PERAJ 9

¿Jampeʼ xtubʼän tikʼasäs ulew ri Ruwachʼulew?

Ronojel ri nbʼanatäj wakami nubʼij chi ri ru-Reino ri Dios xtpe yan (Lucas 21:10, 11; 2 Timoteo 3:1-5).

Ri kʼayewal chupam ri rukʼisibʼäl taq qʼij: ri etzʼanem rikʼin mero, ri oyowal, ri wayijal, ri akʼwalaʼ ri man nkinimaj ta kitzij ri kiteʼ kitataʼ chuqaʼ ri winaqiʼ nkichʼayalaʼ kiʼ pa kachoch

Kʼïy chi ke ri yebʼanatäj wakami, rubʼin pe ri Biblia. Rubʼin pe chi ri winaqiʼ xtbʼe kanima chi kij ri kʼastajinïk chuqaʼ ri mero. Chuqaʼ chi ri akʼwalaʼ man xtkinimaj ta kitzij ri kiteʼ kitataʼ, xa itzel kinaʼoj xtkibʼän.

Rubʼin pe chuqaʼ chi xkebʼanatäj kabʼraqän, oyowal, wayijal chuqaʼ yabʼil. Ronojel reʼ najin wakami.

Jun testigo de Jehová nutzijoj ri utziläj taq rutzijol chi rij ri ru-Reino ri Dios chi re jun achin

Chuqaʼ ri Jesús xubʼij chi ronojel Ruwachʼulew xtitzijöx chi rij ri ru-Reino ri Dios (Mateo 24:14).

Ri ru-Reino ri Dios xtukʼïs ruwäch ri itzelal (2 Pedro 3:13).

Ri Jehová xtukʼïs yan kiwäch ri itzel taq winäq.

Ri Satanás chuqaʼ ri demonios xkexim.

Ri Jesús kʼo pa ruqʼatbʼäl tzij chi kaj chuqaʼ ri winaqiʼ jalajöj kiwäch yekikot chi Ruwachʼulew

Ri xtkibʼän ri nubʼij ri Jehová xtkïl jun kʼakʼaʼ kʼaslem, jun kʼaslem ri akuchi majun chik xibʼirïk ta. Pa rukʼexel ri xibʼirïk, xa xtkikuqubʼaʼ kikʼuʼx chi kij konojel winaqiʼ. Konojel xtkajoʼ kiʼ.