LEKSIÓUN 6

Afuranguagüda huméi bérusu tídangiñeti Bíbülia buidu

Huan 10:33-36

LE LUNBEI HADÜGÜNI: Magufurumada humá láurügü haliihan aban bérusu tídangiñeti Bíbülia lun gürigia ani lárigiñe aba hásügürün lidoun amu puntu. Chouru huméi gunfuranda hamani gürigia ha aganbubalün ka lan lánibei bérusu ligía luma ariñahani le harufudahabei houn.

IDA LUBA HADÜGÜNI?

Íridaya huméi dimurei le súdinibei. Lárigiñe haliihan aban bérusu tídangiñe Bíbülia, íridaya huméi dimurei burí le afuranguagüdübalin ariñahani le habusenrubei harufudahan. O adüga humá aban álügüdahani le gayaraabei líderaguniña gürigia asubudirei ka lan dimurei uágubei hayanuha.

Anhaün írida lídangiñe ariñahani le lídanbei aban bérusu, adüga huméi sun hiyaraati lun gunfuranda hamani gürigia ka lan lánibei bérusu ligía luma puntu le súdinibei.
Águyuguagüda huméi puntu. Anhein hariñaga ka lan uagu haliiha aban bérusu, arufuda huméi lárigiñe ka lan lídangiñe dimurei burí le lídanbei bérusu afuranguagüdübalin.

Ígira humá lun harihini gürigia bérusu sun aünha lan afuranguagüdei houn. Ítara, gayaraabei harihini ka lan lánibei le hariñagubei luma le lariñagubei bérusu.
Afuranguagüda huméi bérusu lidan aban igaburi le ménrengunti gunfurandawa lan. Mírida humá ni kata le múaranti luma ariñahani le hakutihabei. Akutiha huméi átiriñein lan ariñahani hemegeirun gürigia ha aganbubalün lun gunfuranda hamani le habusenrubei hafuranguagüdün houn ani gabaroun huméi le subudi hamaalibei.