Ladügüba san aban humá gürigia buiti lun buidu lan hibagari ámuñegü?
Luagu saragu sígulu, afiñetiña saragu gürigia ladügüba lan aban hamá gürigia buiti lun buidu lan habagari ámuñegü. Kei hénpulu, Ariñagati Confucio, aban máisturu ani sásaamu le awinwandubei labadinagua irumu 551 luma 479 lubaragiñe wadaani: “Madügabá houn amu le mabusenrun bubéi lun hadügǘn bun”.a Úaraguatiña saragu ásiana luma dimurei le.
LE HADÜGÜBEI SARAGU
Añahein saragu gürigia afiñetiña lun lan buidu lan habagari ámuñegü mosu lan buidu lan hóuserun. Ligía háfaagunbei lun inebehabu hamá, buidu ligía hagaburi, hagunfuliruni burí hani buligasion, darangilu ligía hasaminan. Ariñagatu Linh, aban würi to awinwanduboun Bietnamu: “Súnwandan meha nasaminarun anhein lan buidu nóuserun lidan sun katei, buídubei lan lidin nun lidan nibagari”.
Añahein adügatiña katei buiti ladüga ligía lan larufudahabei hani relihión houn. Abahüdahati Hsu-Yun, aban wügüri le awinwandubei Taiwán: “Arufudahóuati nun, anhein lan buidu lóuserun aban gürigia gúndaabei lan lárigiñe lóunwen, ani anhein lan adüga lubéi katei wuribati lasufuriruba lan lun súnwandan”.
LE IBIHÚBEI
Inarüni buídutima lan lidin woun dan le wadügün katei buiti hawagu amu. Íbini ítara, saragu gürigia ha íderagubaña amu, rúhaña fe mama lan súnwandan lasalirun katei kei hagurabuni. Ariñagatu Shiu Ping, aban würi to awinwanduboun Hong Kong: “Kei sügühadina lubéi lídangiñe, gayara nariñagun luagu ha lan adügübaña buiti hawagu amu, mama lan súnwandan heresibirun katei buiti. Adüga numuti sun niyaraati lun nóunigiruniña niduheñu luma lun buidu lan nadügüni katei, lau sun lira, wuribati lidin nun lidan namarieidun, aba lígiruniwa nani weiriei nuguya luma nisaani”.
Gíbetiña gürigia íchiga fe, mama lan sun ha gánibaña relihión lun gürigia hamá buítiña. Ariñagatu Etsuko, aban würi to awinwanduboun Hapón: “Aba nachéinirun tidoun aban óundaruni lánina relihión, ani nuguya meha alidihabalin sun le adügǘbei hawagu nibureintiña. Aba nírudun saragu dan narihinbalin magíaguni le ídanbei hawinwanda gürigia ha lídanbaña nani relihión, ageindaguatiña luagu ubafu ani wuribati meha hayusuruni tiseinsun ligilisi”.
“Adüga numuti sun niyaraati lun nóunigiruniña niduheñu luma lun buidu lan nadügüni katei, lau sun lira, wuribati lidin nun lidan namarieidun aba lígiruniwa nani weiriei nuguya luma nisaani” (SHIU PING, HONG KONG)
Añahein gürigia ha wéiribei línsiñe hani relihión houn, híruti hasandiragun houngua dan harihini sun lan buiti le hadügübei meseriwín lan lun ni kata. Ítara liña meha tasandiragun Van tungua, aban würi lidan ageiraü Bietnamu. Ariñagatu: “Sagü meha weyu nadagaragüdün furuda, fuluri luma éigini luagu latarü houn nagüchagu, lau emenigini lun neresibirun abinirúni lubá ámuñegü. Íbini lau sun buiti le nadügübei luma burí adagaragüdüni luagu saragu irumu...! Aba ladagarun aban lanarime sandi luagu nani weiriei. Lárigiñe aba tóunwen nisaani to meha aturiahaboun lidan amu ageiraü, dan meha 20 lubéi irumu tau”.
Ligíati, anhein ua lubéi buídürügü lan lun aban wamá gürigia buiti lun buidu lan wabagari ámuñegü, kati wemegeirubei? Lun wasubudiruni, mégeitiwa adundehani le chóuruti, le gayaraati lóunabuni sun wálügüdahan ani le lunbei larufuduni woun furangu ka lan lunbei wadügüni lun buidu lan wabagari ámuñegü. Halíabati wadarirei adundahani le?
a Anhein busén hubéi hasubudirun lanwoun ariñahani luagu larufudahan Confucio, aliiha huméi párafu 31 darí 35 lidan kapítulu 7 tidan líburu El hombre en busca de Dios, hadügün gefentiña luagu Heowá ani dariwatu lidan www.jw.org.