VATNEIĴATSĴANĴAYASH 10
¿Ta lhjunash ĉa isa’jop ĉa chintô’ya pa religión yivo’yeshch’e?
1. ¿Ĉaaĵ t’e pa religión yivo’yeshch’e?
“Anujumatsenelhjulh papi niyijô’a ca chintôijata pava ti vaclan” (MATEO 7:15).
Pa Jesús yeiĵatsĵanesh papi t’eiĵatsĵanĵas pa ve’lha religión, yich’e pa chiyishi’ yivo’yeshch’e. Pa lhech lhjunashjulh pa nôyish t’ajuyei pa vatmônlhaĵayash ôiĵôlhôyech. Nasheesh papi napu’ ti nitôfaĉlesh côque nôyish (Mateo 7:14). Pa Dios nasheesh ti yen pa vatôĉlôĵqueyash ti lhtatsuqu’esh na Biblia. Lhaĉom’a papi ti yivo’yeshch’e ti yôĉlôĵei pa lhech ve’lhasham ts’ivee pava yu’eshch’e. Etônch’e na Mateo 7:21, na Juan 14:6 chi’ na Efesios 4:4, 5.
Aĉlôvalhesh na video ¿Nishamesh t’e pa Dios lhaĉom’a nava religiones?
2. ¿Ta t’ônashesh pa Jesús papi cristianos atesha?
“Yit’esha ca nantôfa’clesh pa Dios, taj ti chiyvan pava yisnatesh ti yôôlhjôn’in” (TITO 1:16).
Pa Jesús t’ônashesh ti ĉaaĵ ĵayu papi niyijô’ach’e ti chitôiĵata pava ti vaĉlan ĉa nisasiyan papi t’eiĵatsĵanĵas pa Cristo. Papi voqu’eetsham atesha pa Cristo ti vatcristianoyansha’ne atesha. Taĵ avaatsha lha’vanesh jô pa lhfanishlhavach. Nasheesh pa vatôĉlôĵqueyash yivo’yeshch’e yefenesh papi cristianos yijô’qu’e ĉa isa’ pa lhfanishlhavach. Etônch’e na Mateo 7:14-23.
3. ¿She papi yivo’yeshch’e ti yôĉlôĵei pa Dios?
Shta’van ĵayu pava cinco lhjunash ti yinôôĉlhanitch’e côque:
Napi lhech yivi’ĵatana jô na Biblia ti yovalheijop nava Dios Lhasinôĉ. Napi lhech vaniyitesh jum ĉa nanĉ’ashamesh pava vanĉatôiĵatc’oya na Biblia. Nilhjunashajulh pava religiones niyijô’ach’e ti lhtatsuqu’esh pava lhaichavalhĵanôĉ papi nivaĉle (Mateo 15:7-9). Pa lhamônlhaĵayash napi cristianos yijô’qu’e ti yivoiĵatjulh pa vanqu’eiĵatsĵanesh. Etônch’e na Juan 17:17 chi’ na 2 Timoteo 3:16, 17.
Napi cristianos yijô’qu’e yinvaĉleyan ti yisĉlaneshi jum na Dios lhei, Jeova. Pa Jesús yinvaĉleyan ti yisĉlaneshi chi’ ti vanĉatôiĵata na lhei pa Dios. Nifaĉlem papi nivaĉle pa lhjunash pa Jeova pa yeiĵatsĵanesh shta ĉa nit’alhei ĉa ĵaspa niisiyan nôque lhei (Mateo 6:9). ¿She pa religión ti yitôiĵata na lhei pa Dios? Etônch’e na Deuteronomio 32:3 chi’ na Romanos 10:13, 14.
Napi lhech vanqu’eiĵatsĵanesh pa Dios Lhanvaĉleyash. Pa Dios nichenei pa Jesús na cotsĵaat ĉa ĵaspa nivanqu’eiĵatsĵanesh nava isis tô’lha pa Dios Lhanvaĉleyash. Nasheesh pa lhech yivômĵatshi ĵayu pava tavi’ĵatayem napi nivaĉle. Côque nifaĉ pa Jesús ti yômjei pa lhavafi (Lucas 4:43; 8:1; 23:42, 43). Yit’esha shta papi t’eiĵatsĵanĵas ti vanqu’eiĵatsĵanesh ĵayu pa Lhanvaĉleyash pa Dios. Papi yasinôqui’am pa Dios Lhanvaĉleyash ¿she t’e pa religión yishi’ papuque? Etônch’e na Mateo 24:14.
Napi cristianos yijô’qu’e ninôquesha ĉa ninôvji’ nôque nalhuyish niysa’. Napi voqu’eetsham pa Jesús ninôvji’ pa política ĵa’taĵesha pava saseshvatjulh papu (Juan 17:16; 18:36). Napi lhech tan ĉa nijôneshch’e pa niysa’ lhfanishlhavach papi yishi’ nôque nalhuyish. Etônch’e na Santiago 4:4.
Vanensha’ne jum napi voqu’eetsham yijô’qu’e pa Jesús. Na Biblia apis ti yeiĵatsĵanesh napi lhech ĉa nen lhaĉom’a papi nivaĉle apasha pa tôlh’e. Aĉloĵesh’in pava religiones niyijô’ach’e yefench’esham jum pava vatvatĉlônĵayash taĵ ti napi voqu’eetsham yijô’qu’e pa Jesús tĉavoijulh cavôque (Miqueas 4:1-3). Vooi ti yiĉamôminatei chi’ ti yichenesh pava lhcufaiĵat’esh ĵaspa nefen pap’elh ĉa nanfayuĵat’in. Etônch’e na Juan 13:34, 35 chi’ na 1 Juan 4:20.
4. ¿Isjop t’e avaatsha ĉa natô’ya pa religión yivo’yeshch’e?
¿She pa religión tô’lhesha na Biblia lhaĉom’a nava lhneiĵatsĵanĵayash chi’ ti yinvaĉleyan ti yisĉlaneshi na lhei pa Dios? ¿She religión ti nifaĉ nasheesh pa Dios Lhanvaĉleyash ti yivômĵatshi ĵayu nava tavi’ĵatai? ¿She pa tc’asham ti vanensha’ne jô chi’ ti tĉavoijulh pa vatvatĉlônĵayash? ¿Ta ônashesh navôque ana? Etônch’e na 1 Juan 3:10-12.