Uganu buiti le labürüdübei Matéu
8 Lárigiñebei lararirun Hesusu luéigiñe wübü, aba houdin saragu gürigia lárigi. 2 Ábati liabin aban gawaguti lépüra abuluchagua ligibugiñe, ariñageina: “Nabureme, subudi numuti ánhabu lan busén gayaraabei lan bareidaguagüdünina”. 3 Ábati línchuni Hesusu lúhabu lun laguurun luagu, ariñageina: “Busentina. Areidaguabá”. Aba lareidagun wügüri ligía ouraméme ligía. 4 Ábati lariñagun Hesusu lun: “Mámatia lun bariñaguni ni ka un. Ñüdünrügübá arufudagua bungua lun fádiri, barüinabéime adagaragüdüni le lariñagubei Moisesi, lun larufudún areidaguaadibu lan”.
5 Dan le lebelurunbei uburugun Kapernaúmu, aba layarafadun aban gumadan ayumuragua lun lun líderaguni. 6 Ábati lariñagun lun: “Nabureme, anihein nidamun núbiñe roun liña lau deregüdaü ani lasufuriruña saragu”. 7 Ábati lóunabuni Hesusu: “Nareidaguagüdübei danme le nachülürün búbiñoun”. 8 Lariñagati gumadan ligía lun Hesusu: “Nabureme, madünatina ni lun bebelurun núbiñoun. Lareidaguba nidamun láurügü bíchuguni gumadi. 9 Ladüga íbini au falatina giñe gumadi, ru au gumadi houn súdaragu ha lábugiñebaña naríaahan. Dan le nariñagun lun aban súdara ‘Beiba!’, aba lidin, danti le nariñagun lun amu ‘Higabu!’, aba liabin, ani dan le nariñagun lun nidamun ‘Adügabéi le!’, adüga lumuti”. 10 Ábati taweiridun lanigi Hesusu dan le laganbunbalin le lariñagubei gumadan, ani aba lariñagun houn ha aganbubalin: “Gayaraati nachoururuni hun madarigidina lan ni aban gürigia lidan sun Ísraeli le arufuduti aban afiñeni wéiriti kei wügüri le. 11 Ninarün hau hayabinba lan saragu gürigia luéigiñe oubaü le ñéingiñe lubéi laboucha luma lálüda Weyu añuura luagu dábula úara luma Abraámü, Isaakü luma Hakobu lidan Arúeihani le siélubei, 12 sunme añaha lan ha yebe lúnbaña lílana hamá Larúeihan Bungiu abugawagúa bóugudin lidoun luburiga, le ñeinba lubéi hayahuaha, akünrinha ligíame hari”. 13 Ábati lariñagun Hesusu lun gumadan: “Giribubá búbiñoun, ani gúnfulila le bamuriahabei según afiñeni le arufuda báalibei”. Lúmagiñe oura ligía, aba lareidagun lidamun.
14 Dan le lebelurunbei Hesusu lúbiñoun Féduru, aba larihin roun tiña lan límedi Féduru lau abiruaü. 15 Ábati laguuruni Hesusu túhabu, ani aba lagidarun abiruaü tuéi. Ábati tásaarun aransera heigin. 16 Dan le aguñedeina lan, aba hagumeserun gürigia anaaha gawagutiña sífirigu wuribatiña lun Hesusu, ani aba lasagaruniña sífirigu wuribatiña hagía hádangiñe láurügü líchuguni gumadi houn. Areidaguagüda lumutiña giñe sun ha sándibaña. 17 Susereti lira lun lagunfulirun le meha ariñawagúbei lau lídehan profeta Isaíasi: “Ligía guánarügü agidarubalin wasandi luma gáriti le wawagubei”.
18 Dan le larihinbei Hesusu gíbegua lan gürigia geyegu lau, aba lariñagun houn lani disipulugu lun hánhiñuragun luagun le aban oubaü. 19 Ábati layarafadun aban arufudahati Lilurudun Moisesi lun Hesusu ani aba lariñagun lun: “Máisturu, nídiba bárigi le ñeinhin lumuti bidin”. 20 Ábati lóunabuni Hesusu: “Daritiña animaalugu* halíaba lan heredera ani gamasatiña dunuru, ánheinti Liráü Wügüri,* madariti ni halíaba lan labalachagüdei lichügü”. 21 Ábati lariñagun aban hádangiñe lani disipulugu lun: “Nabureme, ígira yebe bana lun nidin ábunei núguchi”. 22 Ábati lóunabuni Hesusu: “Merederalá bafalarunina, ígiraba lun hábununiña hilaaña hilaguaaña háledigu”.
23 Dan le ládinunbei Hesusu tidoun ugunei, aba houdin lani disipulugu úara luma. 24 Sódini, aba ladagarun aban óunwenbu liñawan dan baranaha, ábati liñuragun lugudi barana darí lun ladouragun tau ugunei. Larumuguñati Hesusu oura ligía. 25 Ábati houdin agagudahei, ariñageina: “Sefu bawa, Nabureme, wóunweguatia!”. 26 Ábati lariñagun houn: “Lóuguati giñe hafiñen, ka uagu hanufudeda?”. Ábati lásaarun Hesusu, aba ladeinhan lun garabali luma lun barana, ani aba lagalumarun sun katei. 27 Ábati hariñagun lani disipulugu lau tueirin anigi: “Katei funa san wügüri le gaganbadi lubéi garabali luma barana lun?”.
28 Dan le lachülürünbei Hesusu luagun le aban oubaü, lidoun hageira gadarana, aba hayabin bián wügüriña gawagutiña sífirigu wuribatiña lubaroun, lídangiñe gabusándu háfurida. Hanarimeti hafasin darí lun hanufude hamá gürigia hásügürün luéigiñe üma ligía. 29 Ábati hagumeserun wügüriña hagía agúaragua lun: “Ka san badaagubei ya, Liráü Bungiu? Biábiña san asufuriragüdawa lubaragiñe lachülürün dan?”. 30 Keiti añahein lan saragu buíruhu eiga ñein yarafa, 31 aba hayumuragun máfianu hagía lun Hesusu: “Ánhawa basagara hádangiñe wügüriña ha, ígirabawa lun webelurun hadoun buíruhu ha”. 32 Ábati lariñagun Hesusu houn: “Heiba hadoun!”. Ouraméme ligía, aba háfuridun máfianu hádangiñe wügüriña hagía ani aba hebelurun hadoun buíruhu. 33 Ñéingiñe, aba hachüüragun buíruhu hagía houngua baranahoun ani aba hóunwegun. Ábati houdin hóuniri buíruhu éibaagueina uburugun abahüdahei sun le asuseredubei, íbini le asuseredubei houn wügüriña ha meha gawagubaña máfianu. 34 Ábati houdin lílana fulasu áluahei Hesusu, danti le hadarirunbalin, aba hayumuragun lun lun lidin hageiragiñe.