BUIN LIÑA UBÓU LAU TUROBULI

2 | Góunigi huméi hiseinsun

KA UAGU LUNTI LUBÉI HADÜGÜNI?

Sagü weyu, áfaaguatiña saragu míñunu gürigia lun habihini létima hemegeirubei. Ani adügati turobuli burí le ubouagubei lúntima hénrengu lan katei. Ka uagu?

Dan le anihein lan likesinga lidan aban fulasu, adügati lira lun leserudun éigini tuma muna.
Adügati giñe lun ua lan wadagimanu luma lun lalouguadun hafayeirún gürigia.
Gayaraati ladügün herigini, hárabaganali o katei líbeina lira lun tagünrinchagun burí muna, bísinisi o amu umegeguni. Gayaraati ladügün le lun héiguadun saragu gürigia lidoun gudemei.

Subuditi san hun?

Anhaün ahandilihei hiseinsun lau lichú aau, aranseñu huba lubá lidere dan.
Gayaraati lalouguadun lebegi huádigimari, seinsu le húmabei areidañu luma burí amu katei le húmabei.
Anihein burí katei le siñabei hagañeihani lau seinsu, kéiburi ugundani luma úarani hadan iduheñu.

Ka gayaraabei hadügüni?

Ariñagatu Lererun Bungiu: “Anhein geigin wabéi, gadaüragun, lunti gufuruma wamá lau lira” (1 Timotéu 6:8).

Úati mini lan gufuruma wamá anihein lan sun le wabusenrubei wama, le mini lubéi gunda wamá lau anihein lan sun le wemegeirubei wama. Buiti lun waritaguni katei le, dántima le mibe lan wámati.

Háfuga mosu lan hadügün somu asansiruni lidan ligaburi hawinwandun lun gunda humá lau húmati. Anhein gasta hubéi lóugiñe le hagañeirubei, lanügüba lira turobuli hun.

LE GAYARAABEI HADÜGÜNI: Adundehani burí le huuti

Lun hóunigiruni hiseinsun laganagua lénrengunga, falá huméi adundehani burí le

RARIGÜDA HUMÁ LÍDANGIÑE HIGASTUN

Rarigüda humá lídangiñe higastun

Magastara huméi hiseinsun lidan katei le memegeirun humuti. Álügüdagua humá hungua: “Le san lúgubu megei nan aban karü? Gayaraati san nábunagun aban nichari lun mibe lan seinsu nagastarun luagu éigini?”.
Lubaragiñe hagañeihan aban katei álügüdagua humá hungua: “Le san lúgubu megei nani? Gayaraati san nafayeiruni?”.
Anhein gayara lubéi ladügǘniwa lira hageira, buíngüda humá gárada lun híderagunün gumadimatiña o amu óundaruni.

“Aba wayanuhan hama waduheñu luagu ligaburi wanügüni wabagari, ábati magastarunhadiwa lan saragu lidan isebáhari. Aba wagumeserun ábougua éigini le maserunti lubuñe” (Gift).

BÜRǗ HUMÉI IDA LUBA LAN HAYUSURUNI HISEINSUN

Bürǘ huméi ida luba lan hayusuruni hiseinsun

Ariñagatu Lererun Bungiu: “Aransehani le saminawati buidu, buiti lasalirun, anhein le adügǘbei lau furesei, barüti günringuaü” (Ariñawagúni 21:5). Líderagubadün habürüdüni ka lan idan hagastarei hiseinsun lun magastarun humá lóugiñe le hagañeirubei.

Furumiñe, bürǘ huméi átiribei lan seinsu hagañeirun hati le.
Lárigiñe, bürǘ huméi le lunbei hafayeiruni ariha humaamugei ka lan idan hagastarei hiseinsun.
Lárigiñe, ariha huméi átiriñein lan hagañeirun lumoun le hagastarubei. Ani anhein gasta hubéi lóugiñe le hagañeirubei, adüga huméi asansiruni le mégeiwabei.

“Sagü hati adügatiwa aban lísüta lau le wagañeirubei luma le wagastarubei. Hóuchatiwa wareidahan wabarua luéidügü lasuseredun somu katei sódiniti. Ítarati madiheriduntiwa saragu ladüga subudi wamani anihein lan wama luéidügü wemegeiruni” (Carlos).

MADUEIHA HUMÁ ANI AREIDAHA HUMÁ

Madueiha humá ani areidaha humá

Adüga humá aransehani lun hafayeiruni hadúeihan ani anhein gayara, mádaragua humá hungua lidoun dúeiti. Buítimabei lun hareidahan lun hagañeihani le hemegeirubei.
Areidaha humá murusun lídangiñe hiseinsun kada hati lun hagañeihan somu katei le hemegeirubei o luéidügü lasuseredun somu katei le magurabúnti.

BENEFA HUMÁ LIDAN HUÁDIGIMARI

Ariñagatu Lererun Bungiu: “Sagawati katei buiti lídangiñe sun áfaaguni” (Ariñawagúni 14:23).

Benefa humá lidan huádigimari

Ariha huméi buiti le líchugubei huádigimari. Lau sun mama lan aban wadagimanu le wéiriti línsiñe hun, ñéingiñe hagañeirei hibagari.
Benefa humá ani óusera humá lau arumani. Líderagubadün lira lun hakipuruni huádigimari ani anhein heferidira, ménrenguntimabei hun lun hadarirun amu.

“Ánhatina lun furumiñeguarügü wadagimanu íbini mínsiñe lan nun o mafayeirun hamani le nabusenrubei nun. Áfaaguatina lun nadügün aban wadagimanu le buiti, kamá hamuga núniwagua nadügei” (Dimitri).

Háluahaña san wadagimanu?

Chubalugu humá. Wa humá tidoun burí bísinisi to ídanboun gayara lan hadarirun wadagimanu, íbini míchugiña lan awisahani luagu megei hamá nadagimeintiña. Ariñaga huméi houn hiduheñu luma houn humadagu háluahaña lan wadagimanu.
Aranseñu humá lun hánharun lun ámuñegueinarügü wadagimanu. Másiñati madari hubéi lan wadagimanu le agunfulirubei lau sun le hayumahabei.