Luagu-ǘrüwa 3 lidan nefu-hati
Aba ladügüni Hosé le lubeibei ánheli ligía lun, aba leresibirunu María keisi lúmari (Mat. 1:24).
Súnwandan meha lafalaruni Hosé ladundehan Heowá ani adügati le lun aban lan wügüri buiti. Ǘrüwañein wéiyaasu líchugun Bungiu adundehani lun, lun lóunigiruniña liduheñu. Ani adüga lumuti lau lóufudagun íbini hénrengu lan (Mat. 1:20; 2:13-15, 19-21). Seremei gaganbadi lan Hosé lun Heowá gayara lubéi meha lóunigirunu María. Chóuruti adüga lan katei le lun hínsiñetima lan tun María luma lun inebetima lan tun. Huguya wügüriña maríeitiña, gayaraati háyeihani Hosé lau háluahan adundehani tídangiñeti Bíbülia le lunbei líderagunün óunigiraña hiduheñu. Dan le hafalaruni adundehani le, íbini mosu lan hadügün asansiruni lidan hibagari, arufudatün hínsiñe tan hani weiriou hun. Ani ladügüba katei le lúntima derebugu lan hibagari keisi maríeitiña. Ariñagatu aban íbiri to awinwanduboun Banuatu, to barüharuboun lóugiñe 20 irumu maríeiñu: “Dan le narihini nani weiriei áluahei ladundehan Heowá luma afalarei, ábatima inebe lan nun. Chóuruti nasandiragun nungua ani afiñetina luagu le lanúadirubei ladügün”. w23.05 páh. 21 pár. 5
Luagu-gádürü 4 lidan nefu-hati
Ñeinbei aban üma gíriti “émeri sagüráuti” (Isa. 35:8).
Huríu ha meha agiribudubaña Babilóniagiñe, mosu meha lánigubaña lan Bungiu (2 Lur. 7:6). Mini lan san le hadügüñein lan meha sun katei buidu? Uá. Mosu meha hadügün asansiruni lidan habagari lun gayara lan hagundaaragüdüni Heowá. Genegeti aba lan meha háyeihani saragu hádangiñe huríu ha águrahoubaña Babilónia ligaburi hasaminan luma hechun babilóniana. Irumu burí lárigiñe, aba taweiridun lanigi gumadimati Neemíasi lau larihin mariñagadi hamá harahüñü huríu lun hererun ebüréu (2 Lur. 6:6, 7; Neem. 13:23, 24). Ida luba méhati hafurendeirun asandira ínsiñeni luagu Heowá luma áhuduragua lun anhein ua lubéi gunfuranda hamani iñeñein létima ídanbei tabürüdǘwa Lererun Bungiu? (Ésüd. 10:3, 44). Ligía mosu lubéi meha hadügün huríu ha óunwenbu burí asansiruni, ani ménrenguntimabei meha houn lun hadügüni lau hawinwandun Ísüraeli ladüga ladügǘña meha aransehani lunya láhudurawagun lun Heowá (Neem. 8:8, 9). w23.05 páh. 15 pár. 6, 7
Wándaradi 5 lidan nefu-hati
Góunigi lumutiña Bungiu ha éiguadubaña, saragüda laña ha méreeñabaña (Sal. 145:14).
Híruti, íbini lan ichaahóua lan woun lun wadügün aban katei, gayara lan wadunragun luma turobuli le gayaraabei leberesehaniwa. Kéiburi dan le ladügün “katei le magurabúnti” lun madaani wamá lun wadügüni le wabusenrubei wibihin lidan weseriwidun lun Bungiu (Apur. 9:11, TNM). Gayaraati giñe ladügün turobuli lun lábürühan warüna luma lun lagidaruni were (Ari. 24:10). Ani kei chará wabéi, anihein dan wádaruni wagudi ani adügati katei le lun hénrengu lan woun wáfaagun lun wibihini le wabusenrubei wadügün (Rom. 7:23). O másiñati labuchadun wawagu (Mat. 26:43). Ka gayaraabei líderagunün lun hubaruaguounméme humá dan le lasuseredun lira o dan le mabuidun lan huéyuri? Haritagua huméi dan le lan mibihin humani le habusenrubei hadügün, úati lan mini lan lira luagu moun lumuti lan hasigirun áfaagua. Según tariñaguni Bíbülia, wásügürüba lídangiñe saragu turobuli. Lau sun lira, ariñagatu giñe woun gayara lan wasigirun wabaruaguóun luma wibihini le wabusenrubei lidan weseriwidun lun Heowá. Ítara liña, dan le wasigirun wabaruaguóun, íbini laganagua turobuli, warufuduñein lun Heowá busén wamá wagundaaragüdüni. Saminatün san luagun óunwenbu ugundani le lasandirubei Heowá dan larihini wáfaaguña lan lun wadügüni le wabusenrubei wadügün lidan weseriwidun lun? w23.05 páh. 30 pár. 14, 15