, gumú lani. Lárigiñebei meha ladügüni Heowá Adán tuma Ewa, aba meha lariñagun houn: “Garahüñügua humá saragu, buíngüda huméi ubóu hau hirahüñü ani gumadi huméi” (Agu. 1:28). Lau meha lariñaguni Heowá le labusenrubei houn, ítara liña meha kamá hamuga lariñaguña “Álüfa”. Lachülürüba weyu lun labuinchun Ubóu hau ladügawagun Adán tuma Ewa ha gaganbadibaña ani mafigountiña ani hadügüba lun aban lan paraísu sun Ubóu. Danme susereeli lira, ítara luba kamá hamuga lariñaguña Heowá “Omega”. Lárigiñebei meha lagumuchuni Heowá ladügüni “sielu luma ubóu, luma sun burí katei le lídanbei”, aba lachoururagüdüni lagunfuliruba lan le labusenrubei lun Ubóu luma houn gürigia. Danme lagumuchun lisedün weyu, gúnfulihalime le labusenrunbei Heowá sunsuinagubei (Agu. 2:1-3). w23.11 páh. 5, 6 pár. 13, 14

Kéiburiñein meha gádürü hati lidura haweiyasun ísüraelina Babilóniagiñe lun Ísüraelin, ani mama meha aban wéiyaasu ménrenguti. Gama lumoun, füramaseti meha Heowá houn ligíaba lan agidarei sun katei le eberesehabei hémerirugugiñe. Gíbetimabei meha buiti hasagarun huríu ha úaraguabaña lau hagiribudun Ísüraelin sügǘ lau furumiñeguarügü sákürifisiu le meha lunbei hadügüni. Liibe-agei meha abiniruni le lunbei heresibiruni, gániti meha luma háhuduragun lun Heowá. Úatu meha ni aban ténpulu lun láhudurawagun lun Heowá Babilónia. Kei meha ua lubéi latarü ñein ni aransehani hani fádirigu, siñati meha hadagaragüdün ísüraelina lun Heowá kei meha lariñaguni lilurudun Moisesi. Lanwoun lira, murusunrügüñanu meha ha inebehabubaña lun Heowá luma lun lilurudun, hóubawagu sun ha áhuduragubaña houn búngiugu mama inarünitiña. Ligíati, saragu meha milu huríu ha áhuduragubaña lun Bungiu, hayumahaña meha hagiribudun hageiroun luma lun haransehan lunya liñuragun áhuduraguni inarüniti. w23.05 páh. 14, 15 pár. 3, 4

Anhein busén wabéi wasigirun éibuga “lidan larugounga”, megei wamuti lídehan lani Bungiu sífiri sandu. Ka uagu? Ladüga mégeiwati saragu áfaaguni lun wakipuragun woungua harumañu lidan ubóu le buinbei lau iwiyei (1 Tesa. 4:3-5, 7, 8). Gayaraati líderaguniwa sífiri sandu lun wararamun lun saminaü luma lichú aau le lánina ubóu le, le múaranbei luma lilurudun Bungiu. Gayaraati giñe líderaguniwa lun gürigia wamá ha “areidatiña, suruti habagari, [ani ha] hínsiñeti inarüni houn” (Efe. 5:9). Ariñagati Hesusu líchuguba lan Heowá sífiri sandu houn ha amuriahabalin (Luk. 11:13). Resibi wamuti sífiri sandu dan le wamuriahani luma Heowá lidan furíei. Weresibirubei giñe dan le walawahani Heowá lidan adamuridaguni úara hama wábirigu (Efe. 5:19, 20). Líderagubadiwa sífiri sandu lun wanügün aban ibagari le aubei lagundaara Bungiu. w24.03 páh. 23, 24 pár. 13-15

Mégeitün san gaguraasuntima humá? Anhein ítara liña lubéi, amuriaha humá luma Heowá lidan furíei lun líderagunün ibihei. Gaguraasuni, ligía ábanbei lídangiñe igaburi le líchugubei lani sífiri (Gal. 5:22, 23). Ligíati, gayaraati wamuriahan luma Heowá lun líchugun sífiri sandu woun luma lun líderaguniwa lun gagaburi wamani igaburi le líchugubei lani sífiri. Anhein wagagibudaguña lubéi luma somu sügǘ le ídanbei hénrengu lan woun gaguraasun wamá, lunti wasigirun amuriaha sífiri sandu luma Heowá (Luk. 11:13). Gayaraati giñe wamuriahan luma lun líderaguniwa arihei katei kei larihini. Ani lárigiñe wafurieidun, adüga waméi sun wayaraati lun warufudun gaguraasuni sagü weyu. Ánhawa amuriaha luma Heowá ani áfaagua wagíame lun warufuduni igaburi le, warihubei aganwoundeina luba lan waguraasun murusun murusun. Ánhawa giñe araramagua asaminara hawagun gürigia ha uágubaña tayanuha Bíbülia, gayaraabei giñe wafurendeirun gaguraasuni lugundun daritiwa saragu hénpulu tidan. w23.08 páh. 22, 23 pár. 10, 11

Chóurugüda lumuti meha Hesusu lun apostolu Féduru lóunigirubei lan Heowá. Lárigiñebei meha láguyugun Hesusu, adügati meha aban milaguru lun lañugun Féduru, hama ha híbiri apostolugu, saragu úduraü gayara láamuga hanuriagun houngua (Huan 21:4-6). Chóuruti adüga lan meha milaguru le lun larihini Féduru ménrengun lan lun Heowá líchuguni le lemegeirubei lun lun labagaridun. Másiñati haritagua lani apostolu le, ouraméme ligía, füramase lan Hesusu luagu lóunigirubaña lan Heowá ha áluahabalin Larúeihan Bungiu furumiñe (Mat. 6:33). Lau lasubudiruni Féduru katei le, aba líchuguni lani ministeriu lidan furumiñeti lúgaaru, mama óuchahani. Ligíati, lidan irumu 33 lidan Pentekosutesi, aba líchugun aban yanu lau ganigi le íderagubaliña saragu milu gürigia lun hánharun lun uganu buiti (Adü. 2:14, 37-41). Ani dan lárigiñe, íderaguati saragu samariana hama amu gürigia ha meha mámabaña huríu lun hadügagun houngua lánime Kristu disipulugu (Adü. 8:14-17; 10:44-48). Furanguti aban lan meha gürigia huuti apostolu Féduru lun Heowá lun lachawahan sun hawuyeri gürigia lidoun damuriguaü. w23.09 páh. 20 pár. 1; páh. 23 pár. 11

Kéiburi bián irumu lárigiñe hagünrinchaguni babilóniana Herusalén, aba meha gewenedü lan urúei Nabukodonosoru aban óunwenbu guáriua ani gidá lumuti uénedü ligía lidarangilan. Aba líchugun gumadi houn sun chu tau ha Babilóniabaña, Danieli haganagua, lun hariñaguni luénedü luma lanichigu uénedü ligía lun. Anhein meha mariñagun hamá, láfaragubaña meha sun hagía hilagubei (Dan. 2:3-5). Siñati meha ladarasahan Danieli; anihein meha saragu ibagari lidan huraraü. Ligíati, aba layumuragun lun urúei “lun líchugun dan lun, lun lariñaguni luénedü lun” (Dan. 2:16). Mégeiti meha Danieli ganigi luma afiñeni lun ladügüni katei le. Ka uagu? Ladüga mariñaguntu Bíbülia afuranguagüdañahaali lan meha Danieli lanichigu uénedü. Amuriahati Danieli hama ǘrüwa lumadagu “lun hamuriahan luma Wabungiute lun lídehan lidan katei le” (Dan. 2:18). Óunaba lumuti Heowá hafurieidun ani lau lídehan, aba meha lariñaguni Danieli luénedü urúei lun. Séfuti Danieli hama lumadagu luéi óunweni! w23.08 páh. 3 pár. 4

Samina wamá luagun buiti le ibihúbei dan le gaguraasun wamá. Íderagua lumutiwa gaguraasuni lun gunda wamá luma lun darangilu wamá. Ligíati gayara lubéi wariñagun buidu lan gaguraasuni lun wátuadi luma lun wasaminan. Líderagubadiwa giñe lun buidu lan wanaagun woungua hama amu luma lun ñein lan úarani lidan damuriguaü. Ánhawa magañidun lau lóufudagun dan le ladügün somu gürigia aban katei woun le mínsiñeti woun, lídehaba gaguraasuni lun maribaduntima lan katei (Sal. 37:8; Ari. 14:29). Lau lira, wáyeihañein Wáguchi le siélubei ani adügati katei le lúntima wayarafadun lun. Kei aubei warihei, aban igaburi buiti le anügübei saragu buiti woun gaguraasuni. Íbini mama lan súnwandan gaguraasun wamá, líderagubadiwa Heowá lun wasigirun arufudei lubuidun igaburi le. Ani sun awanha lan agurabaha lau gurasu lun lachülürün iseri ubóu, gayaraati wachoururuni góunigi lániña Heowá “ha íchugubaña inebesei lun ani afiñe hagía luagu línsiñehabu súnwandan” (Sal. 33:18, 22). Ligíati, sun wagía, lunti wáfaagun lun wasigirun arufuda gaguraasuni. w23.08 páh. 22 pár. 7; páh. 25 pár. 16, 17

Íbini hariñagun gürigia afiñe hamá, le linarün katei, arufudati le hadügübei mafiñen hamá (Sant. 2:1-5, 9). Ayanuhati meha Santiagu luagu aban íbiri le arihubei megei lan líbiri daüguaü o éigini, gama lumoun, madügünti ni kata lun líderaguni. Íbiniti ariñaga lan gürigia ligía afiñe lan, kei le marufudun lani lau le ladügübei, meseriwínti afiñeni ligía lun ni kata (Sant. 2:14-17). Yusu lumuti meha Santiagu tikesin Raabü lun layanuhan luagu larufuduni gürigia afiñe lan lau le ladügübei (Sant. 2:25, 26). Kei meha aganbaaru lan würi to luagu Heowá, subudi tumuti meha líderaguñanu lan ísüraelina (Hos. 2:9-11). Ka tadügübei lun tarufuduni afiñe tan luagu Heowá? Aba taramuduniña bián ísüraelina ha aríaahabalin fulasu lun máfarawagun hamá hilagubei. Kati tibihibei? Ítara kei meha Abüraámü, aba tanügǘn keisi aban gürigia richaguatu lau sun gafigoun tan ani mama tan ísüraelina. Arufudati hénpulu le woun súdini lan warufuduni wafiñen lau le wadügübei. w23.12 páh. 5, 6 pár. 12, 13

Wagía keisi kristiánugu, siñati wagufurumadun láurügü wasubudirun murusunrügü ariñahani tídangiñe Bíbülia. Líderagubadiwa lani Heowá sífiri sandu lun wafurendeiruni “íbini lilulin-agei laritagun Bungiu” (1 Ko. 2:9, 10). Ka uagu madügün hubéi aransehani lun haturiahan hábuguarügü luagu somu tema le gayaraabei ladügün lúntima hayarafadun lun Heowá? Kéiburi hakutihani ida liña lan meha larufudun Heowá ínsiñeni hawagu lubúeingu ha lánina binadu dan luma ida liña lan larufuduni hínsiñe humá lun. Gayaraati giñe haturiahani ida liña lan meha labusenrun Heowá lun háhuduragun ísüraelina lun, ábameti hagoubaguagüdüni luma ida liña lan labusenrun Heowá lun wáhuduragun lun uguñe weyu. Gayaraati giñe hakutihani profesía le agunfulirubei luagu Hesusu lidan libagari luma lidan lani ministeriu ya ubouagu. Chóuruti wéiribei lan línsiñe hun haturiahan luagu tema kéiburi le lau tídehan Índice de las publicaciones Watch Tower tuma Adundehani lun haturiahan gefentiña luagu Heowá. Líderagubadün akutihani le lun lederebugudun hafiñen ani ítara luba hasubudiruni lanichigu “lasubudirúniwa Bungiu” (Ari. 2:4, 5). w23.10 páh. 19 pár. 3-5

Dimurei güriegu le layusurubei apostolu Féduru lun “saragu ínsiñeni”, luáguti aban ínsiñeni le lunbei “aganwoundeina lan” o “aweirideina lan”. Le libiaman fánreinti lidan bérusu le, layanuhaña luagu le libihubei ínsiñeni wéiriti ligía: ladouragun lau hafigoun wábirigu. Ítara liña ínsiñeni le kamá aban gamisa to gayaraabei tátulerawagun saragu darí lun tadouragun, mámarügü lau aban o bián figóu, lun tadouragun lau “saragu figóu”. Lidan fánreinti le, dimurei “daruguati”, mini lan “ferudun”. Ítara kei gayara lan tadouragun bu murusun gamisa lau aban dáseiti, gayaraati giñe ladouragun ínsiñeni lau hadebilin o hafigoun amu. Lunti weiri lan ínsiñeni le wasandirubei hawagu wábirigu darí lun gayara lan feruduna wamani hachara íbini genege lan woun hénrengubei lan lun wadügüni (Kol 3:13). Dan le wibihin feruduna wamaniña amu, warufuduñein luagu weiri lan ínsiñeni le wasandirubei hawagu ani busén wamá wagundaaragüdüni Heowá. w23.11 páh. 11, 12 pár. 13-15

Dan meha le wügürihali urúei Hosíasi, aba ladügün lun taransehóun litenpulun Heowá. Lidan añaha lan aransehoun, aba tadarirún “líburu to ñein lubéi lilurudun Wabungiute le meha líchugubei lídangiñe Moisesi”. Dan le laganbunbalin urúei le tariñagubei líburu to, lau lóufudagun, aba ladügün asansiruni lun gaganbadi lan lun lilurudun Heowá (2 Kro. 34:14, 19-21). Hínsiñeti hamuga san bun béchudun aliihoun Bíbülia? Anhein báfaaguña lubéi lun baliihanu, línsiñeduña san taliihóun bun? Adügatibu san somu katei lun mabulieidunbani bérusu burí le huubei bun? Dan meha le 39 lubéi irumu lau Hosíasi, adügati aban charati le ídanbei ladarirei lounwen. Lubaragiñe hamuga meha lamuriahan luma Heowá lun ladundehani, ábarüga lafiñerun luougua (2 Kro. 35:20-25). Ka wafurendeirubei lídangiñe le? Meberesenga lan átirihali lan irumu wau aturiahoun Bíbülia, mosu lan wasigirun áluahei Heowá. Ani lun lira, mosu wamuriahan luma lun ladundehaniwa súnwandan, waturiahanu Lererun ani aganba wameime adundehani le híchugubei kristiánugu derebuguhaña woun. Anhein wadüga ítara, hénrengubei lun wadügün charati wéinamuti ani gachasintimabadiwa lun gunda wamá lidan wabagari (Sant. 1:25). w23.09 páh. 12, 13 pár. 15, 16

Ayanuhatu Bíbülia hawagu saragu würiña ha meha eseriwidubaña lun Heowá ani hínsiñe ligía houn. Góunigi hamuti meha hamufurun ani úaraguatiña meha “lidan sun katei” (1 Tim. 3:11). Lanwoun lira, chóuruti añahein lan íbirigu würiña ha buítiña ani derebuguti hafiñen lidan damuriguaü le ñein bubéi, ha úmagiñebei gayara lan bafurendeirun saragu katei. Anhein aban lubéi íbiri nibureingiru buguya, saminabá hawagun íbirigu würiña ha gayaraabei báyeihani hagaburi ani áfaaguaba lun badügüni. Lun lira, tenibá lun lubuidun hagaburi ani saminabá luagun ida luba lan báyeihani. Ǘnabuguni, ábanbei lídangiñe igaburi le ídehabei lun aban ban kristiána to derebuguti tafiñen. Würi to ǘnabugutu, buiti tumadagua luma Heowá ani buiti giñe tanaagun tungua hama amu. Kei hénpulu, kei ǘnabugu tubéi ani hínsiñeti Túguchi le siélubei tun, ru tumuti tídehan lidan aransehani le adüga láalibei Bungiu luáguti kaba lan anügei ubaraü dandu lidan damuriguaü kei hadan iduheñu (1 Ko. 11:3). w23.12 páh. 19 pár. 3-5

Agurabati Heowá lun hínsiñe tan lani wügüri weiriou lun luma lun letenirun lun le temegeirubei múnada, lidan tumadagua luma Bungiu luma lidan ligaburi tasandiragun tungua. Ánhabu afurendeira óusera lau lichú aau luma lau gunfurandaü, arufuda buguyame inebesei hawagu würiña ani áfaagua buguyame lun gafiñerúadi lan buagu, laranserubadibu lira lun aban ban maríeiti le buiti ámuñegü. Ani ánhabu amarieida, gayaraabei gasaanigu ban. Gayaraati betenirun lun hénpulu le líchugubei Heowá lun bafurendeirun lun aban ban úguchili buiti (Efe. 6:4). Ariñaga lumuti meha Heowá lun Hesusu, le Lisaani, weiri lan línsiñe lun ani gunda lan lau (Mar. 1:11). Ánhabu gasaani, buídubei lun béchudun achoururagüdei houn gunda ban hau luma ariñagei houn buidu lan hadüga dan le hadügün somu katei le buiti. Agübürigu ha áyeihabalin Heowá, íderagua hamutiña hasaanigu lun kristiánugu hamá ha buítiña ani derebuguti hafiñen. Ida luba baranserun lúmagiñe guentó lun aban ban úguchili buiti? Lau bóuseruniña biduheñu hama lílana damuriguaü lau ínsiñeni luma lau bafurendeirun ariñaga houn hínsiñe hamá bun ani gebegi hamá bun saragu (Huan 15:9). w23.12 páh. 29 pár. 17, 18

Wagía le lubúeingu Heowá, sügütiwa giñe lídangiñe saragu turobuli ani chülüti dan lun wasandirun, ítara kei sun gürigia. Lanwoun lira, óuserawaguatiwa ladüga wafiñen ani éibaaha hamutiwa ha iyereehabúbaña houn lumutuniña Bungiu. Lau sun ígira lan Heowá lun lasuseredun katei wuribati woun, füramasehaali woun líderagubadiwa lan (Isa. 41:10). Lau Heowá wóubagiñe, gayaraati wakipuruni wagundan, wanúadirun buidu luma úaragua wamá íbini laganagua sügǘ hénrenguti. Füramaseti Heowá líchugubei lan “lidarangilan” woun (Fili. 4:6, 7). Darangilaü ligía íchugubei ñurugua tun wanigi ladüga lubuidun wamadagua luma Heowá. Ma lueirin darangilaü “le íñutimabei luéi sun subudi le siñá lubéi ni aban gürigia gunfuranda”. Sandiguañahaadün san hungua lau aban lanarime darangilaü lárigiñe hadügün aban furíei tídangiñe sun hanigi lun Heowá? Lidarangilan Bungiu hasandirubei. w24.01 páh. 20 pár. 2; páh. 21 pár. 4

Ínchaha lumutiwa ínsiñeni le wasandirubei luagu Bungiu lun walawahani liri tídangiñe sun wanigi. Gunfuranda lumuti meha urúei Dawidi dan le lan walawahani liri Heowá, ítara liña lan kéigubeirügü walawahañein lan Heowá guánarügü. Lau wayanuhan luagu lubuidun liri Heowá, wayanuhaña luagu lubuidun ligaburi luma burí katei buídumeraüti le adüga láalibei. Busenti meha Dawidi lun lóuseruni liri Heowá kei aban iri le sánduti, busén ligía lalawahani. Ariñagati busén lan ladügüni lídangiñe sun tilulin-agei lanigi o tau sun luani. Barǘ hamuti meha giñe lewitagu ubaraü lidan lalawahóun liri Heowá. Gunfuranda hamuti meha lau ǘnabuguni ua lan dimurei buídurügüti lun lichugún uéiriguni lun liri Heowá le sándubei keisi ladüna (Neem. 9:5). Ma funa lugundan Heowá dan le laganbuniña lewitagu ha íchiga uéiriguni lun lídangiñe sun tilulin-agei hanigi! w24.02 páh. 9 pár. 6

Masaminarunbei Heowá charaadün lan ladügarügü mibihin humani le yebe habusenrubei hadügün lidan heseriwidun lun (2 Ko. 8:12). Ariha huméi turobuli kei aban chansi lun hafurendeirun. Mabulieida huméi sun le ibiha humaalibei darí guentó. Ariñagatu Bíbülia: “Richaguati Bungiu, ani mabulieidun lubéi le adüga humaalibei” (Ebü. 6:10). Anhein mabulieidun lubalin Bungiu, mabulieida huméi giñe. Samina humá luagun ibihaadün lan hagumeserun apurichiha, habadiseirun luma gamadagua humá luma Heowá. Arufuda lumuti lira gayara lan hubaruaguóun humá ibihei le uágubei háfaagua (Fili. 3:16). Lau lídehan Heowá, gayaraati hibihini le habusenrubei hibihin lidan heseriwidun lun. Ani gúndaabadün anhaün etenira lun ida liña lan líderagunün luma labinirunün Heowá sun awansereina humá lidan heseriwidun lun (2 Ko. 4:7). Anhein mábürühan harüna, hibihuba abiniruni le wéinamutimati (Gal. 6:9). w23.05 páh. 31 pár. 16-18

Hínsiñeti lun Heowá larufuduni houn lubúeingu hínsiñe hamá lun ani gunda lan hau. Bianñein wéiyaasu ladarirún tidan Bíbülia ariñaga lan Heowá lun Hesusu ligía lan Liraübei le hínsiñebei lun ani weiri lan lugundan lau (Mat. 3:17; 17:5). Hínsiñeti hamuga san hun lun lariñagun Heowá huagu gunda lan hau? Inarüni mayanuhan lan Heowá wama siélugiñe. Gama lumoun, ayanuhati wama tídangiñe Bíbülia to Lererun. Dan le waliihani dimurei hínsiñehabuti le meha lariñagubei Hesusu houn lani disipulugu, aba wasandiruni kamá hamuga Heowá ariñagubalin woun. Áyeiha lumuti meha Hesusu ligaburi Lúguchi buidu buidu. Ligíati, dan le waliihan luagu ariñaga lan Hesusu houn lani disipulugu ha úaraguabaña hínsiñe hamá lun íbini meha chará hamá, gayaraati wasaminarun lariñaguñein lan Heowá ligiaméme dimurei woun (Huan 15:9, 15). Ani anhein wásügürüña lubéi lídangiñe somu turobuli, masaminara wamá ladüga lan féridi wamaali lan lugundan Bungiu, ariha waméi kei aban chansi lun warufuduni hínsiñe lan woun lídangiñe sun tilulin-agei wanigi ani afiñe wamá luagu (Sant. 1:12). w24.03 páh. 28 pár. 10, 11