Buidutimalá ligaburi wapurichihan
1. Ka hénpulu lánina furumiñeti sígulu arufudubei lunti lan wabuiduragüdüni ligaburi wapurichihan?
1 Kei kristiánugu lunti wasigirun awansera lun buídutima lan ligaburi wapurichihan. Ligía meha larufudahanbei Hesusu houn lani disipulugu íderagua laña lun buidutimalá hagunfulirun lau hawadigimari lánina apurichihani (Luk. 9:1-5; 10:1-11). Ligiaméme ladügübei Akila tuma Pürisíla dan le hanügünbalin Apolosu hámagua “lun hafuranguagüdünitima luáguti lémeri Bungiu lun” (Adü. 18:24-26). Ínchaha lumuti giñe Pábulu Timotéu —le meha barühalibei saragu dan apurichiha— lun lasigirun áfaagua kei aban máisturu le buiti “gayara láamuga larihíniwa [l]awanserun” (1 Tim. 4:13-15). Meberesenga átirihali lan dan wau eseriwida kei lidamun Aburemei lidan wadagimanu lánina apurichihani, lunti wasigirun abuiduragüdei ligaburi wapurichihan.
2. Ka gayaraabei wadügüni lun wafurendeirun hámagiñe amu íbirigu?
2 Furendei wamá hámagiñe amu. Lun wabuiduragüdüni ligaburi wapurichihan lunti wetenirun lun ligaburi hadügüni amu (Ari. 27:17). Ligíati, danme le wáfuridun apurichiha luma somu íbiri, teni wamá lun le lunbei lariñaguni lidan lapurichihan. Amuriaha wamá giñe ídemuei hama íbirigu ha gapurichihaditiña, aganba wameime adundehani le lunbei híchuguni woun (Ari. 1:5). Hénrenguti san woun wagiribudun bisidaña gürigia, wagumeserun aturiahani tídangiñeti Bíbülia o wagunfulirun lau amu wadagimanu lidan wani ministeriu? Anhein ítara liña lubéi, ayanuha wamá luma íbiri le arihibei lau sétanu lánina apurichihani o luma amu íbiri le subuduhabuti, gayara láamuga híderaguniwa. Haritagua waméi giñe gayara lan líderaguniwa lani Bungiu sífiri sandu lun buídutima lan ligaburi wapurichihan. Ligíati, mararamagua lan wamuriahani lidan wafurieidun (Luk. 11:13).
3. Ida luba wóunabun anhein ichugúa somu eweridihani woun, íbini anhein mamuriahan wabalin?
3 Masafaragua wamá anhein ichugúa somu eweridihani woun, íbini anhein mamuriahan wabalin (Apur. 7:9). Ǘnabugu wamá, geteingiradi wagíame, ítara kei Apolosu ani ánhara wamá lun sun ídemuei le ichugúbei woun. Anhein wadüga ítara, warufuduña lichú au (Ari. 12:15).
4. Ka resun wámabei lúntima wabuiduragüdüni ligaburi wapurichihan?
4 Ruti wawanserun uéiriguni lun Bungiu. Lun líderaguniña Hesusu lani disipulugu lun habuiduragüdüni ligaburi hapurichihan, aba meha layusurun aban hénpulu. Aba lariñagun ítara liña lan kei aban tídibu beibei ani luagu ítara haña lan lani disipulugu anuadirúaaña kei tilimun beibei le ginti. Ariñagati giñe atirimuha lani Lúguchi tilimun beibei le ginbei, “harumagüdalei lúntima lagindun” (Huan 15:2). Ítara kei busén lan labureme aban beibei-agei lúntima gin lan tídibu beibei le lábunagubei, busenti giñe Heowá lun wasigirun íchiga “uéiriguni lun lau wayuma” —lidan amu dimurei— wabuiduragüdüni ligaburi wapurichihan gánwoungüda wameime (Ebü. 13:15). Kaba wibiha anhein wabuiduragüda ligaburi wapurichihan? Ru lumuti Hesusu óunabagülei lau lariñagun: “Ibihati Núguchi uéiriguni dan le gibe lan hin” (Huan 15:8).