Achike rubʼanik nqïl ri qitzij nimabʼäl kʼuʼx

We nqajoʼ yojok rachibʼil ri Tataʼixel, kʼo chi nqabʼän ri nukʼüt ri nimabʼäl kʼuʼx nqa chuwäch rijaʼ. Ri Jesús xubʼij chi ri «winaqiʼ yeyaʼon ruqʼij [ri Tataʼixel]» nkiyaʼ ruqʼij rikʼin ri «qitzij» (Juan 4:23, 24). Xa xe jun rubʼeyal nyaʼöx ruqʼij ri Tataʼixel (Efesios 4:4-6). Ri qitzij nimabʼäl kʼuʼx yojrukʼwaj chupam ri kʼaslem man kʼisel ta; ri man qitzij ta, xa yojrukʼwaj pa kamïk (Mateo 7:13, 14).

Nqetamaj achike ri qitzij nimabʼäl kʼuʼx toq nqatzʼët kibʼanobʼal ri winäq e kʼo chupam. Ruma ri Jehová ütz runaʼoj, ri kan qitzij yeyaʼon ruqʼij kʼo chi e ütz chuqaʼ. Achiʼel jun jebʼël wiʼ alanxäx e ütz taq ruwäch yeruyaʼ pe, ri qitzij nimabʼäl kʼuʼx e ütz chuqaʼ taq winäq nubʼän chi ke (Mateo 7:15-20).

Ri e rachibʼil ri Jehová janila nkiyaʼ ruqʼij ri Loqʼoläj Wuj. Ketaman chi ri Loqʼoläj Wuj reʼ petenäq rikʼin ri Tataʼixel. Ruma riʼ kiyaʼon qʼij chi ja wuj reʼ nyuqʼun ri kikʼaslem, nsolon ri kikʼayewal, chuqaʼ yerutoʼ richin jebʼël nketamaj ruwäch ri Tataʼixel (2 Timoteo 3:16). Rijeʼ nkibʼän chuqaʼ pa kikʼaslem ri nkitzijoj.

Ri e rachibʼil ri Jehová nkajoʼ kiʼ. Ri Jesús xukʼüt chi yerajoʼ ri winäq toq xutzijoj ri Tataʼixel chi ke, chuqaʼ toq xerukʼachojrisaj ri yawaʼiʼ. Ri e kʼo chupam ri qitzij nimabʼäl kʼuʼx, yekajoʼ chuqaʼ ri chʼaqa chik winäq. Achiʼel ri Jesús, man nkiqasaj ta kiqʼij ri mebʼaʼ, ri jun chik kijatzul, chuqaʼ ri jun chik kitinamit. Ri Jesús xubʼij chi ri winäq xtketamaj achike ri e rutzeqelibʼey ruma ri ajowabʼäl kʼo kikʼin (Juan 13:35).

Ri rachibʼil ri Tataʼixel nkiyaʼ ruqʼij ri rubʼiʼ: Jehová. We kʼo ta jun winäq man nrajoʼ ta nukusaj ri qabʼiʼ, ¿la utziläj qachibʼil xtqabʼij chi re? Manäq na wi. Toq kʼo jun qachibʼil, nqabʼij ri rubʼiʼ chuqaʼ ütz yojchʼon chi rij chi ke ri winäq. Ruma riʼ ri nkajoʼ yeʼok rachibʼil ri Tataʼixel, kʼo chi nkikusaj ri rubʼiʼ, chuqaʼ nkitzijoj rijaʼ chi ke chʼaqa chik winäq. Ja riʼ nrajoʼ ri Jehová nqabʼän (Mateo 6:9).

Achiʼel ri Jesús, ri rachibʼil ri Tataʼixel nkitzijoj chi ke ri winäq Rajawaren ri Tataʼixel. Ri Rajawaren ri Tataʼixel jun qʼatbʼäl tzij chi kaj, ri xtkotzʼijan ronojel ri Ruwachʼulew. Ri rachibʼil ri Tataʼixel nkitzijoj chi ke ri winäq re utziläj taq rutzijoxik re Ajawaren reʼ (Mateo 24:14, CO).

Ri Ruqʼalajrisanelaʼ ri Jehová kixikʼon kiʼ nkibʼän ri nqa chuwäch ri Tataʼixel. Nkiyaʼ ruqʼij ri Loqʼoläj Wuj, chuqaʼ nkajoʼ kiʼ. Nkikusaj, chuqaʼ nkiyaʼ ruqʼij rubʼiʼ ri Tataʼixel. Nkikʼüt kʼa chuqaʼ chi rij Rajawaren ri Tataʼixel chi kiwäch ri winäq. Ri Ruqʼalajrisanelaʼ ri Jehová nkibʼän, wakami, ri nukʼüt ri qitzij nimabʼäl kʼuʼx chi Ruwachʼulew.