¡Naqaj chik kʼo ri Tikʼasäs Ulew!

Ri itzelal najin wakami retal chi naqaj chik kʼo ri Tikʼasäs Ulew. Ojer yan kan riʼ ri Ruchʼabʼäl ri Ajaw rubʼin pe chi toq naqaj chik kʼo ri Tikʼasäs Ulew, kʼïy kʼa kʼayewal xkeqatzʼët. Wakami oj kʼo kʼa chi kiwäch re kʼayewal reʼ. Ja reʼ jujun chi ke ri kʼayewal rubʼin pe ri Ruchʼabʼäl ri Ajaw.

Nimaʼq taq oyowal. «Jun ajawaren xtiyakatäj kʼa el chi rij jun chik ajawaren. E kʼo chuqaʼ rey xkeyakatäj el chi kij chʼaqa chik rey.» (Mateo 24:7.) Re jun retal reʼ najin wakami. Kan xe chupam pe ri junaʼ 1914 e ikʼowinäq pe kaʼiʼ nimaʼq taq oyowal, chuqaʼ e kʼïy kokoj. Kan man e ajlatäl ta ri winäq e kaminäq pe ruma re kʼayewal reʼ.

Kikiran kiʼ ri yabʼil. Xkepe «yabʼil xa bʼa akuchi (apeʼ na) chi re ri ruwachʼulew» (Lucas 21:11). ¿La najin reʼ wakami? Jaʼ. E kʼo yabʼil nkiqʼaytisaj achʼakul, e kʼo ri nkiyawaʼij awanima, ri chaqiʼj ojöbʼ, ri raxtew, ri yabʼil ruma jun tzʼiläj bʼanobʼäl, chuqaʼ chʼaqa chik jeʼ. Konojel reʼ e kʼïy winäq e kikamisan el.

Wayijal. Xa bʼa akuchi chi ruwachʼulew e kʼo winäq yewayijan. Ronojel junaʼ man e ajlatäl ta ri winäq yekäm ruma wayijal. Reʼ jun chik retal chi ri Tikʼasäs Ulew xa man näj ta chik kʼo. Ri Ruchʼabʼäl ri Ajaw nubʼij: «Xkepe kʼa [...] wayijal» (Marcos 13:8).

Kabʼraqän. «Xtubʼän silonel xa bʼa akuchi chi re ri Ruwachʼulew.» (Mateo 24:7.) Reʼ chuqaʼ najin wakami. Kan man e ajlatäl ta ri winäq e kaminäq pe kuma ri kabʼraqän, kan xe chupam pe ri junaʼ 1914.

Itzel taq winäq. «Ri winaqiʼ xa xe rijeʼ ri xtikipoqonaj qa kiʼ, kan xtibʼe kanima chi rij ri mero [...], man xtikinimaj ta kitzij ri kiteʼ kitataʼ [...], más xtikajoʼ ri kikotem richin re ruwachʼulew ke chuwäch xtikajoʼ ta ri Dios» (2 Timoteo 3:1-5). ¿Atzʼeton rat e kʼïy winäq ja kibʼanobʼal reʼ wakami? Man nkiyaʼ ta ruqʼij ri Tataʼixel, xa kʼayewal nkiyaʼ pa kiwiʼ ri nkajoʼ nketamaj chi rij rijaʼ.

Chʼaʼoj. Chuqaʼ kan «janila chik bʼiyinäq rubʼanik ri etzelal» (Mateo 24:12). Atzʼeton na wi rat ri rukʼisibʼäl taq junaʼ e ikʼowinäq pe, ri chʼaʼoj janila kʼiyirnäq. Kan xa bʼa akuchi ri winäq kixibʼin kiʼ kuma ri eleqʼomaʼ, ruma yeqʼol, chuqaʼ ruma achike chik na jun itzelal nbʼan chi ke.

Ronojel reʼ retal chi ri Rajawaren ri Tataʼixel man näj chik ta kʼo. Ri Ruchʼabʼäl ri Ajaw nubʼij: «Toq xtitzʼët chi e kʼo chik yekʼuluwachitäj, tiwetamaj kʼa chi noqaqa yan ri qʼij richin rajawaren ri Dios» (Lucas 21:31). ¿Achike kʼa ri Rajawaren ri Tataʼixel? Ja riʼ ri ruqʼatbʼäl tzij ri Tataʼixel kʼo chi kaj; chuqaʼ ja riʼ ri xtbʼanon tikʼasäs chi re ri Ruwachʼulew. Ja qʼatbʼäl tzij riʼ xtkʼojeʼ kan pa kikʼexel ri e kʼo wakami chi ruwachʼulew (Daniel 2:44).