Adüga humuti san le lamuriahabei Bungiu húmagiñe?

“Ánhabu emegeira somu katei, amuriahabei numa ani ábame bibihini.” Furanguti mariñagun hubéi lan hamuga katei le lun aban gürigia le ibidiñeti hun o lun aban gürigia le masubudirun humuti buidu. Gama lumoun, gayarati hariñaguni lun aban humada, lugundun súngubei wagía busentiwa wíderaguniña wamadagu ani adüga wameime le hamuriahabei.

Arufudahatu Bíbülia woun luagu hechu lan Heowá adüga katei burí lun hagundaarun lubúeingu lidan habagari. Kei hénpulu, ariñagati urúei Dawidi, aban lumada Bungiu le buiti: “Nubungiute, gíbeti burí katei buíduburiti le adüga báalibei luma lubuidun aritaguni le burí bídanbei woun. [...] Busentina hamuga nadimurehan luagu burí katei ligía, gama lumoun gíbeyati lun niyaraabei lan abahüdagua” (Sálumu 40:5). Gama lumoun, wéiriti lubuidun Heowá lugundun adügati katei buiti íbini hawagu gürigia ha masubudirunbalin. Ruti “éigini buídurügüti [houn], belugüda lumuti ugundani tidoun [h]anigi” (Adügaü 14:17).

Kei le hínsiñe lubéi lun Heowá lagundaaragüdüniwa, buiti giñe lun wáfaagun lun wagundaaragüdüni (Ariñawagúni 27:11). Gama lumoun, ka lunbei wadügüni lun gunda lan Bungiu wau? Ariñagatu Bíbülia: “Mabulieida humá hadügüni le buídubei, luma lun hafanreinruni húmati hadan ha mibihinbaña; lugundun ligía burí katei le aubei lagundaara Bungiu” (Ebüréu 13:16). Mini lan san le buídurügü lan wadügüni le buídubei ani íderagua wamañame amu lun lagundaarun Heowá wau?

Uá, úati buídurügü lan lira. Según Bíbülia “siñati lagundaarun Bungiu wau anhein mafiñen wabéi luagu” (Ebüréu 11:6). Ariñagatu giñe subudiwati lan meha Abüraámü keisi ‘lumada Heowá’ lárigiñebei larufuduni lafiñen luagu (Santiagu 2:23). Ariñagati giñe Hesukrístu mosu lan wafiñerun luagu Bungiu lun gayara lan labiniruniwa (Huan 14:1). Ida luba san hibihini luwuyeri afiñeni le láluahabei Bungiu hawagu lumadagu? Furumiñe, mosu héchudun aturiahoun Bíbülia. Ítara luba hasubudiruni ka lan lamuriahabei húmagiñe ani gayarabei hagundaaragüdüni lidan sun le hadügübei. Ánhadün áfaagua lun hasubudiruni Bungiu buidu luma lun gaganbadi humá lun, laganwounduba hafiñen ani layarafadatimaba Bungiu hun (Kolosana 1:9, 10).