¿She t’e pa Jesucristo?

1. ¿Ta lhjunash lhapesh ti nich’a ĉaaĵ pa Jesús?

Pa Jesús nilhjunashajulh papi nivaĉle lhayaash ti yi’e pa vôôs ti ĵôjeĉlai ninanvat’aĵ’e na cotsĵaat (Juan 8:23). Vatjutsa’esh pa Dios yivĉlanĵat pa Jesús. Lhavaatsha yefenesh pa Lhtata ĉa navĉlanĵat lhaĉom’a pav’elh matas. Ve’lha pa Jeova ti yivĉlanĵat pa Jesús pa lhech tôlh’ejop ti chiyeyiyanesh pa ve’lha Lhaôs pa Dios (Juan 1:14; 1 Juan 4:9). Pa Jesús yasinôquiesh pava lhĉlishai pa Lhtata pa lhe’naa ti chintôfaaĉsha pa “Ya’clish”. Etônch’e na Proverbios 8:22, 23, 30 chi’ na Colosenses 1:15, 16.

2. ¿Ta t’e lhayaash ti nacheishicham pa Jesús na cotsĵaat?

Pa Dios nichenei pa Lhaôs na cotsĵaat. Tô’lhesh’e pa vôôs pa Dios ti yic’uiĵatei pa Lhaôs pa lhĉachi lhpa lhutsĵa ti judíache lhei María. Lhech lhjunash pa Jesús ômem pa lhtata nivaĉle (Lucas 1:30-35). Lhavaatsha nacheishicham na cotsĵaat ĉa ĵaspa nôfisĵatch’e nava pu’jana nachan’apee: 1) vanqu’eiĵatsĵanesh pa yijô’esh pa Dios, 2) tôlh’ejop pa lhfanishesh ti shineiĵatsĵanesh ĉa shtasnatesh pa yen pa Dios lha’mataĵ ti tavi’ĵataijoom chi’ na 3) yijutei pa lhamônlhaĵayash yivo’yeshch’e “ca jaspa nalhjen napi acloj nivacle”. Etônch’e na Mateo 20:28.

3. ¿Ta t’e lhayaash ti ĉassuyeshi ĉa shinalhĵen?

Ĉa niĉaaĵ papu ti suijop ĉa chinĉlôn ¿isjop t’e ĉa chinalhĵenesh tô’lha lhasha’ ĉa chinshayanesh? Ĵech (Éxodo 21:29, 30). Pa Dios ninen papi nivaĉle ĉa c’utsĵaseesh chi’ ĉa nivafsha’ne. ¿Ta lhayaash ti shtantô’ya côque? Lhayaash pa Jeova nifaĉlem pa Adán ti vaf ĵayu ĉa nasnateshtaĵ pa sasch’e, côque yich’e ĉa ninanĉ’ashameem. Pa lhechesh ĉa ninasnateshtaĵ pa Adán pa lhsasch’e lhavaatsha tan ĉa nivaf (Génesis 2:16, 17; 5:5). Na Biblia yit’esha “pa vatvafi’ yam’apee lhacôm’a papi nivacle” tôlh’ejop pa Adán. Lhech lhjunash pa Adán yit’iyĵatem pa vatsasch’e chi’ pa vatvafi’ lhaĉom’a papi lhĉles. Lhe’naa ti ĉaslhaĉom’a ĉassuyeshi ĉa shinalhĵenesh. Etônch’e na Romanos 5:12 chi’ na 6:23.

Taĵ ti ¿she papi isjop ĉa nishayan ĵaspa shinalhĵenesh pa vatvafi’? Ĉa shtavafelhtaĵ nasheesh ti shtashayan nava ĉassasch’esha’ne. Lhayaash ti nishtanvo’yeshch’e pa sasjop ĉa shtashayan pava lhsasch’esha’ne pap’elh. Etônch’e na Salmo 49:7-9.

4. ¿Ta t’e lhayaash ti vaf pa Jesús?

Pa Jesús niĉasjunashajulh lhayaash ti yivo’yeshch’e jum pa nive’lhaesh ĉa nasnatesh pa vatsasch’e. Nisuyeshi ĉa nivafesh pava lhsasch’esha’ne. Vafjoom ĉa ĵaspa nishayanch’e nava ĉassasch’esha’ne. Pa Dios nichenei pa Lhaôs ĉa nivafjoom. Nôque lhjunash ti nôĉlit pa uĵ lhencheyasha napi nivaĉle. Ti niqu’ishamem pa Jesús pa Lhtata nôĉlitjoom shta ti shinen chi’ ti yijut pa lhamônlhaĵayash ĵaspa shinalhĵenesh pa vatsasch’e chi’ pa vatvafi’. Etônch’e na Juan 3:16 chi’ na Romanos 5:18, 19.

Aĉlôvalhesh na video ¿Ta t’e lhayaash ti vaf pa Jesús?

5. ¿She pa yisnatesh pa Jesús navôque nalhus?

Meelh ti yi’e na cotsĵaat pa Jesús yivatsĵanchat papi taiyashaisha’ne, yinenĵatchishamch’e papi vafsha’ne pa yefen shta papi ĉaaĵem pava tavi’ĵatai jum. Nôque lhjunash ti nôĉlit pa yisnatshem ĵayu papi lhĉavosesh niĉacuĵanĵasa pava amc’oya nalhus (Mateo 15:30, 31; Juan 5:28). Ti vaf pa Jesús pa Dios yinenĵatchisham pa lhech ti vôpeĉlem pa lhamônlhaĵayash yi’ei pa vôôs (Efesios 1:20). C’oya pa Jesús pa lhfayishei pa Lhtata yischic’oya ĉa nijutei pa t’unaĵ ĉa lhĉaanvaĉleesh na cotsĵaat (Hebreos 10:12, 13). Navôque nalhus pa Jesús lhĉaanvaĉleesh yi’ei pa vôôs. Côque lhech pa is ti nifaĉ papi t’eiĵatsĵanĵas tif’apee nan tuc’ae na cotsĵaat. Etônch’e na Daniel 7:13, 14 chi’ na Mateo 24:14.

Tatsha ĵayu pa Jesús tôlh’ejop pa t’unaĵesh pa lhĉaanvaĉle yivômĵatshi papi niysisasha’ne chi’ pa niysa’ ti yivĉlanĵat. Lhaĉom’a papi ti nôĉlit ĉa nueshch’e chi’ ĉa nach’ana pa Jesús uĵ ti ĉ’usemvatsham’in ĵayu yi’ei na cotsĵaat ĉa paraísoeesh. Etônch’e na Salmo 37:9-11.