Ri Tataʼixel, rijaʼ ri nimaläj achibʼil nqïl

Yatok rachibʼil ri Tataʼixel, ja riʼ ütz nakʼulwachij pa akʼaslem. Ri Tataʼixel xtukʼüt chawäch achike rubʼeyal xtawïl ri kikotem, chuqaʼ uxlanibʼäl kʼuʼx pa akʼaslem. Xkaruköl chi ke ri tzʼukun taq naʼoj chuqaʼ ri itzel taq bʼanobʼäl. Xkarakʼaxaj kʼa toq xkachʼon rikʼin. Xtukuqubʼaʼ akʼuʼx, chuqaʼ xtuyaʼ awuchuqʼaʼ (Salmo 71:5; 73:28). Ri Tataʼixel xkarutoʼ kʼa toq xtawïl kʼayewal pa akʼaslem (Salmo 18:18). Nusuj kʼa chuqaʼ jun asipanik, jun kʼaslem man kʼisel ta (Romanos 6:23).

Toq nqetamaj ruwäch ri Tataʼixel, nqetamaj chuqaʼ kiwäch ri rachibʼil. Ri rachibʼil ri Tataʼixel yebʼeʼok chuqaʼ awachibʼil rat. Kan achiʼel achaqʼ awiʼ xtabʼän kikʼin. Xkekikot xtkikʼüt chawäch chi rij ri Tataʼixel, chuqaʼ xkatkitoʼ, xtkikuqubʼaʼ akʼuʼx.

Man oj junan ta rikʼin ri Tataʼixel. Toq nqakanoj rachibʼilanïk ri Tataʼixel, kʼo chi nqʼax chi qawäch reʼ: ri achibʼilanïk nuyaʼ rijaʼ, man junan ta rikʼin ri nqayaʼ röj. Ruma rijaʼ man ajlatäl ta rujunaʼ, man xa jubʼaʼ ta retamabʼal, ruchuqʼaʼ chi qawäch röj. Kan xa xe rijaʼ rukʼamon ntok Qʼatöy Tzij pa qawiʼ. We nqajoʼ yojok rachibʼil, kʼo chi nqakʼaxaj rutzij chuqaʼ nqabʼän ri nukʼutuj chi qe. Ri nqanimaj rutzij, ütz yojbʼe pa qakʼaslem (Isaías 48:18).