Ida liña lóunabuni Heowá wafurieidun?

1, 2. Ka álügüdahani gayaraabei wadügüni wóuniwagua?

ÁLÜGÜDAGUAADÜN san hungua anhein óunaba lubalin Heowá hafurieidun? Anhein ítara liña lubéi, mámarügüñadün huguya. Ariñagatiña saragu íbirigu adüga hamaali lan giñe álügüdahani le hóuniwagua, dántima le hásügürüña lan lídangiñe saragu turobuli. Másiñati giñe hénrengu lan woun warihini ida liña lan lóunabuni Heowá wafurieidun dántima le wasufuriruña lan.

² Lidan aturiahani le, wakutihabei ka lan uagu gayara lubéi wachoururuni óunaba lani Heowá hafurieidun lubúeingu (1 Huan 5:15). Warihubei giñe ka lan uagu anihein lubéi dan genege lan móunabun lani wafurieidun lúmati ida liña lan lóunabuni.

MÁSIÑATI MÓUNABUN LÁNIWA HEOWÁ KEI LE AUBEI WAGURABEI

3. Ka uagu busén lubéi Heowá wafurieidun lun?

³ Chóurugüda tumuti Bíbülia woun hínsiñe wamá lun Heowá saragu ani weiri lan webegi lun (Ahéu 2:7; 1 Huan 4:10). Ligía lagunbirahanbadiwa lun wafurieidun lun luma lun wamuriahan ídemuei luma (1 Fe. 5:6, 7). Busenti líderaguniwa lun wakipuragun woungua yarafa lun luma lun wawanduni sun turobuli le úmabei wagagibudagua.

4. Ida liña wasubudiruni óunaba lani Heowá hafurieidun lubúeingu? (Ariha humóun giñe iyawaü).

⁴ Daritiwa saragu abahüdaguni tidan Bíbülia le arufudubalin óunaba lani Heowá hafurieidun lubúeingu. Aban hénpulu, urúei Dawidi. Lidan sun libagari, gagibuguati meha Dawidi hama saragu láganigu ha furundetiña, ani súnwandan meha lamuriahan ídemuei luma Heowá. Luagu aban dan, aba layumuragun lun: “Nabureme, aganbabéi nafurieidun; tenibá lun nayumuragun. Óunababana, ladüga richatibu ani gúnfulitibu!” (Sal. 143:1). Óunaba lumuti Heowá lafurieidun Dawidi ani sefu lumuti (1 Sam. 19:10, 18-20; 2 Sam. 5:17-25). Ligía lariñagunbei Dawidi lau sun lafiñen: “Yarafati Aburemei houn ha agúahabaña luagu”. Ani wagía gayaraati giñe wachoururuni ligiaméme (Sal. 145:18).

5. Óunaba lumuti san Heowá hafurieidun lubúeingu súnwandan kei le aubei hagurabei? Ru humá aban hénpulu. (Ariha humóun giñe iyawaü).

⁵ Másiñati móunabun lani Heowá wafurieidun kei le aubei wagurabei. Ligía asuseredubei lun apostolu Pábulu. Anihein meha “aban hiiyu charuñu” luagu, mini lan le aban turobuli wéiriti, ani ayumuraguati lun Bungiu ǘrüwa wéiyaasu lun lagidaruni luéi. Óunaba lumuti san Heowá lafurieidun? Anha, gama lumoun mama kei le aubei lagurabahei Pábulu. Lubaragiñe lagidaruni Heowá turobuli ligía luéi, aba líchuguni erei le lemegeirubei lun, lun lasigirun eseriwida lun lau úaraguni (2 Ko. 12:7-10).

6. Ka uagu anihein lubéi dan genege lan móunabun lani Heowá wafurieidun?

⁶ Másiñati óunaba lani Bungiu wafurieidun lidan aban igaburi le magurabun wamuti. Lau sun lira, gayaraati wachoururuni subudi lani Heowá le buídutimabei woun. Ladüga gayaraati “ladügün gibe sügǘ lau le wamuriahabei o le lan wasaminarubei” (Efe. 3:20). Ligíati, gayaraati lóunabuni wafurieidun lidan aban dan o lidan aban igaburi le magurabun wamuti.

7. Ka uagu aniheinbei lubéi dan lunti lan wasansiruni le wamuriahabei luma Heowá? Ru humá aban hénpulu.

⁷ Gayaraati ñeinbei lan dan lunti lan wasansiruni le wamuriahabei luma Heowá dan le gunfuranda wamani buidu ka lan lugundanbei. Ariha waméi lani íbiri Martin Poetzinger hénpulu. Murusun dan lárigiñe lamarieidun, aba hárügüdüni nasi, aba hóunahani lidoun fulasu le ñein lubéi hafosurúa gürigia lun hawadigimaridun. Furumiñe, amuriahati yebe luma Heowá lun hígiragüdüni lun lidin tumoun lani weiriou luma lunya letenirun lun apurichihani. Gama lumoun, sügüti bián dimaasu ani menegeti meha láfuridagüdübei lan Heowá ñéingiñe. Ábati lamuriahan íbiri Poetzinger luma Heowá: “Bungiu Núguchi, adügabá fulesei nun, íderaguabana arihei ka lan babusenrubei lun nadügüni”. Ábati lararamagun asaminara luagu sun turobuli le giñe hásügürübei íbirigu ha lídanbaña fulasu le ñein lubéi hafosurúa gürigia lun hawadigimaridun. Saragu hádangiñe, nidiheritiña meha hawagu hánigu weiriou luma hawagu hasaanigu. Ligíati lariñagunbei íbiri Poetzinger lun Heowá: “Seremei luagu iseri nidasin. Íderaguabana lun gayara lan níchugun dǘgüdaguaü luma gurasu houn níbirigu”. Ani ligía ladügübei lidan nefu irumu le laubei adaürǘwa.

8. Ka katei súdiniti lunbei waritaguni dan le wafurieidun?

⁸ Lunti waritaguni anihein lan katei le labusenrubei Heowá ladügün ani lagunfulirubei lidan lidaani. Lidan katei le lunbei ladügüni Heowá lagidarubei sunsuinagubei ani lun súnwandan sun katei le adügübei lun wasufurirun, kei burí liñawan dan, sandi luma óunweni. Layusurubei Heowá Larúeihan lun lagunfuliruni le füramase lubéi (Dan. 2:44; Aruf. 21:3, 4). Gama lumoun, lubaragiñe lachülürün dan ligía, lígiruña Heowá lun larúeihani Satanási ubóu (Huan 12:31; Aruf. 12:9).b Anhein hamuga laranseha Heowá sun turobuli le ubouagubei, genegebei hamuga larúeihaña lan Satanási buidu. Ligíati, íbini mosu lan wagurabahan lun lagunfuliruni Heowá fiu lídangiñe füramasei le ladügübei, úati mini lan le míderagun lumutiwa lan. Ariha wamá fiu lídangiñe katei le ladügübei Heowá wawagu.

LIGABURI LÓUNABUNI HEOWÁ WAFURIEIDUN

9. Ida liña líderaguniwa Heowá dan le wanúadiruni kaba lan wadüga? Ru humá aban hénpulu.

⁹ Ruti lichú aau woun. Füramaseti Heowá líchugubei lan lichú aau le wemegeirubei woun lun buidu lan le lunbei wanúadiruni. Dántima le wanúadira lan somu katei le lunbei gadan lani wabagari, kei burí anhein wamarieiduba lubéi o mamarieidunbadiwa lan (Sant. 1:5). Ariha waméi tikesin aban íbiri mamarieidungiru to gíriboun María.c Teseriwiduña meha lau ugundani lun Heowá kei prekursora dan le tasubudirunbalin aban íbiri. Ariñagatu: “Lau lásügürün dan, aba gamadagua wamá, aba línsiñedun nun, aba giñe nínsiñedun lun. Subudi numuti meha nuguya lan lunbei nanúadiruni kaba lan nadüga. Ligíati nafurieidunbei lun Heowá tídangiñe sun nanigi luagu katei le. Megei numuti meha ladundehan Heowá, gama lumoun, subudi numuti meha mámaba lan ligía anúadira nuagu”. Sanditu María óunaba lani Heowá tafurieidun ani ru ligía lichú aau tun. Ida? Aba táluahan ariñahani tidan wani agumeiraguagüdüni ani darí tumuti ariñahani le temegeirubei, le óunabubalin álügüdahani le tadügübei túniwagua. Lanwoun lira, aba tíchugun túguchu to gefentu luagu Heowá adundehani buiti tun le íderagubarun akutihei le tasandirubei. Lagumuhóun, buiti le tanúadirubei María tadügün.

10. Según 2 Korintuna 4:7, ida liña líderaguniña Heowá lubúeingu? Ru humá aban hénpulu. (Ariha humóun giñe iyawaü).

¹⁰ Ru lumuti erei le wemegeirubei woun lun wawandun. Ítara kei ladügün lun apostolu Pábulu, líchugubei Heowá erei le wemegeirubei woun lun wawanduni lénrengunga (aliiha huméi 2 Korintuna 4:7). Teni wamá lun ida liña lan líderaguni Heowá aban íbiri gíribei Benjamin. Lúmagiñe nibureingili Benjamin, wínwanti saragu irumu Áfürika hama liduheñu lidan fulasu le ñein lubéi hawinwanda gürigia ha anurahabaña hageiragiñe. Ariñagati: “Gabügürüguati meha nafurieidun lun Heowá amuriaha erei luma lun nadügüni le buídubei. Óunaba lumuti nafurieidun lau líchugun darangilaü nun luma ganigi lun nasigirun apurichiha tuma giñe agumeiraguagüdüni lun héreñu lan nakipuruni numadagua luma”. Ani ariñagayati: “Lau naliihani le hásügürübei amu Gefentiña luma ida liña lan líderaguniña Heowá awanda, ínchaha lumutina lun mábürühan lan narüna luma lun nasigirun lau úaraguni lun”.

11, 12. Ida liña gayara lan layusuruniña Heowá wábirigu lun lóunabuni wafurieidun? (Ariha humóun giñe iyawaü).

¹¹ Yusu lumutiña wábirigu. Furíeiti meha Hesusu tídangiñe sun lanigi guñoun le lubaragiñebei lounwen. Aba layumuragun lun Heowá lun lesefuruni luéi lichugún duru luagun luagu anabagua laali lan Bungiu. Lubaragiñeti lesefuruni Heowá Hesusu íderaguarügü lumuti lau lóunahan aban ánheli lun líchugun dǘgüdaguaü lun (Luk. 22:42, 43). Ítarameme, gayaraati giñe layusurun Heowá aban hádangiñe íbirigu lun hagúarun woun o lun habisidahaniwa lun híchugun dǘgüdaguaü woun. Sun wagía gayaraati wáluahan chansi lun wariñagun “dimurei buiti” houn wábirigu kristiánugu (Ari. 12:25).

¹² Ariha waméi le tásügürübei aban íbiri gíritu Míriam. Fiu dimaasu lárigiñe lounwen tani weiriei, tábuguarügüñoun túbiñe ani wéiriti íruni luma igarigu le tasandirubei, meredeti tayahun ani mégeitu meha tayanuhan luma somu gürigia. Ariñagatu: “Maguraasuntina meha lun nagúarun houn ni aban, ligíati aba lubéi nafurieidun lun Heowá. Dan le anahagua lubéi afurieida ayahuaheina ligía laguarún nun. Aban meha wéiyaali lidan afiñeni, aban umadaü buiti”. Ruti wéiyaali le tuma lani weiriou dǘgüdaguaü tun Míriam, ani chouru tumuti Heowá lan adügübei lun lagúarun íbiri le tun.

13. Írida humá aban hénpulu luagu ida liña lan layusurun Heowá gürigia ha máhuduraguntiña lun, lun lóunabuni wafurieidun.

¹³ Gayaraati layusurun gürigia ha máhuduraguntiña lun (Ari. 21:1). Anihein dan, óunaba lani Heowá hafurieidun lubúeingu lau ladügün lun híderaguniwa gürigia ha máhuduragunbaña lun. Kei hénpulu, adügati Heowá lun líchugun urúei Árütaherühesi üma lun Neemíasi lun lagiribudun Herusaléun lun lídehan lidan lábunawagunya uburugu (Neem. 2:3-6). Uguñe weyu, gayaraati giñe ladügün Heowá lun híderaguniwa gürigia ha mama Gefentiña dan le megei wamani.

14. Ida liña líchugun le tásügürübei Soo Hing gurasu woun? (Ariha humóun giñe iyawaü).

¹⁴ Sanditu meha aban íbiri gíritu Soo Hing yusu lani Heowá tisurusian lun líderagunu. Anihein meha saragu sandi luagu tisaani luéigiñe lichügü, súfuriti aban lanarime danaguaü. Ábati tígiruni Soo Hing luma tani weiriei hawadigimari lun hetenirun lun hasaani. Adügati katei le lun maseinsun hamá. Ábatima lénrengudun gádantiña darí lun tariñagun Soo Hing siñá lan meha tun, ani ibidiñe lan meha tun kaba lan tadüga. Ligíati, aba lubéi tafurieidun lun Heowá tídangiñe sun tanigi amuriaha ídemuei luma. Aba larihin tisurusian ida luba lan líderagunu, ani seremei lun surusia ligía, ibihatu ídemuei lúmagiñe urúei ani daritu giñe aban muna to meseruntu lun hawinwandun ñein. Lárigiñe, ariñagatu Soo Hing: “Ariha wamuti lúhabu Heowá lidan sun sügǘ le, chóuruti ‘aganba lani wafurieidun’” (Sal. 65:2).

MÉGEITIWA AFIÑENI LUN WARIHINI LUMA LUN WÁNHARUN LUN LIGABURI LÓUNABUNI HEOWÁ WAFURIEIDUN

15. Ka íderagubarun aban íbiri arihei óunaba lani Heowá tafurieidun?

¹⁵ Liibe-agei dan, móunabun lumuti Heowá wafurieidun lidan aban igaburi hanarimeti lun harihini sun gürigia. Lau sun lira, ru lumuti Heowá óunabagülei le wemegeirubei woun lun úaragua wamá lun. Ligíati lunti lubéi wetenirun lun warihini ligaburi lóunabuni Wáguchi le siélubei wafurieidun. Genegeti meha tun aban íbiri gíritu Yoko móunabun lani Heowá tafurieidun. Lau sun lira, aba tagumeserun abürühei sun katei le tamuriahabei luma Heowá. Lau lásügürün dan, aba techekürüni le tabürühabei ani aba tíchugun fe óunaba lani Heowá liibe-agei furíei le tadügübei lun, íbini fiu lídangiñe le bulíei taali yebe. Buídubei wadüga ánhawa adireira dan lun wararamagun asaminara luagu ida liña lan lóunabuni Heowá wafurieidun (Sal. 66:19, 20).

16. Ida liña líderaguniwa afiñeni dan le wafurieidun? (Ebüréu 11:6).

¹⁶ Úati buídurügü lan warufudun afiñeni dan le wafurieidun lun Heowá, lunti giñe wánharun lun óunabagülei le líchugubei meberesenga ida liña lan (aliiha huméi Ebüréu 11:6). Ariha waméi lani Mike tuma Chrissy hénpulu, aban feru maríeitiña ha meha busenbaña heseriwidun Betelirugu. Ariñagati Mike: “Buíngüda wamutu gárada saragu wéiyaasu ani gabügürüguati wafurieidun lun Heowá libügürü katei le, gama lumoun magunbirahóuntiwa”. Afiñeti Mike tuma Chrissy luagu subudi lani Heowá halíatimaba lan hahuuda. Sigitiña adügei sun hayaraati lidan heseriwidun lun Heowá: seriwitiña kei prekursorugu lidan fulasu le ñein lubéi hemegeirúa apurichihatiña ani ídehatiña lidan ábunaguni. Ani guentó, heseriwiduña kei óunigirutiña sirkuitu. Ariñagati Mike: “Mama súnwandan lóunabuni Heowá wafurieidun kei le aubei wagurabei, gama lumoun óunaba lumuti ani adüga lumuti lidan aban lubuidun igaburi le magurabun wamuti”.

17, 18. Según Sálumu 86:6, 7, ka katei wachoururubei?

¹⁷ (Aliiha huméi Sálumu 86:6, 7). Chouru lumuti meha Dawidi aganba lani Heowá lafurieidun ani óunabalei. Huguya sun, gayaraati giñe hachoururuni. Arufudati sügǘ burí le akutiha wamaalibei lidan aturiahani le gayara lan líchugun Heowá lichú aau luma erei le wemegeirubei woun lun wawandun. Arihaadiwa giñe gayara lan layusuruniña Heowá íbirigu, yusu lumutiña giñe gürigia ha máhuduragunbaña lun lun líderaguniwa.

¹⁸ Íbini gayara lan móunabun lani Heowá wafurieidun súnwandan lidan igaburi le aubei wagurabei, subudi wamuti lóunabubadiwa lan. Líchugubei le wemegeirubei woun ani lidan dan le wemegeiruni. Ligíati ítarameme wamá afurieida lau afiñeni, chóuruti lóunigirubadiwa lan Heowá guentó ani lídanme iseri ubóu, ábame líchuguni le hemegeirubei sun gürigia houn lau lugundan (Sal. 145:16).