Apurichiha humá houn ‘sun hawuyeri gürigia.’
1. Ka san uma genegegua lan aban apurichihati luma aban nadagimeinti?
1 Aban nadagimeinti buiti mámarügüñoun saragu litulun, subuditi lun ídaba lan luma ida luba lan layusurunu kada aban tídangiñe. Ítarameme, anuhein sun tuwuyeri tulu wama to íderagubadiwa lun wapurichihani uganu buiti. Aban hénpulu, lun gayara lan wapurichihan ‘houn sun hawuyeri gürigia’, anuhein garüdia lau amuñeigueinarügü tema wama (1 Ko. 9:22). Lidan lanwoun ariñahani anuhein aban lísüta lani fiú lídangiñe, ani afuranguagüdati ka lan un tadügǘwa ani anihein adundehani ida luba lan tayusuruniwa garüdia lidan apurichihani lidan fulasu le ñein lubéi weredera.
2. Ida luba tayusurún garüdia lidan wani ministeriu?
2 Ida luba tayusurún garüdia. Aban nadagimeinti buiti súnwandan layusurunu litulun tótima buiduboun lun wadagimanu. Ítarameme, ánhawa ayanuha luma aban gürigia ani arihatiwa buidu lan lun wígirun aban garüdia lun, gayarati wígirunu lun íbini mapurichiha wamá tau garüdia tuguya lidan hati ligía. Aban hénpulu, anhein wapurichihaña lubéi tau líburu Kátima san ani wawinwanduña lidan aban ageiraü le ídanbei mama hamá kristiánu gürigia ani lóuguati tínsiñe Bíbülia houn, háfuga buídutimabei wígirun aban tiraüraü garüdia houn ani ariha wameime anhein busén habéi hafureindeirun lubaragiñe wígirunu líburu.
3. Ka uagu lunti lubéi wahandilihanu watulun to lánina apurichihani buidu?
3 Tidan Lererun Bungiu adimurehóuati buidu hawagu ha adügübalin hawadigimari buidu (Ari. 22:29). Chóuruti úa lan amu wadagimanu súdinitimati luéi ‘lapurichihoun uganu lúmagiñeti Bungiu’ (Rom. 15:16). Lun aban wamá nadagimeinti buiti “le úati kaba lan uagu labusigarida”, lunti buidu wamá lidan tahadilihóun tulu to lánina apurichihani (2 Tim. 2:15).