Buidutimalá wadügüni katei: ínchaha wamaña gürigia ha únbaña wanaahoun garüdia lun hasigirun afurendeira

Ka uagu súdini lubéi? Hínsiñeti houn saragu gürigia haliihanu Garüdia Atalaya gama lumoun mabuseruntiña haturiahanu Bíbülia wama, háfuga ladüga gunda hamá lau hani relihión o madaani hamá lun haturiahan. Íbini ítara, kei súnwandan lubéi haliihanu garüdia, másiñati línchahaniña lira lun habusenrun haganwoundagüdüni hasubudin tuagu Lererun Bungiu (1 Fe. 2:2). Gayaraati lánhingichunu somu arütíkulu hanigi o lasansiragun gádantiña. Ladügüba gabügürügua lan bisida wamaniña murusunraü lun wasubudiruni ka lan hínsiñebei houn luma ka lan adiheridagüdübaliña ani darangilubei giñe hasandiragun houngua wama. Lau lásügürün dan, háfuga gayaraahalime wagumeserun aturiahoun Bíbülia hama.

Le lunbei wadügüni:

Barǘ wamóun iseri Garüdia Atalaya lun gürigia sagü hati. Bisida waméi amu weyu lidan hati lun wayanuhan luma luagu somu arütíkulu tídangiñeti garüdia to wígiruboun lun o lun wígirunu agumeiraguagüdüni to auboun lapurichihóua lidan hati lun, ínchaha wamaamugei abusenra lasigirun afurendeira. Bürǘ waméi sun ariñahani le huuti. (Ariha huméi páhina 3 tidan Wani Ministeriu to lánina eneru, irumu 2014.)
Aranse wamá lubá kada bisida. Lubaragiñe ígirarügü wamanu garüdia lun gürigia, áfaagua wamá wayanuhan luma, adüga wagíame umadaguaü luma, ménrenguntima láamuga wínchahani lun labusenrun lasigirun afurendeira.
Meferidira waméi chansi le wadarirun lun wagumeserun aturiahoun Bíbülia hama. Ánhawa lálügüda aban hádangiñe gürigia ha únbaña wanaahoun garüdia ka lan tariñagubei Bíbülia luagu ítaga katei, barǘ wamá aban agumeiraguagüdüni lánina aturiahani lun to ñein lumuti lounabúa álügüdahani ligía, ábameti wakutihani óunabagülei úara. Lubaragiñe wáfuridun lúbiñegiñe, adüga wamá amu álügüdahani luagu ligiaméme katei lun óunaba wamaamugei dánmeya wagiribudun bisidei. Anhein gabügürügua lubéi wayanuhan luma aban gürigia luagu aban tema lárigi aban ani yusu wamutu Bíbülia o amu agumeiraguagüdüni to luntu aturiahani, gumeseediwa aturiahoun Bíbülia luma. Derege wamaaru san garüdia Uganu Buiti lun ani afuranguagüda wamaali lun ida liña lan taturiahóun Bíbülia tau lídanrügü fiu minutu? Gayaraati giñe warufuduni bidéu Ka uagu lunti lubéi haturiahanu Bíbülia? luma Ida liña wíchugun külase tídangiñeti Bíbülia? lun. Íbini mabusenrun lan meha gürigia laturiahanu Bíbülia wama, gayaraati lasansiragun gádanti. Álügüdaya wameigia anhein busén lubéi laturiahan!

Houcha humá hadügüni le lidan sun hati:

Adüga humá aban lísüta lau hiri gürigia ha únbaña gayara lan hanaahanu Garüdia Atalaya sagü hati. Ru humóun garüdia to málügilibei lúmagiñe táfuridun houn, ariñaga huguyame houn hanügüboun lan to lánina le aban hati houn.