Lubuidun burí dasi le magurabun wamuti luma burí katei buiti le wafurendeirubei lidan weseriwidun lun Heowá

Aba háguyun nagübürigu Esütóniagiñe lidan meha lidaani Libiaman Wuribu Wéiriti ani aba houdin awinwanda Yámani, fulasu le ñein lubéi nágurahoua. Lárigiñe, aba hagumeserun aransera lun wáguyun Kanadáun. Yarafati meha furumiñeti fulasu le ñein lubéi wawinwanda lun Ottawa. Wawinwanduña meha lidan aban liraüraü fulasu le ñein lubéi hagüriahóun gayu. Gudemetiwa meha, le buídubei, anuhein lan meha gañé wábiñe lun watun bachati.

Luagu aban weyu, aba haliihani gefentiña luagu Heowá le lariñagubei Arufudúni 21:3, 4 tun núguchu. Le tafurendeirunbei, hingí lumutu tanigi darí lun tagumeserun ayahuaha. Aba láhüchün inarüni tidan hanigi nagübürigu, ani murusun dan lárigiñe, aba labadiseirun núguchi tuma núguchu.

Íbini mayanuhan hamani meha nagübürigu inglesi buidu buidu, winwan hamuti inarüni le tídanbei Bíbülia. Íbini nadagimein lan meha núguchi sun áriebu tidan aban kónpeni le ñein lubéi lawadigimarídawa níkeli uburugu Sudbury (Ontario), sagü meha samudi lanügüniwa apurichiha au tuma Sylvia to nitu. Ani sagü meha dimaasu wóundaragun keisi iduheñu lun waturiahanu garüdia La Atalaya úara. Íderagua hamutina meha nagübürigu lun nasandirun aban óunwenbu ínsiñeni luagu Bungiu ani adügati lira lun nederegeragun nungua lun Heowá lidan irumu 1956, dan le meha 10 lubéi irumu nau. Óunwenbu ínsiñeni le meha hasandirubei nagübürigu luagu Heowá, ligía ínchahabalina lun nasigirun eseriwida lun Heowá lidan sun nibagari.

Lárigiñebei nagumuchuni naturiahan, aba meha maweirinhaali lan netenirun lun numadagua luma Heowá. Saminatina meha ánhana lan eseriwida kei prekursoru, maseinsunbadina lan meha lun naweiyasuhan tidan aban awión lun nagunfuliruni le nayumahabei lun nasubudirun saragu fulasu ubouagu. Gumesetina meha awadigimarida tidan radiu íchaaha uremu, ani hínsiñeti meha wadagimanu ligía nun. Kei méhati guñoun lubéi meha nawadigimarida, móudintina meha adamuridagua; ani sügütina meha saragu dan hama gürigia ha mínsiñebei Heowá houn. Dan lárigiñe, adügati le nafurendeirubei tídangiñeti Bíbülia lun nadügün asansiruni lidan nibagari.

Aba náguyun uburugun Oshawa, Ontario. Ñein nasubudirei Ray Norman tuma Lesli to litu hama amu prekursorugu. Súngubei hagía beresetiña meha nau saragu. Lau narihini ugundani le hasandirubei, adügati lun nasansiruni le nabusenrubei nadügün lidan neseriwidun lun Heowá. Ínchaha hamutina lun neseriwidun kei prekursoru. Ani ligía nadügübei, gumesetina lidan nefu-hati, irumu 1966. Gúndaatina meha ani buiti meha lidin nun lidan nibagari. Gama lumoun, anite meha katei magurabúnti le lunbei meha lasansiruni nibagari.

ÁNHABU LAGUNBIRAHA HEOWÁ ADÜGA SOMU KATEI, HOUCHABÁ BADÜGÜNI

Dan meha le anahagua lubéi aturiaha, aba nabuinchagüdün gárada lun neseriwidun Betelirugu Toronto (Kanadá). Ani dan lárigiñe, dan le meha neseriwiduña lubéi kei prekursoru, aba nagunbirahoun lun neseriwidun Betelirugu luagu gádürü irumu. Gama lumoun, hínsiñetu meha Lesli nun saragu, ani hanufudetina meha marihin naaru lanme ánhana ánhara lun agunbirahani le. Lárigiñe nafurieidun saragu, aba nánharun lun agunbirahani lun neseriwidun Betelirugu, aba nayouragun tun Lesli lau saragu íruni.

Nadagimeintina meha Betelirugu le ñein lubéi tachibawagúa gamisa ani lárigiñe kei seküretáriu. Ánhounti Leslie, aba tiridúniwa lun teseriwidun kei prekursora espechalitu uburugu Gatineau (Kebekü). Saminatina meha saragu wéiyaasu luagu ka lan funa tadaagubei ani álügüdaguatina meha nungua anhein buidu lubéi le nanúadirubei. Ani dan lárigiñe, aba lasuseredun aban katei buiti lidan nibagari le magurabun numuti: aba meha lagunbirahoun Ray le tati Lesli eseriwida Betelirugu, ani nupaaná meha lidan rumu. Ítara liña gamadaguaya nan tuma Lesli. Aba wamarieidun 27 lidan bián-hati, irumu 1971, lagumuhóun weyu le naubei eseriwida Betelirugu lárigiñe gádürü irumu.

Aba wounahóun eseriwida lidan meha aban damuriguaü le ñein lubéi layanuhóua faransu lóubawagu Kebekü. Ani dan lárigiñe, aba hagunbirahanina eseriwida kei óunigiruti sirkuitu. Wein-widü meha irumu nau dan ligía, ani sanditina meha nibureingidina lan ani maranserungidina lan. Gama lumoun, íderagua lumutina dimurei le lídanbei Heremíasi 1:7, 8 saragu. Íbini ítara, nidiheritina meha luagu ida luba lan lidin woun lidan sirkuitu, lugundun gíbeeli meha danaguaü tasufurirun Lesli ani gaturobulintu meha lun tarumugun. Gama lumoun, aba tariñagu Lesli nun: “Anhein lagunbirahañadiwa lubéi Heowá adüga somu katei, ma lunti wouchun wadügüni?”. Lagumuhóun, aba wánharun lun dasi le ani barütiwa 17 irumu eseriwida lidan sirkuitu.

Wéiriti meha nuberesegun lidan sirkuitu darí lun madaani nan lun násügürün dan tuma Lesli. Mosu meha nafurendeirun aban katei súdiniti. Aban weyu leindi binaafin, aba laguahóun woun luagu wabenari. Dan le nadararunbalin bena, úati ni aban gürigia ñein, ábanrügüñein faniñe ñein tau aban saruwedu, furuda, furumasu, fein, aban budéin diwéin, kopa tuma aban gárada le ñein lubéi lariñaga: “Barüboun bani weiriou asariñaha”. Ma meha lubachouga, ma meha lubuidun ladurangun Weyu weyu ligía. Lau sun lira, mosu meha naranserun fiu yanu ani aba nariñagun tun Lesli siñabei lan nidin. Lau sun gunfuranda tánina, aba tírudun. Dan le nagumeserúnbei awadigimarida, aba nasandiragun nungua wuriba ladüga manügün nanu Lesli asariñaha. Ábati naritaguni le lariñagubei Éfesuna 5:25, 28. Aba nálügüdagun nungua: Laritaguagüdüñadina san Heowá mosu lan gabaroun nani le temegeirubei luma le tasandirubei nani weiriou? Ábati nadügün aban furíei, ani lárigiñe, aba nariñagun tun Lesli: “Keimoun”. Ábati tagundaarun saragu. Ñǘdüntiwa tidan karü lidoun aban fulasu buiti lurugabu aban duna, aba wátuleragunu saruwedu... ani ñein wásügüra aban lubuidun weyu úara. Ani gadaanimemetina lun naranseruni yanu!

Gíbeti meha sirkuitu le wabisidahabei, lúmagiñe Kolumbia Británica darí Terranova, ani gúndaatiwa lau dasi le. Lagunfuliruña meha le nayumahabei, naweiyasuhan! Anihein meha dan samina nan nidin tidan Leskuela Galaadü, gama lumoun, úati meha tidan nanigi misionéru nan lidan amu ageiraü. Saminatina meha aban hamá gürigia espechalitiña íbirigu ha eseriwidubaña kei misionéru, ani masanditina meha buidu nan lun neseriwidun kei misionéru. Lanwoun lira, hanufudetina meha luéi hóunahanina eseriwida Áfürika lidoun aban ageiraü le ñein lubéi saragu sandi luma wuribu. Gúndaatina meha lidan fulasu le ñein lubéi neseriwida.

AGUNBIRAGÜLEI SÓDINITI LUN NESERIWIDUN ESÜTÓNIA LUMA LIDAN AMU BURÍ AGEIRAÜ BÁLTIKU

Lidan irumu 1992, aba gayaraayaali lan lapurichihóun lidan fiu ageiraü le meha lani binadu Unión Sowiétika. Ligíati, aba hálügüdüniwa anhein aranseñuwaña lubéi lun wáguyun Esütónioun eseriwida kei misionérugu. Kei sódini lubéi liabin dasi le, aba wafurieidun lun Heowá. Ábaya wasaminarun: “Anhein lagunbirahañadiwa lubéi Heowá adüga somu katei, ma lunti wouchun wadügüni?”. Ábati wánharun lun agunbirahani le, ani haritagua nágili aba lan nasaminarun: “Le buídubei mounahóunbadiwa lan Áfürikoun”.

Lau lóufudagun, aba wagumeserun afurendeirei hañeñe esütóniana. Fiu hati lárigiñe wachülürün ñeinhin, aba hagunbirahaniwa lun weseriwidun kei óunigirutiña sirkuitu. Mosu meha wabisidahan 46 damuriguaü luma saragu sétanu le lídanbei ǘrüwa ageiraü báltiku luma Kaliningrado (Rusia). Ligíati, mosu meha wafurendeirun murusun letón, lituano luma rusu. Hénrenguti meha woun. Íbini ítara, teinki hamutiwa íbirigu luagu áfaaguni le wadügübei ani íderagua hamutiwa saragu. Lidan irumu 1999, aba tadararun aban iseri sukursáli Esütónia ani iridúatina úara luma Toomas Edur, Lembit Reile luma Tommi Kauko kei lílana Sétanu le Arihibei tau Sukursáli.

Subuditiña meha saragu Gefentiña ha meha anügǘbaña Siberioun woun. Íbini súfuri hamá saragu furisunrugu ani díseñu meha hawéi haduheñu, magañiduntiña. Súnwandan hakipuruni hagundan luma ubebeni lidan ministeriu. Arufudahati sügǘ burí le woun gayara lan wawandun luma lun gunda wamá íbini laganagua lénrengunga.

Sügüti burí saragu irumu ani memeraaguntiwa, ábati tagumeserun Lesli asandira aban lanarime lubucha uagu. Lidan dan ligía, míchutiwa fe aban lan sandi le gíribei fibromialgia adügübei lun labuchadun tuagu Lesli saragu. Ligía aba lubéi wagumeserun asaminara buídubei lan lun wagiribudun Kanadáun. Ligíati, dan le hagunbirahanbaliwa lun woudin uburugu Patterson (Newayóru) lun larufudahóun woun tidan Leskuela houn Lílana Sétanu ha Arihubaña tau Sukursáli, saminatina yebe, siñabei lan woudin. Gama lumoun, lárigiñe wafurieidun saragu, aba wánharun lun agunbirahani le. Ani biní lumuti Heowá le wanúadirubei. Dan le tidan wabéi leskuela to, ligía teresibiruni Lesli agaranihani le temegeirubei. Adügati katei le lun wagiribudun lidoun wadasin.

ÁBAYA DASI LE MAGURABÚNTI: WESERIWIDUN LIDAN AMU BURÍ AGEIRAÜ

Aban guñoun lidan irumu 2008, dan le wagiribudunbei Esütónioun, aba laguarún woun tídangiñe Beteli to ñéingiñe lubéi Larihúa lau Arufudahani lidan sun Ubóu, álügüdawa anhein wánharuba lubéi lun aban iseri dasi Republika Demokrátiku lani Kongo. Aba taweiridun nanigi ladügatima hariñagun woun hagurabubei lan wóunabagüle larugan. Mariñaguntina ni kata tun Lesli guñoun ligía, lun gayara lan tarumugun darangilañu. Gama lumoun aba lagidarun lidabu nagu ani aba nerederun ayanuha luma Heowá libügürü le adiheridagüdübalina ánhana ñüdün Áfürika.

Larugan binaafin, dan le nariñagunbalin tun Lesli, aba wariñagun: “Lagunbirahabadiwa Heowá lun woudin Áfürika. Ida liña san wasubudiruni siñabei lan wadügüni ani gúndaabadiwa lan lidan wadasin anhein mouchun wamagili lubéi?”. Ligíati, lárigiñe 16 irumu wau Esütónia, aba waweiyasuhan Kinshasoun, uburugu le súdinibei lani ageiraü. Anihein meha aban lubuidun fuluri-agei tidan sukursáli ani darangilati meha lasandiragun gürigia lungua ñein. Aban lídangiñe furumiñeti katei le tadügübei Lesli, tafidirun lidan warumun aban tárüheta to túmaboun areidañu lúmagiñe wáfuridun Kanadáagiñe. Bürüwañu liña dimurei le tidan tárüheta tuguya: “Gundaabá le ñein bumuti”. Lau wasubudiruniña íbirigu, wíchugun aturiahani tídangiñeti Bíbülia luma wasandiruni ugundani le lanügübei weseriwidun kei misionérugu, aba wíchugun fe gayara lan wagundaarun lidan weseriwidun lun Heowá. Ani lau lásügürün dan, rúati lubuidun chansi woun lun woudin abisidahahoun Beteli burí to lídanboun 13 amu ageiraü lóubawagu Áfürika. Adügati lira lun warihini ámuñegueinarügü lubuidun burí katei le burí lídanbei aüdü. Anufudei le meha nasandirubei luagu aban dan, aba lidin nuéi, ani rútiwa seremei lun Heowá ladüga lóunahaniwa eseriwida Áfürika.

Lidan ageiraü Kongo, rútiña meha animaalugu ñǘbüritiña woun lun weigin ani saminatiwa yebe maweiyasunbadiwa lan éigaña. Gama lumoun, dan warihini weiri lan línsiñe houn wábirigu héiginiña, aba wóuchuni ani maribanti, ani masakürihantiwa.

Gachansintiwa meha wanügün ídemuei tuma agumeiraguagüdüni houn íbirigu ha erederubaña lidan burí fulasu le ñéingiñe lubéi laboucha weyu libiti Kongo le ñein habéi súdara wuribatiña ha ábürühabaña hawagun lílana burí aüdü ani adügatiña wuribani dandu houn würiña kei houn irahüñü. Hiibe-agei íbirigu, míbeti hámati. Wéirigüda lumutu wanigi warihini lueirin hemenigi luagu águyuguni, ínsiñeni le hasandirubei luagu Heowá luma úaraguni le harufudubei tun lóundarun. Adügati lubuidun hénpulu le harufudubei íbirigu ha lun wasaminarun saragu luagu inarüni burí le wachoururubei ani adügati lun derebugu lan wafiñen. Añahein fiu íbirigu féridi hamutu haban luma hachari. Adügati le lun nasaminarun saragu luagu ni kata lan umegeguni ani létima gebegibei wamadagua luma Heowá. Íbini sügǘ hamá íbirigu ha lídangiñe lénrengunga, meredetiña ekehara saragu. Ínchaha lumutiwa lubuidun igaburi le harufudubei lun wagagibudagun lau ganigi luma lénrengunga le wásügürübei ladüga wasandi.

ABAN ISERI DASI: ASIA

Sódini, ábaya weresibirun ábanya iseri dasi le magurabun wabéi. Aba hamuriahan wama lun wáguyun tidoun sukursáli to Hong Kongboun. Masaminarungubeitiwa yebe wawinwandun Hong Kong. Kei íderagualaadiwa lan Heowá lau ínsiñeni lidan saragu dasi le ibiha wamaalibei, ligía meha chouru wabalin líderagubadiwa lan lidan iseri wadasin. Lidan irumu 2013, lau águiraü wágurugu, aba wayouragua houn wamadagu ha hínsiñebaña woun luma lun lubuidun katei le Áfürikabei, ibidiñega woun ka lan agurabubadiwa Hong Kong.

Aba wáguyun uburugun Hong Kong, aban uburugu le réingati ñein ani le ñein habéi gürigia ha lílana sun ubóu, hénrenguti meha woun wafurendeiruni iñeñe cheiní kántonesi. Gama lumoun, buiti heresibiruniwa íbirigu, hínsiñeti giñe éigini le ñeinbei woun. Fureseti hagibedagun íbirigu lidan ageiraü le, ani kei seru lubéi fulasu ñein, aba lanúadirun Musu Úaraguati lun hasansiruni túbara sukursáli luma lun haluguruni saragu katei le hámabei. Murusun dan lárigiñe, lidan irumu 2015, aba wáguyun lidoun ageiraü Koréa le Súrubei, le ñein lubéi weseriwida darí guentó. Aban katei hénrenguti lafurendeirúniwa iñeñein le yaabei. Gama lumoun, gúndaatiwa warihini furendeihadiwa lan murusunraü, íbini aniheingua lan saragu lunti wafurendeiruni ariñagatiña íbirigu woun labuiduruña lan wayanuhani hererun koreánu.

LE FURENDEI WAMAALIBEI

Mama súnwandan ménrengun lan hadügǘn iseri umadagu. Gama lumoun, rútiwa fe ánhawa lan ádarei furumiñeti pasu ani resibi wamañame amu wábiñe, manügünbadiwa saragu dan lun wasubudiruniña ha híbiri. Arihaadiwa genegegua lan hagaburi sun íbirigu ani adüga lumutiwa Heowá lidan aban igaburi le buiti, le gayaraabei ladügün lun wadaarunu wanigi lun wadügün iseri umadagu luma lun wasandirun ínsiñeni hawagu súngubei (2 Ko. 6:11).

Furendeihadiwa mégeiwa lan lun warihiniña gürigia kei larihiniña Heowá ani áluaha wamá warihini katei le arufudubei hínsiñe wamá lun ani adundehalawa lidan wabagari. Súnwandan dan le lábürühan warüna o dan le wálügüdagun woungua anhein buidu lubéi wéiguadun houn amu, aba meha wakutihanu tárüheta o gárada lánina dǘgüdaguaü to hóunahaboun burí wamadagu woun. Ariha wamaali furangu óunaba lani Heowá wafurieidun ani ru lumuti gurasu luma erei le meha wemegeirubei lidan dan ligía.

Lau burí lásügürün irumu, rútina fe au tuma Lesli íbini lan weiri lan waberesegun, súdiniti lun wadireirun dan lun wásügürüni úara. Arihatiwa giñe buidu lan lun wéherahan lau burí charati le wadügübei dántima le wáfaaguña lan lun wafurendeirun amu iñeñein. Ani sagü guñoun wasaminarun luagu katei le hínsiñebei woun saragu ani rútiwa seremei lun Heowá luagu.

Le linarün katei, masaminaruntina yebe neseriwiduba lan kei misionéru ni nawinwanduba lan lidan amu burí ageiraü. Gama lumoun, ariha naali lau lan lídehan Heowá gayara lan ladügǘniwa sun katei, ani adügati lira lun nagundaarun saragu. Saminatina ítara kei lasaminarun profeta Heremíasi, dan le lariñagunbei: “Aba badaürünina lidan bererun” (Her. 20:7). Ítara liña, rúhali Heowá saragu dasi buíduburiti woun luma abiniruni le magurabun wamuti. Adügaali lun lagunfulirun le nayumahabei, naweiyasuhan tidan awión! Gíbetimahali fulasu le ídounbei aweiyasuhaadina lan tidan awión sügǘ lau le meha uágubei gayara lan nasaminarun dan meha ñǘraügidina. Ñǘdünhadiwa giñe abisidahoun ámuñegueinarügü burí sukursáli to lídanboun ámuñegueinarügü ageiraü ubouagu. Ani mosu neteingirunu Lesli saragu, ladüga íderagua tumutina lidan burí dasi le ani arufudatu aban lubuidun igaburi.

Súnwandan waritaguni ka lan un wadügei dasi le ani ka lan uagu. Abiniruni le weresibirubei uguñe weyu, ábanrügüñein liyawadina ibagari magumuchaditi danme le látuleruni Heowá lúhabu lun líchuguni lau lugundan le hemegeirubei gürigia houn (Sal. 145:16).