LEKSIÓUN 12

Arufuda humá ínsiñehabuni luma gudemehabu

1 Tesalónikana 2:7, 8

LE LUNBEI HADÜGÜNI: Ayanuha humá tídangiñe sun hanigi ani arufuda huméi berese humá hau gürigia ha aganbubalün.

Samina humá hawagun gürigia. Lun haranserunu hanigi, ráramagua humá asaminara luagu burí turobuli le úmabei hagagibudagua gürigia ha aganbubalün ani houcha humá gunfuranda humani ida liña lan hasandiragun houngua.
Anúadira huméi lau duari kaba lan dimurei hayusura. Houcha humá híchugun dǘgüdaguaü, gurasu luma iderebugu houn gürigia ha aganbubalün. Mayusura humá dimurei le adügüti lun hagañidun gürigia, mayanuhan huguyame lau iyereehabúni hawagu gürigia ha máhuduragunbaña lun Heowá ni luagu hafiñen.
Arufuda humá berese humá hau gürigia. Gayaraati hibihini lira, lau hayanuhan lau gamadóuni, úaragua ligíame le hariñagubei luma ligaburi harufuduni higibu. Samina humá giñe luagu le gayaraabei larufuduni higibu houn gürigia ha úmabaña hayanuha; gabügürügualá háhayachun hawagun.

Houcha humá lun maganbúniwa lan le hariñagubei kamá hamuga haweiridagüdüñein katei o áfaaguarügü humá lun hariñaguni. Danme haliihan, adüga huméi lidan aban igaburi le adügüti lun larihíniwa ka lan hasandirubei gürigia ha uágubaña haliiha o le lasandirubei gürigia le abürüdübalin dimurei burí ligía ani madüga humá lun hetenirun gürigia hun. Houcha humá hayanuhan lau ínsiñehabuni.