“Habungiute wínwangiña”

Gabafuti san Bungiu luagu óunweni? Anha! Ida luba gabafutima lan óunweni —o furumiñeguarügü amu ágani— luéi Bungiu Suntigabafu? (1 Korintuna 15:26; Áfuriduni 6:3.) Gabafuti Bungiu lun lagañeiruni óunweni lau láguyuguagüdüniña hilaaña, ani ligía füramase lubéi ladügübei lan lidan iseri ubóu.a Gayarati san wafiñerun luagu füramasei le? Óunabati Hesusu le Liráü Bungiu lau fiú dimurei le íchugubei emenigini woun. (Aliiha huméi Matéu 22:31, 32.)

Dan le layanuhan houn saduséugu, ha meha mafiñenbaña luagu águyuguni, ariñagati Hesusu: “Ánheinti luagu sará hamá hilaaña lunya habagaridun, maliihan humagili san le lariñagubei Bungiu guánarügü hun? Lariñahare: ‘Au Lubungiutebei Abüraámü, Lubungiute Isaakü, Lubungiute Hakobu’. [...] Mama Habungiute hilaguaaña Bungiu, Habungiute wínwangiña”. Lidan bérusu burí le, ayanuhati Hesusu luagu liyanun Moisesi luma Bungiu lurugabu aban búbugati durungu umuti lidoun burí irumu 1514 lubaragiñe lidaani Hesusu (Áfuriduni 3:1-6). Según lariñaguni Hesusu, dimurei “Au Lubungiutebei Abüraámü, Lubungiute Isaakü, Lubungiute Hakobu” ruti ichouruni luagu ñeinbei lan águyuguni. Ida liña wachülürün lidoun saminaü le?

Dan le layanuhanbei Heowá luma Moisesi, lüha meha hóunwegun Abüraámü, Isaakü luma Hakobu —barühali meha Abüraámü 329 irumu lúmagiñe lounwen; Isaakü, 224, luma Hakobu, 197—. Ani mariñagunti Heowá: “Au meha Habungiutebei”, aba lariñagun “Au Habungiutebei”, kamá hamuga wínwangiña ǘrüwa lichügüdina familia ha. Ka uagu?

Afuranguagüdati Hesusu ‘mama lan Habungiute hilaguaaña Heowá, Habungiute wínwangiña’. Samina humá murusun luagun le mini lubéi dimurei le. Lun hamuga úati águyuguni, lasigiruña hamuga Abüraámü, Isaakü luma Hakobu hilañu lun súnwandan, ani aban hamuga Habungiute hilaaña Heowá. Mini lan hamuga le luagu mabafu lan lun lesefuruniña lubúeingu ha úaraguatiña lídangiñe óunweni, ani gabafutimati lan óunweni luéi.

Ka gayarabei lariñawagún luagu Abüraámü, Isaakü luma Hakobu, luma hawagu híbiri lubúeingu Bungiu úaraguatiña ha hilaañabaña? Ariñaga lumuti Hesusu furangu lau dimurei le: “Wínwangiña lanügüniña Bungiu sun gürigia” (Lúkasi 20:38). Wéiriti lachoururuni Heowá lagunfulirubei lan lani füramasei lun láguyuguagüdüniña lubúeingu darí lun layanuhan hawagu kamá wínwangiña (Rómana 4:16, 17). Areida lumutiña súngubei lidan lisaminan le mébehabei darime lachülürün oura lun lásaaragüdüniña lídangiñe óunweni.

Hínsiñeti hamuga san hun harihin somu hádangiñe hiduheñu ha hilaañabaña? Anhein ítara liña lubéi, haritagua huméi wéiritima lan lubafu Heowá luéi óunweni. Úati gayarati lerederuni Bungiu luéi lagunfuliruni lani füramasei lun lásaaragüdüniña hilaaña. Hínsiñeti hamuga san hun haganwoundagüdüni hisubudin luagu füramasei le luma luagu Bungiu le adügübalin? Harihibei yarafatimabei lan hasandiragun hungua lun Heowá le “Habungiute wínwangiña”.