Inarüni le hírubei lidan ibagari

SAMINA humá haríaguña lan aban pelikula luáguti libagari somu gürigia le subudiwati, másiñati aban tan eremuhatu to hínsiñeti ligaburi teremuhan hun. Gumesetu pelikula tuguya lau burí sügǘ lánina tiñüraü, tafurendeirun músika luma tasayahan saragu. Lárigiñe, arihúatu eremuha hagibugiñe saragu gürigia, aweiyasuha ani subudiwa tuguya lidan ámuñegueinarügü ageiraü. Dan lárigiñe, aba taweiyadun ani aba tounwen.

Lau sun aban lan sügǘ inarüniti le arihúbei tidan pelikula tuguya, hilaaru gürigia to uáguboun layanuhóua ñein. Ani ligiamémeba hamuga asusereda anhein luáguti lubéi aban aturiahati siensia, aban áhureruti bali o amu gürigia le subudiwati. Lau sun ibiha lan gürigia ligía saragu katei buiti lidan libagari, másiñati álügüdagua wamá woungua kaba lan hamuga amu burí katei gayara libihini lun hamuga maweiyadun lan, hilá ligía.

Híruti ligía lan asuseredubei woun súngubei (Apurichihati 9:5). Lau sun adüga wamani sun wayaraati lun wesefurun luéi aweiyaduni luma óunweni, súnwandan waweiyadun ani hilagua wagía. Ani gayaraati giñe weferidiruni wabagari sódini ladüga somu danaguaü o sandi le hanarimeti. Kei tariñaguni Lererun Bungiu, ítara waña “kei hemereedu le asaliragubei luagu murusun dan, lárigiñe aba lagumuchagun” (Santiagu 4:14).

Kei gayara lubéi wóunwegun furumiñeguarügü oura, ligía añahein lubéi gürigia abagaridutiña lau saminaü le: “Hou wamá, gurá wamá, lugundun haruga wóunwegun” (1 Korintuna 15:32). Wínwantiña gürigia ítara ladüga gabaroun hamani gayara lan hóunwegun furumiñeguarügü oura ani memenigitiña lubá ámuñegü. Dántima wásügürüña lan lídangiñe lénrengunga, chülüti dan lun wálügüdagun woungua: “Gasuuniti san ibagari?”. Halíaba wadarirei óunabagülei?

Gíbetiña gürigia agurabatiña habihini óunabagülei hámagiñe aturiahatiña siensia. Adügaali awanseruni lidan siensia luma hadan surusiagu lun gayara lan lachawaragun dan le wabagaridubei ani añahein hádangiñe áfaagutiña lúntima hachawaraguni lidura. Meberesenga le adüga hamaalibei, mounabúnwagili álügüdahani burí le: Ka uagu waweiyada ani hilagua wagía? Lachülürüba san dan lun lagumuchúniwa lau óunweni le wágani? Lakutihóuba lóunabagüle álügüdahani burí le lidan burí leweñegua arütíkulu ani lounabúba giñe álügüdahani le: Ka san lisuunibei ibagari?