Ariñahani le lunbei lakutihóun lidan adamuridaguni Habagari Kristiánugu luma Heseriwidun
4-10 lidan Nefu-hati
ARUFUDAHANI GEBEGITI TÍDANGIÑETI BÍBÜLIA | ESEKIÉLI 42-45
“Ladügün Heowá lunya láhudurawagun lun lau arumani”
(Esekiéli 43:10-12.)
w99-S 1/3 páh. 8 pár. 3
“Tenibá” tun litenpulun Bungiu
3 Tidan liliburun Esekiéli, ayanuhati nefu kapítulu luagu aban limigifen arufudúni le meha íchugubei emenigini houn huríu ha asagarúbaña hageiragiñe, ru ligía iderebugu lun hafiñen lugundun, lidan, füramaseti Heowá ladügüba lan lunya láhudurawagun lun lau arumani. Rúhali arufudúni le gurasu houn ha hínsiñehabubaña lun Heowá lúmagiñe sígulu burí le ásügürübei lárigiñe darí lumoun wadaani. Ida? Lun wasubudiruni, akutiha waméi le meha mini lubéi arufudúni ligía houn ísüraelina ha asagarúbaña hageiragiñe. Gádürüñein fánreinti súdiniti lidan: ténpulu, afadirihani, ábuti luma fulasu.
it-2-S páh. 1102 pár. 6
Ténpulu
Arufudúni tuáguti ténpulu to larihiboun Esekiéli. Lidan irumu 593 lb. l. K., katorusu irumu lárigiñe lagünrinchawagun Herusalén tuma litenpulun Salomón, aba lanügǘn fádiri Esekiéli, le profeta, lidan aban arufudúni lábulugun aban wübü íñuti, ábati larihin aban tueirin litenpulun Heowá (Ese 40:1, 2). Rúati gumadi lun Esekiéli lun labahüdaguni sun le larihubei houn “lumutuniña Ísüraeli” lun línchahaniña huríu ha asagarúbaña hageiragiñe lun hǘnabudaguagüdün houngua asaküriha hagíame luma lun líchugun dǘgüdaguaü houn ha úaraguabaña (Ese 40:4; 43:10, 11). Ruti arufudúni ligía saragu ariñahani libügürü tamisurahóun ténpulu. Yúsuati “wewe amisuraagülei” (le migifebei: 3,11 m.) luma gómedi (le migifebei: 51,8 sm) (Ese 40:5). Kei rua lan saragu ariñahani libügürü tamisurahóun ténpulu, añahein afiñetiña seriwi lan arufudúni tuáguti ténpulu to keisi hénpulu tun ténpulu to lábunaguagüdüboun Sorobaweli dan lárigiñe hasagarún huríu hageiragiñe. Gama lumoun, siñati larufudún anhein ítara liña lubéi.
(Esekiéli 44:23.)
(Esekiéli 45:16.)
w99-S 1/3 páh. 10 pár. 10
“Tenibá” tun litenpulun Bungiu
10 Chóuruti ru lan meha arufudúni le gurasu houn ísüraelina ha asagarúbaña hageiragiñe lugundun chóurugüda lumuti meha houn habihiba lan sun iduheñu aban fulasu keisi alagan (konpararualá luma Mikeasi 4:4). Áhuduraguniba meha lun Heowá súdinitima ani lóugiñebei meha furumiñeguarügü amu áhuduraguni. Teni wamá giñe lun ariha lan Esekiéli lidan arufudúni le gürigiaba lan meha íchiga fulasu lun ábuti keisi idewesei lun lawinwandun ñein, ítara kei meha houn fádirigu (Esekiéli 45:16). Arufudati lira, danme lanme meha hagiribudun ísüraelina hageiroun, mosu lanme hídehan hama ha líridubaña Heowá lun hanügüni ubaraü gaganbadi hagíame lun hadundehan. Ábanbei meha hénpulu fulasu ligía lidan aransehani, ídehani luma ichouruni.
Darí wamá pérüla lánina lichú aau
(Esekiéli 43:8, 9.)
it-2-S páh. 501 pár. 4
Iri
Féridi hamuti meha ísüraelina chansi le hámabei lun hanügüni liri Bungiu keisi lumutuniña ladüga hawiyeduni liri lau maganbadi hamá lun lilurudun le richabei (Ese 43:8; Amos 2:7). Dan le labeichunbaliña Bungiu ísüraelina ladüga múaragun hamá lun, gumesetiña meha amu néchanigu adimureha lau menebenehabuni luagu liri Bungiu (konpararualá luma Sal 74:10, 18; Isa 52:5). Kei meha ua lubéi gunfuranda hamani néchanigu hagía lúmagiñe lan Heowá liabin habeichún ísüraelina, aba habulieidagun asaminara mabafurügü liña lan lóunigiruniña lumutuniña. Lun larumadahani liri, aba lesefurun fiu hádangiñe ísüraelina ani aba lagiribudagüdüniña hageiroun (Ese 36:22-24).
(Esekiéli 45:9, 10.)
it-2-S páh. 170
Irichaü
Ligía súnwandan lubéi lamuriahan Heowá hámagiñe sun ha busenbaña lun lagundaarun hau lun hafurendeiruni lilurudun falá hameime ani garichati lun ladügüni (Isa 1:17, 18; 10:1, 2; Her 7:5-7; 21:12; 22:3, 4; Ese 45:9, 10; Amos 5:15; Mik 3:9-12; 6:8; Sak 7:9-12).
11-17 lidan nefu-hati
ARUFUDAHANI GEBEGITI TÍDANGIÑETI BÍBÜLIA | ESEKIÉLI 46-48
“Abinirúni le lunbei meha habihini ísüraelina lárigiñe hagiribudun hageiroun”
(Esekiéli 47:1.)
(Esekiéli 47:7-12.)
w99-S 1/3 páh. 10 pár. 11, 12
“Tenibá” tun litenpulun Bungiu
11 Labinirubei meha san Heowá hageira ísüraelina? Dariwati óunabagülei lidan profesía le adügübei lun wasaminarun luagun aban lubuidun sügǘ: Aba duna éibaaguati áwiyuha tídangiñe ténpulu ani aganwoundeina liña eibu lawanserun darí lebelurun lidoun Barana Hilaali. Adügati lun labuinchun hau sun hawuyeri úduraü ani aba lawanserun bísinisi le hámabei óuchahatiña laru duna. Luéigiñe biángubei laru duna ligía, anihein saragu tídibu wewe le ginti sun irumu ani seriwiti lin lun éiginime, ánheinti lubana lun áranime (Esekiéli 47:1-12).
12 Seriwiti meha füramasei le lun haritagun huríu ha asagarúbaña hageiragiñe luagun saragu amu profesía le wéiribei lebegi houn, le ayanuhabei luagu hagiribudayaba lan hageiroun ani chóurugüda lumuti houn lagunfuliruba lan. Adimurehatiña meha lani Heowá profetagu, lóugiñe aban wéiyaasu, luagu ítara luba lan meha lumúan Ísüraeli kei aban paraísu lárigiñeme hagiribudun ísüraelina ñeinhin. Ayanuhóuati meha saragu lidan burí profesía luagu lachülürüba lan dan lun labouchun nadü lidan burí fulasu mageirawati buin ligíame lau ibagari (Isaíasi 35:1, 6, 7; 51:3; Esekiéli 36:35; 37:1-14). Ligía meha gayara lubéi hagurabahan ísüraelina lóunahaba lan Heowá saragu abiniruni le ruti ibagari houn, ítara kei aban duna éibaaguati le áwiyuhabei tídangiñe ténpulu, lunya háhuduragun lun Heowá lárigiñe buga ígira hamaali lan áhuduraguni inarüni. Habinirúba meha ísüraelina hau wügüriña úaraguatiña ani hínsiñehabutiña lun Heowá, wügüriña richaguatiña ani derebugutiña kei tídibu wewe le lárubei duna le lídanbei arufudúni, wügüriñaba meha ítaratiña alidihabei lidan lábunawagunya fulasu le günringuawaalibei. Abürühati meha giñe Isaíasi luagu “tídibu wewe” lánina irichaü leeya lunbei lábunaguni “le günringuawaalibei” luagu saragu dan (Isaíasi 61:3, 4).
(Esekiéli 47:13, 14.)
w99-S 1/3 páh. 10 pár. 10
“Tenibá” tun litenpulun Bungiu
Chóuruti ru lan meha arufudúni le gurasu houn ísüraelina ha asagarúbaña hageiragiñe, lugundun chóurugüda lumuti houn habihiba lan sun iduheñu aban fulasu keisi alagan (konpararualá luma Mikeasi 4:4). Áhuduraguniba meha lun Heowá súdinitima ani lóugiñebei meha furumiñeguarügü amu áhuduraguni. Gabaroun waméi giñe luagu ariha lan Esekiéli lidan arufudúni gürigiaba lan meha íchiga fulasu lun ábuti keisi idewesei lun lawinwandun ñein, ítara kei meha houn fádirigu (Esekiéli 45:16). Arufudati lira, danme lanme meha hagiribudun ísüraelina hageiroun, mosu lanme hídehan hama ha líridubaña Heowá lun hanügüni ubaraü ani gaganbadi hagíame lun hadundehan. Ábanbei meha hénpulu fulasu ligía lidan aransehani, ídehani luma ichouruni.
(Esekiéli 48:9, 10.)
Darí wamá pérüla lánina lichú aau
(Esekiéli 47:1.)
(Esekiéli 47:8.)
(Esekiéli 48:30.)
(Esekiéli 48:32-34.)
w99-S 1/3 páh. 11 pár. 14
“Tenibá” tun litenpulun Bungiu
Lídanrügüñein meha san binadu dan lagunfulira le larihibei Esekiéli lidan arufudúni? Uá, gúnfuliti meha giñe lidan aban igaburi le wéirigutimati. Samina humá luagun le: Siñabei meha tábunawagun ténpulu to larihiboun Esekiéli kei aubei tarufudúa lun. Inarüni súdini lan meha arufudúni le houn huríu darí lun falá hamá fiu lídangiñe katei le arihúbei lidan. Gama lumoun, hanarimeti meha tueirin ténpulu to larihiboun Esekiéli lidan arufudúni le darí lun siñabei lan hamuga gabara tan ligibuagu wübü Moría, fulasu le meha ñein tubéi binadu ténpulu. Ani ténpulu to larihiboun Esekiéli, mama meha uburuguñoun, lídanñoun meha aban fulasu le maweirinti lidise ñéingiñe, ánhounti to tibiaman ténpulu bunawatu uburugu Herusalén lidan fulasu le meha ñein tubéi to furumiñetu (Ésüdürasi 1:1, 2). Lanwoun lira, máwiyuhanti meha duna éibaaguati tídangiñe ténpulu to Herusalénboun. Ligíati, marihin hamuti meha binadu ísüraelina lagunfulirun lani Esekiéli profesía sunsuinagubei, mini lan lira, lachülürüba lan meha dan lun lagunfulirun profesía le lidan aban igaburi wéiritimati lidan luáguti láhudurawagun lun Bungiu.
(Esekiéli 47:6.)
it-1-S páh. 1148 pár. 4
Liráü wügüri
Lidan Abürüdǘni Ebüréu, tídantima liliburun Esekiéli ladarirúa dimurei burí le, ñein lubéi lagúara Bungiu lun profeta le “liráü wügüri” lóugiñe gádürü-wein-diisi wéiyaasu (Ese 2:1, 3, 6, 8). Másiñati wawa lan lun profeta le ítara, lun furangu lan aban lan gürigia ligía ani mítaran lan le ounahóubei íchigei uganu kei Le óunahabalin, Bungiu le Íñugutimabei. Wáwati giñe lun profeta Danieli “liráü wügüri” lidan Danieli 8:17.
18-24 LIDAN NEFU-HATI
ARUFUDAHANI GEBEGITI TÍDANGIÑETI BÍBÜLIA | DANIELI 1-3
“Ruti Heowá afayeiruahaü houn ha arufudubaña úaraguni lun”
(Danieli 3:16-20.)
Úaragua humá lun Larúeihan Bungiu
15 Kei le gaganbadi wabéi lun Heowá, anihein dan harihini wabesinanigu, waduheñu hama wánigu paaná lidan wadagimanu o leskuelarugu luagu amu wamá hawéi ha híbiri (1 Féduru 2:19). Ariñagati Hesusu gayaraabei lan íbini weyereegudun houn fiu gürigia ladüga amu wamá. Gama lumoun, lunti waritaguni ibidiñe lan ni kata luáguti larúeihan Bungiu houn hiibe-agei. Ligía ua lubéi gunfuranda hamani ka lan uagu Larúeihanrügüñein lubéi Bungiu wafalara.
16 Anhein busén wabéi úaragua wamá lun Heowá, mosu wáfaagun lun gaganbadi wamá lun súnwandan meberesenga kaba lan hariñaga o kaba lan hadüga amu woun (Danieli 3:16-18). Háfuga hénrengu lan houn nibureintiña harufuduni amu hamá hawéi ha híbiri. Háfuga hanufude hamá fiu hamahadun habusuragun lun fanidira o lun madan lániña somu fedu lánina ageiraü. Ligía mosu lubéi híderaguniña hagübürigu lun hóuserun lau ganigi leskuelarugu. Ida? Lidan háhuduragun kei iduheñu gayaraati hayanuhan luagu ida liña lan larihini Heowá luáguti fanidira luma amu burí katei líbeina lira. Ani gayaraati giñe harufudahan houn lun hafuranguagüdüni hafiñen lau inebesei (Rómana 1:16). Ani anhein megei hubéi hayanuhan hama máisturugu lun hafuranguagüdüni wafiñen houn, adüga huméi.
(Danieli 3:26-29.)
Ganigi humá, anihein Heowá huma!
13 Lidan sígulu sedü lubaragiñe wadaani, ǘrüwa lubúeingu Heowá ebüréuna ha úaraguatiña ariha hamuti lidan habagari guánarügü luagu biní lumutiña lan Heowá ha afiñerubaña ani ganigi hagía. Aba lóunaagüdün urúei Nabukodonosoru hawagu sun lúrudugu ha Babilóniabaña ani aba líchugun lúrudu houn lun háhuduragun lun aban óunwenbu guáriua lauti golu. Ani ha meha máhabaña háhuduragun hóunweguba lan lidan aban régigi. Aba hariñagun ǘrüwa ebüréuna ha lun urúei lau inebesei: “Wabungiute le unbei wáhuduragua, gayaraati lesefuruniwa lídangiñe watu gemeti le lídanbei régigi, luma lídangiñe sun wuribani le labusenrubei urúei ladügün woun, ani lesefurubadiwa. Gama lumoun íbini hamuga masuseredun lan ítara, subudiléi urúei buidu, luagu máhuduragunbadiwa lan houn lubungiutegu ni tun guáriua lautu golu to ladügagüdüboun” (Dan. 3:16-18). Lidan lubuidun abahüdaguni le lídanbei Danieli 3:19-30 arihúati ida liña lan lesefuruniña Heowá. Háfuga úabaña ariñagutiña woun háguraadiwa lan lidoun aban régigi, le linarün katei, gagibuguatiwa giñe luma burí katei le óuchagubalin úaraguni le warufudubei lun Bungiu. Gama lumoun gayaraati wachoururuni labinirubadiwa lan Heowá luagu afiñeni luma ganigi le warufudubei.
Darí wamá pérüla lánina lichú aau
(Danieli 1:5.)
(Danieli 1:8.)
it-2-S páh. 375
Mesakü
Gayaraati ǘrüwañein lan resun le uágubei hasaminara wiye lan leigin urúei: 1) hóutiña meha babilóniana animaalugu ha uágubaña lariñaga lilurudun Heowá wiye hamá, 2)mama meha súnwandan háwiyuragüdüni hata animaalugu hagía buidu ani anihein meha dan tigirügü hamaniña, 3) ru hamutiña meha gürigia animaalugu hagía keisi adagaragüdüni houn habungiutegu ani ariha hamuti meha heiginiwa animaalugu hagía kei aban fánreinti lánina háhuduragun (Dan 1:8; konpararualá luma 1 Ko 10:18-20, 28).
(Danieli 2:44.)
w12 1/6 páh. 19, rekuáduru
KATEI SAN “SUN LÍBIRI ARÚEIHANI”?
Según lariñagun Danieli 2:44: “Günringuarügü lubéi arúeihani ligía sun líbiri arúeihani sunsuinagubei”. Layanuhaña profesía le luagu arúeihani le ábanbei lídangiñe fánreinti le luágubei óunwenbu guáriua.
Kábati asusereda lun le líbiri arúeihani ubouaguna? Ariñaga lumuti profesía le lídanbei Arufudúni hóundarawaguba lan “sun urúeigu ha ubouagubaña” lun hageindagun kóntüra Heowá lidan “óunwenbu luéyuri Bungiu le Suntigabafu” (Aruf. 16:14; 19:19-21). Mámarügübei burí arúeihani le ábanbei fánreinti lani guáriua le larihubei Danieli agünrinchawagúa, lagünrinchawaguba giñe sun arúeihani le ubouagubei lidan Arümahedón.
w01-S 15/10 páh. 6 pár. 4
Le lunbei ladügǘn lun ñein lan ugundani ubouagu
Dariwati óunabagülei lidan Danieli 2:44: “Lídanme lidaani harúeihan urúeigu ha [ha arúeihabaña lidan lagumuhóun dan le] ladügüba Bungiu le siélubei aban arúeihani le siñabei lagünrinchaguni ni lagumadiruni ni aban néchani, günringuarügü lubéi arúeihani ligía sun le líbiri arúeihani [le hani gürigia] sunsuinagubei, ábame ladurarun lun súnwandan”. Ka uagu mosu lubéi lagünrinchaguni Larúeihan Bungiu arúeihani burí le ubouagubei? Ladüga mígirun hamani gumadimatiña háyeihani igaburi le meha aubei lanabaguei Satanási Bungiu lidan fuluri-agei Edén lau hawinwanduni habagari kei aubei habusenra. Ani lau háyeihani igaburi ligía, mama adügarügütiña lun lásiñarun heresibiruni ha híbiri gürigia le buídutimabei houn, hadügaguña giñe houngua láganiñume Bungiu (Salumu 2:6-12; Arufudúni 16:14, 16). Ligía mosu lubéi wálügüdagun woungua: “Luéigiñeñadiwa san lóubadina larúeihan Bungiu o láganiñu wagía?”.
25 Lidan Nefu-hati darí 1 lidan Diisi-hati
ARUFUDAHANI GEBEGITI TÍDANGIÑETI BÍBÜLIA | DANIELI 4-6
“Heseriwiduña san lun Heowá lau úarani?”
(Danieli 6:7-10.)
w10-S 15/11 páh. 6 pár. 16
Nibureintiña, ígira humá lun tadundehanün Lererun Bungiu
16 Kaba íderaguabu lun gaganbadi ban lun Heowá súnwandan, íbini dan le bábuguarügüñadibu lan? Haritaguabéi gayara lan bírudaguagüdüni Heowá o bagundaaraguagüdünu lanigi lau ligaburi bóuserun (Agu. 6:5, 6; Ari. 27:11). Ariñagatu Bíbülia berese lan bau (1 Fe. 5:7). Busenti Heowá lun gaganbadi ban lun buidu láamuga lidin bun (Isa. 48:17, 18). Wéiriti meha íruni le híchugubei binadu ísüraelina lun Heowá dan le maganbadi habéi lun (Sal. 78:40, 41). Ánheinti profeta Danieli, ruti meha saragu ugundani lun Heowá. Subudi wamuti lira, lugundun dan lóunahanbei Heowá aban ánheli ayanuha luma, wati lun: “Danieli, le hínsiñebei lun Wabungiute” (Dan. 10:11). Ka uagu? Ladüga meha arufuda lan Danieli úaraguni lun Bungiu dandu hagibugiñe amu kei dan le lábuguarügüñein lan (aliiha huméi Danieli 6:10).
w06-S 1/11 páh. 24 pár. 12
Ariha humuti san katei sagüráuti ítara kei larihini Heowá?
12 Ligía maweiridun tubéi wanigi lau wasubudiruni anihein lan saragu katei le sagüráuti lidan habagari kristiánugu dandu anuadirúaaña kei hapanaagu. Wamadagua luma Heowá aban lídangiñe (1 Krónikasi 28:9; Sálumu 36:7). Wéiriti lebegi woun darí lun mígirun wamá lun ñein lan somu katei o gürigia adügüti lun wafanreinragun luéi Wabungiute Heowá (2 Krónikasi 15:2; Santiagu 4:7, 8). Súdiniti giñe furíei lun wakipurun aban lubuidun umadaguaü luma Heowá. Sagüráuti meha furíei lun profeta Danieli darí lun himei lani líchuguni libagari lidan denchaü sügǘ lau lígiruni lubuidun échuni ligía (Danieli 6:7-11). Konparáruati “hafurieidun lumutuniña Bungiu”, kristiánugu anuadirúaaña, luma kupali le meha ayusurúbei lidan áhuduraguni ténpulurugu (Arufudúni 5:8; 8:3, 4; Fádirigu 16:12, 13). Arufuda lumuti hénpulu le sagüráu lan furíei. Ma lubuidun chansi le wámabei lau gayara lan wayanuhan luma Suntigabafu! Ligía sagüráu lubéi furíei lidan wabagari.
(Danieli 6:16.)
(Danieli 6:20.)
w03-S 15/9 páh. 15 pár. 2
Ka uagu lunti lubéi wafurieidun lun Bungiu sagü dan?
2 Ka meha lasaminarubei Heowá luagu Danieli? Dan le larufudagunbei ánheli Gabüriéli lungua lun profeta Danieli dan le lounabúnbei lafurieidun, ariñagati lun: “Wéiriti bínsiñe lun Wabungiute” (Danieli 9:20-23). Ariñagati giñe Heowá lidan profesía le labürüdübei Esekiéli aban lan meha wügüri richaguati Danieli (Esekiéli 14:14, 20). Menefánti ídeha lan meha sun furíei le ladügübei Danieli lidan sun libagari lun weiri lan lubuidun lumadagua luma Lubungiute, íbini meha Daríu ruti fe luagu lira (Danieli 6:16).
(Danieli 6:22, 23.)
w10-S 15/2 páh. 18 pár. 15
Ariñagati sífiri sandu tuma adari: “Higabu”
15 Lárigiñe lásügürün Danieli aban áriebu fúsurugu, aba lidin urúei arihei, ábati lagúaragun lun: “Danieli, lubúein Bungiu le wínwanbei, sefu lumutibu san Bubungiute le unbei beseriwida lau saragu úarani hawéi liñún?”. Lau lóufudagun, aba lóunabuni Danieli: “Gabagari humá urúei lun súnwandan! Óunaha lumuti Nubungiute lani ánheli, aba ladouruni hayuma liñún lun madügün hamá ni murusun damichi nun, ladüga subudi lumuti Nubungiute luagu madurun nan, madügün au ni kata wuribati hun, urúei”. Biní lumuti Heowá Danieli ladüga seriwi lan lun lau úarani (Dan. 6:19-22).
Darí wamá pérüla lánina lichú aau
(Danieli 4:10, 11.)
(Danieli 4:20-22.)
w07-S 1/9 páh. 18 pár. 5
Puntu méiniti tídangiñeti liliburun Danieli
4:10, 11, 20-22. Ka mini lubéi óunwenbu tídibu wewe le larihibei Nabukodonosoru lidan luénedü? Luagu meha Nabukodonosoru keisi lurúeite arúeihani le gabafubei ubouagu ladimurehóua furumiñe dan le ladimurehóunbei luagu tídibu wewe ligía. Gama lumoun, mosu meha luagu lan aban arúeihani le súdinitimati luéi larúeihan Nabukodonosoru ladimurehóua lugundun ariñawagúati chülǘ lan darí lumoun “lidise-agei ubóu”. Keiti ariñawagúa lan lidan Danieli 4:17 gani lan uénedü ligía luma larúeihan “Suntigabafu” hawagu gürigia, chóuruti layanuhóuña lan giñe luagu liricha Heowá lun larúeihan, luágutima sun ubóu. Ligíati, biámañein lagunfulirun uénedü le: le furumiñeti lidan meha larúeihan Nabukodonosoru, leti libiaman lidan liricha Heowá lun larúeihan.
(Danieli 5:17.)
(Danieli 5:29.)
w88-S 1/10 páh. 30 pár. 3-5
Álügüdahani burí le hadügübei aliihatiña
Dan le lanügǘnbei Danieli, le ebüréu ligibugiñoun Bélisasarü, ábaya füramase lan urúei: hadaüraguagüdübei lan Danieli tau daüguaü guchu, daüwa ligíame aban iñari golu luagu ligiina, rua ligíame lǘrüwan ubaraü lun lidan arúeihani. Lau inebesei, aba lóunabun Danieli: “Redei humá lau hidewese, ru huméi giñe uéiriguni lun amu lau lerederun tidan hani palasiu. Lau sun luwuyeri, nariñagaali hun ka lan mini lan dimurei burí le bürüwañubei luagu touba muna” (Danieli 5:17).
Memegeirunti meha Danieli labimehóun ni lafayeirún lun lariñaguni lanichigu dimurei burí ligía lun urúei. Gayaraati meha lerederun urúei lau lidewese o líchuguni lun amu gürigia. Mámaba meha luagu afayeiruahaü lariñagei Danieli lanichigu dimurei burí ligía lun urúei, ladügübei meha ladüga resibihali lan ubafu lúmagiñe Heowá, Bungiu inarüniti le meha málühalibei anügei laguseragüdün luagun Babilónia.
Kei aubei waliihei lidan Danieli 5:29, lárigiñebei lagunfulirun Danieli lau lererun libügürü lariñaguni le mini lubéi dimurei burí ligía, rumemeti urúei gumadi lun libihini Danieli afayeiruahaü le füramase lubéi lun. Mama Danieli adaürübarun daüguaü tuguya luougua ni iñari ligía. Dáüwarügütu luagu ladüga líchugun urúei Bélisasarü gumadi. Gama lumoun, marufudunti lira magunfulirun lani Danieli le ariñawagúbei lidan Danieli 5:17 ñein lubéi lafuranguagüdei profeta mama lan láluahaña buiti lungua.
dp-S páh. 109 pár. 22
Gádürü dimurei le asansirubalin ubóu
22 Ligíati, darí waali meha lóunabagüle dibinasu. Ábürühamemeeli meha uburugu Babilónia, le meha wéiribei lubafu, háhaburugun médiana hama pérüsiana. Íbini meha weiri lan lirun Bélisasarü luagu asiadirúni le, gúnfuli lumuti lererun. Aba ladügün lun hadaüraguagüdüni lubúeingu Danieli tau daüguaü guchu, daüwa ligía aban iñari golu luagu ligiina ani ariñawagúati ligíaali lan laubei lǘrüwan ubaraü lidan arúeihani (Danieli 5:29). Ánhati Danieli lun uéiriguni ligía ladüga meha samina lan arufuda lani uéiriguni le ladünabei Heowá. Másiñati giñe aguraba lan yebe Bélisasarü maweirinbei lan labeichuni Heowá anhein meha íchiga uéiriguni lun Lani profeta. Anhein ítara liña lubéi, tárühali meha.