Anihein san adundehani chóuruti lun libihín aban ibagari buiti ámuñegü?

Kei warihini darí guento, áfaaguaaña gürigia lun buídubei lan habagari ámuñegü lau hafiñerun luagu sinu, aturiahani tidan luban furendei íñutu, seinsu o lau buidu lan hóuserun. Gama lumoun, dan ladügǘn ítara, genegeti kamá hamuga láfaagun aban gürigia lachülürün lidoun aban fulasu le ibidiñeti lun tau aban mapa wuribatu. Mini lan san le ua lan adundehani chóuruti lun buidu lan wabagari ámuñegü? Inó.

LADUNDEHAN ABAN LE CHÚTIMABEI AAU

Dan le mosu lan wanúadirun, libe-agei dan aba wáluahani ladundehan aban gürigia le chútimabei aau subudi ligía saragu. Ítarameme, anhein busén wabéi lun buidu lan wabagari ámuñegü, mosu wafiñerun luagu adundehani le líchugubei le chútimabei aau, subudihabu ligía. Gayaraati waliihani ladundehan tidan Sandu Bürütu to agumeserúnboun abürüdǘwa kéiburi 3,500 irumu guentó. Wayanuhaña tuagu Bíbülia.

Ka uagu gayara lubei wafiñerun tuagu Bíbülia? Ladüga le úmagiñebei tiabin ligía chútimabei aau lidan sun ubóu. Ligía “Weiriei Mutu”, le aniheinbei “lúmagiñe binadü dan lumoun lébeha dan” (Danieli 7:9; Sálumu 90:2). Ligía Búngiubei inarüniti, “le adügübalin sielu, [...] le adügübalin múa” (Isaíasi 45:18). Ligía guánarügü ariñagubalin liri woun: Heowá (Sálumu 83:18, TNM).

Kei lúmagiñe lan le Adügübaliña sun gürigia tiabin Bíbülia, marufudahantu buidu lan aban rasa o échuni luéi aban. Súnwandan buidu lan tadundehan ani íderagua lumutiña sun gürigia ha lídagiñetiña ámuñegueinarügü fulasu. Tuguyatima líburu to sügügüdawaaru lidoun saragu iñeñein ani to gíbetimati tafanreinhóun lidan sun ubóu. Ligíati mérengun lubéi lun gunfuranda lanu furumiñeguarügü gürigia ani ígira ligía lun tadundehani. Anha, ariñagatu giñe Bíbülia:a

“Úati [...] himei lan Bungiu aban gürigia luéi aban, lubaragiñe lira, resibirügü lumutiña sun ha inebehabubaña lun, ani adüga haméi le buídubei, lídangiñe hamá yebe furumiñeguarügü néchani” (ADÜGAÜ 10:34, 35).

Ítara kei aban úguchili le hínsiñehabuti houn lisaanigu ani íderagua laña, aban giñe Úguchili hínsiñehabuti Heowá, le íderagubaliwa lau lererun le tídanbei Bíbülia (2 Timotéu 3:16). Anha, gayarati hafiñerun tuagu Lererun Bungiu. Kei Lererun lubéi, ani ligía Adügübadiwa subudi lumuti kátima lan buídutimabei woun.

ABAN ADUNDEHANI CHÓURUTI

Gayaraati wachoururuni ru tan Bíbülia adundehani le gayaraabei wafiñerun luagu, lóugiñe 2,000 irumu guentó lúmagiñe tariñaguni machararunga kaba burí lan katei asusereda ubouagu ani ida luba lan buga hóuserun gürigia lidan wadaani.

SÜGǗ BURÍ

“Lageindaguba aban fulasu luma aban, awuribuha ligíame aban ageiraü luma amu. Ñeinbei óunwenbu burí hárabaganali, ilamaü, sandi lidan ámuñegueinarügü fulasu” (LÚKASI 21:10, 11).

GÜRIGIA

“Lunti giñe basubudiruni luagu liábinburiba lan weyu hénrenguti lídounme lagumuhóun dan. Ladüga hóunguarügübei burí gürigia habusenra buiti, hínsiñebei seinsu houn, panta hagíame, barüguabaña houngua. Hadimurehaba wuriba luagu Bungiu, maganbunhabaña hagübürigu, meteingiradibaña, minebenme katei lánina Bungiu houn. Mínsiñehabubaña, magudemehabu, marasualugubaña, siñabei hárügüdagun houngua, hanarimebaña, láganibaña sun le buídubei. Halugurubaña hamadagu, hadügüba burí katei mabuidunti meberesenga hagía kaba lan asusereda lárigiñe, hanarimebei hanaagun houngua, háluahabei hagundan guánarügü lubaragiñe hamuga háluahani Bungiu” (2 TIMOTÉU 3:1-4).

Dan harihini lagunfuliruña lan profesía burí le tídanbei Bíbülia, le bürǘ waalibei saragu dan guentó, ani gúnfuli ligía keisi lubudubu, ka ñǘnbuinbei lidoun hisaminan? Chóuruti samina humá kei Leung, le awinwandubei Hong Kong, le ariñagubei: “Lüha labürüdǘn profesía burí le tídanbei Bíbülia, ani maweiyasunti ábanrügü gürigia ariñaga aban profesía lun lagunfulirun kei labürüdǘn. Chóuruti lúmagiñe lan aban le chútimabei aau wawéi tiabin Bíbülia”.

Tidan Bíbülia daritiwa saragu san profesía burí le gúnfulihali.b Arufuda lumuti katei le Lererun lan Bungiu líburu to. Ariñagati Heowá: “Au Búngiubei, úati amu nuéi. Ariñaga numuti le lunbei lasuseredun lúmagiñe furumiñeti dan” (Isaíasi 46:9, 10). Ligía gayara lubei wafiñerun luagu le tariñagubei Bíbülia lubá ámuñegü.

ADUNDEHANI LE LUNBEI LÍDERAGÜNÜN DANDU GUENTÓ KEI LUN SÚNWANDAN

Anhein hasigira adundehani le tídanbei Sandu Bürütu, buídubei lidin hun. Samina humá luagu burí hénpulu le.

SEINSU LUMA WADAGIMANU

“Buítimati aban úhabu buin lau emeraaguni sügǘ lau biama lau lubucha uagu ladügarügü labusenrun lárügüdüni garabali” (APURICHIHATI 4:6).

HABAGARI IDUHEÑU

“Kada lan aban hídangiñe lunti lan hínsiñe tan lúmari lun kei línsiñegua lungua, lun giñe inebe lan túmari würi tun” (ÉFESUNA 5:33).

WÓUSERUN HAMA AMU

“Ígirabei igañi; magañidabá ladüga gádeirugü lumutitima agañiduni sun katei” (SÁLUMU 37:8).

Dan hawinwanduni adundehani le tíchugubei Bíbülia lidan hibagari, líderagubadün guentó ani ladaarubei bena hubá lun buidu lan hibagari ámuñegü. Ariñaga tumuti Bíbülia woun ida luba lan ibagari le füramase lubéi Bungiu woun lubá ámuñegü.

DARANGILAÜ LUMA ICHOURUNI

“Habagariduba lidan darangilaü le dayarüti” (SÁLUMU 37:11).

MUNA LUMA ÉIGINI HOUN SÚNGUBEI

“Hábunaguba gürigia haban ábame haganóun tidan, hábunaguba beibei ábame héiginu tin” (ISAÍASI 65:21).

ÚAALIME SANDI NI ÓUNWENI

“Laragahabei sun háguira; úaalime óunweni ni ayahuni ni íruni ni igarigu” (ARUFUDÚNI 21:4).

Ka lunbei hadügüni lun buidu lan hibagari ámuñegü? Harihubei lidan leweñegua arütíkulu.

a Anhein busén hubéi hasubudirun lanwoun ariñahani luagu tásügüragüdüniwa Bíbülia luma tafanreinhóun, heiba lidoun www.jw.org ani bagǘ humá luagun ENSEÑANZAS BÍBLICAS > LA BIBLIA Y LA HISTORIA.

b Anhein busén hubéi lanwoun ariñahani, ariha huméi kapítulu 3 tidan garüdia Winwan humá lau ugundani lun súnwandan! Hadariruboun lidan www.jw.org. Heiba lidoun LÍBURU-AGEI > LÍBURU BURÍ & GARÜDIA.