LEKSIÓUN 7

Yusu humá ariñahani chóuruti

Lúkasi 1:3

LE LUNBEI HADÜGÜNI: Yusu humá ariñahani le gayaraati lafiñerúniwa luagu íderagua humaamugaña gürigia arihei houngua ka lan lirichabei katei.

Áluaha humá ariñahani lidan fulasu le chóuruti. Leelá tariñagubei Lererun Bungiu hafalara dan le hayanuhan ani aliiha humá tídangiñe sagü gayara lan. Anhaün írida somu sügǘ, ñunsu, ariñahani lánina siensia, o amu katei, chouru huméi ligía lan iseritimagilibei ani lídangiñeti lan fulasu le uáguti gayara lan lafiñerúniwa.
Buidulá hayusuruni fulasu le ídanbei háluaha ariñahani. Danme hafuranguagüdün somu bérusu tídangiñeti Bíbülia, gabaroun huméi ka lan uagu layanuhóua, uganu létima súdinibei tidan Bíbülia luma le tariñagubei burí agumeiraguagüdüni to weresibiruboun lúmagiñe “musu úaraguati ani gunfuranda ligía” (Mat. 24:45). Anhaün írida ariñahani le lídangiñeti amu fulasu, inebehabu humá lun le uágubei layanuhóua dan le lariñawagúnbei luma lébuna lariñaguni gürigia le abürüdübalin.

Maweiridaguagüda huméi katei ni númeru. Góunigi humá luéi hasansirun “añahein gürigia” luagu “hiibe-agei gürigia”, “anihein dan” luagu “súnwandan” o “háfuga” luagu “chóuruti”.
Íderagua humaña gürigia asaminara. Lárigiñe haliihan aban bérusu tídangiñe Bíbülia o híriduni ariñahani le hadarirubei, adüga humá álügüdahani lau inebesei houn gürigia o ru humá somu hénpulu houn lun híderaguniña arihei houngua ka lan lirichabei katei.