Man tqakʼäm ri man qitzij ta nimabʼäl kʼuʼx

Ri Satanás, chuqaʼ ri itzel taq xamanil man nkajoʼ ta nqabʼän rusamaj ri Tataʼixel. Nkikanoj rubʼanik yekijëkʼ kan, janpeʼ na winäq rikʼin ri Tataʼixel. ¿Achike rubʼeyal? Jun rubʼeyal kikusan ja ri man qitzij ta nimabʼäl kʼuʼx (2 Corintios 11:13-15). Jun nimabʼäl kʼuʼx man qitzij ta toq man nukʼüt ta ri qitzij chi rij ri Loqoläj Wuj. Ri man qitzij ta nimabʼäl kʼuʼx achiʼel ruwachibʼäl ri pwäq; kan qitzij ntzuʼun, xa majun rajïl ta. Xa janila kʼayewal nukʼäm pe pa qawiʼ.

Ri nojin taq naʼoj nkikʼüt ri man qitzij ta nimabʼäl taq kʼuʼx, man ütz ta nutzʼët ri Jehová; ri Tataʼixel richin ri qitzij. Toq ri Jesús xkʼojeʼ waweʼ chi Ruwachʼulew, ri ukʼwäy taq bʼey pa taq nimabʼäl kʼuʼx xkajoʼ xkikamisaj. Pa kikʼuʼx wi rijeʼ kan pa rubʼeyal nkiyaʼ ruqʼij ri Tataʼixel. Nkibʼij wi: «Röj xa kan xa xe kʼa jun ri qatataʼ, y riʼ ja ri Dios». ¿La xqa chuwäch ri Jesús riʼ? Manäq. Rijaʼ xubʼij chi ke: «Ri itataʼ rïx xa kan ja ri Itzel Winäq [ri Satanás]» (Juan 8:41, 44). Wakami e kʼïy winäq nkibʼij chi nkiyaʼ ruqʼij ri Tataʼixel; man qitzij ta kʼa, ruma xa rusamaj ri Satanás chuqaʼ ri itzel taq xamanil nkibʼän (1 Corintios 10:20).

Jun qʼaynäq cheʼ man e ütz ta ruwäch yeruyaʼ; ke riʼ ri nimabʼäl kʼuʼx toq man qitzij ta, ri winäq man ütz ta kibʼanobʼal xtkibʼän. Ri Ruwachʼulew nojinäq chi re kʼayewal ruma ri itzel taq kibʼanobʼal ri winäq. E kʼo ri tzʼiläj taq bʼanobʼäl, ri eleqʼ, tijoj taq poqonal, kamïk, chuqaʼ ri tzʼilobʼisanïk ixoqiʼ. E kʼïy chi ke ri yebʼanon reʼ kʼo kinimabʼäl kʼuʼx, ja kʼa ri nimabʼäl kʼuʼx riʼ man nusiloj ta kanima richin nkibʼän utziläj taq bʼanobʼäl. Re winäq reʼ man yetikïr ta yeʼok rachibʼil ri Tataʼixel we man nkijäl ta ri kibʼanobʼal (Mateo 7:17, 18).

Ri man qitzij ta nimabʼäl kʼuʼx nukʼüt chi ütz yachʼon kikʼin tyoxiʼ. Ri Tataʼixel nubʼij chi man ütz ta yojchʼon kikʼin tyoxiʼ. Re naʼoj reʼ kan qitzij wi. ¿La ütz nqanaʼ röj kʼo ta jun winäq majun bʼey ta nchʼon qikʼin, pa rukʼexel riʼ xa chi re qawachibʼäl (qatzʼoqobʼal) nchʼon wi? ¿La ütz ntok qachibʼil ri winäq riʼ? Manäq na wi. Ri Jehová nrajoʼ chi ri winäq yechʼon rikʼin rijaʼ, man kikʼin ta tyoxiʼ, chuqaʼ wachibʼäl (Éxodo 20:4, 5).

Ri man qitzij ta nimabʼäl kʼuʼx nukʼüt chi ütz yakamisan pa nimaʼq taq oyowal. Ri Jesús xubʼij chi ri e rachibʼil ri Tataʼixel xtkajoʼ kiʼ. Man yeqakamisaj ta ri winäq yeqajoʼ (Juan 13:35). Man ütz ta chuqaʼ yeqakamisaj ri itzel taq winäq. Toq ri achiʼaʼ yeqʼelebʼen richin ri Jesús xbʼekichapaʼ o xbʼekitzʼamaʼ, rijaʼ man xuyaʼ ta qʼij chi ke ri rutijoxelaʼ xechʼayon richin xkiköl (Mateo 26:51, 52).

Ri man qitzij ta nimabʼäl kʼuʼx nukʼüt chi ri itzel taq winäq xteʼkitijaʼ poqon pa qʼaqʼ. Ja kʼa ri Loqʼoläj Wuj nukʼüt chi ri mak yojrukʼwaj pa kamïk (Romanos 6:23). Ri Jehová jun ajowabʼäl Tataʼixel. ¿La kʼo jun ajowabʼäl Tataʼixel yerukʼwaj pa tijoj poqonal ri winäq richin jantapeʼ? Manäq na wi. Chuwäch ri Tikasäs Ulew xa xe jun nimabʼäl kʼuʼx xtkʼojeʼ, ja ri nimabʼäl kʼuʼx nqa chuwäch ri Jehová (Apocalipsis 15:4). Konojel ri chʼaqa chik nimabʼäl taq kʼuʼx, ri kikʼamon kinaʼoj chi kij ruqʼoloj ri Satanás, xtchup kiwäch.