IDA LIÑA WAYUSURUNI BUDAGIA?
Ábunaguni le agumuchubei lubaragiñe laburuchagun sandi COVID-19
1 LIDAN UNSU-HATI, IRUMU 2020
Sagü irumu habadiseirun saragu milu gürigia. Ligía eibu lubéi dan wemegeirun muna lun wáhuduragun lun Heowá. Ligía ladügünbei Departamentu lánina Adibuhani luma Tábunawagun Muna aransehani lun tadügǘn o taranserawagun tóugiñe 2,700 muna lun láhudurawagun lun Heowá lidan irumu lánina eseriwiduni 2020.a
Híruti ebereseha laali lan laburuchagun sandi COVID-19 lagunfulirun aransehani le. Lun gayara lan hounigirúniwa íbirigu, gúnfuliwa ligía lau lilurudun ageiraü, adügaali Sétanu le Arihibei tau Agumeiraguagüdüni lun lararamun liibe-agei dasi le. Íbini ítara, lidan irumu lánina eseriwiduni 2020, aransewatu ani adügǘwa tuguya 1,700 luban áhudurawaguni lubaragiñeraü laburuchagun sandi COVID-19. Lanwoun lira, gumuati lóugiñe 100 wadagimanu lánina ábunaguni le súdiniti tidan burí Beteli. Ariha wamá biama lídangiñe dasi le ani ariha waméi ka lan buiti lanügübei houn íbirigu.
Beteli to Kamerúnboun. Ñǘraütu meha binadu Beteli to lídanboun uburugu Duala ani gíbeti meha lunti laransehóun tuagu. Aba hasaminarun lílana Sétanu le Arihibei tau Agumeiraguagüdüni lun taranserawagun Beteli tuguya, gama lumoun ariha hamuti sérutimabei lan taranserawagun sügǘ lau tebegi guánarügü. Saminatiña giñe gayara lan tábunawagun aban lidan amu fulasu o tagañeihóun amu muna, ábameti taranserawagun. Úati ni aban lídangiñe katei le gayaraati ladügǘn.
Aba híchugun íbirigu fe luagu hadügaa lan gumadimatiña aban üma nórute libiti Duala, yarafa tun aban Muna luntu Adamurini. Lau iseri üma le, ménrengunhaalime lachülürǘniwa tidoun Beteli luma libihíniwa katei kéiburi duna, leiti o katei líbeina lira. Ligía meha temegeirubei Beteli. Aba lubeiti líchugun Musu Úaraguati üma lun tadügǘn aban iseri Beteli lidan fulasu le ñein tubéi Muna luntu Adamurini.
Íbirigu ábunaguoun iseri Beteli to Kamerúnboun.
Lun gayara lan ladügǘn lídangiñe dasi le, adügatiña íbirigu daradu tuma aban kónpeni to lánina bunaguaü, adügati le lun mibe lan dan lanügün ábunaguni ani ígiraguati seinsu. Le linarün katei, ǘnabutimati ebegi le afayeirúbei sügǘ lau le yebe agurabúbei: ígiraguati lóugiñe biama míñunu dólarü. Aba gayaraahali lan háguyun tílana Beteli murusun dan lubaragiñe laburuchagun sandi COVID-19.
Gumuti tadügǘn iseri Beteli to Kamerúnboun lubaragiñe laburuchagun sandi COVID-19.
Guentó, buídutimahali fulasu le ídanbei hawinwanda luma hawadigimarida íbirigu ha eseriwidubaña Betelirugu ageiraü Kamerún, ani ariha hamutu Beteli to kei aban idewesei lúmagiñeti Heowá. Ariñagatiña aban feru maríeitiña: “Busentimaahadiwa wawadigimaridun, arufuda wamaamugei gebegi lan idewesei le woun”.
Íbirigu ábunagua iseri burí áfisi tidan Beteli lubaragiñe laburuchagun sandi COVID-19.
Áfisi lánina ásügüragüdüni lidoun iñeñein tojolabal (Méhiku). Luagu saragu dan, tidan meha Beteli to Lamidanboun Meriga, yarafa lun uburugu Méhiku, hawadigimarida íbirigu ha ásügüragüdübaña lidoun iñeñein tojolabal. Gama lumoun, lídantima fulasu le gíribei Altamirano luma las Margaritas layanuhóua tojolabal, aban fulasu le dísebei tuéi Beteli kéiburi 1,000 kilometuru (620 maili). Adügati meha lira lun hénrengu lan houn ásügüragüdütiña hasubudiruni iseri ligaburi layanuhóun iñeñein le. Ani hénrenguti meha houn tílana Beteli hadarirun íbirigu ha awinwandutiña yarafa, lun hídehan lidan ásügüragüdüni luma lidan gürawárua lan ariñahani.
Íbirigu ábunagua iseri burí áfisi lánina ásügüragüdüni.
Adügati katei le lun lanúadirun Sétanu le Arihibei lau Labürühóun Ariñahani lun háguyun íbirigu ha lidoun fulasu le ñein lubéi layanuhóua tojolabal. Lun lira, agañeihatu Beteli aban muna ani aba haranserunu. Sérutimabei hamuga lun adügǘwarügü tan o áhayaharügü hamá somu áfisi.
Abahüdaha lumuti aban ásügüragüdüti woun ida liña lan lasandiragun lungua: “Lidan 10 irumu le naubei Betelirugu, madaritina ni aban iduheñu ha ayanuhati niñeñe. Guentó, lamidanguañoun fulasu le ídanbei ladimurehóua tojolabal wani áfisi. Sagü weyu, gayaraati nayanuhan hama gürigia ha ayanuhabalin iñeñein le. Adügaali le lun nafurendeirun amu burí dimurei, ani íderagua lumutina le lidan nuadigimari”.
Áfisi lánina ásügüragüdüni lidoun iñeñein tojolabal lubaragiñe luma lárigiñe taransehóun.
Dasi burí lubá irumu lánina eseriwiduni 2021
Lidan irumu lánina eseriwiduni 2021, anhein ñein chansi, busentiwa wawadigimaridun tuagu 75 áfisi lánina ásügüragüdüni luma tuagu muna burí to ñein lubéi tadügǘwa Leskuela tídangiñetu Bíbülia houn kristiánugu. Lasigiruba giñe wadagimanu tuagu 8 Beteli, anihein wadagimanu le lunbei ladügǘniwa Rámapo (Newayóru) laganagua, sánsiwa ligíame tubara Beteli to Árühentinaboun luma Italia. Lanwoun lira, mégeiwatu tóugiñe 1,000 Luban Adamuridaguni to iseri. Luéigiñe amu oubaü, anuhein tóugiñe 6,000 Luban Adamuridaguni to mégeiboun lun tadügǘniwa teweñegua tuma 4,000 to mégeiboun lun taransehóun.
Halíagiñe lasagarúa seinsu lun ladügǘniwa sun wadagimanu le? Óunaba lumuti íbiri Lázaro González, lílana Sétanu le Arihibei tau Sukursáli to lamidanboun Meriga álügüdahani le. Dan le layanuhanbei luagu wadagimanu le adügǘbei tuagu áfisi lánina ásügüragüdüni lidoun iñeñein tojolabal, ariñagati: “Míbeti haseinsun íbirigu ha awinwandubaña lidan burí fulasu le aubei tariha Beteli to Lamidanboun Meriga. Lun hamuga mibihin wamani hídehan íbirigu ha lídangiñetiña sun ubóu, siñabei hamuga tadügǘn áfisi lánina ásügüragüdüni houn wíbirigu ha ayanuhabaña amu iñeñein. Seremei lun hani budagia, gayara lubéi hounahóun ásügüragüdütiña yarafa lun fulasu le ñein lubéi layanuhóua hererun. Seremei wamutiña sun íbirigu luagu híchigadi”. Ariha humuti san? Sun wadagimanu lánina ábunaguni le, adügǘwati seremei lun burí budagia le híchugubei lun lawanserun wadagimanu lánina apurichihani lidan sun ubóu. Saragu lídangiñe rúati luéigiñe donate.jw.org.
a Departamentu lánina Adibuhani luma Tábunawagun Muna etenirubaña lun burí tadügǘn Luban Adamuridaguni lidan burí fulasu le aubei tariha kada Beteli. Ánheinti Departamentu le Arihibei lau Adibuhani luma Tábunawagun Muna lidan Sun Ubóu, ligía anúadirubalin kátima lan wadagimanu mégeiwabei lau lóufudagun luma ida luba lan ladügǘn.