Ámuñegueinarügü ídemuei to wayusuruboun lun warufudahan
1. Ka idan genegegua wamá, wagía kristiánugu, hama sarafangei?
1 Anuhein saragu ámuñegueinarügü tulu hama sarafangei lun hadügüni hawadigimari. Anuhein tídangiñe, lúnrügüñein burí wadagimanu espechaliti hayusuroun, anuheinti amu, gabügürüguati hayusurunu. Ani ha lǘtimahaañabaña lidan wadagimanu le, súnwandan hanügün aban gafu hámagua buin tau tulu tótima hemegeiruboun, to burí furendei hamaaruboun ayusura buidu. Ínchaha tumutiwa Lererun Bungiu áfaagua lun wadügüni wawadigimari buidu. Le linarün katei, agurabúati lun aban lan “nadagimeinti buiti [kada gefenti luagu Heowá], le úati kaba lan uagu labusigarida” (2 Tim. 2:15). Ka ídemuei súdinitimaboun wama? Siñati wasigeneruni Bíbülia lan, ladüga tuguya wayusuruboun lun wadügün disipulugu (Mat. 28:19, 20). Ligía mosu lubéi wadügüni sun wayaraati lun wafurendeirun ahandilihoun buidu arufudaha wamaamugei “uganu lánina inarüni [le tídanbei Lererun Bungiu] kei lubudubu”. Ani lanwoun lira, mosu giñe lafurendeiruni kada kristiánu ida luba lan layusurunu sun ídemuei tótima wemegeiruboun lun warufudahani inarüni houn amu buidu (Ari. 22:29).
2. Ka burí ídemuei mégeitima waboun lun warufudahan?
2 Ídemuei burí tótima wayusuruboun lun warufudahan. Tárigiñe Bíbülia, ka amu ídemuei wemegeiruboun lun warufudahan? Líburu Kátima san tarufudahabei Bíbülia?, tuguyatima wayusuruboun lun wíchugun aturiahani tídangiñeti Bíbülia. Dan le aturiaha wamaaru líburu to dayarügubei, aba waturiahanu líburu “Redei humá lidan línsiñehabu Bungiu” furendei láamugei aturiahati ida luba lan lafalaruni adundehani le tídanbei Bíbülia lidan libagari. Ligía mosu lubéi wasubudirunu biángubei agumeiraguagüdüni to, furendei wagíame ayusuroun buidu. Súdiniti giñe lun ñein tan fiu garüdia taganagua ídemuei to lunboun wayusurunu. Kéiburi garüdia Uganu buiti lúmagiñeti Bungiu, to wayusuruboun lun wagumeserun aturiahoun Bíbülia hama gürigia. Ánhawa adarira lidan fulasu le ídanbei wapurichiha gürigia ha úntiña lénrenguda aliihani o ha ayanuhatiña aban iñeñein le ídanbei úagiru lan agumeiraguagüdüni o lougua tan, gayaraabei warufudahan houn tau garüdia Aganba huméi Bungiu o Aganba huméi Bungiu ábame hawinwandun lun súnwandan. Súdiniti giñe tayusurún garüdia Kátaña san adügübalin lugundan Heowá uguñe weyu? lun wíderaguni aturiahati asubudiroun lóundarun Heowá buidu. Huuti giñe burí bidéu lun hadügǘn disipulugu, ligía lunti lubéi wafurendeirun ayusurei. Ka uagu lunti lubéi haturiahanu Bíbülia?, Ka adügǘbei lidan wadamuridagun? luma Ida liña wíchugun külase tídangiñeti Bíbülia? ligía fiu lídangiñe.
3. Kaba wafurendeira lidan burí arütíkulu le lunbei láfuridun tidan Wani Ministeriu lidan burí hati le lunbei liabin?
3 Líderagubadiwa arütíkulu burí le lunbei láfuridun tidan Wani Ministeriu lidan burí hati le lunbei liabin lun wafurendeiruni ida luba lan wayusurunu agumeiraguagüdüni burí to wámaboun lun warufudahan buidu. Ánhawa áfaagua lun wafurendeirun ayusuroun buidu wafalaruñeinme adundehani tídangiñeti Bíbülia le: “Góunigiguaba buáriuagua, luma lau le barufudahabei; ítaramemeba deregüdagu lidan sun katei. Anhein badüga ítara, basalbaruba, salba hagíame giñe ha aganbubalibu” (1 Tim. 4:16).