Mígira humá lun ladügün hichara o hachara amu lun hadisedun luéi Heowá

1. Ka abiniruni wámabei lau tílana wamá lóundarun Heowá?

MA LUBUIDUN tídanñadiwa lan lóundarun Heowá! Íbini aribadeinatima liña lan katei lidan lagumuhóun dan le, rúhali Heowá íbirigu woun lun híderaguniwa (Sal. 133:1). Íderagua lumutiwa adundehani le líchugubei Heowá woun lun gunda wamá hama waduheñu (Efe. 5:​33–6:1). Ru lumuti giñe lichú aau le wemegeirubei woun lun wageindagun luma luriban saminaü luma lun gunda wamá.

2. Ka lunbei wadügüni, ani ka uagu?

² Íbini ítara, lun mábürühan lan warüna lidan weseriwidun lun Heowá, ñeinbei dan mosu lan wadügün saragu áfaaguni. Ka uagu? Ladüga gayaraati ladügün katei le hadügübei luma le hariñagubei amu gürigia lun wuriba lan wasandiragun woungua. Gayaraati giñe lábürühan warüna dan le wadügün somu charati, dántima le wadügüni ligiaméme charati saragu wéiyaasu. Líderagubadiwa aturiahani le lun wasigirun eseriwida lun Heowá íbini wásügürün lídangiñe ǘrüwa katei le: 1) dan le lachararun aban íbiri woun, 2) dan le lachararun tani würi weiriei tun o tachararun lani wügüri weiriou lun luma 3) dan le wuriba lan wasandiragun woungua ladüga charati le wadügübei. Lidan kada kesi warihubei ka lan gayaraabei wafurendeiruni lúmagiñe aban gürigia le uágubei tayanuha Bíbülia.

DAN LE LACHARARUN ABAN ÍBIRI WOUN

3. Ka turobuli úmabei hagagibudagua lubúeingu Heowá?

³ Turobuli. Le linarün katei, ñéinbaña íbirigu ha adügütiña lun wasafaragun. Másiñati ñéinbaña lan amu óuserutiwa wuriba o hadügün lun wuriba lan wasandiragun woungua. Íbini wéiyaaña lidan afiñeni, anihein dan hachararun. Sun katei le gayaraati ladügün lun ñein hamá gürigia ha machourun hamuti anhein lóundarun lubéi Heowá to. Lubaragiñe hamuga hasigirun eseriwida lun Heowá úara hama hábirigu, másiñati ñéinbaña lan erederutiña mererunga houn ha achararubaña houn o hígiruni habasiihan lidoun adamuridaguni (Sof. 3:9). Buiti funa san le hadügübei? Ariha waméi ka lan gayaraabei wafurendeiruni lúmagiñe aban wügüri le awinwandubei lidan tidaani Bíbülia, le ásügürübei lídangiñe sügǘ libe burí le.

4. Ka meha turobuli úmabei lagagibudagua apostolu Pábulu?

⁴ Gürigia le uágubei tayanuha Bíbülia. Subudi lumuti meha apostolu Pábulu chará hamá líbirigu. Kéiburi dan le lagumeserunbei abasiiha lidoun adamuridaguni lidan damuriguaü le meha Herusalénbei, gíbetiña meha mafiñentiña luagu ñein ani hanufudetiña meha luéi (Adü. 9:26). Dan lárigiñe, achuragua hamuti fiu hádangiñe (2 Ko. 10:10). Lárigiñe, arihati Pábulu aban íbiri derebuguhali lidan lafiñen adüga aban katei le meha gayaraabei ladügün lun hachugeragun saragu kristiánugu (Gal. 2:​11, 12). Adügati meha Márükosu aban katei le mínsiñebei lun Pábulu, lau sun ligía lan meha ábanbei hádangiñe hátima úmabaña laweiyasuha (Adü. 15:​37, 38). Gayaraati hamuga meha lasaminarun Pábulu gibe lan resun luma lun manaagun lan lungua buidu hama ha achararubaña lun. Lau sun lira, mígirunti lun ladisedagüdüni katei burí le luéi Heowá, ouseramémeti buidu hama ha achararubaña lun ani sigiti eseriwida lun Heowá lau úaraguni. Ka íderagubalin?

5. Ka meha íderagubalin Pábulu lun madisedun lan hawéi líbirigu? (Kolosana 3:​13, 14; ariha huméi giñe dibuhu).

⁵ Wéiriti meha hínsiñe líbirigu Pábulu lun darí lun metenirun lan lun hachara, lubaragiñe lira, aba meha letenirun lun igaburi buiti le hawagubei. Íderagua lumuti giñe ínsiñeni Pábulu lun feruduna lan, ítara kei lariñaguni lidan Kolosana 3:​13, 14 (aliiha huméi). Aranse lumuti meha san Pábulu liturobulin luma Márükosu? Chóuruti ítara liña lan. Íbini ígira lani Márükosu Pábulu lábuguarügü lidan furumiñeti wéiyaasu lánina apurichihani le hadügübei, meredeti Pábulu safagu luma. Dan lárigiñe, abürühati aban tubuidun gárada lun damuriguaü le Kolosabei to ídanboun lariñaga weiri lan lebegi Márükosu lun ani ítara liña lan meha lun kei “aban óunwenbu dǘgüdaguaü” (Kol. 4:​10, 11). Ani dan le ladaürǘña lubéi Pábulu Roma, amuriahati lun lidin Márükosu íderaguei (2 Tim. 4:11). Furanguti marihin lániña Pábulu líbirigu keisi gürigia ha máraninaaña. Ka wafurendeirubei lúmagiñe?

6, 7. Kaba íderaguawa lun wasigirun arufuda ínsiñeni hawagu wíbirigu íbini chará hamá? (1 Huan 4:7).

⁶ Le wafurendeirubei. Busenti Heowá lun wasigirun arufuda ínsiñeni houn wábirigu (aliiha huméi 1 Huan 4:7). Danme le lóuseruniwa somu íbiri lau aban igaburi le mabuidunti, masaminara wamá busenrügü liña lan ladügün wuribani woun. Samina wamá láfaaguña lan lun ladügüni le buídubei (Ari. 12:18). Íbini chará wamá, wéiriti wínsiñe lun Heowá. Míchugun lumuti lanagan wawagun dan le wachararun lun ani mareidahanti giñe igarihabu wabá (Sal. 103:9). Súdiniti lun wáyeihani Wáguchi Heowá lau feruduna wamaniña amu (Efe. 4:​32–5:1).

⁷ Mabulieida waméi giñe lunti lan werederun yarafa houn wíbirigu ladüga yarafaali lagumuchagüle ubóu. Lunti wagurabun wagagibudaguba lan luma éibaahouni ani gayaraati íbini wadaürǘniwa. Lídantimaba dan ligía wemegeiraña wábirigu (Ari. 17:17). Susereti aban katei ítarati lun aban wéiyaali lidan afiñeni gíriti Josep ageiraü Esüpáña.a Ladüga úaragua lan lun Heowá, aba ladaürǘniwa úara hama amu íbirigu. Ariñagati: “Kei le úarañadiwa lan meha sun dan, ménrengunti meha wadügün katei le adügüti lun hagañidun ha híbiri. Ligíati, mosu meha wawandagun wóuniwagua ani ferudunagua wagía wámagua. Íderagua lumutiwa meha katei le lun lidan wamá aban luma lun wóunigiragun woungua hawéi amu adaürǘtiña ha mámabaña gefentiña luagu Heowá. Haritagua nágili aba lan meha labuleseirun aban narüna luagu aban dan, hóuburagu liña meha ani siñati meha nánhingichuni. Kei le siñá lan meha nadügün saragu katei, íderagua lumutina meha aban íbiri achibaguoun nílagu ani íderagua lana lidan amu burí katei. Ariha numuti meha kátima lan ínsiñeni inarünibei dántima le nemegeirunbalin”. Ligíati, súdiniti lun waranseruni furumiñeguarügü turobuli hama wábirigu guentó!

DAN LE LACHARARUN TANI WÜRI WEIRIEI TUN O TACHARARUN LANI WÜGÜRI WEIRIOU LUN

8. Ka turobuli úmabei hagagibudagua maríeitiña lidan habagari?

⁸ Turobuli. “Ñeinbei saragu lénrengunga” lidan habagari maríeitiña, ítara kei tariñaguni Bíbülia (1 Ko. 7:28). Ka uagu? Lugundun dandu wügüri kei würi, charatiña. Lanwoun lira, ámuñegueinarügüti hagaburi luma katei le hínsiñebei houn. Másiñati ámuñegueinarügü lan hechun o harasan. Lau lásügürün dan, másiñati láfuachun igaburi le meha marihin habéi dan meha le gadaradun habéi. Gayaraati ladügün sun lira lun ñein lan turobuli lidan habagari maríeitiña. Lubaragiñe hamuga gabaroun hamani chará hamá hagía biángubei ani áfaagua hagía lun haransehani haturobulin, másiñati aba lan herederun íchaaha duru hawougua o hasaminarun hígiragun lan o hafanreinragun lan láranibei haturobulin. Ítara liña funa san?b Ariha waméi tikesin aban würi lánina tidaani Bíbülia to mábürühanbei tarüna íbini tásügürüña lan meha lídangiñe saragu turobuli lidan tibagari keisi maríeitu.

9. Ka meha sügǘ úmabei tagagibudagua Awigaili?

⁹ Gürigia to uáguboun tayanuha Bíbülia. Maríeitu meha aban würi gíritu Awigaili luma aban wügüri gíriti Nawali, ani según tariñaguni Bíbülia, aban meha wügüri rófuti ligía le adügüti katei burí wuribati (1 Sam. 25:3). Chóuruti hénrengu lan meha lawinwandúniwa luma aban gürigia ítarati. Gachansintu meha san Awigaili lun tanurahan lídangiñe ibagari le? Anha. Dan meha le lídinbei Dawidi, le meha lunbei larúeihan Ísüraeli, lun yebe láfaruni Nawali hilagubei ladüga lanabaguni hau sun luwügüriñanigu (1 Sam. 25:​9-13). Gayaraati hamuga meha tanurahan Awigaili lun tígirun lun láfaruni Dawidi Nawali. Lubaragiñe lira, aba tamuriahan luma Dawidi lun feruduna lani libagari Nawali (1 Sam. 25:​23-27). Ka ínchahabarun lun tadügüni lira?

10. Háfuga ka meha ínchahabarun Awigaili lun mábürühan lan tarüna íbini anihein lan meha saragu turobuli lidan tibagari keisi maríeitu?

¹⁰ Hínsiñeti meha Heowá tun Awigaili ani inebeti meha le lasaminarubei luagu maríei tun. Chóuruti meha subudi tani le lariñagubei Heowá dan meha le lamarieidagüdünbalin Adán tuma Ewa (Agu. 2:24). Furanguti meha tun Awigaili sagüráu lan maríei ligibugiñe lagu Bungiu. Chóuruti ladüga lan meha busén tan tagundaagüdüni Bungiu tesefurunbalin libagari tani weiriei luma habagari sun ha túbiñebaña. Lun meha máfarun lani Dawidi Nawali, aranseñutiña meha lun tamuriahan ferudun lau lóufudagun luagu aban charati le mama tadüga. Chóuruti weiri lan meha tínsiñe würi ganigitu to lun Heowá. Ka gayaraabei hafurendeiruni dandu würiña kei wügüriña maríeitiña túmagiñe würi to? Ariha waméi.

11. a) Ka labusenrubei Heowá lun hadügüni ha maríeibaña? (Éfesuna 5:33). b) Ka hafurendeirubei lídangiñe tikesin Carmen? (Ariha humóun giñe iyawaü).

¹¹ Le wafurendeirubei. Busenti Heowá lun inebe lan maríei houn maríeitiña, íbini hénrengu lan habagari hámagua. Chóuruti gunda lan lasandiragun Bungiu lungua dan le larihiniña maríeitiña áfaagua lun haransehani haturobulin hámagua luma lau hóuseragun houngua lau ínsiñeni luma inebesei (aliiha huméi Éfesuna 5:33). Ariha waméi tikesin Carmen. Barüharu meha kéiburi sisi irumu lúmagiñe tamarieidun dan le tagumeserunbei aturiahoun Bíbülia hama gefentiña luagu Heowá ani aba tabadiseirún. Ariñagatu: “Magundanti meha nani weiriei lau nadügagun nungua gefentume luagu Heowá. Mínsiñeti meha lun lun neseriwidun lun Heowá, anaba lumutina ani ariñaga ligía nun lídiba lan múnadagiñe”. Lau sun lira, mábürühanti tarüna. Sun 50 irumu le taubei awinwanda luma tani weiriei adüga tumuti sun tiyaraati lun tarufudun ínsiñeni luma inebesei lun. Ariñagatu giñe: “Lau lásügürün dan, furendeitina gunfunrandei nani weiriei buidu buidu luma lun nayanuhan lun lau ínsiñeni. Subudi numuti meha sagüráu lan maríei lun Heowá. Ligíati, adüga numuti sun niyaraati lun mígiragun nan. Íderagua lumutina ínsiñeni le nasandirubei luagu Heowá lun mábürühan lan narüna”.c Anhein ñǘbuingua turobuli lidoun hibagari keisi maríeitiña, chouru huméi líderagubadün lan Heowá lun hawandun.

DAN LE WURIBA LAN WASANDIRAGUN WOUNGUA LADÜGA CHARATI LE WADÜGÜBEI

12. Ida liña gayara lan wasandiragun woungua dan le wéiguadun lidoun aban figóu wéiriti?

¹² Turobuli. Háfuga wasandirun máraninaali lan wawaguti dan le wadügün aban figóu wéiriti. Ariñagatu Bíbülia gayara lan ladügün wafigoun lun gagarigu tan wanigi (Sal. 51:17). Ligía meha asuseredubei lun aban íbiri gíriti Robert, le meha barühalibei saragu irumu áfaagua lun liridún kei ídehati lidan damuriguaü. Aba meha ladügün aban figóu wéiriti ani subudi lumuti meha garabaguaali lan lungua luagun Heowá. Ariñagati: “Dan le níchugunbei fe luagu le nadügübei, mederaguagüdünti meha nisaminan. Lárigiñe, aba lagarigadun nurageirugu, aba nayahuahan ani furíei nuguya lun Heowá. Haritagua nágili samina nan maganbundigia laali lanme Heowá nafurieidun ladüga gáñigüda naali lan”. Ánhawa éiguada lidoun aban figóu wéiriti, másiñati tíchugun wanigi duru wawagu darí lun wasaminarun ígira láadiwa lan Heowá ani mahuudunhaali lan wasigirun eseriwida lun (Sal. 38:4). Sandiguañahaadün san hungua ítara? Anhein ítara liña lubéi, líderagubadün hafurendeirun lúmagiñe aban lubúein Heowá úaraguati le meha asigirubei eseriwida lun Heowá íbini heigua lan lidoun aban figóu wéiriti.

13. Ka meha figóu wéiriti ladügübei Féduru ani ka burí amu figóu ladügübei lubaragiñe le?

¹³ Gürigia le uágubei tayanuha Bíbülia. Guñoun le lubaragiñebei lafarún Hesusu hilagubei, adügati apostolu Féduru saragu charati. Furumiñe, aba lachoururuni luagu úaraguabei lan íbini anhein hígira ha híbiri apostolugu Hesusu (Mar. 14:​27-29). Lárigiñe, darí lumuti Hesusu Féduru arumuga lóugiñe aban wéiyaasu dan le lidan habéi fuluri-agei Hetüsemaní (Mar. 14:​32, 37-41). Ani dan le larügüdǘnbei Hesusu, aba lígiruni Féduru Hesusu lábugua (Mar. 14:50). Lagumuhóun, aba láfiñurun Féduru ǘrüwa wéiyaasu ibidiñe lan Hesusu lun (Mar. 14:​66-71). Ka ladügübei Féduru dan le líchugunbei fe adügaali lan aban figóu wéiriti? Aba láhügüchün ayahuaha (Mar. 14:72). Gayaraati san hasaminarun luagu ida liña lan meha lasandiragun Féduru lungua dan le larihinbalin Hesusu, le lumada, luagu wagabu? Chóuruti wuriba lan meha lasandiragun Féduru lungua.

14. Ka íderagubalin Féduru lun lasigirun eseriwida lun Heowá? (Ariha huméi giñe).

¹⁴ Sigiti Féduru eseriwida lun Heowá. Ka íderagubalin? Madiñurunti Féduru hawéi líbirigu, áluaharügü lumutiña ani chóuruti aba lan meha híchugun dǘgüdaguaü lun (Luk. 24:33). Lanwoun lira, dan le láguyugunbei Hesusu, aba larufudagun lungua lun Féduru, másiñati lun lan líchugun gurasu lun (Luk. 24:34; 1 Ko. 15:5). Ani lubaragiñe ladeinhan Hesusu lun Féduru, le lumada, luagu le meha ladügübei, aba lariñagun lun leresibiruba lan lanwoun lidasin (Huan 21:​15-17). Lau sun meha subudi lani Féduru adügaali lan aban figóu wéiriti, mábürühanti larüna. Ka uagu? Ladüga meha subudi lani luagu hínsiñememegili lan lun Hesusu ani sigitiña líbirigu íchiga gurasu lun. Ariha waméi ka lan gayaraabei wafurendeiruni lúmagiñe.

15. Ka labusenrubei Heowá lun wachoururuni? (Sálumu 86:5; Rómana 8:​38, 39; ariha humóun giñe iyawaü).

¹⁵ Le wafurendeirubei. Busenti Heowá lun wachoururuni hínsiñe wamá lun ani aranseñu liña lan lun feruduna lániwa (aliiha huméi Sálumu 86:5; Rómana 8:​38, 39). Le linarün aban katei, agurabúati lun wasandiragun woungua wuriba dan le wafigouhan. Íbini ítara, moun lumuti wasaminarun mínsiñehadiwa lan lun Heowá ani úabei lan feruduna lániwa. Lubaragiñe lira, mosu wáluahan ídemuei lau lóufudagun. Ariñagati Robert le buga uágubei wayanuha lidan párafu 12: “Héiguatina meha lidoun figóu ladüga nafiñerun nuougua”. Aba meha líchugun fe megei lan lun layanuhan hama wéiyaaña lidan afiñeni. Sigiti ariñaga: “Dan le nadügünbalin katei le, íderagua hamutina arihei hínsiñememegidina lan lun Heowá. Ariha numuti giñe hínsiñememegidina lan houn wéiyaaña lidan afiñeni. Arufuda hamuti nun mígirun lágidina lan Heowá”. Ítara kei Robert, gayaraati wachoururuni weiri lan wínsiñe lun Heowá, feruduna lániwa dan le wasakürihan lídangiñe wafigoun, áluaha wagía ídemuei ani áfaagua wagía lun méiguadun wamá lidoun ligiaméme figóu (1 Huan 1:​8, 9). Anhein gabaroun wamá hínsiñememegidiwa lan lun Heowá ani feruduna lániwa, mígirun wabéi weseriwidun lun íbini wadügün somu charati.

16. Ka uagu busén hubéi hasigirun eseriwida lun Heowá mabuchadunga huagu?

¹⁶ Lun Heowá, gebegiti saragu áfaaguni le wadügübei lun weseriwidun lun lidan lagumuhóun dan hénrenguti le. Líderagubadiwa lun wasigirun eseriwida lun Heowá lau ǘnabuguni íbini wachararun o hachararun amu woun. Gayaraati warufudun ínsiñeni houn wábirigu, feruduna wamañame dan le hadügün lun wuriba lan wasandiragun woungua. Gayaraati giñe warufudun lun Heowá hínsiñe lan woun ani inebe lan maríei woun lau wáfaagun lun waransehani furumiñeguarügü turobuli lidan wabagari keisi maríeitiña. Ani, ánhawa adüga aban figóu wéiriti, gayaraati wáluahani lídehan Heowá, wánharun lun línsiñehabu luma ferudun le líchugubei woun, sigí wagíame eseriwida lun. “Moun lumuti lubeiti labuchadun wawagu adügei katei le buídubei”, ladüga subudi wamuti luagu labinirubadiwa lan Heowá saragu (Gal. 6:9).